ಬೆಂಗಳೂರು: ಕೋಲಾ ಅಂದ್ರೆ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ? ಸಾಫ್ಟ್ ಡ್ರಿಂಕ್ ಪ್ರಿಯರಿಗೆ ಕೋಲಾ ಎಂದರೆ ಅದೊಂದು ವಿಶಿಷ್ಟ ಪ್ರೀತಿ. ಆದರೆ, ಅದರಲ್ಲಿರುವ ಅತಿಯಾದ ಸಕ್ಕರೆ ಹಾಗೂ ಕೆಫೀನ್ ಅಂಶದಿಂದಾಗಿ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವವರು ಮತ್ತು ಫಿಟ್ನೆಸ್ ಪ್ರಿಯರು ಕೋಲಾದಿಂದ ದೂರವೇ ಉಳಿಯುತ್ತಿದ್ದರು.
ಆದರೆ, ಇನ್ಮುಂದೆ ಆ ಚಿಂತೆ ಬೇಡ ಭಾರತದ ಪ್ರಸಿದ್ಧ ಎಫ್ಎಂಸಿಜಿ ದೈತ್ಯ ಕಂಪನಿ ಐಟಿಸಿ ಫುಡ್ಸ್ ತನ್ನ ಜನಪ್ರಿಯ ಬಿ ನ್ಯಾಚುರಲ್ ಬ್ರ್ಯಾಂಡ್ನ ಅಡಿಯಲ್ಲಿ ಇದೇ ಮೊದಲ ಬಾರಿಗೆ ಕೋಕನಟ್ ಕೋಲಾ ಎನ್ನುವ ಕ್ರಾಂತಿಕಾರಿ ಹಾಗೂ ಆರೋಗ್ಯಕರ ಪಾನೀಯವನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ.
ಎಳೆನೀರಿನ ಪ್ರಕೃತಿ ಸೌಂದರ್ಯ ಹಾಗೂ ಕೋಲಾದ ರೋಮಾಂಚಕ ರುಚಿಯನ್ನು ಸಮ್ಮಿಳನಗೊಳಿಸಿ ಸಿದ್ಧಪಡಿಸಲಾದ ಈ ಪಾನೀಯವು, ಆರೋಗ್ಯ ಮತ್ತು ರುಚಿ ಎರಡನ್ನೂ ಬಯಸುವ ಯುವಜನತೆಗೆ ಹೇಳಿಮಾಡಿಸಿದಂತಿದೆ.
ಏನಿದು ಕೋಕನಟ್ ಕೋಲಾ?
ಕೋಕನಟ್ ಕೋಲಾ ಇಂಥದ್ದೊಂದು ಪಾನೀಯ ಸಾಧ್ಯವೇ? ಎಂದು ನೀವು ಅಚ್ಚರಿಪಡಬಹುದು. ಆದರೆ ಐಟಿಸಿ ಇದನ್ನು ಸಾಧ್ಯವಾಗಿಸಿದೆ. ಇದು ಎಳನೀರಿನ ನೈಸರ್ಗಿಕ ಗುಣಗಳೊಂದಿಗೆ ಕೋಲಾದ ರುಚಿ ಮತ್ತು ಫಿಝ್ ಅನ್ನು ಬೆರೆಸಿ ತಯಾರಿಸಲಾದ ವಿನೂತನ ಹೈಬ್ರಿಡ್ ಪಾನೀಯವಾಗಿದೆ.
‘ರಿಫ್ರೆಶಿಂಗ್ಲಿ ಸಿಂಪಲ್’ ಎಂಬ ಟ್ಯಾಗ್ಲೈನ್ನೊಂದಿಗೆ ಮಾರುಕಟ್ಟೆಗೆ ಲಗ್ಗೆಯಿಟ್ಟಿರುವ ಈ ಕೋಕನಟ್ ಕೋಲಾ, ಸಂಪೂರ್ಣವಾಗಿ ಕೆಫೀನ್ ಮುಕ್ತ ಮತ್ತು ಸಕ್ಕರೆ ಮುಕ್ತ ಪಾನೀಯವಾಗಿದೆ. ಜೊತೆಗೆ, ಒಂದು ಕ್ಯಾನ್ನಲ್ಲಿ ಕೇವಲ 9 ಕ್ಯಾಲೋರಿ ಇರುವುದು ಇದರ ಅತಿ ದೊಡ್ಡ ವಿಶೇಷ. ಅಂದರೆ, ನೀವು ಕೋಲಾದ ರುಚಿಯನ್ನು ಎಂಜಾಯ್ ಮಾಡುವುದರ ಜೊತೆಗೆ ಆರೋಗ್ಯವನ್ನೂ ಕಾಪಾಡಿಕೊಳ್ಳಬಹುದು.
ಗ್ರಾಹಕರ ಅಗತ್ಯಕ್ಕೆ ತಕ್ಕ ಉತ್ಪನ್ನ
ಇತ್ತೀಚಿನ ದಿನಗಳಲ್ಲಿ ಜನರು ತಂಪು ಪಾನೀಯಗಳನ್ನು ಕುಡಿಯಲು ಇಷ್ಟಪಡುತ್ತಾರಾದರೂ, ಆರೋಗ್ಯದ ಬಗ್ಗೆಯೂ ಅಷ್ಟೇ ಕಾಳಜಿ ವಹಿಸುತ್ತಿದ್ದಾರೆ. ಲೈಟ್ ಆಗಿರುವ ಮತ್ತು ತಮ್ಮ ದೈನಂದಿನ ಲೈಫ್ಸ್ಟೈಲ್ಗೆ ಒಗ್ಗುವಂತಹ ಪಾನೀಯಗಳನ್ನು ಹುಡುಕುತ್ತಿದ್ದಾರೆ. ಗ್ರಾಹಕರ ಈ ಬದಲಾಗುತ್ತಿರುವ ಬೇಡಿಕೆಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡಿರುವ ಐಟಿಸಿ, ‘ಕೋಕನಟ್ ಕೋಲಾ’ ಮೂಲಕ ಭಾರತೀಯ ಬೇವರೇಜ್ ಮಾರುಕಟ್ಟೆಯಲ್ಲಿ ಹೊಸದೊಂದು ವಿಭಾಗವನ್ನೇ ಸೃಷ್ಟಿಸಿದೆ.
ಈ ಹೊಸ ಉತ್ಪನ್ನದ ಬಿಡುಗಡೆ ಕುರಿತು ಮಾತನಾಡಿರುವ ಐಟಿಸಿ ಲಿಮಿಟೆಡ್ನ ಡೇರಿ ಮತ್ತು ಬೇವರೇಜ್ ವಿಭಾಗದ ಉಪಾಧ್ಯಕ್ಷ ಹಾಗೂ ಬ್ಯುಸಿನೆಸ್ ಹೆಡ್ ವಿವೇಕ್ ಕೂಕ್ಕಲ್, “ಪಾನೀಯವನ್ನು ಆನಂದಿಸಲು ಅದನ್ನು ಅತಿಯಾಗಿ ಸಂಸ್ಕರಿಸುವ ಅಗತ್ಯವಿಲ್ಲ ಎಂಬ ಸರಳ ಗ್ರಾಹಕ ಒಳನೋಟದಿಂದ ಈ ‘ಕೋಕನಟ್ ಕೋಲಾ’ ಹುಟ್ಟಿಕೊಂಡಿದೆ. ಎಳನೀರು ಮತ್ತು ಕೋಲಾದ ರುಚಿಯನ್ನು ಒಗ್ಗೂಡಿಸಿರುವ ಈ ಪಾನೀಯ, ಗ್ರಾಹಕರಿಗೆ ವಿಭಿನ್ನವಾದ, ಆನಂದದಾಯಕ ಮತ್ತು ರಿಫ್ರೆಶ್ ಅನುಭವವನ್ನು ನೀಡಲಿದೆ. ಇದು ಆರೋಗ್ಯ ಮತ್ತು ರುಚಿಯ ಅದ್ಭುತ ಸಮತೋಲನವಾಗಿದೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಐಟಿಸಿಯ ಪ್ರಾಡಕ್ಟ್ ಡೆವಲಪ್ಮೆಂಟ್ ಹಾಗೂ ಲೈಫ್ ಸೈನ್ಸಸ್ ಮತ್ತು ಟೆಕ್ನಾಲಜಿ ಸೆಂಟರ್ನ ತಜ್ಞರ ತಂಡವು ಈ ಪಾನೀಯವನ್ನು ಎಚ್ಚರಿಕೆಯಿಂದ ಅಭಿವೃದ್ಧಿಪಡಿಸಿದ್ದು, ಎಳನೀರಿನ ಗುಣಗಳು ಮತ್ತು ಕೋಲಾದ ರುಚಿ ಎರಡಕ್ಕೂ ಧಕ್ಕೆಯಾಗದಂತೆ ನೋಡಿಕೊಂಡಿದೆ.
ಪ್ರಸ್ತುತ ಈ ಹೊಸ ‘ಬಿ ನ್ಯಾಚುರಲ್ ಕೋಕನಟ್ ಕೋಲಾ’ 250 ಮಿ.ಲೀ. ಕ್ಯಾನ್ಗಳಲ್ಲಿ ಲಭ್ಯವಿದ್ದು, 60 ರೂ. ಬೆಲೆ ನಿಗದಿಪಡಿಸಲಾಗಿದೆ. ಸದ್ಯಕ್ಕೆ ಇದು ಬೆಂಗಳೂರು, ದಿಲ್ಲಿ, ಮುಂಬೈ, ಪುಣೆ, ಅಹಮದಾಬಾದ್, ಹೈದರಾಬಾದ್, ಚೆನ್ನೈ ಮತ್ತು ಕೋಲ್ಕತ್ತಾ ಸೇರಿದಂತೆ ಪ್ರಮುಖ ಮಹಾನಗರಗಳ ದೊಡ್ಡ ರಿಟೇಲ್ ಮಳಿಗೆಗಳು ಹಾಗೂ ಇನ್ಸ್ಟಾಮಾರ್ಟ್, ಬ್ಲಿಂಕಿಟ್ನಂತಹ ಕ್ವಿಕ್-ಕಾಮರ್ಸ್ ಪ್ಲಾಟ್ಫಾರ್ಮ್ಗಳಲ್ಲಿ ಗ್ರಾಹಕರಿಗೆ ಲಭ್ಯವಿದೆ.
