ದಕ್ಷಿಣ ಭಾರತ ಹಾಗೂ ಬಾಲಿವುಡ್ ಚಿತ್ರರಂಗದಲ್ಲಿ ಮುಂಚೂಣಿಯಲ್ಲಿರುವ ನಟಿ ಪೂಜಾ ಹೆಗ್ಡೆ ಸದ್ಯ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅವರು ತಮ್ಮ ಸಹನಟರ ಬಗ್ಗೆ ಹಲವು ಆಸಕ್ತಿದಾಯಕ ವಿಷಯಗಳನ್ನು ಹಂಚಿಕೊಂಡಿದ್ದು, ಅದರಲ್ಲಿ ನಟ ರಣವೀರ್ ಸಿಂಗ್ ಅವರಿಗೆ ತಾವು ‘ಪಮ್ಮಿ ಆಂಟಿ’ ಎಂದು ಕರೆಯುವ ರಹಸ್ಯವನ್ನು ಬಹಿರಂಗಪಡಿಸಿದ್ದಾರೆ.
ಯಾಕೆ ಆ ಹೆಸರು ಬಂತು?
ಸಂದರ್ಶನದಲ್ಲಿ ಮಾತನಾಡಿದ ಪೂಜಾ ಹೆಗ್ಡೆ, ರಣವೀರ್ ಸಿಂಗ್ ಅವರಿಗೆ ಎಲ್ಲ ವಿಷಯಗಳನ್ನು ತಿಳಿದುಕೊಳ್ಳುವ ಅತಿಯಾದ ಕುತೂಹಲ ಇರುತ್ತದೆ. ಸುತ್ತಮುತ್ತ ಏನು ನಡೆಯುತ್ತಿದೆ ಎಂಬ ಸಂಪೂರ್ಣ ಮಾಹಿತಿ ಅವರಿಗೆ ಬೇಕಿರುತ್ತದೆ. ಇದೇ ಕಾರಣಕ್ಕಾಗಿ ತಾವು ಪ್ರೀತಿಯಿಂದ ಅವರಿಗೆ ‘ಪಮ್ಮಿ ಆಂಟಿ’ ಎಂದು ಕರೆಯುವುದಾಗಿ ನಗುತ್ತಾ ಹೇಳಿದ್ದಾರೆ.
ಅಲ್ಲದೆ, ರಣವೀರ್ ಸಿಂಗ್ ನೀಡಿದ ಒಂದು ಉಪಯುಕ್ತ ಸಲಹೆಯನ್ನೂ ಪೂಜಾ ನೆನಪಿಸಿಕೊಂಡಿದ್ದಾರೆ. ಜಾಹೀರಾತುಗಳಲ್ಲಿ ನಟಿಸುವಾಗ ಯಾವಾಗಲೂ ಅತ್ಯುತ್ತಮ ಪ್ರದರ್ಶನ ನೀಡಬೇಕು ಎಂದು ರಣವೀರ್ ಒಮ್ಮೆ ಸಲಹೆ ನೀಡಿದ್ದರಂತೆ. ದಕ್ಷಿಣ ಭಾರತದಲ್ಲಿ ನಿಮ್ಮ ಸಿನಿಮಾಗಳನ್ನು ನೋಡದ ಪ್ರೇಕ್ಷಕರು, ಮೊದಲ ಬಾರಿಗೆ ನಿಮ್ಮನ್ನು ಇಂತಹ ಬ್ರ್ಯಾಂಡ್ ಜಾಹೀರಾತುಗಳ ಮೂಲಕವೇ ಗುರುತಿಸಬಹುದು ಎಂಬುದು ಅವರ ಮಾತಿನ ಹಿಂದಿನ ಅರ್ಥವಾಗಿತ್ತು ಎಂದು ಪೂಜಾ ತಿಳಿಸಿದ್ದಾರೆ.
ಜೊತೆಗೆ ‘ಸರ್ಕಸ್’ ಸಿನಿಮಾ ಚಿತ್ರೀಕರಣದ ವೇಳೆ ನಡೆದ ಮತ್ತೊಂದು ಮೋಜಿನ ಘಟನೆಯನ್ನು ಹಂಚಿಕೊಂಡ ನಟಿ, ಶೂಟಿಂಗ್‌ಗಾಗಿ ಕಾಯುತ್ತಿದ್ದ ಸಮಯದಲ್ಲಿ ರಣವೀರ್ ಸಿಂಗ್ ಹಾಡೊಂದನ್ನು ಹಾಕಿಕೊಂಡು ಇಡೀ ಸೆಟ್‌ನಲ್ಲಿದ್ದವರ ಮುಂದೆ ಸಖತ್ ಆಗಿ ನೃತ್ಯ ಮಾಡಿ ಎಲ್ಲರನ್ನೂ ರಂಜಿಸಿದ್ದರು ಎಂದು ನೆನಪಿಸಿಕೊಂಡಿದ್ದಾರೆ. ಪೂಜಾ ಹೆಗ್ಡೆ ಹಂಚಿಕೊಂಡಿರುವ ಈ ವಿಷಯಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಅಭಿಮಾನಿಗಳ ಗಮನ ಸೆಳೆಯುತ್ತಿವೆ.
ಸಾಲು ಸಾಲು ಸಿನಿಮಾಗಳಲ್ಲಿ ಪೂಜಾ ಬ್ಯುಸಿ
ಸದ್ಯ ಪೂಜಾ ಹೆಗ್ಡೆ ಕೈಯಲ್ಲಿ ಹಲವು ದೊಡ್ಡ ಸಿನಿಮಾಗಳಿವೆ. ತಮಿಳು ನಟ ವಿಜಯ್ ನಟನೆಯ ಬಹುನಿರೀಕ್ಷಿತ ‘ಜನ ನಾಯಕನ್’ ಸಿನಿಮಾದಲ್ಲಿ ಅವರು ನಾಯಕಿಯಾಗಿ ನಟಿಸಿದ್ದು, ಈ ಚಿತ್ರವು ಶೀಘ್ರದಲ್ಲೇ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಇದರೊಂದಿಗೆ ದುಲ್ಕರ್ ಸಲ್ಮಾನ್ ಜೊತೆಗಿನ ಪ್ರಣಯ ಕಥಾಹಂದರ ಹೊಂದಿರುವ ‘ಶ್ರೀ ಶ್ರೀ’ ಹಾಗೂ ಬಹುನಿರೀಕ್ಷಿತ ಹಾರರ್ ಕಾಮಿಡಿ ಚಿತ್ರ ‘ಕಾಂಚನಾ 4’ ನಲ್ಲೂ ಪೂಜಾ ಹೆಗ್ಡೆ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
