ಉತ್ತರ ಪ್ರದೇಶ ಸರ್ಕಾರದ ಮಹತ್ವಾಕಾಂಕ್ಷಿ ಯೋಜನೆ ಧೂಳು ಹಿಡಿಯುತ್ತಿದೆ. ಹೌದು ಸುಮಾರು 12 ಕೋಟಿ ಮೌಲ್ಯದ ಎಲೆಕ್ಟ್ರಿಕ್ ಡಬಲ್ ಡೆಕ್ಕರ್ ಎಸಿ ಬಸ್ಗಳು ವರ್ಕ್ ಶಾಪ್ ಸೇರಿವೆ. ಇದು ಉತ್ತರ ಪ್ರದೇಶದ ಯೋಗಿ ಮಾದರಿಯ ಆಡಳಿತವೇ? ಎಂದು ನೆಟ್ಟಿಗರು ಪ್ರಶ್ನೆ ಎತ್ತಿದ್ದಾರೆ.
ಸುಮಾರು 12 ಕೋಟಿ ವೆಚ್ಚದ 8 ಎಸಿ ಡಬಲ್ ಡೆಕ್ಕರ್ ಎಲೆಕ್ಟ್ರಿಕ್ ಬಸ್ಗಳಲ್ಲಿ 6 ಚಾರ್ಜಿಂಗ್ ನಿಲ್ದಾಣದ ಕೊರತೆಯಿಂದಾಗಿ ಕಳೆದ ಹಲವಾರು ತಿಂಗಳುಗಳಿಂದ ಬಾರಾಬಂಕಿ ಬಸ್ ನಿಲ್ದಾಣ ಮತ್ತು ವರ್ಕ್ ಶಾಪ್ನಲ್ಲಿಯೇ ನಿಂತಿವೆ. ಕಳೆದ ವರ್ಷ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಈ ಬಸ್ಗಳಿಗೆ ಚಾಲನೆ ನೀಡಿದ್ದರು. ಲಕ್ನೋದಿಂದ ಅಂತರ್-ನಗರ ಸಂಪರ್ಕವನ್ನು ಹೆಚ್ಚಿಸುವ ಉದ್ದೇಶವನ್ನು ಇವು ಹೊಂದಿದ್ದವು.
ಆದರೆ ಪ್ರಸ್ತುತ ಲಕ್ನೋ-ಅಯೋಧ್ಯೆ ಮಾರ್ಗದಲ್ಲಿ ಕೇವಲ 2 ಬಸ್ಗಳು ಮಾತ್ರ ಸಂಚರಿಸುತ್ತಿವೆ. ಇದು ಇಲಾಖೆಗಳ ನಡುವಿನ ಸಮನ್ವಯದ ಕೊರತೆ ಮತ್ತು ಯೋಜನೆಯ ಅನುಷ್ಠಾನದಲ್ಲಿನ ವಿಳಂಬವನ್ನು ಎತ್ತಿ ತೋರಿಸುತ್ತದೆ. ಅಧಿಕಾರಿಗಳು ಬೇರೆ ಇಲಾಖೆ ಕಡೆಗೆ ಕೈ ತೋರಿಸುತ್ತಿದ್ದಾರೆ.
ಏನಿದು ಯೋಜನೆ?: ಈ ಯೋಜನೆಯ ಮೊದಲ ಹಂತದಲ್ಲಿ ಉತ್ತರ ಪ್ರದೇಶ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ 20 ಡಬಲ್ ಡೆಕ್ಕರ್ ಎಲೆಕ್ಟ್ರಿಕ್ ಬಸ್ಗಳನ್ನು ಖರೀದಿಸಲು ಯೋಜಿಸಿತ್ತು. ಟೆಂಡರ್ಗಳನ್ನು ಆಹ್ವಾನಿಸಿ, ಮೊದಲ ಬಸ್ ಅನ್ನು 2025ರಲ್ಲಿ ಉದ್ಘಾಟಿಸಲಾಯಿತು.
ಆದರೆ ಉಳಿದ 6 ಬಸ್ಗಳು ಬಾರಾಬಂಕಿ ಡಿಪೋದಲ್ಲಿ ಬಳಕೆಯಾಗದೆ ಉಳಿದಿವೆ. ಅಧಿಕಾರಿಗಳು ಬಸ್ಗಳ ನಿಯೋಜನೆ ಮತ್ತು ಕಾರ್ಯಾಚರಣೆಯ ಸಿದ್ಧತೆಯನ್ನು ಖಚಿತಪಡಿಸಿಕೊಳ್ಳುವಲ್ಲಿ ವಿಫಲವಾಗಿದ್ದು, ಬಸ್ಗಳಿಗೆ ಬೇಕಾದ ಚಾರ್ಜಿಂಗ್ ಸೌಲಭ್ಯವಿಲ್ಲ.
ಈ ಕುರಿತು ಬಾರಾಬಂಕಿ ಬಸ್ ನಿಲ್ದಾಣದ ಉಸ್ತುವಾರಿ ಎ.ಕೆ.ಅವಸ್ತಿ ಮಾತನಾಡಿ, “ಚಾರ್ಜಿಂಗ್ ವ್ಯವಸ್ಥೆ ಮಾಡಲು ನಿಲ್ದಾಣಕ್ಕೆ ಅಗತ್ಯವಿರುವ ವಿದ್ಯುತ್ ಸಂಪರ್ಕಕ್ಕಾಗಿ ಸೆಪ್ಟೆಂಬರ್ 17, 2025ರಂದು ಉತ್ತರ ಪ್ರದೇಶ ಪವರ್ ಕಾರ್ಪೊರೇಷನ್ ಲಿಮಿಟೆಡ್ಗೆ 2.36 ಕೋಟಿ ರೂ. ನೀಡಲಾಗಿದೆ” ಎಂದು ಹೇಳಿದ್ದಾರೆ.
“ಹಣ ಪಾವತಿಸಿ ತಿಂಗಳುಗಳೇ ಕಳೆದರೂ ಇನ್ನು ವಿದ್ಯುತ್ ಸಂಪರ್ಕ ನೀಡಿಲ್ಲ. ಚಾರ್ಜಿಂಗ್ ಯಂತ್ರಗಳು ಕಳೆದ ಆರು ತಿಂಗಳಿಂದ ಇಲ್ಲಿ ಪ್ಯಾಕ್ನಲ್ಲಿಯೇ ಉಳಿದಿವೆ. ಚಾರ್ಜಿಂಗ್ ಸೌಲಭ್ಯವಿಲ್ಲದೆ ಬಸ್ಗಳನ್ನು ಓಡಿಸಲು ಸಾಧ್ಯವಿಲ್ಲ ಮತ್ತು ಪ್ರಸ್ತುತ ಇರುವ ವಿರಾಜ್ ಖಂಡ್ ಚಾರ್ಜಿಂಗ್ ನಿಲ್ದಾಣವು ಈಗಾಗಲೇ ಪೂರ್ಣ ಸಾಮರ್ಥ್ಯದಲ್ಲಿ ಕಾರ್ಯನಿರ್ವಹಿಸುತ್ತಿದೆ” ಎಂದು ತಿಳಿಸಿದ್ದಾರೆ.
ಯುಪಿ ಸರ್ಕಾರ ಈ ಬಸ್ಗಳನ್ನು ಲಕ್ನೋದಿಂದ ವಿವಿಧ ನಗರಗಳಿಗೆ ಸಂಪರ್ಕ ಕಲ್ಪಿಸಲು ಖರೀದಿ ಮಾಡಿತ್ತು. ಆದರೆ, ಪ್ರಸ್ತುತ ಲಕ್ನೋ ದರ್ಶನ ಸೇವೆಗಾಗಿ ಬಳಸಲಾಗುತ್ತಿರುವ ಬಸ್ ಹೊಸದಾಗಿ ಖರೀದಿಸಿದ ವಾಹನವಾಗಿದ್ದು, ಅದು ಬಾರಾಬಂಕಿ ಡಿಪೋದಲ್ಲಿ ನಿಂತಿರುವ ಡಬಲ್ ಡೆಕ್ಕರ್ ಬಸ್ಗಳಿಗೆ ಸೇರಿದ್ದಲ್ಲ ಎಂದು ಹಿರಿಯ ಅಧಿಕಾರಿ ಸ್ಪಷ್ಟಪಡಿಸಿದ್ದಾರೆ.
ಈಗ ಕೇವಲ ಎರಡು ಬಸ್ಗಳು ಮಾತ್ರ ಕಾರ್ಯನಿರ್ವಹಿಸುತ್ತಿವೆ ಮತ್ತು ಅವುಗಳಿಗೆ ವಿರಾಜ್ ಖಂಡ್ ನಿಲ್ದಾಣದಲ್ಲಿ ಚಾರ್ಜ್ ಮಾಡಲಾಗುತ್ತಿದೆ. ಕೆಲವೊಮ್ಮೆ ಬಸ್ಗಳನ್ನು ಚಾರ್ಜಿಂಗ್ಗಾಗಿ ಗೋಮತಿ ನಗರದ ಸಮೀಪವಿರುವ ಪವರ್ ಸ್ಟೇಷನ್ಗೆ ಕೊಂಡೊಯ್ಯಲಾಗುತ್ತಿದೆ.
ಡಬಲ್ ಡೆಕ್ಕರ್ ಬಸ್ಗಳನ್ನು ನಗರದ ಒಳಗಿನ ಸಂಚಾರಕ್ಕಾಗಿ ವಿನ್ಯಾಸಗೊಳಿಸಲಾಗಿದೆ. ಇವುಗಳು ಸೀಮಿತ ವೇಗವನ್ನು ಹೊಂದಿವೆ, ಇದರಿಂದಾಗಿ ಲಕ್ನೋ-ಅಯೋಧ್ಯೆಯಂತಹ ದೀರ್ಘ ಮಾರ್ಗಗಳಲ್ಲಿ ಪ್ರಯಾಣದ ಸಮಯ ಹೆಚ್ಚಾಗುತ್ತದೆ. ಇವುಗಳನ್ನು ಅಂತರ್-ನಗರ ಮಾರ್ಗಗಳಲ್ಲಿ ಓಡಿಸುವುದು ಸವಾಲಿನ ಕೆಲಸ ಮತ್ತು ಈ ಮಾರ್ಗದಲ್ಲಿ ಪ್ರಯಾಣಿಕರ ಸಂಖ್ಯೆಯೂ ಕಡಿಮೆಯಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಬಾರಾಬಂಕಿ ಡಿಪೋ ಕಾರ್ಯನಿರ್ವಾಹಕ ಇಂಜಿನಿಯರ್ ಶುಭಾಷ್ ಚಂದ್ರ ಮಾತನಾಡಿ, “ಚಾರ್ಜಿಂಗ್ ಮೂಲಸೌಕರ್ಯ ಸ್ಥಾಪಿಸುವ ಟೆಂಡರ್ ಪ್ರಕ್ರಿಯೆಯ ಅಂತಿಮ ಹಂತ ಬಾಕಿ ಇರುವುದರಿಂದ ವಿಳಂಬವಾಗಿದೆ. ಅನುದಾನ ಬಂದಿದೆ. ಆದರೆ ಗುತ್ತಿಗೆದಾರರೊಂದಿಗೆ ಮಾತುಕತೆ ಇನ್ನೂ ನಡೆಯುತ್ತಿದೆ” ಎಂದು ತಿಳಿಸಿದರು.
