ನಮ್ಮ ಹಿರಿಯರು ಯಾವಾಗಲೂ ಒಂದು ಮಾತನ್ನು ಹೇಳುತ್ತಾರೆ, ಅದೇನೆಂದರೆ ಆಹಾರವನ್ನು ಕುಳಿತು ತಿನ್ನಬೇಕು ಮತ್ತು ನೀರನ್ನು ಕುಳಿತು ಕುಡಿಯಬೇಕು. ಆದರೆ ಇಂದಿನ ಇಂಟರ್ನೆಟ್ ಯುಗದ ಬ್ಯುಸಿ ಲೈಫ್‌ಸ್ಟೈಲ್‌ನಲ್ಲಿ ನಾವೆಲ್ಲರೂ ನಿಂತ ಜಾಗದಲ್ಲೇ ಗಟಗಟನೇ ನೀರು ಕುಡಿಯುವುದನ್ನು ರೂಢಿ ಮಾಡಿಕೊಂಡಿದ್ದೇವೆ. ಮೇಲ್ನೋಟಕ್ಕೆ ಇದು ಸಾಮಾನ್ಯ ಎನಿಸಿದರೂ, ನಿಂತುಕೊಂಡು ನೀರು ಕುಡಿಯುವುದು ನಮ್ಮ ದೇಹದ ಪ್ರಮುಖ ಅಂಗಗಳ ಮೇಲೆ ಅತ್ಯಂತ ಕೆಟ್ಟ ಪರಿಣಾಮ ಬೀರುತ್ತದೆ ಎಂದು ವೈದ್ಯಕೀಯ ವಿಜ್ಞಾನ ಮತ್ತು ಆಯುರ್ವೇದ ಎರಡೂ ಎಚ್ಚರಿಸುತ್ತವೆ. ನಿಂತು ನೀರು ಕುಡಿಯುವುದರಿಂದ ಆರೋಗ್ಯಕ್ಕೆ ಉಂಟಾಗುವ ಪ್ರಮುಖ ತೊಂದರೆಗಳು ಇಲ್ಲಿವೆ.
ಜೀರ್ಣಕ್ರಿಯೆಯ ಮೇಲೆ ಗಂಭೀರ ಪರಿಣಾಮ
ನಾವು ನಿಂತುಕೊಂಡು ನೀರು ಕುಡಿದಾಗ, ಆ ನೀರು ಯಾವುದೇ ಅಡೆತಡೆಯಿಲ್ಲದೆ ಅತ್ಯಂತ ವೇಗವಾಗಿ ನೇರವಾಗಿ ನಮ್ಮ ಜಠರ ಮತ್ತು ಅನ್ನನಾಳಕ್ಕೆ ಧುಮುಕುತ್ತದೆ. ಇದರಿಂದಾಗಿ ಜೀರ್ಣಾಂಗ ವ್ಯವಸ್ಥೆಯ ಸ್ನಾಯುಗಳ ಮೇಲೆ ತೀವ್ರ ಒತ್ತಡ ಉಂಟಾಗುತ್ತದೆ. ಈ ಪ್ರಕ್ರಿಯೆಯು ಹೊಟ್ಟೆಯ ಆಮ್ಲಗಳ ಸಮತೋಲನವನ್ನು ಕೆಡಿಸುವುದರಿಂದ ಗ್ಯಾಸ್ಟ್ರಿಕ್, ಅಜೀರ್ಣ ಮತ್ತು ಎದೆಯುರಿಯಂತಹ ಸಮಸ್ಯೆಗಳಿಗೆ ಪ್ರಮುಖ ಕಾರಣವಾಗುತ್ತದೆ.
ಕಿಡ್ನಿ ಆರೋಗ್ಯಕ್ಕೆ ದಕ್ಕೆ
ಕುಳಿತು ನೀರು ಕುಡಿದಾಗ ನಮ್ಮ ದೇಹವು ನೀರನ್ನು ಸರಿಯಾಗಿ ಫಿಲ್ಟರ್ (ಶುದ್ಧೀಕರಣ) ಮಾಡಲು ಅನುಕೂಲ ಮಾಡಿಕೊಡುತ್ತದೆ. ಆದರೆ ನಿಂತು ನೀರು ಕುಡಿಯುವುದರಿಂದ ನೀರು ಅತಿ ವೇಗವಾಗಿ ಮೂತ್ರಕೋಶದ ಕಡೆಗೆ ಸಾಗುತ್ತದೆ. ಇದರಿಂದಾಗಿ ಕಿಡ್ನಿಗಳಿಗೆ ನೀರನ್ನು ಸರಿಯಾಗಿ ಫಿಲ್ಟರ್ ಮಾಡಲು ಸಾಧ್ಯವಾಗುವುದಿಲ್ಲ. ಪರಿಣಾಮವಾಗಿ ನೀರಿನಲ್ಲಿರುವ ಕಲ್ಮಶಗಳು ರಕ್ತ ಮತ್ತು ಮೂತ್ರಕೋಶದಲ್ಲೇ ಉಳಿದುಕೊಂಡು, ಭವಿಷ್ಯದಲ್ಲಿ ಮೂತ್ರನಾಳದ ಸೋಂಕು (UTI) ಅಥವಾ ಕಿಡ್ನಿ ಸ್ಟೋನ್ ಸಮಸ್ಯೆಗೆ ದಾರಿ ಮಾಡಿಕೊಡುತ್ತದೆ.
ಸಂದಿವಾತ ಅಥವಾ ಕೀಲು ನೋವಿನ ಅಪಾಯ
ನಿಂತು ನೀರು ಕುಡಿಯುವ ಅಭ್ಯಾಸವು ದೇಹದ ದ್ರವ ಪದಾರ್ಥಗಳ ಸಮತೋಲನವನ್ನು ಏರುಪೇರು ಮಾಡುತ್ತದೆ. ಇದು ಕೀಲುಗಳಲ್ಲಿನ ಅಗತ್ಯ ದ್ರವವನ್ನು ಕಡಿಮೆ ಮಾಡಿ, ಅಲ್ಲಿ ಕಲ್ಮಶಗಳು ಶೇಖರಣೆಯಾಗುವಂತೆ ಮಾಡುತ್ತದೆ. ಇದರಿಂದಾಗಿ ವಯಸ್ಸಾಗುತ್ತಿದ್ದಂತೆ ಮೊಣಕಾಲು ನೋವು, ಕೀಲು ನೋವು ಮತ್ತು ಸಂಧಿವಾತದ (ಆರ್ಥ್ರೈಟಿಸ್)ಂತಹ ತೀವ್ರ ಆರೋಗ್ಯ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ.
ಶ್ವಾಸಕೋಶ ಮತ್ತು ಹೃದಯಕ್ಕೆ ತೊಂದರೆ
ವೇಗವಾಗಿ ನಿಂತು ನೀರು ಕುಡಿಯುವಾಗ ನಮ್ಮ ಉಸಿರಾಟದ ಪ್ರಕ್ರಿಯೆಗೆ ಕ್ಷಣಕಾಲ ಅಡ್ಡಿಯಾಗುತ್ತದೆ. ಇದು ಶ್ವಾಸಕೋಶ ಮತ್ತು ಹೃದಯದ ಕಾರ್ಯನಿರ್ವಹಣೆಯ ಮೇಲೆ ಹೆಚ್ಚುವರಿ ಒತ್ತಡವನ್ನು ಹೇರುತ್ತದೆ. ದೇಹಕ್ಕೆ ಅಗತ್ಯವಿರುವ ಆಮ್ಲಜನಕದ ಪೂರೈಕೆಯಲ್ಲೂ ಏರುಪೇರಾಗುವ ಸಾಧ್ಯತೆ ಇರುತ್ತದೆ.
ಹಾಗಾಗಿ, ಆರೋಗ್ಯವಾಗಿರಲು ಯಾವಾಗಲೂ ಆರಾಮವಾಗಿ ಕುಳಿತು, ನಿಧಾನವಾಗಿ ಸಿಪ್ ಮಾಡುತ್ತಾ ನೀರು ಕುಡಿಯುವ ಹಳೆಯ ಪದ್ಧತಿಯನ್ನು ಮರುರೂಢಿಸಿಕೊಳ್ಳುವುದು ಇಂದಿನ ತುರ್ತು ಅಗತ್ಯವಾಗಿದೆ.
