ಚೆನ್ನೈ: ತಮಿಳುನಾಡು ಮಾಜಿ ಬಿಜೆಪಿ ರಾಜ್ಯಾಧ್ಯಕ್ಷ ಅಣ್ಣಾಮಲೈ ಕಾಕ್ರೋಚ್ ಜನತಾ ಪಾರ್ಟಿ(ಸಿಜೆಪಿ) ಬೆಂಬಲಿಸುದಾಗಿ ಘೋಷಿಸಿದ ಬೆನ್ನಲ್ಲೇ ಮಾಜಿ ತಮಿಳುನಾಡು ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷೆ ಡಾ. ತಮಿಳಿಸೈ ಸೌಂದರರಾಜನ್ ಪರೋಕ್ಷವಾಗಿ ಅಣ್ಣಾಮಲೈ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
ಡಾ. ತಮಿಳಿಸೈ ಸೌಂದರರಾಜನ್ ಸಾಮಾಜಿಕ ಜಾಲತಾಣಗಳಲ್ಲಿ ಅಣ್ಣಾಮಲೈಅವರನ್ನು ಟಾರ್ಗೆಟ್ ಮಾಡಿ ಕೆಲ ಕುತೂಹಲಕಾರಿ ಹೇಳಿಕೆಗಳನ್ನು ನೀಡಿದ್ದು, ಅವರ ಟ್ವೀಟ್ ಭಾರಿ ವೈರಲ್ ಆಗಿದೆ.
ಸಿಜೆಪಿ ನಾಯಕರಾದ ಸೌರವ್ ದಾಸ್ ಮತ್ತು ಅಶುತೋಷ್ ರಂಕಾ ಅವರನ್ನು ಒಂದು ವಾರದ ನ್ಯಾಯಾಂಗ ಬಂಧನದಲ್ಲಿಡಲಾಗಿತ್ತು. ನಾಯಕರನ್ನು ಜೈಲಿಗೆ ಹಾಕಿದರೆ, ಅವರ ಜನಪ್ರಿಯತೆ ಹೆಚ್ಚುವುದಿಲ್ಲವೇ, ದೆಹಲಿ ಪೊಲೀಸರು ನಡೆದುಕೊಂಡ ರೀತಿ ಆಕ್ಷೇಪಾರ್ಹ ಎಂದು ಅಣ್ಣಾಮಲೈ ಹೇಳಿದ್ದರು. ಇದು, ಬಿಜೆಪಿ ವಲಯದಲ್ಲಿ ಭಾರೀ ವಿರೋಧಕ್ಕೆ ಕಾರಣವಾಗಿತ್ತು. ಈಗ, ತಮಿಳಿಸೈ ಸೌಂದರರಾಜನ್ ನೀಡಿರುವ ಕೇಲ ಹೇಳಿಕೆ ಮತ್ತಷ್ಟು ಚರ್ಚೆಗೆ ಕಾರಣವಾಗಿದೆ.
ಮಾಜಿ ತೆಲಂಗಾಣದ ರಾಜ್ಯಪಾಲರೂ ಆಗಿರುವ ತಮಿಳಿಸೈ ಸೌಂದರರಾಜನ್ ಯಾರ ಹೆಸರನ್ನೂ ನೇರವಾಗಿ ಉಲ್ಲೇಖಿಸದೇ ಎಕ್ಸ್ ಪೋಸ್ಟ್ ಒಂದನ್ನು ಮಾಡಿದ್ದಾರೆ. ಅದರಲ್ಲಿ, ಪರೋಕ್ಷವಾಗಿ, ಬಿಜೆಪಿಯನ್ನು ಎಷ್ಟೇ ಟಾರ್ಗೆಟ್ ಮಾಡಲು ನೋಡಿದರೂ, ಅದು ಪರ್ವತವಾಗಿಯೇ ಉಳಿಯುತ್ತದೆಯೇ ಹೊರತು, ಮರಳದಿಬ್ಬವಾಗುವುದಿಲ್ಲ ಎಂದು ಇವರು ಬರೆದುಕೊಂಡಿದ್ದಾರೆ.
”ಗಾಳಿ ಜೋರಾಗಿ ಬೀಸಿ ತನ್ನ ದಿಕ್ಕನ್ನು ಬದಲಾಯಿಸಿಕೊಳ್ಳಬಹುದು. ಆದರೆ, ಪರ್ವತವನ್ನು ಅಲುಗಾಡಿಸಲು ಸಾಧ್ಯವೇ? ಪರ್ವತವು ಪರ್ವತವಾಗಿಯೇ ಉಳಿಯುತ್ತದೆಯೇ ಹೊರತು ಮರಳಿನ ದಿಬ್ಬವಾಗುವುದಿಲ್ಲ. ಹಿಂದೊಮ್ಮೆ, ತಾನೇ ಸಿಂಹ ಎಂದು ಬೀಗುತ್ತಿದ್ದವರ ಪೈಕಿ ಕೆಲವರು ಈಗ, ತಮಿಳುನಾಡಿನ ಸಣ್ಣ ಕಾಕ್ರೋಚ್’ಗಳಂತೆ ಬಣ್ಣ ಬದಲಾಯಿಸಿಕೊಳ್ಳುತ್ತಿದ್ದಾರೆ”.
“ಪರ್ವತ ಗಾಳಿ ಬೀಸಿದ ಕಡೆ, ರೂಪ ಬದಲಾಯಿಸಿಕೊಳ್ಳುವುದಿಲ್ಲ, ಮರಳಿನ ದಿಬ್ಬ ಮಾತ್ರ ರೂಪ ಬದಲಾಯಿಸಿಕೊಳ್ಳುವುದು. ತಾವೇ ಸಿಂಹ ಎಂದು ಮೆರೆಯುತ್ತಿದ್ದವರು, ಈಗ ತಮಿಳುನಾಡಿನಲ್ಲಿ ಜಿರಳೆಗಳಂತೆ ಓಡಾಡುತ್ತಿದ್ದಾರೆ”ಎಂದು ತಮಿಳಿಸೈ ಸೌಂದರರಾಜನ್, ಟ್ವೀಟ್ ಮಾಡಿದ್ದಾರೆ.
ತಮಿಳಿಸೈ ಸೌಂದರರಾಜನ್ ಅವರ ಪೋಸ್ಟಿಗೆ ನಾನಾ ರೀತಿಯ ಕಾಮೆಂಟುಗಳು ಬಂದಿವೆ. ಅದರಲ್ಲಿ ಒಂದು ಹೀಗಿದೆ, ’ನೀವು ವಿದ್ಯಾವಂತರು, ಆದರೂ, ಚುನಾವಣೆಯಲ್ಲಿ ಸ್ಪರ್ಧಿಸಲು ನೀವು ಸರಿಯಾದ ದಾರಿಯನ್ನು ಹಿಡಿಯಲಿಲ್ಲ ಎನ್ನುವುದು ನಿಮ್ಮದೇ ಪಾರ್ಟಿಯಲ್ಲಿ ಇರುವ ಎಲ್ಲರಿಗೂ ಗೊತ್ತಿದೆ. ನಿಮ್ಮದೇ ತಪ್ಪು ಇರುವಾಗ, ನೀವು ಇನ್ನೊಬ್ಬರಿಗೆ ಅಭಿಪ್ರಾಯ ಮಂಡಿಸುವುದು ಸರಿಯಲ್ಲ’ ಎನ್ನುವ ಪ್ರತಿಕ್ರಿಯೆ ಬಂದಿದೆ.
ಸಿಂಹವನ್ನು ಟೀಕಿಸಿದ ತಕ್ಷಣ ಅದರ ಗಾಂಭೀರ್ಯತೆ ಕಮ್ಮಿಯಾಗುವುದಿಲ್ಲ. ಕಾಲ ಬದಲಾದಂತೆ, ನಿಜವಾದ ನಾಯಕ ಯಾರು? ಮುಖವಾಡ ಹಾಕಿಕೊಂಡವರು ಯಾರು? ಎನ್ನುವುದನ್ನು ತಿಳಿಯಲು ಜಾಸ್ತಿ ಸಮಯ ಬೇಕಿಲ್ಲ ಎಂದು ಇನ್ನೊಬ್ಬರು, ತಮಿಳಿಸೈ ಸೌಂದರರಾಜನ್ ಪೋಸ್ಟಿಗೆ ಕಾಮೆಂಟ್ ಮಾಡಿದ್ದಾರೆ. ಒಟ್ಟಾರೆ ತಮಿಳು ನಾಡಿನಲ್ಲಿ ಬಿಜೆಪಿ ವರ್ಸಸ್ ಅಣ್ಣಾಮಲೈ ವಾಕ್ಸಮರಗಳು ಆರಂಭವಾಗಿರುವುದಂತು ನಿಜ.
