ಬಕ್ರೀದ್ ಹಬ್ಬದಂದು ಯಾವ ಪ್ರಾಣಿಗಳನ್ನು ಬಲಿ ನೀಡಬೇಕು? ಯಾವುದನ್ನು ನೀಡಬಾರದು? ಇಸ್ಲಾಂನಲ್ಲಿರುವ ನಿಖರ ನಿಯಮಗಳು ಇಲ್ಲಿವೆ ನೋಡಿ

ನವದೆಹಲಿ: ದೇಶಾದ್ಯಂತ ಈಗ ಇಸ್ಲಾಂ ಧರ್ಮದ ಪವಿತ್ರ ಹಬ್ಬಗಳಲ್ಲೊಂದಾದ ಬಕ್ರೀದ್ (Eid al-Adha) ಆಚರಣೆಗೆ ಭರದಿಂದ ಸಿದ್ಧತೆಗಳು ಸಾಗುತ್ತಿವೆ. ಮಾರುಕಟ್ಟೆಗಳು ಗ್ರಾಹಕರು ಹಾಗೂ ವ್ಯಾಪಾರಿಗಳಿಂದ ಗಿಜಿಗುಡುತ್ತಿದ್ದು, ಹಬ್ಬದ ಬಲಿದಾನಕ್ಕಾಗಿ ಈಗಾಗಲೇ ಪ್ರಾಣಿಗಳ ಖರೀದಿಯೂ ಜೋರಾಗಿ ನಡೆದಿದೆ. ಮುಸ್ಲಿಂ ಸಮುದಾಯಕ್ಕೆ ಈದ್-ಉಲ್-ಅಝಾ (ಬಕ್ರೀದ್) ಕೇವಲ ಧಾರ್ಮಿಕ ಹಬ್ಬ ಮಾತ್ರವಲ್ಲ, ಇದರ ಹಿಂದೆ ನಂಬಿಕೆ, ತ್ಯಾಗ ಮತ್ತು ಮಾನವೀಯತೆಯ ದೊಡ್ಡ ಸಂದೇಶವೇ ಅಡಗಿದೆ.

ಆದರೆ, ಬಕ್ರೀದ್ ಆಚರಣೆಯ ಈ ಸಂದರ್ಭದಲ್ಲಿ ಅನೇಕರ ಮನಸ್ಸಿನಲ್ಲಿ ‘ಯಾವ ಪ್ರಾಣಿಗಳನ್ನು ಬಲಿ ನೀಡಬಹುದು? ಶರಿಯಾ ಕಾನೂನಿನ ಪ್ರಕಾರ ಯಾವುದನ್ನು ಬಲಿ ನೀಡಬಾರದು? ವಯಸ್ಸಿನ ಮಿತಿ ಏನಿರಬೇಕು?’ ಎಂಬ ಹಲವು ಪ್ರಶ್ನೆಗಳು ಮೂಡುವುದು ಸಹಜ. ಆ ಎಲ್ಲಾ ಗೊಂದಲಗಳಿಗೆ ಇಸ್ಲಾಮಿಕ್ ನಿಯಮಗಳ ಪ್ರಕಾರ ಇಲ್ಲಿದೆ ಕಂಪ್ಲೀಟ್ ಮಾಹಿತಿ:

ಬಕ್ರೀದ್ ಹಬ್ಬದ ಇತಿಹಾಸ ಮತ್ತು ಮಹತ್ವವೇನು?

ಇಸ್ಲಾಮಿಕ್ ನಂಬಿಕೆಯ ಪ್ರಕಾರ, ಹಜರತ್ ಇಬ್ರಾಹಿಂ ಅವರು ಅಲ್ಲಾಹನ ಮೇಲಿನ ತಮ್ಮ ಅಪಾರ ಭಕ್ತಿಯನ್ನು ಸಾಬೀತುಪಡಿಸಲು ತಮಗೆ ಅತ್ಯಂತ ಪ್ರೀತಿಪಾತ್ರವಾದ ಮಗ ಇಸ್ಮಾಯಿಲ್‌ನನ್ನೇ ಬಲಿ ಕೊಡಲು ಮುಂದಾಗುತ್ತಾರೆ. ಕಣ್ಣಿಗೆ ಬಟ್ಟೆ ಕಟ್ಟಿಕೊಂಡು ಮಗನ ಕುತ್ತಿಗೆಗೆ ಕತ್ತಿ ಇಟ್ಟಾಗ, ಅಲ್ಲಾಹನ ಮಹಿಮೆಯಿಂದ ಮಗನ ಜಾಗದಲ್ಲಿ ಒಂದು ಮೇಕೆ (ಆಡು) ಬಲಿಯಾಗಿ, ಮಗ ಸುರಕ್ಷಿತವಾಗಿ ನಿಂತಿರುತ್ತಾನೆ. ಅಂದಿನಿಂದ ಆಡು, ಕುರಿಗಳನ್ನು ಬಲಿ ನೀಡುವ ಈ ಪದ್ಧತಿ ಆರಂಭವಾಯಿತು.ಈ ಹಬ್ಬದ ನಿಜವಾದ ಅರ್ಥ ಕೇವಲ ಪ್ರಾಣಿ ಬಲಿ ಕೊಡುವುದಲ್ಲ; ಮನುಷ್ಯ ತನ್ನ ಹೃದಯದಲ್ಲಿರುವ ಅಹಂಕಾರ, ದುರಾಸೆ ಮತ್ತು ಕೆಟ್ಟ ಆಲೋಚನೆಗಳನ್ನು ತ್ಯಜಿಸುವುದಾಗಿದೆ.

ಈ ಪ್ರಾಣಿಗಳನ್ನು ಬಲಿ ನೀಡುವಂತಿಲ್ಲ (Restricted Animals)

ಇಸ್ಲಾಮಿಕ್ ಶರಿಯಾ ನಿಯಮಗಳ ಪ್ರಕಾರ, ಬಲಿ ನೀಡುವ ಪ್ರಾಣಿ ಸಂಪೂರ್ಣವಾಗಿ ಸದೃಢ ಮತ್ತು ಆರೋಗ್ಯಕರವಾಗಿರಬೇಕು. ಈ ಕೆಳಗಿನ ಲೋಪಗಳಿರುವ ಪ್ರಾಣಿಗಳನ್ನು ಬಲಿ ನೀಡಲು ಅವಕಾಶವಿಲ್ಲ:

ಅನಾರೋಗ್ಯ ಮತ್ತು ಗಾಯ: ಗಂಭೀರ ಕಾಯಿಲೆ ಇರುವ ಅಥವಾ ಗಾಯಗೊಂಡ ಪ್ರಾಣಿಗಳನ್ನು ಬಲಿ ನೀಡುವಂತಿಲ್ಲ.

ದೈಹಿಕ ನ್ಯೂನತೆ: ಕಣ್ಣು ಕಾಣಿಸದ (ಕುರುಡು), ಕಾಲು ನಡಿಗೆ ಇಲ್ಲದ (ಕುಂಟ) ಅಥವಾ ವಿಪರೀತ ದುರ್ಬಲವಾಗಿರುವ ಪ್ರಾಣಿಗಳನ್ನು ಬಳಸುವಂತಿಲ್ಲ.

ಚಿಕ್ಕ ಪ್ರಾಣಿಗಳು: ನಿಗದಿತ ವಯಸ್ಸಿಗಿಂತ ಚಿಕ್ಕದಾಗಿರುವ ಪ್ರಾಣಿಗಳ ಬಲಿದಾನವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.

ಬಲಿ ಕೊಡುವ ಪ್ರಾಣಿಗಳ ನಿಖರ ವಯಸ್ಸು ಎಷ್ಟಿರಬೇಕು?

ಇಸ್ಲಾಂ ಧರ್ಮದಲ್ಲಿ ಬಲಿದಾನದ ಪ್ರಾಣಿಗಳ ವಯಸ್ಸಿನ ಬಗ್ಗೆ ಕಟ್ಟುನಿಟ್ಟಾದ ಮತ್ತು ಸ್ಪಷ್ಟವಾದ ನಿಯಮಗಳಿವೆ:

ಪ್ರಾಣಿಯ ಹೆಸರುಕನಿಷ್ಠ ಇರಬೇಕಾದ ವಯಸ್ಸು

ಮೇಕೆ / ಆಡುಕನಿಷ್ಠ 1 ವರ್ಷ ವಯಸ್ಸಾಗಿರಬೇಕು

ಕುರಿ / ಟಗರುಕನಿಷ್ಠ 6 ತಿಂಗಳು ವಯಸ್ಸಾಗಿರಬೇಕು

ಎಮ್ಮೆ / ಹೋರಿ / ಎತ್ತುಕನಿಷ್ಠ 2 ವರ್ಷ ವಯಸ್ಸಾಗಿರಬೇಕು

ಒಂಟೆಕನಿಷ್ಠ 5 ವರ್ಷ ವಯಸ್ಸಾಗಿರಬೇಕು

ಶರಿಯಾ ಪ್ರಕಾರ ಇವುಗಳನ್ನು ಬಲಿ ನೀಡಲು ಅವಕಾಶವಿದ್ದರೂ, ಧಾರ್ಮಿಕ ನಿಯಮಗಳ ಜೊತೆಗೆ ಆಯಾ ರಾಜ್ಯಗಳ ಸ್ಥಳೀಯ ಆಡಳಿತ ಮತ್ತು ಸರ್ಕಾರದ ಕಾನೂನುಗಳನ್ನು ಪಾಲಿಸುವುದು ಕಡ್ಡಾಯವಾಗಿದೆ