ಸಾಮಾನ್ಯವಾಗಿ ಕೈಗಡಿಯಾರಗಳನ್ನು ಸಮಯ ನೋಡಲು ಬಳಸುತ್ತೇವೆ. ಆದರೆ ₹4.25 ಕೋಟಿ ಬೆಲೆಯ ಕೈಗಡಿಯಾರವೊಂದು ಈಗ ಎಲ್ಲರ ಗಮನ ಸೆಳೆಯುತ್ತಿದೆ. ಐಷಾರಾಮಿ ವಾಚ್‌ ತಯಾರಿಕಾ ಸಂಸ್ಥೆ ಜೇಕಬ್‌ ಆ್ಯಂಡ್‌ ಕೋ (Jacob & Co) ಪರಿಚಯಿಸಿರುವ ‘ಶ್ರೀರಾಮಚಂದ್ರ ಲಿಮಿಟೆಡ್ ಎಡಿಷನ್‌’ ವಾಚ್‌ನಲ್ಲಿ ಶ್ರೀರಾಮ, ಹನುಮಂತ ಮತ್ತು ಅಯೋಧ್ಯೆಯ ರಾಮಮಂದಿರದ ಚಿತ್ರಣವಿದೆ. ಈ ವಾಚ್‌ನ ಮತ್ತೊಂದು ವಿಶೇಷವೆಂದರೆ, ವಿಶ್ವದಾದ್ಯಂತ ಕೇವಲ ಮೂರು ವಾಚ್‌ಗಳನ್ನು ಮಾತ್ರ ತಯಾರಿಸಲಾಗಿದೆ.
ವಾಚ್‌ನಲ್ಲೇ ಶ್ರೀರಾಮ, ಹನುಮಂತನ ಮೂರ್ತಿ
ಈ ವಾಚ್‌ ನೋಡಲು ಎಷ್ಟು ಸುಂದರವಾಗಿದೆಯೋ, ಅದರ ವಿನ್ಯಾಸವೂ ಅಷ್ಟೇ ವಿಶೇಷವಾಗಿದೆ. ವಾಚ್‌ನ 6 ಗಂಟೆಯ ಸ್ಥಾನದಲ್ಲಿ ಶ್ರೀರಾಮನ ಮೂರ್ತಿಯಿದ್ದು, 9 ಗಂಟೆಯ ಸ್ಥಾನದಲ್ಲಿ ಹನುಮಂತನ ಮೂರ್ತಿಯನ್ನು ರೂಪಿಸಲಾಗಿದೆ. ನೀಲಿ ಬಣ್ಣದ ಹಿನ್ನೆಲೆಯ ಮೇಲೆ ಮಂಡಲ ವಿನ್ಯಾಸವನ್ನೂ ನೀಡಲಾಗಿದೆ. ಇದರ ನಡುವೆ ರಾಮಮಂದಿರದ ಕಲಾತ್ಮಕ ಚಿತ್ರಣ ಗಮನ ಸೆಳೆಯುತ್ತದೆ.
ಭಾರತದ ಆಧ್ಯಾತ್ಮಿಕ ಪರಂಪರೆಯಿಂದ ಸ್ಫೂರ್ತಿ ಪಡೆದು ತಯಾರಿಸಿರುವ ಈ ವಾಚ್‌ನಲ್ಲಿ ಭಕ್ತಿ ಮತ್ತು ಐಷಾರಾಮಿ ವಿನ್ಯಾಸ ಎರಡೂ ಮೇಳೈಸಿವೆ.
ಸಮಯ ತೋರಿಸುವುದಷ್ಟೇ ಅಲ್ಲ, ಇದರೊಳಗಿದೆ ಪುಟ್ಟ ಭೂಮಿ
ಈ ವಾಚ್‌ನ ವಿಶೇಷತೆ ಇಲ್ಲಿಗೇ ಮುಗಿಯುವುದಿಲ್ಲ. ಇದರೊಳಗೆ ನೀಲಿ ಬಣ್ಣದ ಪುಟ್ಟ ಭೂಮಿಯ ಮಾದರಿಯಿದ್ದು, ಅದು ತನ್ನ ಅಕ್ಷದ ಸುತ್ತ ಪ್ರತಿ 60 ಸೆಕೆಂಡ್‌ಗಳಿಗೆ ಒಂದು ಸುತ್ತು ತಿರುಗುತ್ತದೆ. 12 ಗಂಟೆಯ ಸ್ಥಾನದಲ್ಲಿರುವ ಫ್ಲೈಯಿಂಗ್ ಟೂರ್‌ಬಿಲನ್‌ ಕೂಡ ಒಂದು ನಿಮಿಷದಲ್ಲಿ ಒಂದು ಸುತ್ತು ಪೂರ್ಣಗೊಳಿಸುತ್ತದೆ.
ಇದರಲ್ಲಿರುವ ಕೇಸರಿ ಬಣ್ಣದ ಜೇಕಬ್‌-ಕಟ್ ಕ್ಯೂಬಿಕ್ ಜಿರ್ಕೋನಿಯಾ ರತ್ನವು ಸೂರ್ಯನನ್ನು ಪ್ರತಿನಿಧಿಸುತ್ತದೆ. ಕಿತ್ತಳೆ ಬಣ್ಣದ ಫೈರ್ ಓಪಲ್ ಡಯಲ್‌ ಮೂಲಕ ಗಂಟೆ ಮತ್ತು ನಿಮಿಷಗಳನ್ನು ನೋಡಬಹುದು. ಹೀಗೆ ಸೂರ್ಯ, ಭೂಮಿ ಮತ್ತು ಚಲಿಸುವ ಯಾಂತ್ರಿಕ ವ್ಯವಸ್ಥೆಗಳನ್ನು ಒಂದೇ ವಾಚ್‌ನಲ್ಲಿ ಅಳವಡಿಸಿರುವುದು ಇದರ ವಿಶೇಷ.
₹4.25 ಕೋಟಿ ಬೆಲೆಯ ವಾಚ್‌ನಲ್ಲಿ ಏನೇನಿದೆ?
ಈ ಕೈಗಡಿಯಾರವನ್ನು 18 ಕ್ಯಾರೆಟ್ ರೋಸ್ ಗೋಲ್ಡ್‌ನಿಂದ ತಯಾರಿಸಲಾಗಿದೆ. ಇದರ ಮೇಲೆ ಗುಮ್ಮಟಾಕಾರದ ಸ್ಯಾಫೈರ್ ಕ್ರಿಸ್ಟಲ್ ಗಾಜನ್ನು ಬಳಸಲಾಗಿದೆ. ವಾಚ್‌ನ ಒಳಗಿನ ಯಾಂತ್ರಿಕ ವ್ಯವಸ್ಥೆಯನ್ನು ಸುತ್ತಲಿನಿಂದ ವೀಕ್ಷಿಸಲು ಅನುಕೂಲವಾಗುವಂತೆ ಪಾರದರ್ಶಕ ವಿನ್ಯಾಸವನ್ನೂ ನೀಡಲಾಗಿದೆ. ಜೊತೆಗೆ ನೀಲಿ ಬಣ್ಣದ ಅಲಿಗೇಟರ್ ಚರ್ಮದ ಪಟ್ಟಿಯಿದೆ.
ಜೇಕಬ್‌ ಆ್ಯಂಡ್‌ ಕೋ ಸಂಸ್ಥೆಯ ಆಸ್ಟ್ರೋನಾಮಿಯಾ ಸೋಲಾರ್ ಮಾದರಿಯನ್ನು ಆಧರಿಸಿ ಈ ವಾಚ್‌ ರೂಪಿಸಲಾಗಿದೆ. ಅತ್ಯಾಧುನಿಕ ತಂತ್ರಜ್ಞಾನ, ದುಬಾರಿ ವಸ್ತುಗಳು ಮತ್ತು ವಿಶಿಷ್ಟ ಕಲಾತ್ಮಕ ವಿನ್ಯಾಸ ಇದನ್ನು ಐಷಾರಾಮಿ ವಾಚ್‌ಗಳ ಸಾಲಿನಲ್ಲಿ ವಿಶೇಷವಾಗಿಸಿವೆ.
ಆದರೆ ಎಲ್ಲರಿಗೂ ಈ ವಾಚ್‌ ಖರೀದಿಸಲು ಸಾಧ್ಯವಿಲ್ಲ. ₹4.25 ಕೋಟಿ ಬೆಲೆಯ ಜೊತೆಗೆ, ಜಗತ್ತಿನಾದ್ಯಂತ ಕೇವಲ ಮೂರು ವಾಚ್‌ಗಳನ್ನು ಮಾತ್ರ ತಯಾರಿಸಿರುವುದರಿಂದ ಕೆಲವೇ ಸಂಗ್ರಹಕಾರರಿಗೆ ಇದನ್ನು ತಮ್ಮದಾಗಿಸಿಕೊಳ್ಳುವ ಅವಕಾಶ ಸಿಗಲಿದೆ.
