ಶ್ರೀಹರಿಕೋಟಾ: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ(ಇಸ್ರೋ) ತನ್ನ ಉಡಾವಣಾ ತಂತ್ರಜ್ಞಾನ ಅಭಿವೃದ್ಧಿಯಲ್ಲಿ ಮತ್ತೊಂದು ಮಹತ್ವದ ಮೈಲಿಗಲ್ಲು ಸಾಧಿಸಿದೆ. ಪಿಎಸ್‌ಎಲ್‌ವಿ (PSLV) ರಾಕೆಟ್ ನ ಮೂರನೇ ಹಂತಕ್ಕೆ ಸಂಬಂಧಿಸಿದ ಗ್ರೌಂಡ್ ಸ್ಟ್ಯಾಟಿಕ್ ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಿದೆ.
ಈ ಪರೀಕ್ಷೆಯು ರಾಕೆಟ್ ನ ಕಾರ್ಯಕ್ಷಮತೆ, ವಿಶ್ವಾಸಾರ್ಹತೆ ಮತ್ತು ಮುಂದಿನ ಉಡಾವಣೆಗಳ ಸಿದ್ಧತೆಯನ್ನು ಮೌಲ್ಯಮಾಪನ ಮಾಡುವ ನಿಟ್ಟಿನಲ್ಲಿ ಮಹತ್ವದ್ದಾಗಿದೆ.
ತನ್ನ ಪ್ರಮುಖ ಉಡಾವಣಾ ವಾಹನವಾದ ‘ಪೋಲಾರ್ ಸ್ಯಾಟಲೈಟ್ ಲಾಂಚ್ ವೆಹಿಕಲ್’ (PSLV) ಅನ್ನು ಮತ್ತೆ ಯಶಸ್ವಿ ಹಾದಿಗೆ ತರುವ ಪ್ರಯತ್ನದಲ್ಲಿರುವ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO), ಗುರುವಾರ (ನವೆಂಬರ್ 12, 2026) ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಲ್ಲಿರುವ ‘ಸ್ಟ್ಯಾಟಿಕ್ ಟೆಸ್ಟ್ ಫೆಸಿಲಿಟಿ’ಯಲ್ಲಿ, PSLVಯ ಮೂರನೇ ಹಂತದ (PS3) ‘ಗ್ರೌಂಡ್ ಸ್ಟ್ಯಾಟಿಕ್ ಟೆಸ್ಟ್’ ಅನ್ನು ಯಶಸ್ವಿಯಾಗಿ ನಡೆಸಿದೆ.
ಎರಡು ಮಿಷನ್‌ ಗಳ ವೈಫಲ್ಯದ ಬಳಿಕ ಇಸ್ರೋ ಮಹತ್ವದ ಹೆಜ್ಜೆ
ಪಿಎಸ್‌ಎಲ್‌ವಿ ರಾಕೆಟ್‌ನ ಮೂರನೇ ಹಂತದಲ್ಲಿ ಈ ಹಿಂದೆ ಉಂಟಾಗಿದ್ದ ತಾಂತ್ರಿಕ ವೈಫಲ್ಯಗಳ ಹಿನ್ನೆಲೆಯಲ್ಲಿ ಇಸ್ರೋ ಕೈಗೊಂಡಿದ್ದ ಸುಧಾರಣಾ ಕ್ರಮಗಳು ಯಶಸ್ಸು ಕಂಡಿವೆ. ನವೆಂಬರ್ 12ರಂದು ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದ ಸ್ಥಿರ ಪರೀಕ್ಷಾ ಘಟಕದಲ್ಲಿ ಸುಧಾರಿತ ಮೂರನೇ ಹಂತದ (PS3) ಘನ ಇಂಧನ ಮೋಟಾರ್‌ನ ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಲಾಗಿದೆ.
ಎರಡು ಉಡಾವಣೆಗಳಲ್ಲಿ ತಾಂತ್ರಿಕ ಸಮಸ್ಯೆ
2025ರ ಮೇ ತಿಂಗಳಲ್ಲಿ ನಡೆದ ಪಿಎಸ್‌ಎಲ್‌ವಿ-C61 ಉಡಾವಣೆಯಲ್ಲಿ ಮೂರನೇ ಹಂತದ ಮೋಟಾರ್ ನಲ್ಲಿ ತಾಂತ್ರಿಕ ಅಸಹಜತೆ ಕಾಣಿಸಿಕೊಂಡಿತ್ತು. ಇದರಿಂದ EOS-09 ಉಪಗ್ರಹವನ್ನು ಕಕ್ಷೆಗೆ ಸೇರಿಸುವ ಕಾರ್ಯಾಚರಣೆ ವಿಫಲವಾಗಿತ್ತು.
ಇದೇ ರೀತಿಯ ಸಮಸ್ಯೆ 2026ರ ಜನವರಿಯಲ್ಲಿ ನಡೆದ ಪಿಎಸ್‌ಎಲ್‌ವಿ-C62/EOS-N1 ಮಿಷನ್‌ ನಲ್ಲಿಯೂ ಎದುರಾಗಿತ್ತು. ಈ ಹಿನ್ನೆಲೆಯಲ್ಲಿ ಇಸ್ರೋ ಮೂರನೇ ಹಂತದ ವಿನ್ಯಾಸ ಮತ್ತು ಉತ್ಪಾದನಾ ಪ್ರಕ್ರಿಯೆಗಳನ್ನು ಸಮಗ್ರವಾಗಿ ಪರಿಶೀಲಿಸಿತ್ತು.
ಮೂರನೇ ಹಂತದಲ್ಲಿ ಏನೆಲ್ಲ ಬದಲಾವಣೆ?
* ಮೋಟಾರ್ ನ ವಿನ್ಯಾಸದ ಸುರಕ್ಷತಾ ಮಿತಿಗಳನ್ನು ಹೆಚ್ಚಿಸಲಾಗಿದೆ.
* ನೋಜಲ್ ವಿನ್ಯಾಸದಲ್ಲಿ ಅಗತ್ಯ ಸುಧಾರಣೆ ಮಾಡಲಾಗಿದೆ.
* ಯಾಂತ್ರಿಕ ಸಂಪರ್ಕ ವ್ಯವಸ್ಥೆಯನ್ನು ಬಲಪಡಿಸಲಾಗಿದೆ.
* ಸೀಲಿಂಗ್ ವ್ಯವಸ್ಥೆಯಲ್ಲಿ ಹೆಚ್ಚುವರಿ ಸುರಕ್ಷತಾ ವ್ಯವಸ್ಥೆ ಅಳವಡಿಸಲಾಗಿದೆ.
* ಕಚ್ಚಾ ವಸ್ತುಗಳ ಗುಣಮಟ್ಟ ಪರಿಶೀಲನೆಗೆ ಹೊಸ ಮಾನದಂಡ ರೂಪಿಸಲಾಗಿದೆ.
* ಜೋಡಣೆ ಮತ್ತು ಗುಣಮಟ್ಟ ತಪಾಸಣೆ ಪ್ರಕ್ರಿಯೆಗಳನ್ನು ಪರಿಷ್ಕರಿಸಲಾಗಿದೆ.
* ಜೋಡಣೆ ಹಾಗೂ ಸಾಗಣೆ ಸಂದರ್ಭದಲ್ಲಿ ವಿನಾಶರಹಿತ ಪರೀಕ್ಷೆಗಳನ್ನು (NDT) ಮತ್ತಷ್ಟು ಸುಧಾರಿಸಲಾಗಿದೆ.
ಈ ಬದಲಾವಣೆಗಳೊಂದಿಗೆ ಸಿದ್ಧಪಡಿಸಲಾದ ಹೊಸ ಆವೃತ್ತಿಯ ಮೂರನೇ ಹಂತದ ಮೋಟಾರ್ ಅನ್ನು ಯಶಸ್ವಿಯಾಗಿ ಪರೀಕ್ಷಿಸಲಾಗಿದೆ.
ಮುಂದಿನ ಹಂತವೇನು?
ಪರೀಕ್ಷೆಯ ಸಂದರ್ಭದಲ್ಲಿ ಸಂಗ್ರಹಿಸಲಾದ ತಾಂತ್ರಿಕ ದತ್ತಾಂಶವನ್ನು ಇಸ್ರೋ ವಿಜ್ಞಾನಿಗಳು ಸಮಗ್ರವಾಗಿ ವಿಶ್ಲೇಷಿಸಲಿದ್ದಾರೆ. ಅದರ ಫಲಿತಾಂಶಗಳ ಆಧಾರದ ಮೇಲೆ ಮುಂದಿನ ಪರೀಕ್ಷೆಗಳನ್ನು ನಡೆಸಲು ಯೋಜಿಸಲಾಗಿದೆ ಎಂದು ಇಸ್ರೋ ತಿಳಿಸಿದೆ.
ಪಿಎಸ್‌ಎಲ್‌ವಿ ಭಾರತದ ಅತ್ಯಂತ ವಿಶ್ವಾಸಾರ್ಹ ಉಡಾವಣಾ ವಾಹಕಗಳಲ್ಲಿ ಒಂದಾಗಿದ್ದು, ವಿವಿಧ ಉಪಗ್ರಹಗಳನ್ನು ಭೂಮಿಯ ಕಕ್ಷೆಗೆ ಸೇರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಇತ್ತೀಚಿನ ವೈಫಲ್ಯಗಳ ಬಳಿಕ ಮೂರನೇ ಹಂತದಲ್ಲಿ ಮಾಡಿರುವ ಸುಧಾರಣೆಗಳ ಪರೀಕ್ಷೆ ಯಶಸ್ವಿಯಾಗಿರುವುದು ಇಸ್ರೋಗೆ ಮಹತ್ವದ ಬೆಳವಣಿಗೆಯಾಗಿದೆ.
ಸೂಚನೆ: ಮುಂದಿನ ಪರೀಕ್ಷೆಗಳು ಮತ್ತು ಮೌಲ್ಯಮಾಪನದ ನಂತರವೇ ಅದರ ಕಾರ್ಯಾಚರಣಾ ಸಿದ್ಧತೆ ಕುರಿತು ಸ್ಪಷ್ಟತೆ ಸಿಗಲಿದೆ.
