ಬೆಂಗಳೂರು/ನ್ಯೂಯಾರ್ಕ್: ಜಗತ್ತಿನ ಇ-ಕಾಮರ್ಸ್ ದೈತ್ಯ ಅಮೆಜಾನ್ (Amazon) ಈಗ ಒಂದು ಕಡೆ ಖರ್ಚು ಕಡಿಮೆ ಮಾಡಲು ಉದ್ಯೋಗಿಗಳನ್ನು ಮನೆಗೆ ಕಳುಹಿಸುತ್ತಿದ್ದರೆ, ಮತ್ತೊಂದು ಕಡೆ ಭವಿಷ್ಯದ ತಂತ್ರಜ್ಞಾನವಾದ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಮೇಲೆ ಹಣದ ಹೊಳೆಯನ್ನೇ ಹರಿಸಲು ಮುಂದಾಗಿದೆ.
ಕಳೆದ ಬುಧವಾರವಷ್ಟೇ ಅಮೆಜಾನ್ ಸುಮಾರು 16,000 ಕಾರ್ಪೊರೇಟ್ ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸುವುದಾಗಿ ಘೋಷಿಸಿತ್ತು. ಆದರೆ, ಈ ಬೆನ್ನಲ್ಲೇ ಚಾಟ್ಜಿಪಿಟಿ (ChatGPT) ಸೃಷ್ಟಿಕರ್ತ ಸಂಸ್ಥೆಯಾದ ಓಪನ್ ಎಐ (OpenAI) ನಲ್ಲಿ ಬರೋಬ್ಬರಿ 50 ಬಿಲಿಯನ್ ಡಾಲರ್ (ಅಂದಾಜು 4.2 ಲಕ್ಷ ಕೋಟಿ ರೂಪಾಯಿ) ಹೂಡಿಕೆ ಮಾಡಲು ಅಮೆಜಾನ್ ಮಾತುಕತೆ ನಡೆಸುತ್ತಿದೆ ಎಂಬ ಸುದ್ದಿ ಹೊರಬಿದ್ದಿದೆ.
ಅಮೆಜಾನ್ ಸಿಇಒ ಆಂಡಿ ಜಾಸ್ಸಿ ಅವರು ನೇರವಾಗಿ ಓಪನ್ ಎಐ ಸಿಇಒ ಸ್ಯಾಮ್ ಆಲ್ಟ್ಮನ್ ಅವರೊಂದಿಗೆ ಮಾತುಕತೆ ನಡೆಸುತ್ತಿದ್ದಾರೆ. ಒಂದು ವೇಳೆ ಈ ಒಪ್ಪಂದ ಯಶಸ್ವಿಯಾದರೆ, ಓಪನ್ ಎಐ ಇತಿಹಾಸದಲ್ಲೇ ಅಮೆಜಾನ್ ಅತಿ ದೊಡ್ಡ ಹೂಡಿಕೆದಾರ ಸಂಸ್ಥೆಯಾಗಲಿದೆ.
ಓಪನ್ ಎಐ ಸಂಸ್ಥೆಯು ಒಟ್ಟು 100 ಬಿಲಿಯನ್ ಡಾಲರ್ ಹಣ ಸಂಗ್ರಹಿಸುವ ಗುರಿ ಹೊಂದಿದ್ದು, ಆ ಮೂಲಕ ಕಂಪನಿಯ ಮೌಲ್ಯವನ್ನು 830 ಬಿಲಿಯನ್ ಡಾಲರ್ಗೆ ಏರಿಸಲು ಯೋಜಿಸಿದೆ. ಈ ರೇಸ್ನಲ್ಲಿ ಸಾಫ್ಟ್ಬ್ಯಾಂಕ್ ಕೂಡ 30 ಬಿಲಿಯನ್ ಡಾಲರ್ ಹೂಡಿಕೆಗೆ ಸಜ್ಜಾಗಿದೆ.
ಉದ್ಯೋಗ ಕಡಿತದ ಬರೆ: ಅಕ್ಟೋಬರ್ನಲ್ಲಿ 14,000 ಜನರನ್ನು ತೆಗೆದುಹಾಕಿದ್ದ ಅಮೆಜಾನ್, ಈಗ ಮತ್ತೆ 16,000 ಜನರನ್ನು ವಜಾ ಮಾಡಿದೆ. ಇದು ಉದ್ಯೋಗಿಗಳಲ್ಲಿ ಆತಂಕ ಮೂಡಿಸಿದ್ದರೂ, ಕಂಪನಿಯು ತನ್ನ ಸಂಪೂರ್ಣ ಗಮನವನ್ನು ಐಟಿ ಮೂಲಸೌಕರ್ಯ ಮತ್ತು AI ಮೇಲೆ ಕೇಂದ್ರೀಕರಿಸುತ್ತಿದೆ.ಇದುವರೆಗೆ ಮೈಕ್ರೋಸಾಫ್ಟ್ ಜೊತೆ ಮಾತ್ರ ಗುರುತಿಸಿಕೊಂಡಿದ್ದ ಓಪನ್ ಎಐ, ಈಗ ಅಮೆಜಾನ್ನ ‘ವೆಬ್ ಸರ್ವೀಸಸ್’ (AWS) ಬಳಸಲು ಮುಂದಾಗಿದೆ. ಇದಕ್ಕಾಗಿ ಈಗಾಗಲೇ 38 ಬಿಲಿಯನ್ ಡಾಲರ್ ಮೊತ್ತದ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ.
ಅಮೆಜಾನ್ ಡಬಲ್ ಗೇಮ್?
ಅಚ್ಚರಿಯ ವಿಷಯವೆಂದರೆ, ಅಮೆಜಾನ್ ಕೇವಲ ಓಪನ್ ಎಐ ಮೇಲೆ ಮಾತ್ರವಲ್ಲದೆ, ಅದರ ಪ್ರತಿಸ್ಪರ್ಧಿ ಸಂಸ್ಥೆಯಾದ ಆಂಥ್ರೋಪಿಕ್ (Anthropic) ನಲ್ಲೂ ಈಗಾಗಲೇ 8 ಬಿಲಿಯನ್ ಡಾಲರ್ ಹೂಡಿಕೆ ಮಾಡಿದೆ. ಅಂದರೆ, ಎಐ ಲೋಕದ ಯಾವ ಕಂಪನಿ ಗೆದ್ದರೂ ಅಂತಿಮವಾಗಿ ಲಾಭ ಅಮೆಜಾನ್ಗೇ ಸಿಗುವಂತೆ ಕಂಪನಿಯು ತನ್ನ ದಾಳ ಉರುಳಿಸುತ್ತಿದೆ.ಅಮೆಜಾನ್ಗೆ ಈಗ ಮನುಷ್ಯರಿಗಿಂತ ಹೆಚ್ಚಾಗಿ ‘ಕೃತಕ ಬುದ್ಧಿಮತ್ತೆ’ (AI) ಮೇಲೆ ನಂಬಿಕೆ ಹೆಚ್ಚಾದಂತಿದೆ. ಉದ್ಯೋಗಿಗಳ ಸಂಬಳ ಉಳಿಸಿ, ಆ ಹಣವನ್ನು ಭವಿಷ್ಯದ ತಂತ್ರಜ್ಞಾನಕ್ಕೆ ಬಳಸಲು ಕಂಪನಿ ಸಿದ್ಧವಾಗಿದೆ.
16,000 ಉದ್ಯೋಗಿಗಳ ಮೇಲೆ ಇದರ ಪರಿಣಾಮವೇನು?
• ವಜಾ ಪ್ರಕ್ರಿಯೆ: ಈ ವಾರದಿಂದಲೇ ಅಮೆಜಾನ್ ಉದ್ಯೋಗಿಗಳಿಗೆ ಇಮೇಲ್ ಮೂಲಕ ನೋಟಿಸ್ ಕಳುಹಿಸಲು ಆರಂಭಿಸಿದೆ. ಇವರಲ್ಲಿ ಹೆಚ್ಚಿನವರು ಅಮೆಜಾನ್ ವೆಬ್ ಸರ್ವೀಸಸ್ (AWS) ಮತ್ತು ಕಾರ್ಪೊರೇಟ್ ವಿಭಾಗದವರು.
• ಪರಿಹಾರ (Severance): ವಜಾಗೊಂಡ ಉದ್ಯೋಗಿಗಳಿಗೆ ಅವರ ಅನುಭವದ ಆಧಾರದ ಮೇಲೆ ಕೆಲವು ತಿಂಗಳ ಸಂಬಳ, ಆರೋಗ್ಯ ವಿಮೆ ಮತ್ತು ಹೊಸ ಉದ್ಯೋಗ ಹುಡುಕಲು ಸಹಾಯ ಮಾಡುವುದಾಗಿ ಕಂಪನಿ ತಿಳಿಸಿದೆ.
OpenAI ಹೂಡಿಕೆಯಿಂದ ಅಮೆಜಾನ್’ಗೆ ಸಿಗುವ ಲಾಭವೇನು?
ಮೈಕ್ರೋಸಾಫ್ಟ್ ಈಗಾಗಲೇ ಓಪನ್ ಎಐನಲ್ಲಿ ದೊಡ್ಡ ಪಾಲು ಹೊಂದಿದೆ. ಆದರೂ ಅಮೆಜಾನ್ ಈಗ 50 ಬಿಲಿಯನ್ ಡಾಲರ್ ಹೂಡಿಕೆ ಮಾಡುತ್ತಿರುವುದು ಏಕೆ?
• ಕ್ಲೌಡ್ ಮಾರುಕಟ್ಟೆಯಲ್ಲಿ ಪ್ರಾಬಲ್ಯ: ಓಪನ್ ಎಐ ತನ್ನ ಡೇಟಾ ತರಬೇತಿಗಾಗಿ ಅಮೆಜಾನ್ನ AWS ಸರ್ವರ್ಗಳನ್ನು ಬಳಸಿದರೆ, ಅಮೆಜಾನ್ಗೆ ಬಿಲಿಯನ್ ಗಟ್ಟಲೆ ಆದಾಯ ಬರುತ್ತದೆ.
• ಅಲೆಕ್ಸಾ (Alexa) ಅಪ್ಗ್ರೇಡ್: ಅಮೆಜಾನ್ನ ‘ಅಲೆಕ್ಸಾ’ ಸದ್ಯಕ್ಕೆ ಚಾಟ್ಜಿಪಿಟಿಯಷ್ಟು ಬುದ್ಧಿವಂತವಾಗಿಲ್ಲ. ಓಪನ್ ಎಐ ತಂತ್ರಜ್ಞಾನ ಬಳಸಿ ಅಲೆಕ್ಸಾವನ್ನು ವಿಶ್ವದ ಅತ್ಯಂತ ಸ್ಮಾರ್ಟ್ ವಾಯ್ಸ್ ಅಸಿಸ್ಟೆಂಟ್ ಆಗಿ ಮಾಡಲು ಅಮೆಜಾನ್ ಯೋಜಿಸಿದೆ.
