ನವದೆಹಲಿ: ದೇಶದ ಅತಿದೊಡ್ಡ ಸರ್ಕಾರಿ ಬ್ಯಾಂಕ್ಗಳಲ್ಲಿ ಒಂದಾದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ತನ್ನ ಗ್ರಾಹಕರಿಗೆ ಮಹತ್ವದ ಎಚ್ಚರಿಕೆ ನೀಡಿದೆ. ತಾಂತ್ರಿಕ ವ್ಯವಸ್ಥೆಗಳ ನಿರ್ವಹಣಾ ಕಾರ್ಯದ ಹಿನ್ನೆಲೆಯಲ್ಲಿ 2026ರ ಸೆಪ್ಟೆಂಬರ್ 4ರಂದು ಶುಕ್ರವಾರ ಕೆಲಕಾಲ UPI ಸೇವೆಗಳು ಲಭ್ಯವಿರುವುದಿಲ್ಲ ಎಂದು ಬ್ಯಾಂಕ್ ತಿಳಿಸಿದೆ.
ಈ ಅವಧಿಯಲ್ಲಿ YONO, Google Pay, PhonePe, Paytm ಸೇರಿದಂತೆ ವಿವಿಧ UPI ಆ್ಯಪ್ಗಳ ಮೂಲಕ SBI ಖಾತೆಯಿಂದ ಮಾಡುವ ಡಿಜಿಟಲ್ ಪಾವತಿಗಳಿಗೆ ತಾತ್ಕಾಲಿಕ ಅಡಚಣೆ ಉಂಟಾಗಲಿದೆ.
ಯಾವ ಸಮಯದಲ್ಲಿ UPI ಸೇವೆ ಸ್ಥಗಿತ?
SBI ಪ್ರಕಾರ, ಸೆಪ್ಟೆಂಬರ್ 4ರಂದು ರಾತ್ರಿ 12.15ರಿಂದ 1 ಗಂಟೆಯವರೆಗೆ ಒಟ್ಟು 45 ನಿಮಿಷಗಳ ಕಾಲ UPI ಸೇವೆಗಳು ಸ್ಥಗಿತಗೊಳ್ಳಲಿವೆ.ಅಂದರೆ, SBI ಖಾತೆಗೆ ಲಿಂಕ್ ಮಾಡಿರುವ UPI ಆ್ಯಪ್ಗಳ ಮೂಲಕ ಈ ಅವಧಿಯಲ್ಲಿ ಪಾವತಿ ಮಾಡಲು ಸಾಧ್ಯವಾಗುವುದಿಲ್ಲ. ನಿಗದಿತ ನಿರ್ವಹಣಾ ಕಾರ್ಯದ ಕಾರಣ ಈ ಅಡಚಣೆ ಉಂಟಾಗಲಿದೆ ಎಂದು SBI ತಿಳಿಸಿದೆ.
ಈ ಸಮಯದಲ್ಲಿ UPI ಮೂಲಕ ಹಣ ಪಾವತಿಸಲು ಅಗತ್ಯವಿರುವ ಗ್ರಾಹಕರು ಪರ್ಯಾಯ ಪಾವತಿ ವ್ಯವಸ್ಥೆಯನ್ನು ಸಿದ್ಧವಾಗಿಟ್ಟುಕೊಳ್ಳುವುದು ಉತ್ತಮ.ಆದರೆ ನಿರ್ವಹಣಾ ಕಾರ್ಯವು ನಿಗದಿತ ಸಮಯಕ್ಕಿಂತ ಮೊದಲೇ ಪೂರ್ಣಗೊಳ್ಳುವ ಸಾಧ್ಯತೆಯೂ ಇದೆ ಎಂದು SBI ತಿಳಿಸಿದೆ.
UPI Lite ಬಳಕೆ ಮಾಡಬಹುದು
UPI ಸೇವೆಗಳಲ್ಲಿ ತಾತ್ಕಾಲಿಕ ವ್ಯತ್ಯಯ ಉಂಟಾದರೂ UPI Lite ಸೇವೆ ಮುಂದುವರಿಯಲಿದೆ ಎಂದು SBI ತಿಳಿಸಿದೆ. ಈ ಕುರಿತು ಬ್ಯಾಂಕ್ ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಮಾಹಿತಿ ಹಂಚಿಕೊಂಡಿದೆ.
ನಿಗದಿತ ನಿರ್ವಹಣಾ ಪ್ರಕ್ರಿಯೆಯ ಭಾಗವಾಗಿ ಸೆಪ್ಟೆಂಬರ್ 4ರಂದು 00.15ರಿಂದ 01.00 ಗಂಟೆಯವರೆಗೆ SBI UPI ಸೇವೆಗಳಲ್ಲಿ ವ್ಯತ್ಯಯ ಉಂಟಾಗಲಿದೆ. ಆದರೆ ಕಾರ್ಯವು ನಿಗದಿತ ಸಮಯಕ್ಕಿಂತ ಮೊದಲೇ ಪೂರ್ಣಗೊಳ್ಳುವ ಸಾಧ್ಯತೆಯಿದೆ. ಗ್ರಾಹಕರು UPI Lite ಸೇವೆಯನ್ನು ಬಳಸುವುದನ್ನು ಮುಂದುವರಿಸಬಹುದು ಎಂದು SBI ತಿಳಿಸಿದೆ.
UPI Lite ಮಿತಿಗಳು ಎಷ್ಟು?
UPI ಸೇವೆ ಸ್ಥಗಿತಗೊಂಡಿದ್ದರೂ UPI Lite ಮೂಲಕ ಪಾವತಿ ಮಾಡಲು ಅವಕಾಶವಿದೆ. UPI PIN ಅಗತ್ಯವಿಲ್ಲದೆ ಗರಿಷ್ಠ ₹1,000ವರೆಗೆ ಪಾವತಿ ಮಾಡಬಹುದು.UPI Lite ಖಾತೆಯಲ್ಲಿ ಗರಿಷ್ಠ ₹5,000 ಬ್ಯಾಲೆನ್ಸ್ ಇರಿಸಿಕೊಳ್ಳಲು ಅವಕಾಶವಿದೆ.
UPI ವಹಿವಾಟಿನ ಮಿತಿಗಳ ಪ್ರಕಾರ, ವ್ಯಕ್ತಿಯಿಂದ ವ್ಯಕ್ತಿಗೆ ದಿನಕ್ಕೆ ಗರಿಷ್ಠ 20 ವಹಿವಾಟುಗಳನ್ನು ನಡೆಸಬಹುದು. ವ್ಯಕ್ತಿಯಿಂದ ವ್ಯಾಪಾರಿಗೆ (Merchant) ಮಾಡುವ ವಹಿವಾಟಿನ ಮಿತಿ ವಹಿವಾಟಿನ ಮೌಲ್ಯವನ್ನು ಆಧರಿಸಿರುತ್ತದೆ.
ಸಾಮಾನ್ಯ UPI ವಹಿವಾಟಿನಲ್ಲಿ ದಿನಕ್ಕೆ ₹1 ಲಕ್ಷದವರೆಗೆ ಹಣ ವರ್ಗಾವಣೆ ಮಾಡಬಹುದು. ಇನ್ನು ವಿಮೆ ಮತ್ತು ಕ್ಯಾಪಿಟಲ್ ಮಾರ್ಕೆಟ್ ಸಂಬಂಧಿತ ಪಾವತಿಗಳಿಗೆ ₹2 ಲಕ್ಷದವರೆಗೆ, ತೆರಿಗೆ ಪಾವತಿ, ಆಸ್ಪತ್ರೆ ಹಾಗೂ ಶಿಕ್ಷಣ ಸಂಸ್ಥೆಗಳಿಗೆ ಮಾಡುವ ಪಾವತಿಗಳಿಗೆ ₹5 ಲಕ್ಷದವರೆಗೆ ಮಿತಿ ಇದೆ.
