ಬೆಂಗಳೂರು: ಗಿಗ್ ಎಕಾನಮಿ ಉದ್ಯೋಗದಿಂದ ಕುಟುಂಬದ ಆದಾಯದಲ್ಲಿ ಹೇಗೆ ಬದಲಾವಣೆ ತರಬಹುದು ಎಂಬುದಕ್ಕೆ ಮಹಿಳೆಯೊಬ್ಬರ ಕಥೆ ಇದೀಗ ಗಮನ ಸೆಳೆಯುತ್ತಿದೆ. ಸ್ನ್ಯಾಬಿಟ್‌ ಕಂಪನಿಯ ಹಿರಿಯ ನಿರ್ದೇಶಕ ಸಾಯಿ ಕಿರಣ್ ಸಿಂಗನಮಾಲಾ ಅವರು ಈ ಅನುಭವವನ್ನು ಲಿಂಕ್ಡ್‌ಇನ್‌ನಲ್ಲಿ ಹಂಚಿಕೊಂಡಿದ್ದಾರೆ.
ಸ್ನ್ಯಾಬಿಟ್‌ನಲ್ಲಿ ಕೇವಲ ನಾಲ್ಕು ತಿಂಗಳಿನಿಂದ ಕೆಲಸ ಮಾಡುತ್ತಿರುವ ಮಹಿಳೆಯೊಬ್ಬರ ಜೊತೆ ಕೆಲ ದಿನಗಳ ಹಿಂದೆ ಮಾತನಾಡಿದ್ದಾಗಿ ಸಾಯಿ ಕಿರಣ್ ತಿಳಿಸಿದ್ದಾರೆ. ಆಕೆಯ ಪತಿ ಆಟೋ ಚಾಲಕರಾಗಿ ಕೆಲಸ ಮಾಡುತ್ತಿದ್ದಾರೆ.
ಮಹಿಳೆ ಕೆಲಸಕ್ಕೆ ಸೇರಿದ ಬಳಿಕ ಇಬ್ಬರೂ ಸೇರಿ ತಿಂಗಳಿಗೆ ಸುಮಾರು ₹80 ಸಾವಿರದಿಂದ ₹1 ಲಕ್ಷದವರೆಗೆ ಸಂಪಾದಿಸುತ್ತಿದ್ದಾರೆ ಎಂದು ಸಾಯಿ ಕಿರಣ್ ಹೇಳಿದ್ದಾರೆ.
ಈ ಆದಾಯದಿಂದ ತಮ್ಮ ಮಗುವನ್ನು ವರ್ಷಕ್ಕೆ ಸುಮಾರು ₹1.5 ಲಕ್ಷ ಶುಲ್ಕ ಇರುವ ಶಾಲೆಗೆ ಸೇರಿಸಲು ಸಾಧ್ಯವಾಗಿದೆ ಎಂದು ಆಕೆ ತಿಳಿಸಿದ್ದಾಗಿ ಅವರು ಹೇಳಿದ್ದಾರೆ.
ಮಹಿಳೆಯೊಬ್ಬರು ತಿಂಗಳಿಗೆ ₹30–40 ಸಾವಿರ ಸಂಪಾದಿಸುವುದರಿಂದಲೂ ಕುಟುಂಬದ ಜೀವನದಲ್ಲಿ ದೊಡ್ಡ ಬದಲಾವಣೆ ತರಬಹುದು ಎಂದು ಸಾಯಿ ಕಿರಣ್ ಹೇಳಿದ್ದಾರೆ. ಇದರಿಂದ ಮಕ್ಕಳ ಶಿಕ್ಷಣಕ್ಕೆ ಹೆಚ್ಚಿನ ಅವಕಾಶ, ಆರ್ಥಿಕ ಭದ್ರತೆ ಹಾಗೂ ಮಹಿಳೆಯರಲ್ಲಿ ಆತ್ಮವಿಶ್ವಾಸ ಹೆಚ್ಚಾಗುತ್ತದೆ ಎಂದಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆ
ಸಾಯಿ ಕಿರಣ್ ಅವರ ಪೋಸ್ಟ್‌ಗೆ ಸಾಮಾಜಿಕ ಜಾಲತಾಣದಲ್ಲಿ ಹಲವರು ಪ್ರತಿಕ್ರಿಯಿಸಿದ್ದಾರೆ. ಮಹಿಳೆಯೊಬ್ಬರು ಸಂಪಾದಿಸಲು ಆರಂಭಿಸಿದಾಗ ಅದರ ಪರಿಣಾಮ ಕೇವಲ ಆಕೆಯ ಮೇಲೆ ಮಾತ್ರವಲ್ಲ, ಇಡೀ ಕುಟುಂಬದ ಮೇಲೂ ಬೀರುತ್ತದೆ ಎಂದು ಹಲವರು ಹೇಳಿದ್ದಾರೆ.
ಮತ್ತೊಬ್ಬರು, ಉದ್ಯೋಗವೆಂದರೆ ಕೇವಲ ಹಣ ಸಂಪಾದಿಸುವ ಮಾರ್ಗವಲ್ಲ. ಅದು ಗೌರವ, ಸ್ವಾವಲಂಬನೆ ಹಾಗೂ ಮುಂದಿನ ಪೀಳಿಗೆಗೆ ಉತ್ತಮ ಭವಿಷ್ಯ ನೀಡುವ ಅವಕಾಶವೂ ಹೌದು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಇನ್ನೊಬ್ಬರು, “ಮಹಿಳೆ ಸಂಪಾದಿಸಲು ಆರಂಭಿಸಿದಾಗ ಕುಟುಂಬದ ಭವಿಷ್ಯವೇ ಬದಲಾಗುತ್ತದೆ. ಉದ್ಯೋಗ ಆದಾಯ ನೀಡುತ್ತದೆ. ಕೌಶಲ್ಯ ಮತ್ತು ಗೌರವ ಆತ್ಮವಿಶ್ವಾಸ ನೀಡುತ್ತದೆ” ಎಂದು ಪ್ರತಿಕ್ರಿಯಿಸಿದ್ದಾರೆ.
ಮತ್ತೊಬ್ಬರು, ಒಬ್ಬ ಮಹಿಳೆಯ ಬೆಳವಣಿಗೆ ಇಡೀ ಕುಟುಂಬಕ್ಕೆ ಹೊಸ ಭರವಸೆಯಾಗಬಹುದು. ಇಂತಹ ಕಥೆಗಳು ಅರ್ಥಪೂರ್ಣ ಉದ್ಯೋಗದ ಮಹತ್ವವನ್ನು ತೋರಿಸುತ್ತವೆ ಎಂದು ಹೇಳಿದ್ದಾರೆ.
