ತಿಂಡಿಗೆ ಅವಲಕ್ಕಿ ತಿನ್ನೋ ಅಭ್ಯಾಸ ನಿಮಗಿದ್ಯಾ ? ಹೀಗೆ ಮಾಡಿದ್ರೆ ತೂಕ ಇಳಿಯೋದು ಪಕ್ಕಾ !

ಭಾರತೀಯರ ನೆಚ್ಚಿನ ಉಪಹಾರಗಳಲ್ಲಿ ಅವಲಕ್ಕಿಗೆ ಪ್ರಮುಖ ಸ್ಥಾನವಿದೆ. ತೂಕ ಇಳಿಸಿಕೊಳ್ಳಲು ಬಯಸುವವರು ಹಾಗೂ ಆರೋಗ್ಯಕರ ಜೀವನಶೈಲಿ ರೂಢಿಸಿಕೊಂಡಿರುವ ಬಹುತೇಕರು ಬೆಳಗಿನ ತಿಂಡಿಗೆ ಅವಲಕ್ಕಿಯನ್ನೇ ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೆ, ಕೇವಲ ಈರುಳ್ಳಿ-ಕೊತ್ತಂಬರಿ ಹಾಕಿ ಮಾಡುವ ಸಾಂಪ್ರದಾಯಿಕ ಅವಲಕ್ಕಿ ಉಪಹಾರ ನಿಜವಾಗಿಯೂ ತೂಕ ಇಳಿಸಲು ಹಾಗೂ ಆರೋಗ್ಯಕ್ಕೆ ಪರಿಪೂರ್ಣವೇ? ಇದಕ್ಕೆ ಪೌಷ್ಟಿಕತಜ್ಞೆ (ನ್ಯೂಟ್ರಿಷನಿಸ್ಟ್) ಮೇಘನಾ ತಿವಾಟಿಯಾ ಅವರು ನೀಡಿರುವ ವೈಜ್ಞಾನಿಕ ವಿವರಣೆ ಇಲ್ಲಿದೆ.

ಕೇವಲ ಕ್ಯಾಲೋರಿ ಅಷ್ಟೇ ಅಲ್ಲ, ರಕ್ತದಲ್ಲಿನ ಸಕ್ಕರೆ ಮಟ್ಟವೂ ಮುಖ್ಯ! ರಾತ್ರಿಯ ದೀರ್ಘ ನಿದ್ರೆಯ ನಂತರ ನಾವು ತೆಗೆದುಕೊಳ್ಳುವ ಮೊದಲ ಆಹಾರ ನಮ್ಮ ದೇಹದ ಚಯಾಪಚಯ ಕ್ರಿಯೆಯನ್ನು (Metabolism) ನಿರ್ಧರಿಸುತ್ತದೆ. ಉಪಹಾರ ಕೇವಲ ಹೊಟ್ಟೆ ತುಂಬಿಸುವುದಕ್ಕೆ ಮಾತ್ರ ಸೀಮಿತವಾಗಿರದೆ, ಅದರಲ್ಲಿ ಪ್ರೋಟೀನ್, ನಾರಿನಂಶ (ಫೈಬರ್), ಆರೋಗ್ಯಕರ ಕೊಬ್ಬು ಮತ್ತು ನಿರಂತರ ಶಕ್ತಿ ನೀಡುವ ಅಂಶಗಳಿರಬೇಕು.

ಅವಲಕ್ಕಿ ತಿಂದ ಕೆಲವೇ ಗಂಟೆಗಳಲ್ಲಿ ರಕ್ತದಲ್ಲಿನ ಗ್ಲೂಕೋಸ್ ಮಟ್ಟ ತಕ್ಷಣ ಏರಿಕೆ ಕಂಡು, ನಂತರ ತೀವ್ರವಾಗಿ ಇಳಿಯುತ್ತದೆ (Sugar Crash). ಇದರಿಂದಾಗಿ ತಿಂಡಿ ತಿಂದ 2 ಗಂಟೆಯಲ್ಲೇ ಮತ್ತೆ ಹಸಿವಾಗುವುದು, ಆಲಸ್ಯ, ನಿದ್ದೆ ಬರುವುದು ಅಥವಾ ಸಿಹಿ ತಿನ್ನಬೇಕೆಂಬ ಬಯಕೆ ಉಂಟಾಗುತ್ತದೆ.

‘ಸೆಕೆಂಡ್ ಮೀಲ್ ಎಫೆಕ್ಟ್’ (Second Meal Effect) ಎಂದರೇನು? ಸಂಶೋಧನೆಗಳ ಪ್ರಕಾರ, ನಾವು ಬೆಳಗ್ಗೆ ಸೇವಿಸುವ ಮೊದಲ ಊಟವು ಮಧ್ಯಾಹ್ನದ ಊಟದ ಮೇಲೂ ಪ್ರಭಾವ ಬೀರುತ್ತದೆ. ಇದನ್ನು ‘ಸೆಕೆಂಡ್ ಮೀಲ್ ಎಫೆಕ್ಟ್’ ಎನ್ನಲಾಗುತ್ತದೆ. ಬೆಳಗ್ಗೆ ಸಮತೋಲಿತವಲ್ಲದ ತಿಂಡಿ ತಿಂದರೆ ಅಥವಾ ತಿಂಡಿ ಬಿಟ್ಟರೆ, ಮಧ್ಯಾಹ್ನ ಸಾಮಾನ್ಯ ಊಟ ಮಾಡಿದರೂ ರಕ್ತದಲ್ಲಿ ಸಕ್ಕರೆ ಮಟ್ಟ ವಿಪರೀತ ಹೆಚ್ಚಾಗುತ್ತದೆ.

ಅವಲಕ್ಕಿಯನ್ನು ಪರಿಪೂರ್ಣ ಆರೋಗ್ಯಕರ ಊಟವನ್ನಾಗಿಸುವುದು ಹೇಗೆ? ಅವಲಕ್ಕಿಯಲ್ಲಿ ಮುಖ್ಯವಾಗಿ ಕಾರ್ಬೋಹೈಡ್ರೇಟ್‌ಗಳಿರುತ್ತವೆ. ಕಾರ್ಬೋಹೈಡ್ರೇಟ್‌ಗಳು ದೇಹ ಮತ್ತು ಮೆದುಳಿಗೆ ಅಗತ್ಯವಾದ ಶಕ್ತಿಯನ್ನು ಒದಗಿಸುತ್ತವೆ. ಆದರೆ ಕೇವಲ ಕಾರ್ಬ್ಸ್ ಮಾತ್ರ ಸೇವಿಸುವುದು ಸರಿಯಲ್ಲ. ಹಾಗಾಗಿ ಅವಲಕ್ಕಿ ತಯಾರಿಸುವಾಗ ಈ ಸರಳ ಬದಲಾವಣೆಗಳನ್ನು ಮಾಡಿಕೊಳ್ಳಿ:

• ತರಕಾರಿಗಳ ಬಳಕೆ ಹೆಚ್ಚಿಸಿ: ಅವಲಕ್ಕಿ ಮಾಡುವಾಗ ಹಸಿ ಬಟಾಣಿ, ಕ್ಯಾರೆಟ್, ಬೀನ್ಸ್‌ನಂತಹ ನಾರಿನಂಶ ಸಮೃದ್ಧ ತರಕಾರಿಗಳನ್ನು ಧಾರಾಳವಾಗಿ ಸೇರಿಸಿ.

• ಕಡಲೆಕಾಯಿ ಬೀಜ ಬಿಡಬೇಡಿ: ಕಡಲೆಕಾಯಿಯಲ್ಲಿ ಕ್ಯಾಲೋರಿ ಜಾಸ್ತಿ ಎಂದು ಹಲವರು ಅದನ್ನು ತಿನ್ನುವುದಿಲ್ಲ. ಆದರೆ ಕಡಲೆಕಾಯಿಯಲ್ಲಿ ಉತ್ತಮ ಪ್ರೋಟೀನ್ ಮತ್ತು ಆರೋಗ್ಯಕರ ಕೊಬ್ಬು ಇದ್ದು, ಅದು ಹೊಟ್ಟೆ ಬೇಗ ಹಸಿಯದಂತೆ ತಡೆಯುತ್ತದೆ.

• ಪ್ರೋಟೀನ್ ಜೊತೆಗಿಟ್ಟುಕೊಳ್ಳಿ: ಅವಲಕ್ಕಿಯ ಜೊತೆಗೆ ಮೊಸರು, ಬೇಯಿಸಿದ ಮೊಟ್ಟೆ ಅಥವಾ ಪನೀರ್ ತುಂಡುಗಳನ್ನು ಸೇರಿಸಿ ಸೇವಿಸುವುದರಿಂದ ಅದು ಪರಿಪೂರ್ಣ ಸಮತೋಲಿತ ಆಹಾರವಾಗುತ್ತದೆ.

• ಖಾರಾ ಸೇವ್ ಅಳತೆಯಿರಲಿ: ರುಚಿಗಾಗಿ ಅವಲಕ್ಕಿ ಮೇಲೆ ಸ್ವಲ್ಪ ಸೇವ್ ಉದುರಿಸಿಕೊಳ್ಳುವುದು ತಪ್ಪಲ್ಲ. ಆದರೆ ಇಡೀ ತಟ್ಟೆ ತುಂಬಾ ಸೇವ್ ಹಾಕಿ ತಿಂದರೆ ಕ್ಯಾಲೋರಿ ಪ್ರಮಾಣ ಹೆಚ್ಚಾಗುತ್ತದೆ.

ತೂಕ ಇಳಿಸಲು ನಾವೆಂದೂ ನಮ್ಮ ಸಾಂಪ್ರದಾಯಿಕ ಆಹಾರಗಳನ್ನು ಬಿಟ್ಟು ವಿದೇಶಿ ಡಯಟ್ ಮೊರೆಹೋಗಬೇಕಿಲ್ಲ. ನಾವು ತಿನ್ನುವ ದೈನಂದಿನ ಅವಲಕ್ಕಿಯನ್ನೇ ಸರಿಯಾದ ಪ್ರಮಾಣದ ಪ್ರೋಟೀನ್ ಮತ್ತು ತರಕಾರಿಗಳೊಂದಿಗೆ ಬೆರೆಸಿ ಸಮತೋಲಿತವಾಗಿ ಸೇವಿಸಿದರೆ ಆರೋಗ್ಯವೂ ವೃದ್ಧಿಸುತ್ತದೆ, ತೂಕವೂ ನಿಯಂತ್ರಣದಲ್ಲಿರುತ್ತದೆ.