ವಿಮಾನ ಪ್ರಯಾಣಿಕರಿಗೆ ಶಾಕ್ ಕೊಟ್ಟ ಇಂಡಿಗೋ! ಟಿಕೆಟ್ ದರ ಹೆಚ್ಚಳಕ್ಕೆ ಸಿದ್ಧತೆ ?

ನವದೆಹಲಿ: ದೀಪಾವಳಿ ಹಬ್ಬಕ್ಕೆ ಇನ್ನೇನು ಕೆಲವೇ ದಿನಗಳು ಬಾಕಿ. ದೂರದ ಊರುಗಳಲ್ಲಿ ಉದ್ಯೋಗ ಮಾಡುತ್ತಿರುವ ಮಕ್ಕಳು, ಕುಟುಂಬದಿಂದ ದೂರವಿರುವವರು ಹಬ್ಬದ ಸಂಭ್ರಮವನ್ನು ತಮ್ಮವರೊಂದಿಗೆ ಹಂಚಿಕೊಳ್ಳಲು ತವರಿಗೆ ಮರಳುವ ಸಿದ್ಧತೆಯಲ್ಲಿದ್ದಾರೆ. ಕೆಲವರು ರೈಲು ಟಿಕೆಟ್‌ಗಾಗಿ ಕಾಯುತ್ತಿದ್ದರೆ, ಇನ್ನು ಕೆಲವರು ಸಮಯ ಉಳಿಸಲು ವಿಮಾನ ಪ್ರಯಾಣದ ಮೊರೆ ಹೋಗುತ್ತಾರೆ. ಅದರಲ್ಲೂ ಕೈಗೆಟುಕುವ ದರದಲ್ಲಿ ವಿಮಾನ ಪ್ರಯಾಣದ ಕನಸು ಕಾಣುವ ಮಧ್ಯಮ ವರ್ಗದವರಿಗೆ ಇಂಡಿಗೋ ನೆಚ್ಚಿನ ಆಯ್ಕೆ. ಆದರೆ, ಈ ಬಾರಿ ಹಬ್ಬದ ಸಂಭ್ರಮದ ನಡುವೆ ವಿಮಾನ ಪ್ರಯಾಣದ ಖರ್ಚು ಹೆಚ್ಚಾಗುವ ಆತಂಕ ಎದುರಾಗಿದೆ. ಇಂಧನ ಬೆಲೆ ಏರಿಕೆ ಮತ್ತು ಹೆಚ್ಚುತ್ತಿರುವ ನಿರ್ವಹಣಾ ವೆಚ್ಚದಿಂದಾಗಿ ಇಂಡಿಗೋ ಟಿಕೆಟ್ ದರ ಹೆಚ್ಚಿಸುವ ಸುಳಿವು ನೀಡಿದ್ದು, ಇದು ಸಾಮಾನ್ಯ ಪ್ರಯಾಣಿಕರ ಪ್ರಯಾಣದ ಬಜೆಟ್‌ಗೆ ಹೊರೆಯಾಗುವ ಸಾಧ್ಯತೆಯಿದೆ.

ಹೌದು, ಹೆಚ್ಚುತ್ತಿರುವ ವಿಮಾನ ಇಂಧನ ಬೆಲೆ ಮತ್ತು ನಿರ್ವಹಣಾ ವೆಚ್ಚದ ಹೊರೆ ಪ್ರಯಾಣಿಕರ ಜೇಬಿಗೆ ಕತ್ತರಿ ಹಾಕುವ ಸಾಧ್ಯತೆಯಿದೆ. ಮುಂಬರುವ ದಿನಗಳಲ್ಲಿ ವಿಮಾನ ಟಿಕೆಟ್ ದರಗಳನ್ನು ಹೆಚ್ಚಿಸುವುದು ಅನಿವಾರ್ಯವಾಗಬಹುದು ಎಂಬ ಸುಳಿವನ್ನು ಇಂಡಿಗೋ ಸಂಸ್ಥೆ ನೀಡಿದೆ. ಹೀಗಾಗಿ ಈಗಾಗಲೇ ಪ್ರಯಾಣಕ್ಕೆ ಸಿದ್ಧತೆ ನಡೆಸುತ್ತಿರುವ ಸಾಮಾನ್ಯ ಜನರು, ಉದ್ಯೋಗಿಗಳು ಮತ್ತು ಕುಟುಂಬಗಳಿಗೆ ಇದು ಆತಂಕದ ಸುದ್ದಿಯಾಗಿದೆ.

ತವರಿಗೆ ಹೋಗುವ ಪ್ರಯಾಣಕ್ಕೂ ಹೆಚ್ಚುವರಿ ಖರ್ಚು?

ಬೆಂಗಳೂರಿನಲ್ಲಿ ಕೆಲಸ ಮಾಡುವವರು ದೀಪಾವಳಿ ಅಥವಾ ಇತರ ಹಬ್ಬಗಳಿಗೆ ತಮ್ಮ ಊರುಗಳಿಗೆ ತೆರಳಲು ವಿಮಾನ ಪ್ರಯಾಣವನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಕೆಲವರು ಕುಟುಂಬ ಸಮೇತ ಪ್ರವಾಸಕ್ಕೂ ಯೋಜನೆ ರೂಪಿಸುತ್ತಾರೆ. ಕಡಿಮೆ ದರದ ಟಿಕೆಟ್ ಸಿಕ್ಕರೆ ಸಾಕು ಎಂದು ಮುಂಚಿತವಾಗಿಯೇ ಬುಕ್ಕಿಂಗ್ ಮಾಡುತ್ತಾರೆ.

ಆದರೆ, ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಭೌಗೋಳಿಕ ರಾಜಕೀಯ ಉದ್ವಿಗ್ನತೆಗಳಿಂದ ಜಾಗತಿಕ ಕಚ್ಚಾ ತೈಲ ಬೆಲೆ ಏರಿಕೆಯಾಗಿದೆ. ಇದರ ಪರಿಣಾಮವಾಗಿ ವಿಮಾನಗಳಿಗೆ ಬಳಸುವ ಏವಿಯೇಷನ್ ಟರ್ಬೈನ್ ಫ್ಯೂಯೆಲ್ (ATF) ಬೆಲೆಯೂ ಹೆಚ್ಚಾಗಿದೆ. ವಿಮಾನಯಾನ ಸಂಸ್ಥೆಗಳ ಒಟ್ಟು ನಿರ್ವಹಣಾ ವೆಚ್ಚದಲ್ಲಿ ಇಂಧನದ ಪಾಲು ದೊಡ್ಡದಾಗಿರುವುದರಿಂದ ಟಿಕೆಟ್ ದರ ಏರಿಕೆಯ ಒತ್ತಡ ಹೆಚ್ಚಾಗಿದೆ.

ಇಂಡಿಗೋಗೆ ನಷ್ಟದ ಹೊರೆ; ಪ್ರಯಾಣಿಕರ ಮೇಲೆ ದರ ಏರಿಕೆಯ ಬಿಸಿ!

ಇಂಡಿಗೋ ಮಾತೃಸಂಸ್ಥೆ ಇಂಟರ್‌ಗ್ಲೋಬ್ ಏವಿಯೇಷನ್ ಜುಲೈನಿಂದ ಸೆಪ್ಟೆಂಬರ್ 30ರವರೆಗಿನ ಎರಡನೇ ತ್ರೈಮಾಸಿಕದಲ್ಲಿ ₹1,879.1 ಕೋಟಿ ನಿವ್ವಳ ನಷ್ಟ ದಾಖಲಿಸಿದೆ.

ಕಳೆದ ವರ್ಷದ ಇದೇ ಅವಧಿಯಲ್ಲಿ ₹2,614 ಕೋಟಿ ನಷ್ಟವಾಗಿತ್ತು. ಈ ಬಾರಿ ನಷ್ಟದ ಪ್ರಮಾಣ ಕಡಿಮೆಯಾಗಿದ್ದರೂ ಸತತ ಮೂರನೇ ತ್ರೈಮಾಸಿಕದಲ್ಲೂ ಕಂಪನಿ ನಷ್ಟ ಅನುಭವಿಸಿರುವುದು ಗಮನಾರ್ಹ.

ಇದೇ ಅವಧಿಯಲ್ಲಿ ಕಂಪನಿಯ ಕಾರ್ಯಾಚರಣಾ ವೆಚ್ಚ ಶೇ.19.2ರಷ್ಟು ಹೆಚ್ಚಾಗಿ ₹26,357 ಕೋಟಿಗೆ ತಲುಪಿದೆ. ಒಟ್ಟು ಆದಾಯ ಶೇ.26ರಷ್ಟು ಏರಿಕೆಯಾಗಿ ₹23,364 ಕೋಟಿ ದಾಖಲಾಗಿದ್ದರೂ, ವೆಚ್ಚದ ಪ್ರಮಾಣ ಹೆಚ್ಚಾಗಿರುವುದರಿಂದ ನಷ್ಟ ಮುಂದುವರಿದಿದೆ.

ಕಂಪನಿಯ ಒಟ್ಟು ವೆಚ್ಚದಲ್ಲಿ ವಿಮಾನ ಇಂಧನದ ಪಾಲೇ ಶೇ.37.8ರಷ್ಟಿದೆ. ಹೀಗಾಗಿ ಇಂಧನ ಬೆಲೆ ಏರಿಕೆ ಇಂಡಿಗೋಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.

47 ವರ್ಷಗಳ ಅನುಭವದಲ್ಲೇ ಇಂತಹ ಪರಿಸ್ಥಿತಿ ನೋಡಿಲ್ಲ!

ಇಂಡಿಗೋದ ನೂತನ ಸಿಇಒ ವಿಲ್ಲಿ ವಾಲ್ಷ್ ಕೂಡ ಇಂಧನ ಬೆಲೆ ಏರಿಕೆ ಕುರಿತು ಆತಂಕ ವ್ಯಕ್ತಪಡಿಸಿದ್ದಾರೆ.

ವಿಮಾನಯಾನ ಕ್ಷೇತ್ರದಲ್ಲಿ ಸುಮಾರು 47 ವರ್ಷಗಳ ಅನುಭವ ಹೊಂದಿರುವ ಅವರು, ಈ ಹಿಂದೆ ಹಲವು ಇಂಧನ ಬೆಲೆ ಏರಿಳಿತಗಳನ್ನು ಕಂಡಿದ್ದರೂ ಪ್ರಸ್ತುತ ಎದುರಾಗಿರುವ ಸವಾಲು ಹಿಂದೆಂದೂ ಕಂಡಿರದಷ್ಟು ಗಂಭೀರವಾಗಿದೆ ಎಂದು ಹೇಳಿದ್ದಾರೆ. ಈ ಪರಿಸ್ಥಿತಿ ಇಡೀ ವಿಮಾನಯಾನ ಉದ್ಯಮದ ಮೇಲೆ ಒತ್ತಡ ಹೇರುತ್ತಿದೆ ಎಂದು ತಿಳಿಸಿದ್ದಾರೆ.

ಟಿಕೆಟ್ ಬೆಲೆ ಹೆಚ್ಚಳದ ಜೊತೆಗೆ ವಿಮಾನಗಳ ಸಂಖ್ಯೆಯೂ ಕಡಿಮೆಯಾಗುತ್ತಾ?

ವೆಚ್ಚದ ಹೊರೆಯನ್ನು ತಗ್ಗಿಸಿಕೊಳ್ಳಲು ಇಂಡಿಗೋ ತನ್ನ ವಿಮಾನ ಸೇವೆಗಳ ಯೋಜನೆಯಲ್ಲೂ ಬದಲಾವಣೆ ಮಾಡಿಕೊಳ್ಳುತ್ತಿದೆ. ಪ್ರಯಾಣಿಕರ ಸಂಖ್ಯೆ ಕಡಿಮೆ ಇರುವ ಕೆಲವು ಅಂತಾರಾಷ್ಟ್ರೀಯ ಮಾರ್ಗಗಳಲ್ಲಿ ವಿಮಾನಗಳ ಹಾರಾಟದ ಸಂಖ್ಯೆ ಅಥವಾ ಸೀಟುಗಳ ಸಾಮರ್ಥ್ಯವನ್ನು ಕಡಿಮೆ ಮಾಡಲು ಮುಂದಾಗಿದೆ.

ಇನ್ನೊಂದೆಡೆ, ಪ್ರಯಾಣಿಕರ ಬೇಡಿಕೆ ಹೆಚ್ಚಿರುವ ದೇಶೀಯ ಮಾರ್ಗಗಳಲ್ಲಿ ಸೇವೆಗಳನ್ನು ಮುಂದುವರಿಸುವ ಸಾಧ್ಯತೆಯಿದೆ. ಹಬ್ಬಗಳ ಸಂದರ್ಭದಲ್ಲಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗುವುದರಿಂದ ಟಿಕೆಟ್ ದರಗಳ ಮೂಲಕ ಆದಾಯ ಹೆಚ್ಚಿಸಿಕೊಳ್ಳುವ ನಿರೀಕ್ಷೆಯನ್ನೂ ಸಂಸ್ಥೆ ಹೊಂದಿದೆ.

ಸೀಟುಗಳು ಖಾಲಿ ಇದ್ದರೂ ಟಿಕೆಟ್ ದರ ಹೆಚ್ಚಳ!

ಇಂಡಿಗೋ ನೀಡಿರುವ ಅಂಕಿಅಂಶಗಳ ಪ್ರಕಾರ, ಕಳೆದ ವರ್ಷ ಪ್ರತಿ ಪ್ರಯಾಣಿಕರಿಂದ ಪ್ರತಿ ಕಿಲೋಮೀಟರ್‌ಗೆ ದೊರೆಯುತ್ತಿದ್ದ ಸರಾಸರಿ ಆದಾಯ ₹4.69 ಆಗಿತ್ತು. ಈ ಬಾರಿ ಅದು ₹6.30ಕ್ಕೆ ಏರಿಕೆಯಾಗಿದೆ.

ಆದರೆ ವಿಮಾನಗಳ ಆಸನ ಭರ್ತಿ ಪ್ರಮಾಣ ಶೇ.82.5ರಿಂದ ಶೇ.80.3ಕ್ಕೆ ಇಳಿಕೆಯಾಗಿದೆ. ಅಂದರೆ, ಕಳೆದ ವರ್ಷಕ್ಕೆ ಹೋಲಿಸಿದರೆ ಸೀಟು ಭರ್ತಿ ಸ್ವಲ್ಪ ಕಡಿಮೆಯಾಗಿದ್ದರೂ ಟಿಕೆಟ್‌ಗಳ ಸರಾಸರಿ ದರ ಹೆಚ್ಚಳದಿಂದ ಆದಾಯ ಏರಿಕೆಯಾಗಿದೆ.

ಸಾಮಾನ್ಯ ಪ್ರಯಾಣಿಕರ ಪ್ರಯಾಣದ ಬಜೆಟ್‌ಗೆ ಹೊಡೆತ?

ಒಂದು ಕಡೆ ಕುಟುಂಬದೊಂದಿಗೆ ಹಬ್ಬ ಆಚರಿಸಲು ತವರಿಗೆ ಹೋಗುವ ಆಸೆ, ಮತ್ತೊಂದು ಕಡೆ ಹೆಚ್ಚಾಗಬಹುದಾದ ವಿಮಾನ ಟಿಕೆಟ್ ದರ! ಈ ಎರಡರ ನಡುವೆ ಸಾಮಾನ್ಯ ಪ್ರಯಾಣಿಕರು ತಮ್ಮ ಪ್ರಯಾಣದ ಬಜೆಟ್ ಮರುಪರಿಶೀಲಿಸಬೇಕಾದ ಪರಿಸ್ಥಿತಿ ಎದುರಾಗಬಹುದು.

ವಿಶೇಷವಾಗಿ ಬೆಂಗಳೂರು, ಹೈದರಾಬಾದ್, ಮುಂಬೈ, ದೆಹಲಿ ಸೇರಿದಂತೆ ಪ್ರಮುಖ ನಗರಗಳ ನಡುವೆ ಸಂಚರಿಸುವ ಉದ್ಯೋಗಿಗಳು, ಐಟಿ ವೃತ್ತಿಪರರು ಮತ್ತು ಕುಟುಂಬಗಳ ಮೇಲೆ ದರ ಏರಿಕೆಯ ಪರಿಣಾಮ ಬೀರುವ ಸಾಧ್ಯತೆಯಿದೆ.

ಒಟ್ಟಿನಲ್ಲಿ, ಕಡಿಮೆ ದರದಲ್ಲಿ ವಿಮಾನ ಪ್ರಯಾಣದ ಅವಕಾಶ ಕಲ್ಪಿಸುತ್ತಿದ್ದ ಇಂಡಿಗೋದಲ್ಲೇ ಟಿಕೆಟ್ ಬೆಲೆ ಏರಿಕೆಯ ಸುಳಿವು ಸಿಕ್ಕಿರುವುದು ಪ್ರಯಾಣಿಕರಲ್ಲಿ ಆತಂಕ ಮೂಡಿಸಿದೆ. ಆದರೆ ಟಿಕೆಟ್ ದರ ಎಷ್ಟು ಹೆಚ್ಚಾಗಲಿದೆ ಮತ್ತು ಯಾವಾಗಿನಿಂದ ಜಾರಿಗೆ ಬರಲಿದೆ ಎಂಬುದರ ಬಗ್ಗೆ ಸ್ಪಷ್ಟ ಮಾಹಿತಿ ಹೊರಬಿದ್ದಿಲ್ಲ. ಹೀಗಾಗಿ ವಿಮಾನ ಪ್ರಯಾಣಕ್ಕೆ ಯೋಜನೆ ರೂಪಿಸುವವರು ಟಿಕೆಟ್ ದರಗಳ ಬದಲಾವಣೆ ಮೇಲೆ ನಿಗಾ ಇಡುವುದು ಉತ್ತಮ.