ಅರ್ಜೆಂಟಿನಾ ಎಂದ ತಕ್ಷಣ ನಮ್ಮ ಮನಸ್ಸಿಗೆ ಮೆಸ್ಸಿ, ಫುಟ್ಬಾಲ್ ಮತ್ತು ಅಲ್ಲಿನ ಆಕರ್ಷಕ ನೃತ್ಯಗಳೇ ಮೊದಲು ನೆನಪಾಗುತ್ತವೆ. ಆದರೆ ಈ ದೇಶವನ್ನು ಲ್ಯಾಂಡ್ ಆಫ್ ಸಿಲ್ವರ್ ಅಥವಾ ಬೆಳ್ಳಿಯ ನಾಡು ಎಂದು ಕರೆಯಲಾಗುತ್ತದೆ ಎಂಬುದು ನಿಮಗೆ ಗೊತ್ತೇ? ಈ ವಿಶಿಷ್ಟ ಹೆಸರಿನ ಹಿಂದೆ ಕೇವಲ ಒಂದು ಹೆಸರು ಮಾತ್ರವಲ್ಲ, ಅದ್ಭುತ ಇತಿಹಾಸ, ಭೌಗೋಳಿಕ ಮಹತ್ವ ಮತ್ತು ಸಾಹಸಪ್ರಿಯ ಅನ್ವೇಷಕರ ರೋಚಕ ಕಥೆಗಳು ಅಡಗಿಕೊಂಡಿವೆ.
ಹೆಸರಲ್ಲೇ ಇದೆ ಬೆಳ್ಳಿಯ ಹೊಳಪು
ಅರ್ಜೆಂಟಿನಾ ಎಂಬ ಪದವು ಗಾಳಿಯಲ್ಲಿ ಬಂದದ್ದಲ್ಲ. ಇದು ಲ್ಯಾಟಿನ್ ಭಾಷೆಯ ಅರ್ಜೆಂಟಮ್ (Argentum) ಎಂಬ ಪದದಿಂದ ಬಂದಿದೆ. ವಿಜ್ಞಾನದಲ್ಲಿ ಬೆಳ್ಳಿಗೆ (Silver) ಇರುವ ಸಂಕೇತ Ag ಕೂಡ ಇದೇ ಮೂಲದಿಂದ ಬಂದದ್ದು. 16ನೇ ಶತಮಾನದಲ್ಲಿ ಇಲ್ಲಿಗೆ ಬಂದ ಯುರೋಪಿಯನ್ ಅನ್ವೇಷಕರು ಈ ಭಾಗದಲ್ಲಿ ಅಪಾರ ಪ್ರಮಾಣದ ಬೆಳ್ಳಿ ನಿಕ್ಷೇಪವಿದೆ ಎಂದು ನಂಬಿದ್ದರು. ಆ ನಂಬಿಕೆಯೇ ಇಂದು ದೇಶದ ಹೆಸರಾಗಿ ಉಳಿದುಕೊಂಡಿದೆ.
ರಿಯೋ ಡಿ ಲಾ ಪ್ಲಾಟಾ: ಬೆಳ್ಳಿಯ ನದಿ
ಅರ್ಜೆಂಟಿನಾ ಮತ್ತು ಉರುಗ್ವೆ ದೇಶಗಳ ನಡುವೆ ಹರಿಯುವ ದೊಡ್ಡ ಕೊಲ್ಲಿಯನ್ನು ರಿಯೋ ಡಿ ಲಾ ಪ್ಲಾಟಾ (Rio de la Plata) ಎಂದು ಕರೆಯುತ್ತಾರೆ. ಸ್ಪ್ಯಾನಿಷ್ ಭಾಷೆಯಲ್ಲಿ ಇದರ ಅರ್ಥ ಬೆಳ್ಳಿಯ ನದಿ.ಇಲ್ಲಿ ಕೇವಲ ಬೆಳ್ಳಿಯಷ್ಟೇ ಅಲ್ಲದೆ ಚಿನ್ನ, ತಾಮ್ರ, ಸೀಸ ಮತ್ತು ಸತುವು ಕೂಡ ಹೆಚ್ಚಿನ ಪ್ರಮಾಣದಲ್ಲಿ ದೊರೆಯುತ್ತವೆ.
ಅಂದಿನ ಕಾಲದ ಪರಿಶೋಧಕರು ಈ ನದಿಯ ಆಳದಲ್ಲಿ ಬೆಳ್ಳಿ ಅಡಗಿದೆ ಮತ್ತು ಇದರ ಮೂಲಕವೇ ಬೆಳ್ಳಿಯ ವ್ಯಾಪಾರ ನಡೆಯುತ್ತದೆ ಎಂದು ಬಲವಾಗಿ ನಂಬಿದ್ದರು.ನದಿಯಲ್ಲಿ ಬೆಳ್ಳಿ ಹರಿಯದಿದ್ದರೂ, ಅದರ ಸುತ್ತಮುತ್ತಲಿನ ಭೂಪ್ರದೇಶವು ಖನಿಜ ಸಂಪತ್ತಿನ ಗಣಿಯಾಗಿದೆ.ಅರ್ಜೆಂಟಿನಾವನ್ನು ಕೇವಲ ಹಳೆಯ ಕಥೆಗಳಿಗಾಗಿ ಬೆಳ್ಳಿಯ ನಾಡು ಎಂದು ಕರೆಯುವುದಿಲ್ಲ. ಇಂದಿಗೂ ಇದು ಜಗತ್ತಿನ ಪ್ರಮುಖ ಖನಿಜ ಉತ್ಪಾದಕ ರಾಷ್ಟ್ರಗಳಲ್ಲಿ ಒಂದು.ವಿಶ್ವಪ್ರಸಿದ್ಧ ಆಂಡಿಸ್ ಪರ್ವತ ಶ್ರೇಣಿಯಲ್ಲಿರುವ ಖನಿಜ ಪಟ್ಟಿಗಳು ಅರ್ಜೆಂಟಿನಾಕ್ಕೆ ಭಾರಿ ವರದಾನವಾಗಿವೆ.
ಪ್ರಮುಖ ನಿಕ್ಷೇಪಗಳು: ಸಾಂತಾ ಕ್ರೂಜ್ ಜುಜುಯ್ ಮತ್ತು ಸಾನ್ ಜುವಾನ್ ಪ್ರಾಂತ್ಯಗಳಲ್ಲಿ ಬೆಳ್ಳಿಯ ಜೊತೆಗೆ ಚಿನ್ನ, ತಾಮ್ರ ಮತ್ತು ಸೀಸದ ಗಣಿಗಾರಿಕೆ ದೊಡ್ಡ ಮಟ್ಟದಲ್ಲಿ ನಡೆಯುತ್ತಿದೆ.ಮೆಕ್ಸಿಕೋ ಮತ್ತು ಚೀನಾ ಬಿಟ್ಟರೆ ದಕ್ಷಿಣ ಅಮೆರಿಕಾದಲ್ಲಿ ಪೆರು ಮತ್ತು ಬೊಲಿವಿಯಾದೊಂದಿಗೆ ಅರ್ಜೆಂಟಿನಾ ಕೂಡ ಬೆಳ್ಳಿ ಉತ್ಪಾದನೆಯಲ್ಲಿ ಮುಂಚೂಣಿಯಲ್ಲಿದೆ.ಹೀಗೆ ಅರ್ಜೆಂಟಿನಾ ಎಂಬ ಹೆಸರು ಕೇವಲ ಒಂದು ಭೌಗೋಳಿಕ ಗುರುತಲ್ಲ ಅದು ಆ ದೇಶದ ಇತಿಹಾಸ ಸಂಸ್ಕೃತಿ ಮತ್ತು ಆರ್ಥಿಕತೆಯ ಬೆನ್ನೆಲುಬು.
