ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಸ್ವಂತ ಮನೆ ನಿರ್ಮಿಸುವ ಮಧ್ಯಮ ವರ್ಗದ ಜನರ ಕನಸಿಗೆ ಬಿಡಿಎ (BDA) ಭಾರಿ ಹೊಡೆತ ನೀಡಿದೆ. ತನ್ನ ಬಹುನಿರೀಕ್ಷಿತ ಡಾ. ಕೆ. ಶಿವರಾಮ ಕಾರಂತ ಬಡಾವಣೆಯ ನಿವೇಶನಗಳ ಬೆಲೆಯನ್ನು ಬಿಡಿಎ ಗಣನೀಯವಾಗಿ ಏರಿಕೆ ಮಾಡಿದ್ದು, ಪರಿಷ್ಕೃತ ದರದಂತೆ ಪ್ರತಿ ಚದರ ಅಡಿಗೆ ಬರೋಬ್ಬರಿ ₹6,000 ನಿಗದಿಪಡಿಸಿದೆ. ಇದೇ ವೇಳೆ, ಒಟ್ಟು ನಿವೇಶನಗಳ ಹಂಚಿಕೆಯನ್ನು ಎರಡು ಹಂತಗಳಲ್ಲಿ ನಡೆಸಲು ಪ್ರಾಧಿಕಾರ ತೀರ್ಮಾನಿಸಿದೆ.
30×40 ನಿವೇಶನದ ದರ ಈಗ ₹72 ಲಕ್ಷ
ಬಿಡಿಎ ಹೊಸ ದರ ಜಾರಿಗೊಳಿಸಿದ ನಂತರ, ಸಾರ್ವಜನಿಕರಲ್ಲಿ ಅತ್ಯಂತ ಹೆಚ್ಚಿನ ಬೇಡಿಕೆ ಇರುವ 30×40 ಅಡಿ (1,200 ಚದರ ಅಡಿ) ಅಳತೆಯ ನಿವೇಶನದ ಬೆಲೆ ಸುಮಾರು ₹72 ಲಕ್ಷ ತಲುಪಲಿದೆ.
ಕಳೆದ 2023ರ ಅಂತ್ಯದಲ್ಲಿ ಬಿಡಿಎ ಪ್ರತಿ ಚದರ ಅಡಿಗೆ ₹4,900 ದರ ನಿಗದಿಪಡಿಸಿತ್ತು. ಆಗ 30×40 ನಿವೇಶನದ ಬೆಲೆ ಸುಮಾರು ₹59 ಲಕ್ಷ ಇತ್ತು. ಅಂದರೆ, ಇದೀಗ ಒಂದೇ ಬಾರಿಗೆ ಪ್ರತಿ ಚದರ ಅಡಿಗೆ ಬರೋಬ್ಬರಿ ₹1,100 ಹೆಚ್ಚಳವಾದಂತಾಗಿದೆ.
ಸುತ್ತಮುತ್ತಲಿನ ಖಾಸಗಿ ಲೇಔಟ್‌ಗಳ ಪ್ರಸ್ತುತ ಮಾರುಕಟ್ಟೆ ದರಕ್ಕೆ ಹೋಲಿಸಿದರೆ ಬಿಡಿಎ ನಿಗದಿಪಡಿಸಿರುವ ದರ ಕಡಿಮೆಯಿರುವುದು ನಿಜವಾದರೂ, ಬಡಾವಣೆ ಆರಂಭಿಸಿದ ಮೂಲ ಉದ್ದೇಶವಾದ “ಮಧ್ಯಮ ವರ್ಗದ ಜನರಿಗೆ ಕೈಗೆಟುಕುವ ದರದಲ್ಲಿ ಮನೆ” ಎನ್ನುವ ಆಶಯಕ್ಕೆ ಇದು ಹಿನ್ನಡೆಯುಂಟುಮಾಡಲಿದೆ ಎಂದು ಅರ್ಜಿದಾರರು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ. ಈ ಬಡಾವಣೆಯಲ್ಲಿ 20×30, 40×60 ಹಾಗೂ 50×80 ಅಳತೆಯ ಸೈಟ್‌ಗಳಿಗಿಂತ 30×40 ಅಳತೆಯ ನಿವೇಶನಗಳೇ ಹೆಚ್ಚಾಗಿವೆ.
ಎರಡು ಹಂತಗಳಲ್ಲಿ ನಿವೇಶನ ಹಂಚಿಕೆ: ವಾರದಲ್ಲೇ ಅಧಿಸೂಚನೆ
ಬಡಾವಣೆಯ ಕೆಲವು ನಿವೇಶನಗಳು ಇನ್ನೂ ನ್ಯಾಯಾಲಯದ ವ್ಯಾಜ್ಯದಲ್ಲಿ ಇರುವುದರಿಂದ ಬಿಡಿಎ ಹಂಚಿಕೆ ಪ್ರಕ್ರಿಯೆಯನ್ನು ಎರಡು ಹಂತಗಳಲ್ಲಿ ಮಾಡಲು ಮುಂದಾಗಿದೆ.
ಮೊದಲ ಹಂತ: ಸಾರ್ವಜನಿಕರಿಗೆ ಲಭ್ಯವಾಗಲಿರುವ ಒಟ್ಟು 6,000 ನಿವೇಶನಗಳ ಪೈಕಿ, ಮೊದಲ ಹಂತವಾಗಿ 3,000 ನಿವೇಶನಗಳಿಗೆ ಅರ್ಜಿ ಆಹ್ವಾನಿಸಲು ಇನ್ನು ಕೇವಲ ಒಂದು ವಾರದೊಳಗೆ ಅಧಿಕೃತ ಅಧಿಸೂಚನೆ ಹೊರಡಿಸಲು ಬಿಡಿಎ ಸಿದ್ಧತೆ ನಡೆಸಿದೆ.
ರೈತರಿಗೆ ನಿವೇಶನ ಹಂಚಿಕೆ: ಬಡಾವಣೆಗೆ ಭೂಮಿ ನೀಡಿದ ರೈತರಿಗೆ ರ್ಯಾಂಡಮೈಸೇಷನ್ ತಂತ್ರಜ್ಞಾನದ ಮೂಲಕ ಸುಮಾರು 18,000 ನಿವೇಶನಗಳನ್ನು ಹಂಚಿಕೆ ಮಾಡಲಾಗುತ್ತದೆ. ಬಿಡಿಎ ಬಳಿ ಈ ತಂತ್ರಜ್ಞಾನ ಈಗಾಗಲೇ ಸಿದ್ಧವಾಗಿದೆ.
17 ಹಳ್ಳಿಗಳ ವ್ಯಾಪ್ತಿಯಲ್ಲಿ ನಿರ್ಮಾಣವಾಗುತ್ತಿದೆ ಅತಿದೊಡ್ಡ ಬಡಾವಣೆ
ಸರ್ ಎಂ. ವಿಶ್ವೇಶ್ವರಯ್ಯ ಬಡಾವಣೆಯ ನಂತರ ಉತ್ತರ ಬೆಂಗಳೂರಿನಲ್ಲಿ ನಿರ್ಮಾಣವಾಗುತ್ತಿರುವ ಕಾರಂತ ಬಡಾವಣೆಯು ಬಿಡಿಎ ಕೈಗೆತ್ತಿಕೊಂಡಿರುವ ಅತಿ ದೊಡ್ಡ ವಸತಿ ಯೋಜನೆಯಾಗಿದೆ. ಒಟ್ಟು 3,069 ಎಕರೆ ಸುಬಂಧಿತ ಪ್ರದೇಶದಲ್ಲಿ ಹರಡಿಕೊಂಡಿರುವ ಈ ಬಡಾವಣೆಯು ಹಾರೋಹಳ್ಳಿ, ಅವರಹಳ್ಳಿ, ರಾಮಗೊಂಡನಹಳ್ಳಿ, ಜಾರಕಬಂಡೆ ಕಾವಲ್ ಸೇರಿದಂತೆ ಒಟ್ಟು 17 ಹಳ್ಳಿಗಳ ವ್ಯಾಪ್ತಿಯನ್ನು ಒಳಗೊಂಡಿದೆ.
ದಶಕಗಳ ಕಾಲ ಕಾನೂನು ಸಂಕಷ್ಟದಲ್ಲಿದ್ದ ಈ ಯೋಜನೆಗೆ ಸುಪ್ರೀಂ ಕೋರ್ಟ್ ಹಸಿರು ನಿಶಾನೆ ತೋರಿದ ನಂತರ ಕಾಮಗಾರಿ ಚುರುಕುಗೊಂಡಿದ್ದು, ಯೋಜನೆಯಲ್ಲಿ ಒಟ್ಟು 34,000 ನಿವೇಶನಗಳನ್ನು ನಿರ್ಮಿಸುವ ಬೃಹತ್ ಗುರಿ ಹೊಂದಲಾಗಿದೆ.
ನಿವೇಶನಗಳ ಅಳತೆ ಮತ್ತು ಲಭ್ಯವಿರುವ ಸಂಖ್ಯೆಯ ವಿವರ:
20 x 30 ಅಡಿ: 3,257 ನಿವೇಶನಗಳು
30 x 40 ಅಡಿ: 13,024 ನಿವೇಶನಗಳು
30 x 50 ಅಡಿ: 2,718 ನಿವೇಶನಗಳು
40 x 60 ಅಡಿ: 3,616 ನಿವೇಶನಗಳು
50 x 60 ಅಡಿ: 422 ನಿವೇಶನಗಳು
60 x 50 ಅಡಿ: 31 ನಿವೇಶನಗಳು
ಬೆಸ ನಿವೇಶನ (Odd Sites): 6,723 ನಿವೇಶನಗಳು
ಮೂಲೆ ನಿವೇಶನ (Corner Sites): 5,201 ನಿವೇಶನಗಳು
