ಚಿತ್ರರಂಗದ ದಿವಂಗತ ಅತಿಲೋಕ ಸುಂದರಿ ಶ್ರೀದೇವಿ ಅವರ ಕಿರಿಯ ಮಗಳು ಖುಷಿ ಕಪೂರ್ ಇದೀಗ ಬಾಲಿವುಡ್‌ನಲ್ಲಿ ತಮ್ಮ ವೃತ್ತಿಜೀವನದ ಪ್ರಮುಖ ಘಟ್ಟಕ್ಕೆ ಪಾದಾರ್ಪಣೆ ಮಾಡಲು ಸಜ್ಜಾಗಿದ್ದಾರೆ. ಝೋಯಾ ಅಖ್ತರ್ ನಿರ್ದೇಶನದ ದ ಅರ್ಚೀಸ್ ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿದ್ದ ಖುಷಿ, ಆನಂತರ ಬಂದ ಕೆಲವು ಸಿನಿಮಾಗಳಲ್ಲಿ ಹೇಳಿಕೊಳ್ಳುವಂತಹ ಯಶಸ್ಸು ಕಾಣಲಿಲ್ಲ. ಆದರೆ ಈಗ ತಮ್ಮ ತಾಯಿಯ ನೆನಪನ್ನು ಮರಳಿ ತರುವ ಪ್ರಮುಖ ಯೋಜನೆಯೊಂದರಲ್ಲಿ ತೊಡಗಿಸಿಕೊಂಡಿದ್ದು, ಚಿತ್ರಪ್ರೇಮಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿದ್ದಾರೆ.
ಖುಷಿ ಕಪೂರ್ ಅಭಿನಯದ ಮುಂಬರುವ ನೂತನ ಸಿನಿಮಾ ಮಾಮ್ 2. ಗಿರೀಶ್ ಕೊಹ್ಲಿ ನಿರ್ದೇಶನ ಮಾಡುತ್ತಿರುವ ಈ ಚಿತ್ರವನ್ನು ಖುಷಿ ಅವರ ತಂದೆ ಬೋನಿ ಕಪೂರ್ ನಿರ್ಮಿಸುತ್ತಿದ್ದಾರೆ. ನೋಯ್ಡಾ ಮತ್ತು ಗ್ರೀಸ್ ಸೇರಿದಂತೆ ವಿವಿಧ ಸುಂದರ ತಾಣಗಳಲ್ಲಿ ಈ ಸಿನಿಮಾದ ಚಿತ್ರೀಕರಣ ನಡೆದಿದೆ. ಈ ಚಿತ್ರದಲ್ಲಿ ಖುಷಿ ಜೊತೆಗೆ ಕರೀಷ್ಮಾ ತನ್ನಾ ತಾಯಿಯ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಜಿಶ್ಶು ಸೇನ್‌ಗುಪ್ತಾ ಕೂಡ ಪ್ರಮುಖ ಪಾತ್ರವೊಂದನ್ನು ಪೋಷಿಸುತ್ತಿದ್ದಾರೆ.
ಸಿನಿಮಾ ಉದ್ಯಮದ ಆಂತರಿಕ ಮೂಲಗಳ ಪ್ರಕಾರ, ಈ ಚಿತ್ರದಲ್ಲಿ ಖುಷಿ ಕಪೂರ್ ಅವರ ನಟನೆ ಪ್ರೇಕ್ಷಕರಿಗೆ ಸಂಪೂರ್ಣ ಹೊಸ ಅನುಭವ ನೀಡಲಿದೆ. ತಮ್ಮ ತಾಯಿಯ ಕೊನೆಯ ಚಿತ್ರವಾದ ಮಾಮ್ ನಂಟು ಈ ಸಿನಿಮಾಗೆ ಇರುವುದರಿಂದ, ಖುಷಿ ತಮ್ಮ ಸಂಪೂರ್ಣ ಸಾಮರ್ಥ್ಯವನ್ನು ಧಾರೆ ಎರೆದು ಅಭಿನಯಿಸಿದ್ದಾರೆ ಎಂದು ಹೇಳಲಾಗುತ್ತಿದೆ. ತಾಯಿಯ ನೆನಪಿಗೆ ಗೌರವ ಸಲ್ಲಿಸುವ ರೀತಿಯಲ್ಲಿ ಅತ್ಯಂತ ಭಾವನಾತ್ಮಕ ಹಾಗೂ ಭರವಸೆಯ ಅಭಿನಯವನ್ನು ಅವರು ನೀಡಿದ್ದು, ಪ್ರೇಕ್ಷಕರು ಮತ್ತು ವಿಮರ್ಶಕರು ಅವರ ಹೊಸ ಅವತಾರವನ್ನು ಕಂಡು ಆಶ್ಚರ್ಯಪಡುವುದು ಖಚಿತ ಎನ್ನಲಾಗಿದೆ.
೨೦೧೭ರಲ್ಲಿ ತೆರೆಕಂಡ ರವಿ ಉದ್ಯಾವರ್ ನಿರ್ದೇಶನದ ಮಾಮ್ ಸಿನಿಮಾ ಶ್ರೀದೇವಿ ಅಭಿನಯದ ಕೊನೆಯ ಚಿತ್ರವಾಗಿತ್ತು. ಈ ಅಭಿನಯಕ್ಕಾಗಿ ಅವರಿಗೆ ಮರಣೋತ್ತರ ರಾಷ್ಟ್ರಪ್ರಶಸ್ತಿ ಹಾಗೂ ಐಐಎಫ್‌ಎ ಪ್ರಶಸ್ತಿಗಳು ಒಲಿದು ಬಂದಿದ್ದವು. ಈಗ ಅದೇ ಸರಣಿಯ ಭಾಗವಾಗಿ ಮೂಡಿಬರುತ್ತಿರುವ ಮಾಮ್ 2 ಚಿತ್ರವನ್ನು ಈ ವರ್ಷದ ನವೆಂಬರ್ ತಿಂಗಳಲ್ಲಿ ಬಿಡುಗಡೆ ಮಾಡಲು ಚಿತ್ರತಂಡ ಯೋಜನೆ ರೂಪಿಸಿದೆ. ವಿಶೇಷವೆಂದರೆ ನವೆಂಬರ್ ೧೧ ರಂದು ನಿರ್ಮಾಪಕ ಬೋನಿ ಕಪೂರ್ ಅವರ ಜನ್ಮದಿನವಿದ್ದು, ಮಗಳ ಈ ಅದ್ಭುತ ಅಭಿನಯವೇ ಅವರಿಗೆ ಸಿಗುವ ಅತ್ಯುತ್ತಮ ಕೊಡುಗೆಯಾಗಲಿದೆ.
