ಟೀಮ್ ಇಂಡಿಯಾದ ಮಾಜಿ ಕ್ರಿಕೆಟಿಗ ಹಾಗೂ ಪ್ರಸಿದ್ಧ ಕ್ರಿಕೆಟ್ ವಿಶ್ಲೇಷಕ ಇರ್ಫಾನ್ ಪಠಾಣ್ ಅಕ್ಟೋಬರ್ 27 ರಂದು ತಮ್ಮ 42ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದಾರೆ. ಭಾರತ ಕಂಡ ಅತ್ಯಂತ ಯಶಸ್ವಿ ಎಡಗೈ ವೇಗದ ಬೌಲಿಂಗ್ ಹಾಗೂ ಆಲ್‌ರೌಂಡರ್ ಆಗಿರುವ ಇರ್ಫಾನ್, 2007 ರ ಚೊಚ್ಚಲ ಟಿ20 ವಿಶ್ವಕಪ್ ಗೆದ್ದ ಭಾರತ ತಂಡದ ಪ್ರಮುಖ ರೂವಾರಿಯಾಗಿದ್ದರು.
ಮೈದಾನದಲ್ಲಿ ತಮ್ಮ ಅದ್ಭುತ ಬೌಲಿಂಗ್ ಹಾಗೂ ಬ್ಯಾಟಿಂಗ್ ಪ್ರದರ್ಶನದಿಂದ ಅಭಿಮಾನಿಗಳ ಹೃದಯ ಗೆದ್ದಿರುವ ಇರ್ಫಾನ್, ಮೈದಾನದಿಂದ ಹೊರಗೂ ತಮ್ಮ ನೇರ ನುಡಿ ಹಾಗೂ ದೇಶಪ್ರೇಮದ ವಿಚಾರಗಳಿಂದ ಸದಾ ಸುದ್ದಿಯಲ್ಲಿರುತ್ತಾರೆ. ಅವರ ಹುಟ್ಟುಹಬ್ಬದ ಈ ಸುಸಂದರ್ಭದಲ್ಲಿ, ಅವರು ಹೇಳಿರುವ ನಾಲ್ಕು ಪ್ರಮುಖ ಹಾಗೂ ಸ್ಫೂರ್ತಿದಾಯಕ ಮಾತುಗಳ ಸಾರಾಂಶ ಇಲ್ಲಿದೆ:
1. “ಎಲ್ಲಕ್ಕಿಂತ ಮೊದಲು ನಾನು ಒಬ್ಬ ಭಾರತೀಯ”:
ತಮ್ಮ ಭಾರತೀಯತೆಯ ಗುರುತನ್ನು ಅತ್ಯಂತ ಹೆಮ್ಮೆಯಿಂದ ಪ್ರತಿಪಾದಿಸುವ ಇರ್ಫಾನ್, “ನನ್ನ ಸ್ವಂತ ದೇಶದಲ್ಲಿ ನನ್ನ ಮನಸ್ಸಿನಲ್ಲಿದ್ದನ್ನು ವ್ಯಕ್ತಪಡಿಸಲು ನನಗೆ ಯಾರ ಅನುಮತಿಯೂ ಬೇಕಾಗಿಲ್ಲ” ಎಂದು ಬಲವಾಗಿ ಹೇಳುತ್ತಾರೆ. ದೇಶಪ್ರೇಮ ಮತ್ತು ವಾಕ್ ಸ್ವಾತಂತ್ರ್ಯ ಎರಡೂ ಜೊತೆಜೊತೆಯಾಗಿ ಸಾಗುತ್ತವೆ ಎಂಬುದಕ್ಕೆ ಅವರ ಈ ಮಾತುಗಳು ನಿದರ್ಶನ.
2. “ತಂಡದ ಶ್ರಮವೇ ನಿಜವಾದ ಯಶಸ್ಸು”:
ವೃತ್ತಿಪರ ಕ್ರಿಕೆಟ್ ಆಡಿರುವ ಇರ್ಫಾನ್ ಅವರಿಗೆ ಜಂಟಿ ಶ್ರಮದ ಮಹತ್ವ ಚೆನ್ನಾಗಿ ತಿಳಿದಿದೆ. ವೈಯಕ್ತಿಕ ಪ್ರತಿಭೆ ಪಂದ್ಯವನ್ನು ಗೆಲ್ಲಿಸಿಕೊಡಬಹುದು, ಆದರೆ ನಿರಂತರ ಯಶಸ್ಸು ಸಿಗಬೇಕಾದರೆ ಇಡೀ ತಂಡ ಒಂದಾಗಿ ಗುರಿಯತ್ತ ಶ್ರಮಿಸಬೇಕು ಎಂದು ಅವರು ಪ್ರತಿಪಾದಿಸುತ್ತಾರೆ.
3. “ಮಾನವೀಯತೆ ಸತ್ತಾಗ ಇಡೀ ಜಗತ್ತೇ ಕಣ್ಣೀರಿಡುತ್ತದೆ”:
ದೇಶ ಯಾವುದೇ ಇರಲಿ, ಮಾನವೀಯತೆ ಸತ್ತಾಗ ಜಗತ್ತೇ ದುಃಖಿಸುತ್ತದೆ ಎಂದು ಹೇಳಿದ್ದ ಇರ್ಫಾನ್, ಲೈಂಗಿಕ ದೌರ್ಜನ್ಯ ಮತ್ತು ಹಿಂಸಾಚಾರದ ವಿರುದ್ಧ ಧ್ವನಿ ಎತ್ತಿದ್ದರು. ಮಾನವೀಯ ಮೌಲ್ಯಗಳನ್ನು ಎತ್ತಿಹಿಡಿಯುವುದು ಹಾಗೂ ಅತ್ಯಾಚಾರಿಗಳಿಗೆ ಕಠಿಣ ಶಿಕ್ಷೆಯಾಗಬೇಕು ಎಂಬುದು ಇಡೀ ಸಮಾಜದ ಜವಾಬ್ದಾರಿಯಾಗಿದೆ ಎಂದು ಅವರು ಕಿವಿಮಾತು ಹೇಳಿದ್ದರು.
