ಮೂತ್ರಪಿಂಡದ ಕಲ್ಲುಗಳು (ಕಿಡ್ನಿ ಸ್ಟೋನ್ಸ್) ಕಾಣಿಸಿಕೊಳ್ಳಲು ನೀರಿನ ಕೊರತೆ ಮಾತ್ರ ಕಾರಣವಲ್ಲ. ಆಹಾರ ಪದ್ಧತಿ, ಮೂತ್ರದಲ್ಲಿನ ಖನಿಜಗಳ ಪ್ರಮಾಣ, ಅನುವಂಶಿಕತೆ ಸೇರಿದಂತೆ ಹಲವು ಅಂಶಗಳು ಇದಕ್ಕೆ ಕಾರಣವಾಗಬಹುದು. ಸಾಕಷ್ಟು ನೀರು ಕುಡಿಯುವುದರಿಂದ ಕಲ್ಲುಗಳು ರೂಪುಗೊಳ್ಳುವ ಅಪಾಯವನ್ನು ಕಡಿಮೆ ಮಾಡಬಹುದು. ಆದರೆ, ಪದೇಪದೇ ಕಲ್ಲುಗಳ ಸಮಸ್ಯೆ ಕಾಣಿಸಿಕೊಳ್ಳುವವರು ಆಹಾರ ಪದ್ಧತಿಯ ಬಗ್ಗೆಯೂ ಗಮನಹರಿಸಬೇಕು. ಹಾಗಾದರೆ, ಯಾವ ಆಹಾರಗಳನ್ನು ಮಿತವಾಗಿ ಸೇವಿಸಬೇಕು? ಕ್ಯಾಲ್ಸಿಯಂ ಕ್ಯಾಲ್ಸಿಯಂ ಸೇವನೆ ನಿಲ್ಲಿಸಬೇಕೇ? ಇಲ್ಲಿದೆ ಮಾಹಿತಿ.
ಕಿಡ್ನಿ ಸ್ಟೋನ್ಸ್ ಹೇಗೆ ರೂಪುಗೊಳ್ಳುತ್ತವೆ?
ಕಿಡ್ನಿ ಸ್ಟೋನ್ಸ್ ಹೇಗೆ ಲ್ಸಿಯಂ, ಆಕ್ಸಲೇಟ್ ಮತ್ತು ಯೂರಿಕ್ ಆಮ್ಲದಂತಹ ಪದಾರ್ಥಗಳ ಸಾಂದ್ರತೆ ಹೆಚ್ಚಾದಾಗ ಸಣ್ಣ ಹರಳುಗಳು ರೂಪುಗೊಳ್ಳಬಹುದು. ಕಾಲಕ್ರಮೇಣ ಈ ಹರಳುಗಳು ಒಂದಕ್ಕೊಂದು ಸೇರಿ ಗಟ್ಟಿಯಾಗುವುದರಿಂದ ಮೂತ್ರಪಿಂಡದಲ್ಲಿ ಕಲ್ಲುಗಳು ಉಂಟಾಗುತ್ತವೆ.
ಇವುಗಳಲ್ಲಿ ಕ್ಯಾಲ್ಸಿಯಂ ಆಕ್ಸಲೇಟ್ ಕಲ್ಲುಗಳು ಅತ್ಯಂತ ಸಾಮಾನ್ಯವಾದವು. ವ್ಯಕ್ತಿಯ ಆಹಾರ ಪದ್ಧತಿ, ದೇಹದಲ್ಲಿನ ನೀರಿನ ಪ್ರಮಾಣ, ಮೂತ್ರದಲ್ಲಿನ ರಾಸಾಯನಿಕ ಸಮತೋಲನ ಮತ್ತು ಅನುವಂಶಿಕ ಅಂಶಗಳು ಕಲ್ಲುಗಳು ರೂಪುಗೊಳ್ಳುವ ಅಪಾಯದ ಮೇಲೆ ಪರಿಣಾಮ ಬೀರುತ್ತವೆ.
ಆಕ್ಸಲೇಟ್ ಹೆಚ್ಚಿರುವ ಆಹಾರಗಳನ್ನು ಸಂಪೂರ್ಣವಾಗಿ ಬಿಡಬೇಕೇ?
ಆಕ್ಸಲೇಟ್ ಅನೇಕ ಸಸ್ಯಜನ್ಯ ಆಹಾರಗಳಲ್ಲಿ ನೈಸರ್ಗಿಕವಾಗಿ ಕಂಡುಬರುವ ಸಂಯುಕ್ತವಾಗಿದೆ. ಪಾಲಕ್ ಸೊಪ್ಪು, ಬೀಟ್‌ರೂಟ್, ಕೆಲವು ನಟ್ಸ್‌, ಚಾಕೊಲೇಟ್ ಮತ್ತು ಚಹಾದಲ್ಲಿ ಇದರ ಪ್ರಮಾಣ ಹೆಚ್ಚಿರಬಹುದು.
ಆದರೆ, ಆಕ್ಸಲೇಟ್ ಇರುವ ಆಹಾರಗಳನ್ನು ಸೇವಿಸುವ ಎಲ್ಲರಿಗೂ ಕಿಡ್ನಿ ಸ್ಟೋನ್ಸ್ ಉಂಟಾಗುವುದಿಲ್ಲ. ಪದೇಪದೇ ಕ್ಯಾಲ್ಸಿಯಂ ಆಕ್ಸಲೇಟ್ ಕಲ್ಲುಗಳು ಕಾಣಿಸಿಕೊಳ್ಳುವವರು ವೈದ್ಯರು ಅಥವಾ ಆಹಾರ ತಜ್ಞರ ಸಲಹೆಯಂತೆ ಆಕ್ಸಲೇಟ್ ಹೆಚ್ಚಿರುವ ಆಹಾರಗಳ ಪ್ರಮಾಣವನ್ನು ನಿಯಂತ್ರಿಸಬಹುದು.
ಪೌಷ್ಟಿಕಾಂಶಗಳು ದೊರೆಯುವ ಆಹಾರಗಳನ್ನು ಯಾವುದೇ ಕಾರಣವಿಲ್ಲದೆ ಸಂಪೂರ್ಣವಾಗಿ ತ್ಯಜಿಸುವುದು ಸೂಕ್ತವಲ್ಲ.
ಕ್ಯಾಲ್ಸಿಯಂ ಸೇವನೆ ನಿಲ್ಲಿಸುವುದು ಸರಿಯೇ?
ಕಿಡ್ನಿ ಸ್ಟೋನ್ಸ್ ಉಂಟಾಗುವುದನ್ನು ತಡೆಯಲು ಕ್ಯಾಲ್ಸಿಯಂ ಸೇವನೆಯನ್ನು ಸಂಪೂರ್ಣವಾಗಿ ನಿಲ್ಲಿಸಬೇಕು ಎಂಬುದು ತಪ್ಪು ಕಲ್ಪನೆ.
ಹಾಲು, ಮೊಸರು ಸೇರಿದಂತೆ ಆಹಾರದಿಂದ ದೊರೆಯುವ ಕ್ಯಾಲ್ಸಿಯಂ ಕರುಳಿನಲ್ಲಿ ಆಕ್ಸಲೇಟ್‌ನೊಂದಿಗೆ ಸೇರಿಕೊಳ್ಳಲು ಸಹಾಯ ಮಾಡುತ್ತದೆ. ಇದರಿಂದ ಆಕ್ಸಲೇಟ್ ದೇಹಕ್ಕೆ ಹೀರಿಕೊಳ್ಳುವ ಪ್ರಮಾಣ ಕಡಿಮೆಯಾಗಬಹುದು.
ಆಹಾರದಲ್ಲಿ ಕ್ಯಾಲ್ಸಿಯಂ ಪ್ರಮಾಣವನ್ನು ಅನಗತ್ಯವಾಗಿ ಕಡಿಮೆ ಮಾಡಿದರೆ, ಕೆಲವು ವ್ಯಕ್ತಿಗಳಲ್ಲಿ ಆಕ್ಸಲೇಟ್ ಹೀರಿಕೊಳ್ಳುವಿಕೆ ಹೆಚ್ಚಾಗಿ ಕಲ್ಲುಗಳ ಅಪಾಯ ಹೆಚ್ಚಾಗಬಹುದು. ಆದ್ದರಿಂದ, ವೈದ್ಯರ ಸಲಹೆಯಿಲ್ಲದೆ ಕ್ಯಾಲ್ಸಿಯಂಯುಕ್ತ ಆಹಾರಗಳನ್ನು ಸಂಪೂರ್ಣವಾಗಿ ನಿಲ್ಲಿಸಬಾರದು.
ಉಪ್ಪು, ಸಿಟ್ರಸ್ ಹಣ್ಣು ಮತ್ತು ಪ್ರೋಟೀನ್ ಬಗ್ಗೆ ಎಚ್ಚರಿಕೆ ಇರಲಿ
1. ಉಪ್ಪಿನ ಸೇವನೆ ನಿಯಂತ್ರಿಸಿ
ಆಹಾರದಲ್ಲಿ ಸೋಡಿಯಂ ಪ್ರಮಾಣ ಹೆಚ್ಚಾದರೆ ಮೂತ್ರದ ಮೂಲಕ ಹೊರಹೋಗುವ ಕ್ಯಾಲ್ಸಿಯಂ ಪ್ರಮಾಣವೂ ಹೆಚ್ಚಾಗಬಹುದು. ಇದು ಕೆಲವು ರೀತಿಯ ಕಿಡ್ನಿ ಸ್ಟೋನ್ಸ್ ಅಪಾಯವನ್ನು ಹೆಚ್ಚಿಸುತ್ತದೆ. ಹೀಗಾಗಿ, ಹೆಚ್ಚು ಉಪ್ಪು ಹೊಂದಿರುವ ಸಂಸ್ಕರಿತ ಆಹಾರಗಳನ್ನು ಮಿತವಾಗಿ ಸೇವಿಸುವುದು ಉತ್ತಮ.
2. ನಿಂಬೆ ಮತ್ತು ಕಿತ್ತಳೆಯಂತಹ ಹಣ್ಣುಗಳನ್ನು ಸೇವಿಸಿ
ನಿಂಬೆ ಮತ್ತು ಕಿತ್ತಳೆಯಂತಹ ಸಿಟ್ರಸ್ ಹಣ್ಣುಗಳಲ್ಲಿ ಸಿಟ್ರೇಟ್ ಇರುತ್ತದೆ. ಇದು ಮೂತ್ರದಲ್ಲಿ ಕೆಲವು ರೀತಿಯ ಹರಳುಗಳು ರೂಪುಗೊಳ್ಳುವುದನ್ನು ತಡೆಯಲು ಸಹಾಯ ಮಾಡುತ್ತದೆ. ಆದರೆ, ಹಣ್ಣುಗಳನ್ನು ಸೇವಿಸುವುದೊಂದೇ ಕಲ್ಲುಗಳನ್ನು ತಡೆಯುವ ಖಚಿತ ವಿಧಾನವಲ್ಲ.
3. ಪ್ರಾಣಿಜನ್ಯ ಪ್ರೋಟೀನ್ ಅತಿಯಾಗಿ ಸೇವಿಸಬೇಡಿ
ಮಾಂಸ, ಮೀನು ಮತ್ತು ಇತರ ಪ್ರಾಣಿಜನ್ಯ ಪ್ರೋಟೀನ್‌ಗಳನ್ನು ಅತಿಯಾಗಿ ಸೇವಿಸುವುದರಿಂದ ಮೂತ್ರದ ರಾಸಾಯನಿಕ ಸಮತೋಲನ ಬದಲಾಗಬಹುದು. ಇದರಿಂದ ಕೆಲವು ರೀತಿಯ ಕಲ್ಲುಗಳು ರೂಪುಗೊಳ್ಳುವ ಅಪಾಯ ಹೆಚ್ಚಾಗಬಹುದು. ಆದ್ದರಿಂದ, ದೈನಂದಿನ ಆಹಾರದಲ್ಲಿ ಪ್ರೋಟೀನ್ ಪ್ರಮಾಣ ಸಮತೋಲನದಲ್ಲಿರುವಂತೆ ನೋಡಿಕೊಳ್ಳಬೇಕು.
ಮೂತ್ರಪಿಂಡದ ಕಲ್ಲುಗಳ ಪ್ರಮುಖ ಲಕ್ಷಣಗಳಿವು
ಕಲ್ಲುಗಳ ಗಾತ್ರ ಮತ್ತು ಅವು ಮೂತ್ರಪಿಂಡ ಅಥವಾ ಮೂತ್ರನಾಳದ ಯಾವ ಭಾಗದಲ್ಲಿವೆ ಎಂಬುದರ ಆಧಾರದ ಮೇಲೆ ಲಕ್ಷಣಗಳು ಬದಲಾಗುತ್ತವೆ. ಕೆಲವರಿಗೆ ಯಾವುದೇ ಲಕ್ಷಣಗಳು ಕಾಣಿಸಿಕೊಳ್ಳದಿದ್ದರೂ, ಇನ್ನು ಕೆಲವರಿಗೆ ತೀವ್ರ ನೋವು ಉಂಟಾಗಬಹುದು.
ಗಮನಿಸಬೇಕಾದ ಲಕ್ಷಣಗಳು:
ಬೆನ್ನು ಅಥವಾ ಹೊಟ್ಟೆಯ ಪಕ್ಕದ ಭಾಗದಲ್ಲಿ ತೀವ್ರ ನೋವು.
ಮೂತ್ರ ವಿಸರ್ಜಿಸುವಾಗ ನೋವು ಅಥವಾ ಉರಿ.
ಮೂತ್ರದಲ್ಲಿ ರಕ್ತ ಕಾಣಿಸಿಕೊಳ್ಳುವುದು.
ವಾಕರಿಕೆ ಮತ್ತು ವಾಂತಿ.
ಮೂತ್ರ ವಿಸರ್ಜಿಸಲು ತೊಂದರೆಯಾಗುವುದು ಅಥವಾ ಮೂತ್ರದ ಪ್ರಮಾಣ ಕಡಿಮೆಯಾಗುವುದು.
ಈ ಲಕ್ಷಣಗಳು ಕಂಡುಬಂದರೆ ನಿರ್ಲಕ್ಷಿಸದೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
ಪುರುಷರು ಮತ್ತು ಮಹಿಳೆಯರಲ್ಲಿ ಯಾರಿಗೆ ಹೆಚ್ಚು ಅಪಾಯ?
ಮೂತ್ರಪಿಂಡದ ಕಲ್ಲುಗಳು ಪುರುಷರಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತವೆ ಎಂಬುದು ತಪ್ಪು ಕಲ್ಪನೆ. ಪುರುಷರಲ್ಲಿ ಈ ಸಮಸ್ಯೆ ಕಾಣಿಸಿಕೊಳ್ಳುವ ಸಾಧ್ಯತೆ ಸಾಮಾನ್ಯವಾಗಿ ಹೆಚ್ಚಿರಬಹುದು. ಆದರೆ, ಮಹಿಳೆಯರೂ ಮೂತ್ರಪಿಂಡದ ಕಲ್ಲುಗಳ ಸಮಸ್ಯೆಗೆ ಒಳಗಾಗಬಹುದು.
ತಜ್ಞರ ಪ್ರಕಾರ, ಆಹಾರ ಪದ್ಧತಿ, ದೇಹದ ಚಯಾಪಚಯ ಕ್ರಿಯೆ, ನೀರಿನ ಸೇವನೆ ಮತ್ತು ಇತರ ಆರೋಗ್ಯ ಸಮಸ್ಯೆಗಳು ಕಲ್ಲುಗಳು ರೂಪುಗೊಳ್ಳುವ ಸಾಧ್ಯತೆಯ ಮೇಲೆ ಪರಿಣಾಮ ಬೀರುತ್ತವೆ. ಮಹಿಳೆಯರಲ್ಲಿ ಗರ್ಭಾವಸ್ಥೆಯ ಸಮಯದಲ್ಲಿ ದೇಹದಲ್ಲಿ ಕೆಲವು ಬದಲಾವಣೆಗಳು ಉಂಟಾಗುವುದರಿಂದ ಮೂತ್ರಪಿಂಡದ ಕಲ್ಲುಗಳಿಗೆ ಸಂಬಂಧಿಸಿದ ತೊಂದರೆಗಳೂ ಕಾಣಿಸಿಕೊಳ್ಳಬಹುದು.ಆದ್ದರಿಂದ, ಈ ಸಮಸ್ಯೆ ಪುರುಷರಿಗೆ ಮಾತ್ರ ಸೀಮಿತವಲ್ಲ. ಮಹಿಳೆಯರೂ ಅಗತ್ಯ ಮುನ್ನೆಚ್ಚರಿಕೆ ವಹಿಸಬೇಕು.
ಕಿಡ್ನಿ ಸ್ಟೋನ್ಸ್ ತಡೆಯಲು ಎಷ್ಟು ನೀರು ಕುಡಿಯಬೇಕು?
ದೇಹದಲ್ಲಿ ನೀರಿನ ಕೊರತೆ ಉಂಟಾದಾಗ ಮೂತ್ರ ಹೆಚ್ಚು ಸಾಂದ್ರವಾಗುತ್ತದೆ. ಇದರಿಂದ ಕಲ್ಲುಗಳನ್ನು ರೂಪಿಸುವ ಪದಾರ್ಥಗಳು ಹರಳುಗಳಾಗುವ ಸಾಧ್ಯತೆ ಹೆಚ್ಚುತ್ತದೆ. ಸಾಕಷ್ಟು ನೀರು ಕುಡಿಯುವುದರಿಂದ ಮೂತ್ರವನ್ನು ತೆಳುವಾಗಿರಿಸಲು ಮತ್ತು ಕಲ್ಲುಗಳ ಅಪಾಯವನ್ನು ಕಡಿಮೆ ಮಾಡಲು ಸಹಾಯವಾಗುತ್ತದೆ.
ವಿಶೇಷವಾಗಿ ಬಿಸಿಲಿನಲ್ಲಿ ಕೆಲಸ ಮಾಡುವವರು, ಹೆಚ್ಚು ವ್ಯಾಯಾಮ ಮಾಡುವವರು ಮತ್ತು ಬೆವರಿನ ಮೂಲಕ ಹೆಚ್ಚಿನ ದ್ರವ ಕಳೆದುಕೊಳ್ಳುವವರು ನೀರಿನ ಸೇವನೆಯ ಬಗ್ಗೆ ಹೆಚ್ಚಿನ ಗಮನಹರಿಸಬೇಕು.
ಆದರೆ, ಎಲ್ಲರಿಗೂ ಒಂದೇ ಪ್ರಮಾಣದ ನೀರು ಸೂಕ್ತವಾಗಿರುವುದಿಲ್ಲ. ಹವಾಮಾನ, ದೈಹಿಕ ಚಟುವಟಿಕೆ ಮತ್ತು ಆರೋಗ್ಯ ಸ್ಥಿತಿಗೆ ಅನುಗುಣವಾಗಿ ದ್ರವದ ಅಗತ್ಯ ಬದಲಾಗುತ್ತದೆ. ಹೃದಯ ಅಥವಾ ಮೂತ್ರಪಿಂಡದ ಕೆಲವು ಕಾಯಿಲೆಗಳಿಂದ ದ್ರವ ಸೇವನೆಗೆ ನಿರ್ಬಂಧವಿದ್ದರೆ ವೈದ್ಯರ ಸಲಹೆ ಪಾಲಿಸಬೇಕು.
ಪದೇಪದೇ ಕಿಡ್ನಿ ಸ್ಟೋನ್ಸ್ ಕಾಣಿಸಿಕೊಂಡರೆ ಏನು ಮಾಡಬೇಕು?
ಕಲ್ಲುಗಳ ಸಮಸ್ಯೆ ಮತ್ತೆ ಮತ್ತೆ ಕಾಣಿಸಿಕೊಂಡರೆ ಕೇವಲ ನೀರು ಕುಡಿಯುವ ಪ್ರಮಾಣ ಹೆಚ್ಚಿಸುವುದರಿಂದಲೇ ಪರಿಹಾರ ಸಿಗದಿರಬಹುದು. ಇಂತಹ ಸಂದರ್ಭಗಳಲ್ಲಿ ವೈದ್ಯರು ಅಗತ್ಯಕ್ಕೆ ಅನುಗುಣವಾಗಿ ಈ ಪರೀಕ್ಷೆಗಳನ್ನು ಸೂಚಿಸಬಹುದು:
ರಕ್ತ ಪರೀಕ್ಷೆ.
24 ಗಂಟೆಗಳ ಮೂತ್ರ ಪರೀಕ್ಷೆ.
ಹೊರಬಂದ ಕಲ್ಲಿನ ರಾಸಾಯನಿಕ ವಿಶ್ಲೇಷಣೆ.
ಅಗತ್ಯವಿದ್ದರೆ ಸ್ಕ್ಯಾನ್‌ ಅಥವಾ ಇತರ ಚಿತ್ರಣ ಪರೀಕ್ಷೆಗಳು.
ಈ ಪರೀಕ್ಷೆಗಳಿಂದ ಕಲ್ಲುಗಳು ರೂಪುಗೊಳ್ಳಲು ಕಾರಣವಾಗಿರುವ ಅಂಶಗಳನ್ನು ಗುರುತಿಸಿ, ಅದಕ್ಕೆ ಅನುಗುಣವಾಗಿ ಆಹಾರ ಪದ್ಧತಿ ಮತ್ತು ಚಿಕಿತ್ಸೆಯನ್ನು ನಿರ್ಧರಿಸಲು ಸಾಧ್ಯವಾಗುತ್ತದೆ.
ಈ ಲಕ್ಷಣಗಳನ್ನು ನಿರ್ಲಕ್ಷಿಸಬೇಡಿ
ಬೆನ್ನು ಅಥವಾ ಹೊಟ್ಟೆಯ ಪಕ್ಕದಲ್ಲಿ ತೀವ್ರ ನೋವು, ಮೂತ್ರದಲ್ಲಿ ರಕ್ತ, ಮೂತ್ರ ವಿಸರ್ಜಿಸುವಾಗ ನೋವು ಅಥವಾ ಉರಿ ಕಾಣಿಸಿಕೊಂಡರೆ ವೈದ್ಯರನ್ನು ಸಂಪರ್ಕಿಸಿ. ವಿಶೇಷವಾಗಿ ಜ್ವರದ ಜೊತೆಗೆ ತೀವ್ರ ನೋವು ಅಥವಾ ಮೂತ್ರ ವಿಸರ್ಜನೆಯಲ್ಲಿ ತೊಂದರೆ ಇದ್ದರೆ ತುರ್ತು ವೈದ್ಯಕೀಯ ನೆರವು ಪಡೆಯಬೇಕು.
ನೆನಪಿಡಿ: ಸಾಕಷ್ಟು ನೀರು ಕುಡಿಯುವುದು, ಉಪ್ಪಿನ ಸೇವನೆ ನಿಯಂತ್ರಿಸುವುದು ಮತ್ತು ಸಮತೋಲಿತ ಆಹಾರ ಸೇವಿಸುವುದು ಕಿಡ್ನಿ ಸ್ಟೋನ್ಸ್ ಅಪಾಯವನ್ನು ಕಡಿಮೆ ಮಾಡಲು ನೆರವಾಗಬಹುದು. ಆದರೆ, ಈಗಾಗಲೇ ಕಲ್ಲುಗಳ ಸಮಸ್ಯೆ ಇದ್ದರೆ ಅಥವಾ ಪದೇಪದೇ ಕಾಣಿಸಿಕೊಳ್ಳುತ್ತಿದ್ದರೆ ವೈದ್ಯರ ಸಲಹೆಯಂತೆ ಪರೀಕ್ಷೆ ಮತ್ತು ಚಿಕಿತ್ಸೆ ಪಡೆಯುವುದು ಅತ್ಯಗತ್ಯ.
