ಕ್ರಿಕೆಟ್ ಎಂಬುದು ಕೇವಲ ಆಟವಲ್ಲ, ಅದರಾಚೆಗಿನ ಭಾವನೆ ಎಂಬುದನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ವೇಗಿ ಮುಖೇಶ್ ಚೌಧರಿ ಸಾಬೀತುಪಡಿಸಿದ್ದಾರೆ. ಸುದೀರ್ಘ ಕಾಯಿಲೆಯಿಂದ ಬಳಲುತ್ತಿದ್ದ ತಮ್ಮ ತಾಯಿಯನ್ನು ಕಳೆದುಕೊಂಡ ನೋವಿನಲ್ಲಿದ್ದ ಮುಖೇಶ್, ಅಂತ್ಯಕ್ರಿಯೆ ಮುಗಿದ ಕೆಲವೇ ದಿನಗಳಲ್ಲಿ ತಂಡವನ್ನು ಸೇರಿಕೊಂಡು ವೃತ್ತಿಪರತೆ ಮೆರೆದಿದ್ದಾರೆ.
ನೋವಿನಲ್ಲೂ ಮೈದಾನಕ್ಕಿಳಿದ ವೀರ ಕಳೆದ ಶನಿವಾರ ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದ ನಂತರ ಮುಖೇಶ್ ಅವರು ರಾಜಸ್ಥಾನದ ಭಿಲ್ವಾರಾದಲ್ಲಿರುವ ತಮ್ಮ ಸ್ವಗ್ರಾಮಕ್ಕೆ ತೆರಳಿದ್ದರು. ತಾಯಿಯ ಅಂತಿಮ ಸಂಸ್ಕಾರ ಮುಗಿಸಿ, ಗುರುವಾರ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಮುಂಬೈ ಇಂಡಿಯನ್ಸ್ ವಿರುದ್ಧದ ಮಹತ್ವದ ಪಂದ್ಯದ ವೇಳೆ ತಂಡವನ್ನು ಕೂಡಿಕೊಂಡರು. ಈ ಪಂದ್ಯದಲ್ಲಿ ಮುಖೇಶ್ ಅವರ ತಾಯಿಯ ಅಗಲಿಕೆಗೆ ಸಂತಾಪ ಸೂಚಿಸಲು ಸಿಎಸ್ ಕೆ ಆಟಗಾರರು ಕಪ್ಪು ಪಟ್ಟಿ ಧರಿಸಿ ಕಣಕ್ಕಿಳಿದಿದ್ದರು.
ತಾಯಿಗೆ ಅರ್ಪಿಸಿದ ವಿಕೆಟ್ 208 ರನ್‌ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಿದ್ದ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಮುಖೇಶ್ ಆರಂಭದಲ್ಲೇ ಆಘಾತ ನೀಡಿದರು. ತಮ್ಮ ಮೊದಲ ಓವರ್‌ನಲ್ಲೇ ಅಪಾಯಕಾರಿ ಬ್ಯಾಟರ್ ಕ್ವಿಂಟನ್ ಡಿ ಕಾಕ್ ಅವರ ವಿಕೆಟ್ ಉರುಳಿಸಿದರು. ವಿಕೆಟ್ ಪಡೆದ ತಕ್ಷಣ ಮುಖೇಶ್ ಅವರು ಆಕಾಶದತ್ತ ಕೈ ತೋರಿಸಿ ತಮ್ಮ ತಾಯಿಯನ್ನು ನೆನೆದರು. ಈ ಭಾವುಕ ಕ್ಷಣವನ್ನು ಕಂಡ ಕ್ರೀಡಾಂಗಣದಲ್ಲಿದ್ದ ಅಭಿಮಾನಿಗಳು ಮತ್ತು ಸಾಮಾಜಿಕ ಜಾಲತಾಣದ ಮಂದಿ ಮುಖೇಶ್ ಅವರ ಬದ್ಧತೆಗೆ ಎದ್ದು ನಿಂತು ಸಲಾಂ ಹೊಡೆದಿದ್ದಾರೆ.
ತೀವ್ರ ವೈಯಕ್ತಿಕ ದುಃಖದ ನಡುವೆಯೂ ತಂಡಕ್ಕಾಗಿ ಆಡಲು ಬಂದ ಮುಖೇಶ್ ಚೌಧರಿ ಅವರ ಈ ನಡೆ ಈಗ ಕ್ರೀಡಾ ಲೋಕದಲ್ಲಿ ಚರ್ಚೆಯಾಗುತ್ತಿದ್ದು, ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
