ಭೋಪಾಲ್: ಮಧ್ಯಪ್ರದೇಶದ ಸಾಗರ್ ಜಿಲ್ಲೆಯ ಗ್ರಾಮವೊಂದರಲ್ಲಿ ದಲಿತ ಕುಟುಂಬವೊಂದು ಸ್ಥಳೀಯ ದೇವಸ್ಥಾನದಲ್ಲಿ ಆಯೋಜಿಸಲಾಗಿದ್ದ ಸಾಮೂಹಿಕ ಔತಣಕೂಟದಲ್ಲಿ ಪಾಲ್ಗೊಳ್ಳುವುದರಿಂದ ವಂಚಿತವಾಗಿದೆ.
ಮೇಲ್ಜಾತಿ ಸಮುದಾಯಕ್ಕೆ ಸೇರಿದ ಇಬ್ಬರು ವ್ಯಕ್ತಿಗಳು ಅವರಿಗೆ ನೇರವಾಗಿ ಪ್ರಸಾದವನ್ನು(ಆಶೀರ್ವಾದದ ಆಹಾರ) ನೀಡಲು ನಿರಾಕರಿಸಿ ಅದನ್ನು ಅವರ ಮೇಲೆ ಎಸೆದಿದ್ದಾರೆ.
ಜುಲೈ 4, ಮಂಗಳವಾರದಂದು ಸೆಮ್ರಾ ಗ್ರಾಮದ ರಾಮ ಜಾನಕಿ ದೇವಸ್ಥಾನದಲ್ಲಿ ಈ ಘಟನೆ ನಡೆದಿದೆ. ಇಡೀ ಗ್ರಾಮದಿಂದ ದೇಣಿಗೆ ಮತ್ತು ಧಾನ್ಯಗಳನ್ನು ಸಂಗ್ರಹಿಸಿ ಸಾಮೂಹಿಕ ಔತಣ ಏರ್ಪಡಿಸಲಾಗಿತ್ತು. ದಲಿತ ಸಮುದಾಯದವರೂ ಸಹಕರಿಸಿದ್ದರು.
ಪ್ರಸಾದ ಸ್ವೀಕರಿಸುವ ಭರವಸೆಯೊಂದಿಗೆ ಹಲವು ದಲಿತ ಕುಟುಂಬಗಳೂ ದೇವಸ್ಥಾನಕ್ಕೆ ಆಗಮಿಸಿದವು. ಆದರೆ, ಗ್ರಾಮದ ನಿವಾಸಿಗಳಾದ ಬಬ್ಲೂ ಕುಶ್ವಾಹ ಮತ್ತು ರಾಮ್ ಭಜನ್ ಯಾದವ್ ಅವರು ದಲಿತ ಮಹಿಳೆಯರು ಮತ್ತು ಮಕ್ಕಳ ಮೇಲೆ ಪ್ರಸಾದವನ್ನು ಎಸೆದರು ಮತ್ತು ಹಬ್ಬದ ಸಮಯದಲ್ಲಿ ಇತರರೊಂದಿಗೆ ಕುಳಿತುಕೊಳ್ಳದಂತೆ ಎಚ್ಚರಿಕೆ ನೀಡಿದರು ಎಂದು ದೂರಲಾಗಿದೆ.
ದಲಿತ ಸಮುದಾಯದ ಸದಸ್ಯರು ಈ ತಾರತಮ್ಯದ ವರ್ತನೆಯನ್ನು ವಿರೋಧಿಸಿದಾಗ, ಕುಶ್ವಾಹಾ ಮತ್ತು ಯಾದವ್ ಅವಹೇಳನಕಾರಿ ಜಾತಿ ಆಧಾರಿತ ನಿಂದನೆ ಮಾಡಿ ಪರಿಸ್ಥಿತಿಯನ್ನು ಉಲ್ಬಣಗೊಳಿಸಿದ್ದಾರೆ. ಘಟನೆಯ ನಂತರ ದಲಿತ ಸಮುದಾಯದವರು ಅದೇ ದಿನ ಅಮದರ ಪೊಲೀಸ್ ಠಾಣೆಯಲ್ಲಿ ಲಿಖಿತ ದೂರು ದಾಖಲಿಸಿ ಕಠಿಣ ಕ್ರಮಕ್ಕೆ ಒತ್ತಾಯಿಸಿದ್ದಾರೆ.
ಜುಲೈ 7 ರಂದು, ಇಬ್ಬರೂ ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಉಪವಿಭಾಗದ ಪೊಲೀಸ್ ಅಧಿಕಾರಿ ಲೋಕೇಶ್ ದಾವರ್ ತಿಳಿಸಿದ್ದಾರೆ. ಆರೋಪಿಗಳು ಸದ್ಯ ತಲೆಮರೆಸಿಕೊಂಡಿದ್ದಾರೆ.
ಈ ಸಂಕಟವನ್ನು ವಿವರಿಸಿದ ದಲಿತ ಸಮುದಾಯದ ಶಂಖಿ ಚೌಧರಿ, ನೀವು ಕೆಳ ಜಾತಿಗೆ ಸೇರಿದವರು, ಅದಕ್ಕಾಗಿಯೇ ನಾವು ನಿಮಗೆ ಪ್ರಸಾದ ನೀಡುವುದಿಲ್ಲ ಎಂದು ಹೇಳಿದ ಅವರು ಪ್ರಸಾದವನ್ನು ನಮ್ಮ ಮೇಲೆ ಎಸೆದರು, ನನ್ನ ಮಗಳು ಅದನ್ನು ಸಂಗ್ರಹಿಸಲು ಪ್ರಯತ್ನಿಸಿದಳು ಎಂದು ತಿಳಿಸಿದ್ದಾರೆ.
ಈ ವೇಳೆ ಸ್ಥಳದಲ್ಲಿದ್ದ ಕಾಂಚನ್ ಚೌಧರಿ, ಉತ್ಸವದ ಹೆಸರಲ್ಲಿ ನಮ್ಮಿಂದ ಆಹಾರ ಧಾನ್ಯ ತೆಗೆದುಕೊಂಡು ಹೋಗುತ್ತಾರೆ, ನಾವು ಹೋದಾಗ ನೇರವಾಗಿ ಪ್ರಸಾದ ಕೊಡುವುದಿಲ್ಲ ಏಕೆ ಎಂದು ಕೇಳಿದಾಗ ಅವರು ನೀವು ಪ್ರಸಾದ ತೆಗೆದುಕೊಳ್ಳಬೇಕಾದರೆ ತೆಗೆದುಕೊಳ್ಳಿ, ಇಲ್ಲದಿದ್ದರೆ ಇಲ್ಲಿಂದ ಹೋಗಿ ಎಂದರು. ಅವರು 3-4 ವರ್ಷಗಳಿಂದ ಹೀಗೇ ಮಾಡುತ್ತಿದ್ದಾರೆ ಎಂದು ದೂರಿದ್ದಾರೆ.
