ಬೆಂಗಳೂರು: ಐಪಿಎಲ್ ಅಂಗಳದಲ್ಲಿ ಈ ಸಲ ಕಪ್ ನಮ್ಮದೇ ಎಂದು 2025ರಲ್ಲಿ ಟ್ರೋಫಿ ಗೆದ್ದು ಇತಿಹಾಸ ಬರೆದಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ, ಈಗ ಮಾರಾಟದ ವಿಚಾರದಲ್ಲೂ ವಿಶ್ವ ದಾಖಲೆ ಬರೆದಿದೆ. ಮದ್ಯದ ದೈತ್ಯ ಕಂಪನಿ ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (USL), ತನ್ನ 100 ಪ್ರತಿಶತ ಪಾಲನ್ನು ಆದಿತ್ಯ ಬಿರ್ಲಾ ಗ್ರೂಪ್ ನೇತೃತ್ವದ ಒಕ್ಕೂಟಕ್ಕೆ ಬರೋಬ್ಬರಿ 16,706 ಕೋಟಿ ರೂಪಾಯಿಗೆ (1.78 ಬಿಲಿಯನ್ ಡಾಲರ್) ಮಾರಾಟ ಮಾಡಿದೆ
ಯಾರು ಈ ಹೊಸ ಮಾಲೀಕರು?
ಆರ್‌ಸಿಬಿಯನ್ನು ಖರೀದಿಸಿರುವ ಈ ಬೃಹತ್ ಒಕ್ಕೂಟದಲ್ಲಿ ಹಲವು ದಿಗ್ಗಜ ಕಂಪನಿಗಳಿವೆ:
ಆದಿತ್ಯ ಬಿರ್ಲಾ ಗ್ರೂಪ್ (ABG): ಕುಮಾರ್ ಮಂಗಲಂ ಬಿರ್ಲಾ ನೇತೃತ್ವದ ಭಾರತದ ಪ್ರಮುಖ ಉದ್ಯಮ ಸಂಸ್ಥೆ.
ಟೈಮ್ಸ್ ಆಫ್ ಇಂಡಿಯಾ ಗ್ರೂಪ್: ಭಾರತದ ಅತಿದೊಡ್ಡ ಮಾಧ್ಯಮ ಸಂಸ್ಥೆ.
ಬೋಲ್ಟ್ ವೆಂಚರ್ಸ್: ಅಮೆರಿಕದ ಖ್ಯಾತ ಹೂಡಿಕೆದಾರ ಡೇವಿಡ್ ಬ್ಲಿಟ್ಜರ್ ಒಡೆತನದ ಸಂಸ್ಥೆ.
ಬ್ಲಾಕ್‌ಸ್ಟೋನ್ (Blackstone): ಜಗತ್ತಿನ ಪ್ರಸಿದ್ಧ ಖಾಸಗಿ ಇಕ್ವಿಟಿ ಸಂಸ್ಥೆ.
ಈ ಒಪ್ಪಂದವು ಆರ್‌ಸಿಬಿಯ ಪುರುಷರ ತಂಡ (IPL) ಮತ್ತು ಮಹಿಳಾ ತಂಡ (WPL) ಎರಡನ್ನೂ ಒಳಗೊಂಡಿದೆ. ಈ ಮೊತ್ತವು ಐಪಿಎಲ್‌ನ ಲಕ್ನೋ ಮತ್ತು ಅಹಮದಾಬಾದ್ ತಂಡಗಳ ಒಟ್ಟು ಮೌಲ್ಯಕ್ಕಿಂತಲೂ ಹೆಚ್ಚಾಗಿರುವುದು ವಿಶೇಷ
ತಂಡದ ಮಾಲೀಕತ್ವ ಬದಲಾದ ತಕ್ಷಣ ಅಭಿಮಾನಿಗಳಲ್ಲಿ ಮೂಡಿದ್ದ ದೊಡ್ಡ ಪ್ರಶ್ನೆ ಎಂದರೆ ತಂಡದ ಹೆಸರು ಬದಲಾಗುತ್ತಾ? ಎಂಬುದು. ಆದರೆ, ಆರ್‌ಸಿಬಿ ಅಭಿಮಾನಿಗಳಿಗೆ ಒಂದು ಸಿಹಿ ಸುದ್ದಿ ಇದೆ. ಆದಿತ್ಯ ಬಿರ್ಲಾ ಗ್ರೂಪ್‌ನ ಪ್ರಮುಖ ವ್ಯಕ್ತಿ ಅನನ್ಯ ಬಿರ್ಲಾ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಒಂದು ಪೋಸ್ಟ್ ಹಂಚಿಕೊಂಡಿದ್ದು, ತಂಡದ ಹೆಸರು ಬದಲಾಗುವುದಿಲ್ಲ ಎಂಬ ಸುದ್ದಿಯನ್ನು ಖಚಿತಪಡಿಸಿದ್ದಾರೆ. ಬೆಂಗಳೂರಿನ ಜನರ ಭಾವನೆ ಮತ್ತು ಆರ್‌ಸಿಬಿ ಬ್ರ್ಯಾಂಡ್ ಮೌಲ್ಯವನ್ನು ಹಾಗೆಯೇ ಉಳಿಸಿಕೊಳ್ಳಲು ಹೊಸ ಮಾಲೀಕರು ನಿರ್ಧರಿಸಿದ್ದಾರೆ.
ಅನನ್ಯ ಬಿರ್ಲಾ ಆಸ್ತಿ ಎಷ್ಟು ಗೊತ್ತಾ?
ಆರ್‌ಸಿಬಿಯ ಗ್ಲಾಮರಸ್ ಫೇಸ್ ಆಗಿ ಮಿಂಚುತ್ತಿರುವ ಅನನ್ಯ ಬಿರ್ಲಾ ಅವರ ಆಸ್ತಿ ಮತ್ತು ಸಾಧನೆಗಳ ವಿವರ ಹೀಗಿದೆ:
ನಿವ್ವಳ ಮೌಲ್ಯ: ಅನನ್ಯ ಅವರ ವೈಯಕ್ತಿಕ ಆಸ್ತಿ ಮೌಲ್ಯ ಸುಮಾರು ₹1,770 ಕೋಟಿ.
ಸ್ವಂತ ಉದ್ಯಮ: 17ನೇ ವಯಸ್ಸಿನಲ್ಲೇ ಸ್ವತಂತ್ರ ಮೈಕ್ರೋಫಿನ್ ಆರಂಭಿಸಿ, ಇಂದು ಅದನ್ನು ₹13,500 ಕೋಟಿಗೂ ಅಧಿಕ ಮೌಲ್ಯದ ಕಂಪನಿಯನ್ನಾಗಿ ಬೆಳೆಸಿದ್ದಾರೆ. ಇತ್ತೀಚೆಗಷ್ಟೇ ಈ ಕಂಪನಿ ₹3,000 ಕೋಟಿಯ IPO (ಷೇರು ಮಾರುಕಟ್ಟೆ ಪ್ರವೇಶ) ಗೆ ಸಿದ್ಧತೆ ನಡೆಸಿದೆ.
ಮುಂಬೈನ ಜತಿಯಾ ಹೌಸ್: ಇವರು ವಾಸಿಸುವ ಬಂಗಲೆಯ ಬೆಲೆ ಬರೋಬ್ಬರಿ ₹425 ಕೋಟಿ ಇದು ಮುಂಬೈನ ಮಲಬಾರ್ ಹಿಲ್ಸ್‌ನಲ್ಲಿದೆ.
ಕಾರುಗಳ ಸಂಗ್ರಹ: ಇವರ ಗ್ಯಾರೇಜ್‌ನಲ್ಲಿ ₹5 ಕೋಟಿ ಬೆಲೆಯ ಲ್ಯಾಂಬೋರ್ಗಿನಿ ಉರುಸ್, ರೇಂಜ್ ರೋವರ್ ವೋಗ್, ಪೋರ್ಷೆ ಬಾಕ್ಸ್‌ಸ್ಟರ್ ಎಸ್‌ ಮತ್ತು ಬಿಎಂಡಬ್ಲ್ಯೂ 7 ಸೀರೀಸ್ ಕಾರುಗಳಿವೆ.
