ರೈಲು ಪ್ರಯಾಣ ಎಂದರೆ ಅನೇಕರಿಗೆ ಇಷ್ಟ. ಆದರೆ ಕೆಲವೊಮ್ಮೆ ನೀವು ಮಾಡುವ ಸಣ್ಣ ತಪ್ಪುಗಳು ನಿಮ್ಮ ಜೇಬಿಗೆ ಕತ್ತರಿ ಹಾಕಬಹುದು. ಇನ್ಮುಂದೆ ರೈಲಿನಲ್ಲಿ ಊಟ ಮಾಡುವಾಗ ಜಾಗರೂಕರಾಗಿರಲೇಬೇಕು. ಇಲ್ಲದಿದ್ದರೆ ನೀವು ಎಸೆಯುವ ಕಸಕ್ಕೆ ಬೀಳುವ ದಂಡವೇ ಬಹಳ ದುಬಾರಿಯಾಗಲಿದೆ. ‘ನಮ್ಮ ರೈಲು-ನಮ್ಮ ಸ್ವಚ್ಛತೆ’ ಎನ್ನುತ್ತಾ ರಂಗಕ್ಕಿಳಿದಿರುವ ಅಧಿಕಾರಿಗಳು, ಒಂದೇ ದಿನದಲ್ಲಿ 1400ಕ್ಕೂ ಹೆಚ್ಚು ಜನರಿಗೆ ಬಿಸಿ ಮುಟ್ಟಿಸಿ ಲಕ್ಷಾಂತರ ರೂಪಾಯಿ ದಂಡ ವಸೂಲಿ ಮಾಡಿದ್ದಾರೆ.
ಒಂದೇ ದಿನದಲ್ಲಿ 2.89 ಲಕ್ಷ ರೂಪಾಯಿ ದಂಡ
ರೈಲ್ವೆ ನಿಲ್ದಾಣಗಳನ್ನು ಮತ್ತು ರೈಲುಗಳನ್ನು ಸ್ವಚ್ಛವಾಗಿಡಲು ರೈಲ್ವೆ ಇಲಾಖೆಯು ‘ಕ್ಲೀನ್ ರೈಲ್ವೆ’ ಕಾರ್ಯಕ್ರಮವನ್ನು ಯುದ್ಧೋಪಾದಿಯಲ್ಲಿ ಕೈಗೆತ್ತಿಕೊಂಡಿದೆ. ಇದರ ಭಾಗವಾಗಿ ಕೇವಲ ಒಂದೇ ದಿನದಲ್ಲಿ ವಿವಿಧ ರೈಲ್ವೆ ನಿಲ್ದಾಣಗಳಲ್ಲಿ ತಪಾಸಣೆ ನಡೆಸಿದಾಗ, ಬರೋಬ್ಬರಿ 1,447 ಮಂದಿ ನಿಯಮ ಉಲ್ಲಂಘಿಸಿ ಸಿಕ್ಕಿಬಿದ್ದಿದ್ದಾರೆ. ಇವರಿಂದ ರೈಲ್ವೆ ಅಧಿಕಾರಿಗಳು ಒಟ್ಟು 2,89,400 ರೂಪಾಯಿ ದಂಡ ವಸೂಲಿ ಮಾಡಿದ್ದಾರೆ. ಅಂದರೆ ಸರಾಸರಿ ಪ್ರತಿ ವ್ಯಕ್ತಿಯಿಂದ 200 ರೂಪಾಯಿ ದಂಡ ವಸೂಲಿ ಮಾಡಲಾಗುತ್ತಿದೆ.
ಕುಟುಂಬದೊಂದಿಗೆ ಊಟ ಮಾಡಿ ಕಸ ಅಲ್ಲೇ ಎಸೆದರೆ ದಂಡ ಗ್ಯಾರಂಟಿ!
ಇತ್ತೀಚೆಗೆ ಒಂದೇ ಕುಟುಂಬದ ಸದಸ್ಯರು ಮನೆಯಿಂದ ತಂದಿದ್ದ ಆಹಾರವನ್ನು ರೈಲಿನಲ್ಲಿ ಸೇವಿಸಿ, ಬಳಿಕ ಉಳಿದ ವ್ಯರ್ಥ ಪದಾರ್ಥಗಳನ್ನು ಮತ್ತು ಪ್ಲಾಸ್ಟಿಕ್ ಕವರ್‌ಗಳನ್ನು ತಮ್ಮ ಸೀಟಿನ ಕೆಳಗೆ ಎಸೆದಿದ್ದರು. ಇದನ್ನು ಗಮನಿಸಿದ ರೈಲ್ವೆ ಸಿಬ್ಬಂದಿ ತಕ್ಷಣವೇ ಅವರಿಗೆ ಭಾರಿ ದಂಡ ವಿಧಿಸಿದರು. “ನೀವು ಊಟ ಎಲ್ಲದ್ದನ್ನಾದರೂ ಮಾಡಿ, ಆದರೆ ಕಸವನ್ನು ಮಾತ್ರ ಡಸ್ಟ್‌ಬಿನ್‌ನಲ್ಲೇ (ಕಸದ ಬುಟ್ಟಿ) ಹಾಕಬೇಕು” ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ರೈಲ್ವೆ ಇಲಾಖೆಯ ಎಚ್ಚರಿಕೆಗಳು
- ರೈಲ್ವೆ ಆವರಣದಲ್ಲಿ ಸಿಸಿಟಿವಿ ಕ್ಯಾಮೆರಾಗಳು ಮತ್ತು ನಾಗರಿಕ ಉಡುಪಿನಲ್ಲಿರುವ (Civil Dress) ಸಿಬ್ಬಂದಿ ಪ್ರಯಾಣಿಕರ ಚಲನವಲನಗಳನ್ನು ಗಮನಿಸುತ್ತಿರುತ್ತಾರೆ.
- ಪ್ಲಾಸ್ಟಿಕ್ ತ್ಯಾಜ್ಯ ಮತ್ತು ಉಳಿದ ಆಹಾರ ಪದಾರ್ಥಗಳಿಂದ ಪರಿಸರಕ್ಕೆ ಮಾತ್ರವಲ್ಲದೆ, ಇತರ ಪ್ರಯಾಣಿಕರ ಆರೋಗ್ಯಕ್ಕೂ ಅಪಾಯ ಉಂಟಾಗುತ್ತದೆ.
- ರೈಲ್ವೆ ಕಾಯ್ದೆಯ ಪ್ರಕಾರ ರೈಲ್ವೆ ಆವರಣವನ್ನು ಅಶುಚಿಗೊಳಿಸುವುದು ಶಿಕ್ಷಾರ್ಹ ಅಪರಾಧ.
- ನೀವು ಊಟ ಮಾಡಿದ ನಂತರ ಬರುವ ಕಸವನ್ನು ಒಂದು ಕವರ್‌ನಲ್ಲಿ ಹಾಕಿ, ನಿಮ್ಮ ಬೋಗಿಯ ಕೊನೆಯಲ್ಲಿರುವ ಡಸ್ಟ್‌ಬಿನ್‌ನಲ್ಲಿ ಮಾತ್ರ ಹಾಕಿ.
ಇದರಿಂದ ನಿಮ್ಮ ಪ್ರಯಾಣ ಸುಖಕರವಾಗಿರುವುದಲ್ಲದೆ, ದಂಡ ಪಾವತಿಸುವ ತಲೆನೋವು ಇರುವುದಿಲ್ಲ.
