ಮುಂಬೈನ ಅತ್ಯಂತ ಐತಿಹಾಸಿಕ ಹಾಗೂ ಪ್ರತಿಷ್ಠಿತ ಕಾಂಗಾ ಲೀಗ್ (Kanga League) ಕ್ರಿಕೆಟ್ ಪಂದ್ಯಾವಳಿಗೆ ಸಂಬಂಧಿಸಿದ ವಿಡಿಯೋವೊಂದು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ. ಇದಕ್ಕೆ ಪ್ರಮುಖ ಕಾರಣವೆಂದರೆ, ಆ ಪಂದ್ಯದಲ್ಲಿ ಬ್ಯಾಟಿಂಗ್ ಮಾಡುತ್ತಿರುವ ಆಟಗಾರ ಧರಿಸಿರುವ ಜೆರ್ಸಿ ನಂಬರ್ ಹಾಗೂ ಆಟದ ಶೈಲಿ. ಅಚ್ಚರಿಯೆಂಬಂತೆ ಆ ಬ್ಯಾಟರ್ ಅಕ್ಷರಶಃ ಟೀಮ್ ಇಂಡಿಯಾದ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಅವರಂತೆ ಕಾಣಿಸಿಕೊಳ್ಳುತ್ತಿರುವುದು ಕ್ರಿಕೆಟ್ ಅಭಿಮಾನಿಗಳಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಈ ವೀಡಿಯೊದಲ್ಲಿ, ಬ್ಯಾಟರ್ ಧರಿಸಿರುವ ’18’ (18) ಸಂಖ್ಯೆಯ ಜೆರ್ಸಿ ಯಾರ ಗಮನವನ್ನೂ ಸೆಳೆಯದೆ ಇರಲಾರದು. ವಿರಾಟ್ ಕೊಹ್ಲಿ ಕಳೆದ ಹಲವು ವರ್ಷಗಳಿಂದ ಧರಿಸಿಕೊಂಡು ಬಂದಿರುವ ಇದೇ ಜೆರ್ಸಿ ಸಂಖ್ಯೆ ಹಾಗೂ ಅವರದೇ ಶೈಲಿಯ ಆಕ್ರಮಣಕಾರಿ ಹಾಗೂ ಕ್ಲಾಸಿಕ್ ಬ್ಯಾಟಿಂಗ್ ಭಂಗಿಯನ್ನು ಈ ಆಟಗಾರ ಹೋಲುತ್ತಿರುವುದು ವೀಕ್ಷಕರನ್ನು ಬೆರಗುಗೊಳಿಸಿದೆ. ದೇಶದ ಮೂಲೆಮೂಲೆಯಲ್ಲಿರುವ ಯುವ ಕ್ರಿಕೆಟಿಗರು ಕೊಹ್ಲಿ ಅವರ ಆಟವನ್ನು ಅನುಕರಿಸುವುದು ಸಾಮಾನ್ಯವಾದರೂ, ಈ ವೀಡಿಯೊದಲ್ಲಿರುವ ಆಟಗಾರನ ಹಾವಭಾವ ಅಚ್ಚರಿಯ ರೀತಿಯಲ್ಲಿ ಅಚ್ಚೊತ್ತಿದಂತೆ ಇದೆ. ಆದರೆ, ಈ ಆಟಗಾರ ಯಾರೆಂಬುದರ ಬಗ್ಗೆ ಇನ್ನೂ ಸ್ಪಷ್ಟ ಮಾಹಿತಿ ಲಭ್ಯವಾಗಿಲ್ಲ.
ಮುಂಬೈ ಕ್ರಿಕೆಟ್ ವಲಯದಲ್ಲಿ ದಶಕಗಳ ಇತಿಹಾಸ ಹೊಂದಿರುವ ಕಾಂಗಾ ಲೀಗ್ ಟೂರ್ನಿಯು ಮಳೆ ಮತ್ತು ಕಠಿಣ ಪಿಚ್ ಪರಿಸ್ಥಿತಿಗಳಲ್ಲಿ ಆಟಗಾರರ ನೈಜ ಸಾಮರ್ಥ್ಯವನ್ನು ಪರೀಕ್ಷೆಗೆ ಒಡ್ಡುವುದಕ್ಕೆ ಹೆಸರುವಾಸಿಯಾಗಿದೆ. ಇಂತಹ ಸ್ಥಳೀಯ ಟೂರ್ನಿಯೊಂದರಲ್ಲಿ ಈ ರೀತಿಯ ರೋಚಕ ದೃಶ್ಯ ವೈರಲ್ ಆಗಿರುವುದು ಕ್ರೀಡಾಭಿಮಾನಿಗಳನ್ನು ಹುಬ್ಬೇರಿಸುವಂತೆ ಮಾಡಿದೆ. ಹಾಗಾದರೆ ಇದು ನಿಜಕ್ಕೂ ವಿರಾಟ್ ಕೊಹ್ಲಿಯೇ ಎಂಬ ಪ್ರಶ್ನೆ ಅನೇಕರಲ್ಲ ಮೂಡುವುದು ಸಹಜ.
ಆದರೆ ವಾಸ್ತವದಲ್ಲಿ ಇದು ವಿರಾಟ್ ಕೊಹ್ಲಿ ಅಲ್ಲ. ವೆಸ್ಟ್ ಇಂಡೀಸ್ ವಿರುದ್ಧದ ಇತ್ತೀಚಿನ ಸರಣಿಯ ಬಳಿಕ ಸದ್ಯ ವಿರಾಟ್ ಕೊಹ್ಲಿ ಕ್ರಿಕೆಟ್‌ನಿಂದ ಸ್ವಲ್ಪ ವಿರಾಮ ಪಡೆದು ವಿಶ್ರಾಂತಿಯಲ್ಲಿದ್ದಾರೆ. 37 ವರ್ಷದ ಈ ದಿಗ್ಗಜ ಆಟಗಾರ ಮುಂದಿನ ತಿಂಗಳು ನ್ಯೂಜಿಲ್ಯಾಂಡ್ ಪ್ರವಾಸದಲ್ಲಿ ನಡೆಯಲಿರುವ ಐದು ಪಂದ್ಯಗಳ ಏಕದಿನ ಸರಣಿಯ ಮೂಲಕ ಮತ್ತೆ ಕಣಕ್ಕಿಳಿಯಲಿದ್ದಾರೆ. ಒಟ್ಟಿನಲ್ಲಿ, ಮುಂಬೈನ ಸ್ಥಳೀಯ ಪಂದ್ಯವೊಂದರಲ್ಲಿ ಕೊಹ್ಲಿ ಅವರನ್ನು ಹೋಲುವ ಜೆರ್ಸಿ ಹಾಗೂ ಆಟದ ಶೈಲಿಯ ಕಾರಣದಿಂದ ಈ ವೀಡಿಯೊ ಈಗ ಎಲ್ಲೆಡೆ ಸಖತ್ ವೈರಲ್ ಆಗಿದ್ದು, ನೆಟ್ಟಿಗರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.
