ಬೆಂಗಳೂರು: ತಮಿಳುನಾಡು ವಿಧಾನಸಭಾ ಚುನಾವಣೆ 2026ರ ಫಲಿತಾಂಶ ಇಡೀ ದೇಶದ ಗಮನ ಸೆಳೆದಿದೆ. ರಾಜಕೀಯ ಅಖಾಡಕ್ಕೆ ಹೊಸದಾಗಿ ಧುಮುಕಿದ ನಟ ದಳಪತಿ ವಿಜಯ್ ಅವರ ತಮಿಳಗ ವೆಟ್ರಿ ಕಳಗಂ (TVK) ಪಕ್ಷವು ಭರ್ಜರಿ ಬಹುಮತದೊಂದಿಗೆ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ವಿಜಯ್ ಅವರ ಈ ಐತಿಹಾಸಿಕ ಸಾಧನೆಗೆ ಚಿತ್ರರಂಗದ ಗಣ್ಯರು ಮಾತ್ರವಲ್ಲದೆ, ಕ್ರೀಡಾ ಲೋಕದಿಂದಲೂ ಅಭಿನಂದನೆಗಳ ಮಹಾಪೂರವೇ ಹರಿದು ಬರುತ್ತಿದೆ. ಸದ್ಯ ಟೀಮ್ ಇಂಡಿಯಾದ ಹಿರಿಯ ಸ್ಪಿನ್ನರ್ ಹಾಗೂ ಕ್ರೀಡಾ ವಿಶ್ಲೇಷಕ ರವಿಚಂದ್ರನ್ ಅಶ್ವಿನ್ ಅವರು ವಿಜಯ್ ಅವರನ್ನು ಶ್ಲಾಘಿಸಿ ಹಾಕಿರುವ ಪೋಸ್ಟ್ ನೆಟ್ಟಿಗರ ಗಮನ ಸೆಳೆಯುತ್ತಿದೆ.
ಸೂಪರ್ ಫ್ಯಾನ್‌ನಿಂದ ನಿಮ್ಮ ಫಾಲೋವರ್ ಆಗುವೆ ಎಂದ ಅಶ್ವಿನ್
ಚೆನ್ನೈ ಮೂಲದ ರವಿಚಂದ್ರನ್ ಅಶ್ವಿನ್ ಅವರು ಸೋಶಿಯಲ್ ಮೀಡಿಯಾದಲ್ಲಿ ವಿಜಯ್ ಮತ್ತು ಅವರ TVK ಪಕ್ಷದ ಅಭೂತಪೂರ್ವ ಯಶಸ್ಸನ್ನು ಕೊಂಡಾಡಿದ್ದಾರೆ. ನಾಳೈಯ ತೀರ್ಪು ಟು ನೇತ್ರೈಯ ತೀರ್ಪು ಅದ್ಭುತ ಫಲಿತಾಂಶಕ್ಕಾಗಿ ದಳಪತಿ ಮತ್ತು ಅವರ ಪಕ್ಷಕ್ಕೆ ಅಭಿನಂದನೆಗಳು. ನಿಮಗೆ ಒಳ್ಳೆಯದಾಗಲಿ. ನಿಮ್ಮ ಕೇವಲ ಸೂಪರ್ ಫ್ಯಾನ್ ಆಗಿ ಉಳಿಯುವುದಕ್ಕಿಂತ, ಮುಂಬರುವ ದಿನಗಳಲ್ಲಿ ನಾನು ಹೆಮ್ಮೆಯಿಂದ ಅನುಸರಿಸಬಹುದಾದ ಒಬ್ಬ ನಾಯಕನಾಗಿ ನೀವು ಬೆಳೆಯುವುದನ್ನು ನೋಡಲು ನಾನು ಇಷ್ಟಪಡುತ್ತೇನೆ ಎಂದು ಅಶ್ವಿನ್ ಭಾವುಕರಾಗಿ ಬರೆದುಕೊಂಡಿದ್ದಾರೆ.
ಇಲ್ಲಿ ಅಶ್ವಿನ್ ಉಲ್ಲೇಖಿಸಿರುವ “ನಾಳೈಯ ತೀರ್ಪು ಟು ನೇತ್ರೈಯ ತೀರ್ಪು” (ನಾಳೆಯ ತೀರ್ಪಿನಿಂದ ನಿನ್ನೆಯ ತೀರ್ಪಿನವರೆಗೆ) ಎಂಬ ಸಾಲುಗಳು, ತಮಿಳುನಾಡು ರಾಜಕೀಯದಲ್ಲಿ ಜನಸಾಮಾನ್ಯರು ಮತ್ತು ಅಭಿಮಾನಿಗಳು ದೀರ್ಘಕಾಲದಿಂದ ಕಂಡಿದ್ದ ಕನಸು ಇಂದು ನನಸಾಗಿದೆ ಎಂಬುದನ್ನು ಬಿಂಬಿಸುತ್ತಿದೆ.
ತಮಿಳುನಾಡಿನಲ್ಲಿ ಟಿವಿಕೆ ಸುನಾಮಿ: ಧೂಳೀಪಟವಾದ ದ್ರಾವಿಡ ಕೋಟೆ
234 ಸದಸ್ಯ ಬಲದ ತಮಿಳುನಾಡು ವಿಧಾನಸಭೆಯಲ್ಲಿ ವಿಜಯ್ ಅವರ TVK ಪಕ್ಷವು ಬರೋಬ್ಬರಿ 108 ಸ್ಥಾನಗಳನ್ನು ಗೆಲ್ಲುವ ಮೂಲಕ ಏಕೈಕ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಇಷ್ಟು ದಿನ ರಾಜ್ಯ ಆಳಿದ್ದ ಪ್ರಮುಖ ದ್ರಾವಿಡ ಪಕ್ಷಗಳಾದ ಡಿಎಂಕೆ (DMK) 59 ಸ್ಥಾನ ಹಾಗೂ ಎಡಿಎಂಕೆ (ADMK) 47 ಸ್ಥಾನಗಳಿಗೆ ತೃಪ್ತಿಪಟ್ಟುಕೊಳ್ಳಬೇಕಾಗಿದೆ.
ಇತರ ಪಕ್ಷಗಳ ಫಲಿತಾಂಶ ಹೀಗಿದೆ:
ಇಂಡಿಯನ್ ನ್ಯಾಷನಲ್ ಕಾಂಗ್ರೆಸ್: 05 ಸ್ಥಾನ
ಪಟ್ಟಾಲಿ ಮಕ್ಕಳ್ ಕಚ್ಚಿ (PMK): 04 ಸ್ಥಾನ
ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ (IUML): 02 ಸ್ಥಾನ
ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (CPI): 02 ಸ್ಥಾನ
ರಾಜ್ಯ ರಾಜಕೀಯದಲ್ಲಿ ಹೊಸ ದಿಕ್ಸೂಚಿ
ಮೊದಲ ಚುನಾವಣೆಯಲ್ಲೇ ಸೆಂಚುರಿ ಬಾರಿಸಿರುವ ದಳಪತಿ ವಿಜಯ್, ತಮಿಳುನಾಡು ರಾಜಕೀಯ ಇತಿಹಾಸದಲ್ಲೇ ಹೊಸ ದಾಖಲೆ ಬರೆದಿದ್ದಾರೆ. ಸಿನೆಮಾ ಸ್ಟಾರ್‌ಗಳ ಕೈಹಿಡಿಯುವ ತಮಿಳುನಾಡಿನ ಹಳೇ ಸಂಪ್ರದಾಯವನ್ನು ಯುವ ಜನಾಂಗ ಮತ್ತೊಮ್ಮೆ ಸಾಬೀತುಪಡಿಸಿದೆ. ಅಶ್ವಿನ್ ಅವರಂತಹ ಜಾಗತಿಕ ಮಟ್ಟದ ಕ್ರೀಡಾಪಟು ವಿಜಯ್ ಅವರ ನಾಯಕತ್ವಕ್ಕೆ ಬೆಂಬಲ ಸೂಚಿಸಿರುವುದು ಟಿವಿಕೆ ಪಕ್ಷದ ಬಲವನ್ನು ಇನ್ನಷ್ಟು ಹೆಚ್ಚಿಸಿದೆ.
