ಫಿಫಾ ವಿಶ್ವಕಪ್ ಇತಿಹಾಸದಲ್ಲೇ ಮೊದಲ ಹಾಫ್-ಟೈಮ್ ಶೋ: ಶಕೀರಾ ಮತ್ತು ಜಸ್ಟಿನ್ ಬೀಬರ್ ಗಾನಬಜಾನಕ್ಕೆ ಅದಿರಿದ ಮೆಟ್‌ಲೈಫ್ ಸ್ಟೇಡಿಯಂ

ಫಿಫಾ ವಿಶ್ವಕಪ್ 2026ರ ಫೈನಲ್ ಪಂದ್ಯವು ಕೇವಲ ಫುಟ್ಬಾಲ್ ಆಟಕ್ಕಷ್ಟೇ ಅಲ್ಲದೆ, ಇತಿಹಾಸದಲ್ಲೇ ಮೊದಲ ಬಾರಿಗೆ ಆಯೋಜಿಸಲಾಗಿದ್ದ ಅದ್ಧೂರಿ ಹಾಫ್-ಟೈಮ್ ಶೋ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದೆ. ನ್ಯೂಜೆರ್ಸಿಯ ಮೆಟ್‌ಲೈಫ್ ಸ್ಟೇಡಿಯಂನಲ್ಲಿ ನಡೆದ ಸ್ಪೇನ್ ಮತ್ತು ಅರ್ಜೆಂಟೀನಾ ನಡುವಿನ ಹೈವೋಲ್ಟೇಜ್ ಪಂದ್ಯದ ಮಧ್ಯಂತರದ ಅವಧಿಯಲ್ಲಿ ಜಾಗತಿಕ ಸಂಗೀತ ಲೋಕದ ದಿಗ್ಗಜರು ಹಾಗೂ ಫುಟ್ಬಾಲ್ ತಾರೆಗಳು ಒಂದೇ ವೇದಿಕೆಯಲ್ಲಿ ಸೃಷ್ಟಿಸಿದ ಜಾದೂ ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿತು. ಮೊದಲಾರ್ಧದ ಮುಕ್ತಾಯಕ್ಕೆ ಉಭಯ ತಂಡಗಳು ಯಾವುದೇ ಗೋಲು ಗಳಿಸದೆ ಸಮಬಲ ಸಾಧಿಸಿದ್ದಾಗ ಕ್ರೀಡಾಂಗಣದಲ್ಲಿ ಮನರಂಜನೆಯ ಮಹಾಪೂರವೇ ಹರಿಯಿತು.

ಕೋಲ್ಡ್‌ಪ್ಲೇ ಬ್ಯಾಂಡ್‌ನ ಪ್ರಮುಖ ಗಾಯಕ ಕ್ರಿಸ್ ಮಾರ್ಟಿನ್ ನೇತೃತ್ವದಲ್ಲಿ ಮೂಡಿಬಂದ ಈ ಅದ್ಭುತ ಕಾರ್ಯಕ್ರಮದಲ್ಲಿ ಪಾಪ್ ದಿವಂಗತೆ ಮಡೋನಾ ಮೊದಲು ವೇದಿಕೆ ಏರಿ ಅಭಿಮಾನಿಗಳನ್ನು ರಂಜಿಸಿದರು. ಅವರ ಪ್ರದರ್ಶನದ ವೇಳೆ ಬ್ರೆಜಿಲ್ ಫುಟ್ಬಾಲ್ ದಂತಕಥೆಗಳಾದ ರೊನಾಲ್ಡೊ ಮತ್ತು ರೊನಾಲ್ಡೀನ್ಹೋ ಸಾಥ್ ನೀಡಿದ್ದು ವಿಶೇಷವಾಗಿತ್ತು. ಇದರ ಬೆನ್ನಲ್ಲೇ ಟೆಡ್ ಲಾಸೊ ವೆಬ್ ಸರಣಿಯ ಖ್ಯಾತ ನಟರಾದ ಜೇಸನ್ ಸುಡೈಕಿಸ್ ಮತ್ತು ಬ್ರೆಂಡನ್ ಹಂಟ್ ಅತಿಥಿಗಳಾಗಿ ಆಗಮಿಸಿ ಜಾಗತಿಕ ಪಾಪ್ ಐಕಾನ್ ಜಸ್ಟಿನ್ ಬೀಬರ್ ಅವರನ್ನು ವೇದಿಕೆಗೆ ಆಹ್ವಾನಿಸಿದರು. ಜಸ್ಟಿನ್ ಬೀಬರ್ ತಮ್ಮ ಜನಪ್ರಿಯ ಗೀತೆಯ ಅಕೌಸ್ಟಿಕ್ ಆವೃತ್ತಿಯನ್ನು ಹಾಡುವ ಮೂಲಕ ಇಡೀ ಕ್ರೀಡಾಂಗಣದಲ್ಲಿ ವಿದ್ಯುತ್ ಸಂಚಲನ ಮೂಡಿಸಿದರು.

ಇದಾದ ನಂತರ ಜಾಗತಿಕ ಮಟ್ಟದಲ್ಲಿ ಭಾರಿ ಕ್ರೇಜ್ ಹೊಂದಿರುವ ಬಿಟಿಎಸ್ ಬ್ಯಾಂಡ್ ಮತ್ತು ಖ್ಯಾತ ಗಾಯಕಿ ಶಕೀರಾ ಹಾಗೂ ಬರ್ನಾ ಬಾಯ್ ಒಟ್ಟಾಗಿ ಈ ಬಾರಿಯ ವಿಶ್ವಕಪ್‌ನ ಅಧಿಕೃತ ಗೀತೆ ‘ಡೈ, ಡೈ’ ಹಾಡಿಗೆ ಹೆಜ್ಜೆ ಹಾಕುತ್ತಿದ್ದಂತೆ ಪ್ರೇಕ್ಷಕರ ಹರ್ಷೋದ್ಗಾರ ಮುಗಿಲು ಮುಟ್ಟಿತ್ತು. ಬ್ರಿಟನ್ಸ್ ಗಾಟ್ ಟ್ಯಾಲೆಂಟ್ ರಿಯಾಲಿಟಿ ಶೋ ಖ್ಯಾತಿಯ ಗೆಟ್ಟೋ ಕಿಡ್ಸ್ ಡ್ಯಾನ್ಸ್ ಗ್ರೂಪ್, ಮಪೆಟ್ಸ್ ಶೋನ ಮಿಸ್ ಪಿಗಿ ಮತ್ತು ಕೆರ್ಮಿಟ್ ಹಾಗೂ ಸೆಸೇಮ್ ಸ್ಟ್ರೀಟ್‌ನ ಕೌಂಟ್ ವಾನ್ ಕೌಂಟ್ ಪಾತ್ರಗಳ ಜಂಟಿ ಪ್ರದರ್ಶನದೊಂದಿಗೆ ಈ ಐತಿಹಾಸಿಕ ಸಾಂಸ್ಕೃತಿಕ ಹಬ್ಬಕ್ಕೆ ಅದ್ಧೂರಿ ತೆರೆ ಬಿತ್ತು.

ಕೇವಲ ಮಧ್ಯಂತರ ಅಷ್ಟೇ ಅಲ್ಲದೆ ಪಂದ್ಯದ ಆರಂಭಕ್ಕೂ ಮುನ್ನವೇ ಖ್ಯಾತ ಯೂಟ್ಯೂಬರ್ ಐಶೋಸ್ಪೀಡ್, ಪೋಸ್ಟ್ ಮಲೋನ್ ಮತ್ತು ಸ್ವಾಯ್ ಲೀ ತಮ್ಮ ಅದ್ಭುತ ಪ್ರದರ್ಶನದ ಮೂಲಕ ಕ್ರೀಡಾಂಗಣದ ಗ್ಯಾಲರಿಯಲ್ಲಿದ್ದ ಸಾವಿರಾರು ಅಭಿಮಾನಿಗಳಲ್ಲಿ ರೋಮಾಂಚನ ಮೂಡಿಸಿದ್ದರು. ಇವರ ಬೆನ್ನಲ್ಲೇ ರಾಬಿ ವಿಲಿಯಮ್ಸ್ ಹಾಗೂ ಜೆನ್ನಿಫರ್ ಹಡ್ಸನ್ ಹಾಡುಗಳ ಮೂಲಕ ರಂಜಿಸಿದರೆ, ಹಾಲಿವುಡ್ ಸ್ಟಾರ್ ನಟ ಟಾಮ್ ಕ್ರೂಸ್ ಭಾಷಣದ ಮೂಲಕ ಆಟಗಾರರನ್ನು ಪ್ರೋತ್ಸಾಹಿಸಿದರು. ಬಾಕ್ಸಿಂಗ್ ರಿಂಗ್‌ನ ಪ್ರಸಿದ್ಧ ಅನೌನ್ಸರ್‌ಗಳಾದ ಮೈಕೆಲ್ ಬಫರ್ ಮತ್ತು ಬ್ರೂಸ್ ಬಫರ್ ತಮ್ಮದೇ ವಿಶಿಷ್ಟ ಶೈಲಿಯಲ್ಲಿ ಸ್ಪೇನ್ ಹಾಗೂ ಅರ್ಜೆಂಟೀನಾ ತಂಡಗಳನ್ನು ಮೈದಾನಕ್ಕೆ ಸ್ವಾಗತಿಸಿದ್ದು ಪಂದ್ಯದ ರೋಮಾಂಚನವನ್ನು ದುಪ್ಪಟ್ಟು ಮಾಡಿತ್ತು.

Ronaldo and Ronaldinho were driving Madonna through the tunnel during the half-time show 😅 pic.twitter.com/N0Z0hzbvXn

— Football on TNT Sports (@footballontnt) July 19, 2026

SHAKIRA performing at the FIFA #WorldCup Final Halftime Show pic.twitter.com/VLEkuT7LIV

— ْ (@pourlesjolies) July 19, 2026