ಇಂದಿನ ದಿನಗಳಲ್ಲಿ ಮಕ್ಕಳನ್ನು ಖಾಸಗಿ ಶಾಲೆಗಳಿಗೆ ಸೇರಿಸುವುದು ಪೋಷಕರಿಗೆ ದೊಡ್ಡ ಆರ್ಥಿಕ ಸವಾಲಾಗಿ ಪರಿಣಮಿಸಿದೆ. ಭಾರತದಲ್ಲೇ ಪ್ರೈವೇಟ್ ಶಾಲಾ ಶುಲ್ಕಗಳು ಆಕಾಶ ಮುಟ್ಟುತ್ತಿರುವಾಗ, ವಿಶ್ವದ ದೊಡ್ಡಣ್ಣ ಅಮೆರಿಕದಲ್ಲಿ ಪ್ರೀ-ಸ್ಕೂಲ್ (Pre-School) ಫೀಸ್ ಕೇಳಿದರೆ ಖಂಡಿತ ನಿಮಗೂ ಶಾಕ್ ಆಗುತ್ತದೆ.
ಅಮೆರಿಕದಲ್ಲಿ ಪ್ರೀ-ಸ್ಕೂಲ್ (ಪೂರ್ವ ಪ್ರಾಥಮಿಕ) ಶಿಕ್ಷಣ ಎಷ್ಟು ದುಬಾರಿ ಎಂಬುದನ್ನು ಭಾರತೀಯ ಮೂಲದ ಕಂಟೆಂಟ್ ಕ್ರಿಯೇಟರ್ ಸೋನಲ್ ಚೌಧರಿ ಅವರು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದು, ಈ ವೀಡಿಯೋ ನೆಟ್ಟಿಗರ ಗಮನ ಸೆಳೆದಿದೆ. ಅಮೆರಿಕದ ಕನೆಕ್ಟಿಕಟ್ನ ಸಿಮ್ಸ್ಬರಿ ನಗರದಲ್ಲಿ ವಾಸಿಸುತ್ತಿರುವ ಸೋನಲ್, ತಮ್ಮ ಎರಡು ವರ್ಷದ ಮಗಳು ‘ಬಾನಿ’ಯ ಅಡ್ಮಿಷನ್ಗಾಗಿ ಖಾಸಗಿ ಪ್ರೀ-ಸ್ಕೂಲ್ಗೆ ಭೇಟಿ ನೀಡಿದ್ದ ವೇಳೆ ಈ ಅನುಭವವಾಗಿದೆ.
https://www.instagram.com/reel/DbpB5w7BBUf/
https://www.facebook.com/watch/?v=1980105996011373
ದಿನಕ್ಕೆ ಕೇವಲ 3 ಗಂಟೆ ಕ್ಲಾಸ್, ಲಕ್ಷಗಳಲ್ಲಿ ಫೀಸ್
ಸೋನಲ್ ವಿವರಿಸಿರುವಂತೆ, ಅವರು ಭೇಟಿ ನೀಡಿದ 68 ವರ್ಷಗಳ ಇತಿಹಾಸವಿರುವ ಖಾಸಗಿ ಪ್ರೀ-ಸ್ಕೂಲ್ನಲ್ಲಿ ಪ್ರತಿ 8 ಮಕ್ಕಳಿಗೆ ಇಬ್ಬರು ಶಿಕ್ಷಕರನ್ನು ನೇಮಿಸಲಾಗುತ್ತದೆ. ಬೆಳಿಗ್ಗೆ 8:45 ರಿಂದ 11:45 ರವರೆಗೆ, ಅಂದರೆ ದಿನಕ್ಕೆ ಕೇವಲ 3 ಗಂಟೆಗಳ ಕಾಲ ಮಾತ್ರ ತರಗತಿಗಳು ನಡೆಯುತ್ತವೆ. ಆಟೋಟಗಳು, ಸಂಗೀತ, ಯೋಗ, ಚಿತ್ರಕಲೆ ಮತ್ತು ಬೋರ್ಡ್ ಚಟುವಟಿಕೆಗಳ ಮೂಲಕ ಮಕ್ಕಳಿಗೆ ಒತ್ತಡವಿಲ್ಲದೆ ಶಿಕ್ಷಣ ನೀಡಲಾಗುತ್ತದೆ.
ಆದರೆ, ಈ 3 ಗಂಟೆಗಳ ತರಗತಿಗೆ ನಿಗದಿಪಡಿಸಿರುವ ಶುಲ್ಕ ಮಾತ್ರ ಬೆಚ್ಚಿಬೀಳಿಸುವಂತಿದೆ:
ವಾರಕ್ಕೆ 2 ದಿನದ ತರಗತಿಗೆ: ವರ್ಷಕ್ಕೆ ಸುಮಾರು ₹3.9 ಲಕ್ಷ
ವಾರಕ್ಕೆ 3 ದಿನದ ತರಗತಿಗೆ: ವರ್ಷಕ್ಕೆ ಸುಮಾರು ₹5.6 ಲಕ್ಷ
ವಾರಕ್ಕೆ 4 ದಿನದ ತರಗತಿಗೆ: ವರ್ಷಕ್ಕೆ ಸುಮಾರು ₹7.4 ಲಕ್ಷ
ವಾರಕ್ಕೆ 5 ದಿನದ ತರಗತಿಗೆ: ವರ್ಷಕ್ಕೆ ಸುಮಾರು ₹9.3 ಲಕ್ಷ
ಇನ್ನು 3 ರಿಂದ 5 ವರ್ಷದ ಮಕ್ಕಳಿಗೂ ಸಹ ವಾರದ ದಿನಗಳ ಆಧಾರದ ಮೇಲೆ ₹3 ಲಕ್ಷದಿಂದ ₹7 ಲಕ್ಷದವರೆಗೆ ವಾರ್ಷಿಕ ಶುಲ್ಕ ವಿಧಿಸಲಾಗುತ್ತದೆ. ಮಗುವನ್ನು ಮುಂಚಿತವಾಗಿ ಶಾಲೆಗೆ ಬಿಡಲು ಅಥವಾ ಮಧ್ಯಾಹ್ನ ತಡವಾಗಿ ಕರೆದೊಯ್ಯಲು ಪ್ರತಿದಿನ ಹೆಚ್ಚುವರಿ ಶುಲ್ಕ ಪಾವತಿಸಬೇಕಾಗುತ್ತದೆ.
ಲಕ್ಷಗಳಲ್ಲಿ ಫೀಸ್: ಭಾರತದಲ್ಲಿ ‘ಮಾರುತಿ ಬ್ರೆಝಾ’ ಕಾರೇ ಸಿಗುತ್ತೆ
ಇನ್ನು ಶಾಲಾ ಶುಲ್ಕದ ವಿವರ ಕೇಳಿದ ಸೋನಲ್ ಸಂಪೂರ್ಣ ಅಚ್ಚರಿಗೊಂಡಿದ್ದಾರೆ. ಸೆಪ್ಟೆಂಬರ್ನಿಂದ ಜೂನ್ವರೆಗೆ ನಡೆಯುವ ಈ ಶೈಕ್ಷಣಿಕ ಅವಧಿಗೆ ನಿಗದಿಪಡಿಸಲಾದ ವಾರ್ಷಿಕ ಫೀಸ್ ಹೀಗಿದೆ:
ವಾರಕ್ಕೆ 2 ದಿನದ ತರಗತಿಗೆ: ವರ್ಷಕ್ಕೆ ಸುಮಾರು ₹4 ಲಕ್ಷ
ವಾರಕ್ಕೆ 5 ದಿನದ ತರಗತಿಗೆ: ವರ್ಷಕ್ಕೆ ಸುಮಾರು ₹9 ಲಕ್ಷ
ಅಮೆರಿಕದ ಖಾಸಗಿ ಪ್ರೀ-ಸ್ಕೂಲ್ನ ಒಂದು ವರ್ಷದ ಫೀಸ್, ಭಾರತದಲ್ಲಿ ಸಿಗುವ ಹೊಚ್ಚ ಹೊಸ ‘ಮಾರುತಿ ಬ್ರೆಝಾ’ ಕಾರಿನ ಬೆಲೆಗೆ ಸಮಾನವಾಗಿದೆ!
ಉಚಿತ ಸರ್ಕಾರಿ ಶಿಕ್ಷಣ vs ದುಬಾರಿ ಪ್ರೀ-ಸ್ಕೂಲ್
ಅಮೆರಿಕದಲ್ಲಿ ಕಿಂಡರ್ಗಾರ್ಟನ್ನಿಂದ 12ನೇ ತರಗತಿಯವರೆಗೆ (K-12) ಸರ್ಕಾರಿ ಶಾಲೆಗಳಲ್ಲಿ ಉಚಿತ ಶಿಕ್ಷಣ ಸಿಗುತ್ತದೆ. ಆದರೆ 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಪ್ರೀ-ಸ್ಕೂಲ್ಗಳು ಖಾಸಗಿಯಾಗಿ ನಡೆಯುವುದರಿಂದ ಅವುಗಳ ವೆಚ್ಚ ತೀರಾ ದುಬಾರಿಯಾಗಿರುತ್ತದೆ.
ಶುಲ್ಕ ಹೆಚ್ಚಿದ್ದರೂ, ಮಕ್ಕಳಿಗೆ ನೀಡುವ ವೈಯಕ್ತಿಕ ಗಮನ, ಶಿಕ್ಷಕರ ಅನುಪಾತ ಹಾಗೂ ಗುಣಮಟ್ಟದ ಸೌಲಭ್ಯಗಳನ್ನು ನೋಡಿದರೆ ಈ ಫೀಸ್ ಸಮಂಜಸ ಎನಿಸುತ್ತದೆ ಎಂದು ಸೋನಲ್ ಅಭಿಪ್ರಾಯಪಟ್ಟಿದ್ದಾರೆ. ಸದ್ಯ ಈ ವೀಡಿಯೋ ವೈರಲ್ ಆಗಿದ್ದು, ಭಾರತ ಮತ್ತು ಅಮೆರಿಕದ ಶಿಕ್ಷಣ ವೆಚ್ಚದ ಕುರಿತು ಸೋಶಿಯಲ್ ಮೀಡಿಯಾದಲ್ಲಿ ದೊಡ್ಡ ಮಟ್ಟದ ಚರ್ಚೆ ಆರಂಭವಾಗಿದೆ.
