ಗೌತಮ್ ಅದಾನಿ ಮತ್ತೆ ನಂಬರ್‌ 1: ಮೂರು ವರ್ಷಗಳ ಬಳಿಕ ಫೋರ್ಬ್ಸ್‌ 2026ರ ಭಾರತದ 100 ಶ್ರೀಮಂತರ ಪಟ್ಟಿಯಲ್ಲಿ ಅದಾನಿ ಗ್ರೂಪ್‌ ಅಧ್ಯಕ್ಷ ಗೌತಮ್ ಅದಾನಿ ಮತ್ತೆ ಅಗ್ರಸ್ಥಾನಕ್ಕೇರಿದ್ದಾರೆ. ಅದಾನಿ ಮತ್ತು ಅವರ ಕುಟುಂಬದ ಒಟ್ಟು ಆಸ್ತಿ ಮೌಲ್ಯ ₹10.85 ಲಕ್ಷ ಕೋಟಿ (112.7 ಬಿಲಿಯನ್ ಡಾಲರ್) ಎಂದು ಅಂದಾಜಿಸಲಾಗಿದೆ.
ಕಳೆದ ವರ್ಷಕ್ಕೆ ಹೋಲಿಸಿದರೆ ಅದಾನಿ ಕುಟುಂಬದ ಸಂಪತ್ತು ₹1.99 ಲಕ್ಷ ಕೋಟಿ (20.7 ಬಿಲಿಯನ್ ಡಾಲರ್) ಹೆಚ್ಚಾಗಿದೆ. ಡಾಲರ್ ಲೆಕ್ಕದಲ್ಲೂ ಈ ವರ್ಷ ಪಟ್ಟಿಯಲ್ಲಿರುವ ಉದ್ಯಮಿಗಳ ಪೈಕಿ ಅತಿ ಹೆಚ್ಚು ಸಂಪತ್ತು ಹೆಚ್ಚಿಸಿಕೊಂಡವರು ಗೌತಮ್ ಅದಾನಿ.
ಆದರೆ 2022ರಲ್ಲಿ ದಾಖಲಾಗಿದ್ದ ₹14.43 ಲಕ್ಷ ಕೋಟಿ (150 ಬಿಲಿಯನ್ ಡಾಲರ್) ಸಂಪತ್ತಿನ ಗರಿಷ್ಠ ಮಟ್ಟಕ್ಕೆ ಹೋಲಿಸಿದರೆ, ಅದಾನಿ ಅವರ ಪ್ರಸ್ತುತ ಸಂಪತ್ತು ಇನ್ನೂ ಕಡಿಮೆಯಾಗಿದೆ.
ಮುಖೇಶ್ ಅಂಬಾನಿಗೆ 2ನೇ ಸ್ಥಾನ
ರಿಲಯನ್ಸ್ ಇಂಡಸ್ಟ್ರೀಸ್‌ ಅಧ್ಯಕ್ಷ ಮುಖೇಶ್ ಅಂಬಾನಿ ಈ ಬಾರಿ ಎರಡನೇ ಸ್ಥಾನಕ್ಕೆ ಇಳಿದಿದ್ದಾರೆ. ಅವರ ಒಟ್ಟು ಸಂಪತ್ತು ₹1.80 ಲಕ್ಷ ಕೋಟಿ ಕಡಿಮೆಯಾಗಿದ್ದು, ₹8.3 ಲಕ್ಷ ಕೋಟಿಗೆ ತಲುಪಿದೆ.
ರಿಲಯನ್ಸ್‌ನ ವಿವಿಧ ವ್ಯವಹಾರಗಳಲ್ಲಿನ ಲಾಭದ ಪ್ರಮಾಣದ ಮೇಲಿನ ಒತ್ತಡ ಕಂಪನಿಯ ಷೇರುಗಳ ಮೇಲೆ ಪರಿಣಾಮ ಬೀರಿದೆ ಎಂದು ಫೋರ್ಬ್ಸ್‌ ಹೇಳಿದೆ.
ನಾಲ್ಕು ಹೊಸ ಹೆಸರುಗಳು, ಅನಿಲ್ ಅಗರ್ವಾಲ್ ವಾಪಸ್
ಈ ವರ್ಷದ ಪಟ್ಟಿಗೆ ನಾಲ್ಕು ಹೊಸ ಹೆಸರುಗಳು ಸೇರ್ಪಡೆಯಾಗಿವೆ. ಇಂಡೋ-ಎಂಐಎಂನ ಕೃಷ್ಣ ಶಿವಕುಲ, ಅಪಾರ್ ಇಂಡಸ್ಟ್ರೀಸ್‌ನ ಕುಶಾಲ್ ಮತ್ತು ಚೈತನ್ಯ ದೇಸಾಯಿ, ಆದಿತ್ಯ ಇನ್ಫೋಟೆಕ್‌ನ ಆದಿತ್ಯ ಖೇಮ್ಕಾ ಹಾಗೂ ಬಾಲಾಜಿ ವೇಫರ್ಸ್‌ನ ವಿರಾಣಿ ಸಹೋದರರು ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.
ಕುಶಾಲ್ ಮತ್ತು ಚೈತನ್ಯ ದೇಸಾಯಿ ಅವರ ಒಟ್ಟು ಆಸ್ತಿ ₹40,898 ಕೋಟಿ ಎಂದು ಅಂದಾಜಿಸಲಾಗಿದೆ. ಆದಿತ್ಯ ಖೇಮ್ಕಾ ಕುಟುಂಬದ ಸಂಪತ್ತು ₹34,643 ಕೋಟಿ ಇದೆ.ಇದೇ ವೇಳೆ ಅನಿಲ್ ಅಗರ್ವಾಲ್ ಕೂಡ ಈ ವರ್ಷದ ಪಟ್ಟಿಗೆ ಮತ್ತೆ ಮರಳಿದ್ದಾರೆ.
100 ಶ್ರೀಮಂತರ ಒಟ್ಟು ಸಂಪತ್ತು ಎಷ್ಟು?
ಈ ವರ್ಷ ಭಾರತೀಯ ರೂಪಾಯಿ ಮೌಲ್ಯ ಶೇ.8.5ರಷ್ಟು ಕುಸಿದಿದ್ದು, ಷೇರು ಮಾರುಕಟ್ಟೆಯೂ ಶೇ.9.5ರಷ್ಟು ಇಳಿಕೆಯಾಗಿದೆ. ಆದರೂ ಭಾರತದ 100 ಶ್ರೀಮಂತರ ಒಟ್ಟು ಸಂಪತ್ತು ಸುಮಾರು ₹96.23 ಲಕ್ಷ ಕೋಟಿಯಷ್ಟೇ ಉಳಿದಿದೆ.
ಈ ಒಟ್ಟು ಸಂಪತ್ತಿನಲ್ಲಿ ಗೌತಮ್ ಅದಾನಿ ಮತ್ತು ಕುಟುಂಬದ ಪಾಲು ಸುಮಾರು ಶೇ.11.3ರಷ್ಟಿದೆ. ಮುಖೇಶ್ ಅಂಬಾನಿ ಮತ್ತು ಕುಟುಂಬದ ಪಾಲು ಸುಮಾರು ಶೇ.8.6ರಷ್ಟಿದೆ.
