ಮುಂಬೈನಲ್ಲಿ ನಡೆದ ಬಾಲಿವುಡ್ ಮ್ಯೂಸಿಕ್ ಪ್ರಾಜೆಕ್ಟ್ ಕಾರ್ಯಕ್ರಮದಲ್ಲಿ ದೇಶದ ಖ್ಯಾತ ಹಿನ್ನೆಲೆ ಗಾಯಕಿ ಶಿಲ್ಪಾ ರಾವ್ ಅವರಿಗೆ ಸಂಘಟಕರಿಂದ ತೀವ್ರ ಮುಜುಗರ ಉಂಟಾದ ಘಟನೆ ನಡೆದಿದೆ. ಅಕ್ಟೋಬರ್ ಇಪ್ಪತ್ತನಾಲ್ಕರಂದು ನಡೆದ ಈ ಸಂಗೀತ ಉತ್ಸವದ ಹತ್ತನೇ ಆವೃತ್ತಿಯಲ್ಲಿ ಶಿಲ್ಪಾ ರಾವ್ ಅವರ ಗಾಯನ ನಡೆಯುತ್ತಿದ್ದ ವೇಳೆಯಲ್ಲೇ ದಿಢೀರನೆ ಮೈಕ್ ಸಂಪರ್ಕವನ್ನು ಸ್ಥಗಿತಗೊಳಿಸಿ ಪ್ರದರ್ಶನವನ್ನು ಅರ್ಧಕ್ಕೆ ನಿಲ್ಲಿಸಲಾಗಿದೆ.
ಕಾರ್ಯಕ್ರಮದ ಸಮಯ ನಿರ್ವಹಣೆಯಲ್ಲಿ ಉಂಟಾದ ವಿಳಂಬದ ನೆಪವೊಡ್ಡಿ ಸಂಘಟಕರು ಗಾಯಕಿಯ ಮೈಕ್ ಸ್ವಿಚ್ ಆಫ್ ಮಾಡಿದ್ದಾರೆ. ಶಿಲ್ಪಾ ರಾವ್ ಅವರು ವೇದಿಕೆ ಮೇಲಿದ್ದು ಅಭಿಮಾನಿಗಳಿಗೆ ಧನ್ಯವಾದ ತಿಳಿಸುತ್ತಿದ್ದ ಸಮಯದಲ್ಲೇ ಮುಂದಿನ ತಂಡದ ಪ್ರದರ್ಶನವನ್ನು ಆರಂಭಿಸಲಾಯಿತು. ಈ ವೀಡಿಯೋಗಳು ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಂಘಟಕರ ನಡವಳಿಕೆಗೆ ಸಂಗೀತ ಪ್ರಿಯರಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ಈ ಘಟನೆಯ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿರುವ ಶಿಲ್ಪಾ ರಾವ್, ಮುಂಬೈನಲ್ಲಿ ನಡೆದ ಈ ಸನ್ನಿವೇಶದಿಂದ ನನ್ನ ಮನಸ್ಸಿಗೆ ತೀವ್ರ ಬೇಸರವಾಗಿದೆ. ಇಂತಹ ಸುಂದರ ಕ್ಷಣವನ್ನು ನಮ್ಮಿಂದ ಕಿತ್ತುಕೊಂಡದ್ದು ನೋವು ತಂದಿದೆ ಎಂದು ಬರೆದುಕೊಂಡಿದ್ದಾರೆ. ಪ್ರದರ್ಶನ ಅರ್ಧಕ್ಕೆ ನಿಂತರೂ ತನಗೆ ಬೆಂಬಲ ನೀಡಿದ ಅಭಿಮಾನಿಗಳಿಗೆ ಕೃತಜ್ಞತೆ ಸಲ್ಲಿಸಿರುವ ಅವರು, ಶೀಘ್ರದಲ್ಲೇ ಮುಂಬೈನಲ್ಲಿ ತಮ್ಮದೇ ಆದ ಪ್ರತ್ಯೇಕ ಸಂಗೀತ ಕಾರ್ಯಕ್ರಮದ ಮೂಲಕ ಮತ್ತೆ ಭೇಟಿಯಾಗುವುದಾಗಿ ಭರವಸೆ ನೀಡಿದ್ದಾರೆ.
ವಿವಾದ ಹೆಚ್ಚಾಗುತ್ತಿದ್ದಂತೆ ಸ್ಪಷ್ಟನೆ ನೀಡಿರುವ ಬಾಲಿವುಡ್ ಮ್ಯೂಸಿಕ್ ಪ್ರಾಜೆಕ್ಟ್ ಸಂಸ್ಥೆಯು, ಸ್ಥಳೀಯ ಆಡಳಿತದ ಕಟ್ಟುನಿಟ್ಟಿನ ಸಮಯದ ನಿಯಮಗಳು ಮತ್ತು ಕೆಯೂ ಸೀಮಿತ ಅವಧಿಯ ಕಾರಣದಿಂದಾಗಿ ಪ್ರದರ್ಶನವನ್ನು ಬೇಗನೆ ಮುಕ್ತಾಯಗೊಳಿಸಬೇಕಾಯಿತು. ಇದು ಅನಿವಾರ್ಯ ಪರಿಸ್ಥಿತಿಯಾಗಿದ್ದರೂ ಗಾಯಕಿಗೆ ಉಂಟಾದ ಅಸೌಕರ್ಯಕ್ಕೆ ಕ್ಷಮೆ ಯಾಚಿಸುವುದಾಗಿ ತಿಳಿಸಿದೆ.
ಎರಡು ಸಾವಿರದ ಏಳರಲ್ಲಿ ತೋಸೆ ನೈನಾ ಹಾಡಿನ ಮೂಲಕ ರಂಗಪ್ರವೇಶ ಮಾಡಿದ ಶಿಲ್ಪಾ ರಾವ್, ಖುದಾ ಜಾನೇ, ಘುಂಗ್ರೂ, ಬುಲ್ಲೆಯಾ, ಬೇಷರಂ ರಂಗ್ ಹಾಗೂ ಚಲೇಯಾ ಸೇರಿದಂತೆ ಸಾಲು ಸಾಲು ಸೂಪರ್ ಹಿಟ್ ಹಾಡುಗಳ ಮೂಲಕ ಭಾರತೀಯ ಚಿತ್ರರಂಗದಲ್ಲಿ ಪ್ರಸಿದ್ಧರಾಗಿದ್ದಾರೆ.
