ಮೆಗಾಸ್ಟಾರ್ ಚಿರಂಜೀವಿ ಕುಟುಂಬದಲ್ಲಿ ಮತ್ತೊಂದು ಡೈವೋರ್ಸ್: ನಟಿ ನಿಹಾರಿಕಾ –ನಟ ಚೈತನ್ಯ ವಿಚ್ಛೇದನ

ಹೈದರಾಬಾದ್: ಮದುವೆಯಾದ 3 ವರ್ಷಗಳ ನಂತರ ಚಿರಂಜೀವಿ ಸೊಸೆ ನಿಹಾರಿಕಾ ಕೊನಿಡೇಲ ಮತ್ತು ಪತಿ ಚೈತನ್ಯ ಜೊನ್ನಲಗಡ್ಡ ವಿಚ್ಛೇದನವನ್ನು ಖಚಿತಪಡಿಸಿದ್ದಾರೆ.

ಚಿರಂಜೀವಿ ಸಹೋದರ ನಟ ಹಾಗೂ ರಾಜಕಾರಣಿ ಪವನ್ ಕಲ್ಯಾಣ್ ಮೂರನೇ ಪತ್ನಿ ಅನ್ನಾ ಲೆಜ್ನೆವಾ ಅವರಿಂದ ವಿಚ್ಛೇದನ ಪಡೆದುಕೊಳ್ಳಲು ಮುಂದಾಗಿದ್ದಾರೆ ಎಂದು ಹೇಳಲಾಗಿದೆ. ಚಿರಂಜೀವಿಯ ಮೊದಲ ಪುತ್ರಿ ಶ್ರೀಜಾ ಮೂರನೇ ಮದುವೆಗೆ ರೆಡಿಯಾಗಿದ್ದಾರೆ ಎಂಬ ಸುದ್ದಿಗಳು ಹರಿದಾಡುತ್ತಿವೆ.

ನಟಿ ನಿಹಾರಿಕಾ ಕೊನಿಡೇಲಾ ಮತ್ತು ಚೈತನ್ಯ ಜೊನ್ನಲಗಡ್ಡಾ ಅವರು ವಿಚ್ಛೇದನದತ್ತ ಸಾಗುತ್ತಿದ್ದಾರೆ. ಇದಕ್ಕೂ ಮೊದಲು, ನಿಹಾರಿಕಾ ಇನ್‌ಸ್ಟಾಗ್ರಾಮ್‌ನಿಂದ ಮದುವೆಯ ಚಿತ್ರಗಳನ್ನು ಅಳಿಸಿದ್ದಾರೆ ಮತ್ತು ಅವರ ಪತಿಯನ್ನು ಅನ್‌ಫಾಲೋ ಮಾಡಿದ್ದಾರೆ, ಇಬ್ಬರ ನಡುವೆ ಎಲ್ಲವೂ ಸರಿಯಾಗಿಲ್ಲ ಎಂದು ಸುಳಿವು ನೀಡಿದ್ದಾರೆ. ಈಗ, ಹೊಸ ಇನ್‌ಸ್ಟಾ ಪೋಸ್ಟ್‌ ನಲ್ಲಿ, ಅವರು ಪರಸ್ಪರ ಬೇರೆಯಾಗಲು ನಿರ್ಧರಿಸಿದ್ದಾರೆ ಎಂದು ನಟಿ ಖಚಿತಪಡಿಸಿದ್ದಾರೆ.

ಚೈತನ್ಯ ಮತ್ತು ನಾನು ಪರಸ್ಪರ ಬೇರೆಯಾಗಲು ನಿರ್ಧರಿಸಿದ್ದೇವೆ. ಬೆಂಬಲದ ಆಧಾರ ಸ್ತಂಭವಾಗಿರುವ ನನ್ನ ಕುಟುಂಬ ಮತ್ತು ಸ್ನೇಹಿತರಿಗೆ ಧನ್ಯವಾದಗಳು. ನಾನು ಕೆಲವು ಗೌಪ್ಯತೆಯನ್ನು ವಿನಂತಿಸುತ್ತೇನೆ. ಅರ್ಥ ಮಾಡಿಕೊಂಡಿದ್ದಕ್ಕೆ ಧನ್ಯವಾದಗಳು ಎಂದು ಪೋಸ್ಟ್ ಹಾಕಿದ್ದಾರೆ.

ನಟ ವರುಣ್ ತೇಜ್ ಅವರ ಸಹೋದರಿ ನಿಹಾರಿಕಾ ಅವರು 2020 ರಲ್ಲಿ ಚೈತನ್ಯ ಅವರನ್ನು ಉದಯಪುರದಲ್ಲಿ ವಿವಾಹವಾದರು. ಮದುವೆಗೂ ಮುನ್ನ ನಿಹಾರಿಕಾ ನಟಿಯಾಗಿದ್ದಾಗಲೇ ಗುಂಟೂರಿನ ಪೊಲೀಸ್ ಮಹಾನಿರೀಕ್ಷಕ ಜೆ. ಪ್ರಭಾಕರ್ ರಾವ್ ಅವರ ಪುತ್ರ, ಐಟಿ ವೃತ್ತಿಪರ ಚೈತನ್ಯರೊಂದಿಗೆ ಮನೆಯವರು ಮದುವೆ ನಿಶ್ಚಯ ಮಾಡಿದ್ದರು.

ನಟ-ನಿರ್ಮಾಪಕ ನಾಗೇಂದ್ರ ಬಾಬು ಅವರ ಪುತ್ರಿ, ನಿಹಾರಿಕಾ ತನ್ನ ವೃತ್ತಿಜೀವನವನ್ನು ಟಿವಿ ನಿರೂಪಕಿಯಾಗಿ ಪ್ರಾರಂಭಿಸಿದ್ದರು. ನಂತರ ನಾಗ ಶೌರ್ಯ ಮುಖ್ಯ ಪಾತ್ರದಲ್ಲಿ ನಟಿಸಿದ ಓಕ ಮನಸು(2016) ನಲ್ಲಿ ನಟನೆಗೆ ಪ್ರವೇಶಿಸಿ ‘ಒರು ನಲ್ಲ ನಾಲ್ ಪಾತು ಸೋಲ್ರೆನ್’, ‘ಹ್ಯಾಪಿ ವೆಡ್ಡಿಂಗ್’, ‘ಸೂರ್ಯಕಾಂತಂ’ ಮತ್ತು ‘ಸೈರಾ ನರಸಿಂಹ ರೆಡ್ಡಿ’ ಮೊದಲಾದ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.