ಕೆಲವೊಮ್ಮೆ ಒಂದು ಸಣ್ಣ ಘಟನೆ ಅಥವಾ ಸರಳವಾದ ಊಟವೇ ಬದುಕಿನ ದಾರಿಯನ್ನೇ ಬದಲಾಯಿಸಿಬಿಡುತ್ತದೆ. ಕೊಚ್ಚಿಯ ಮಾಜಿ ಬ್ಯಾಂಕರ್ ಅಜಯ್ ಗೋಪಿನಾಥ್ ಅವರ ವಿಷಯದಲ್ಲೂ ಇದೇ ಆಗಿದೆ. ಬೆಂಗಳುರಿನ ರೆಸ್ಟೋರೆಂಟ್‌ವೊಂದಕ್ಕೆ ತೆರಳಿದ್ದಾಗ ಅವರಿಗೆ ‘ಮೈಕ್ರೋಗ್ರೀನ್ಸ್’ (ತರಕಾರಿ ಮತ್ತು ಮೂಲಿಕೆಗಳ ಎಳೆಯ ಸಸಿಗಳು) ಪರಿಚಯವಾಯಿತು. ಖಾದ್ಯಗಳ ಅಲಂಕಾರಕ್ಕೆ ಹಾಗೂ ರುಚಿ ಹೆಚ್ಚಿಸಲು ಬಳಸುವ ಈ ಪುಟ್ಟ ಗಿಡಗಳ ಪೌಷ್ಟಿಕಾಂಶದ ಬಗ್ಗೆ ಕುತೂಹಲ ತಳೆದ ಅಜಯ್, ಬ್ಯಾಂಕಿಂಗ್ ಕ್ಷೇತ್ರದ ತಮ್ಮ ಸುಖಕರ ಉದ್ಯೋಗವನ್ನು ತೊರೆದು ಕೃಷಿ ಉದ್ಯಮಕ್ಕೆ ಕಾಲಿಡಲು ನಿರ್ಧರಿಸಿದರು.
ಸತತ ಪ್ರಯತ್ನ ಮತ್ತು ಪ್ರಯೋಗ: 2017-18ರ ಸುಮಾರಿಗೆ ಅಜಯ್ ಪ್ರಯೋಗಾತ್ಮಕವಾಗಿ ಮೈಕ್ರೋಗ್ರೀನ್ಸ್ ಬೆಳೆಯಲು ಪ್ರಾರಂಭಿಸಿದರು. ಆರಂಭದಲ್ಲೇ ಉದ್ಯಮವನ್ನು ಪ್ರಾರಂಭಿಸುವ ಬದಲು, ಸುಮಾರು ಎರಡು ವರ್ಷಗಳ ಕಾಲ ಬೆಳೆಯುವ ವಿವಿಧ ವಿಧಾನಗಳ ಬಗ್ಗೆ ಸುದೀರ್ಘ ಸಂಶೋಧನೆ ನಡೆಸಿದರು. ಆರಂಭಿಕ ಪ್ರಯೋಗಗಳಲ್ಲಿ ಟಿಶ್ಯೂ ಪೇಪರ್ ಬಳಸಿ ಹೆಸರು ಕಾಳು ಬೆಳೆಯಲು ಹೋಗಿ ವಿಫಲರಾಗಿದ್ದರು. ಇಂಟರ್ನೆಟ್‌ನಲ್ಲಿ ಸಿಗುವ ಮಾಹಿತಿಯೂ ಸಂಪೂರ್ಣವಾಗಿ ನೆರವಾಗಲಿಲ್ಲ. ನಂತರ ಯುಕೆಯ ಮೈಕ್ರೋಗ್ರೀನ್ಸ್ ತಜ್ಞರೊಬ್ಬರ ಮಾರ್ಗದರ್ಶನ ಪಡೆದ ಅವರು, ಹೈಬ್ರಿಡ್ ಅಲ್ಲದ ಮತ್ತು ರಾಸಾಯನಿಕ ರಹಿತ ಗುಣಮಟ್ಟದ ಬೀಜಗಳ ಪ್ರಾಮುಖ್ಯತೆಯನ್ನು ತಿಳಿದುಕೊಂಡರು. ಬೆಂಗಳೂರು, ಪುಣೆ ಮತ್ತು ಛತ್ತೀಸ್‌ಗಢದಿಂದ ಸೂಕ್ತ ಬೀಜಗಳನ್ನು ತರಿಸಿ ತಮ್ಮ ಬೆಳೆಯುವ ವಿಧಾನವನ್ನು ಸುಧಾರಿಸಿಕೊಂಡರು.
80 ಚದರ ಅಡಿಯ ಕೊಠಡಿಯೇ ಮೊದಲ ಫಾರ್ಮ್: ಸಂಪೂರ್ಣ ಅನುಭವ ಗಳಿಸಿದ ನಂತರ, ತಮ್ಮ ಮನೆಯಲ್ಲಿದ್ದ ಕೇವಲ 80 ಚದರ ಅಡಿಯ ಸಣ್ಣ ಕೊಠಡಿಯನ್ನು ‘ಗ್ರೋ ಗ್ರೀನ್ಸ್’ (Grow Greens) ಎಂಬ ತಮ್ಮ ಸಂಸ್ಥೆಯ ಮೊದಲ ವಾಣಿಜ್ಯ ಫಾರ್ಮ್ ಆಗಿ ಪರಿವರ್ತಿಸಿದರು. ಕೇವಲ ಎರಡು ರ‍್ಯಾಕ್‌ಗಳು ಮತ್ತು ಕೆಲವು ಟ್ರೇಗಳೊಂದಿಗೆ ಆರಂಭವಾದ ಈ ಕೃಷಿಯಲ್ಲಿ ಇಂದು ಮೂಲಂಗಿ, ಸಾಸಿವೆ, ಸೂರ್ಯಕಾಂತಿ, ಬೀಟ್‌ರೂಟ್ ಸೇರಿದಂತೆ 35ಕ್ಕೂ ಹೆಚ್ಚು ತಳಿಗಳ ಮೈಕ್ರೋಗ್ರೀನ್ಸ್ ಬೆಳೆಯಲಾಗುತ್ತಿದೆ. ಸೂಕ್ತ ತಾಪಮಾನ, ವಾತಾವರಣ ಮತ್ತು ಕೀಟನಾಶಕಗಳಿಲ್ಲದೆ ನೈಸರ್ಗಿಕವಾಗಿ ಬೆಳೆಯುವ ವಿಧಾನವನ್ನು ಇವರು ಅಳವಡಿಸಿಕೊಂಡಿದ್ದಾರೆ.
ದೇಶಾದ್ಯಂತ ವಿಸ್ತರಿಸಿದ ಉದ್ಯಮ: ಇಂದು ‘ಗ್ರೋ ಗ್ರೀನ್ಸ್’ ಸಂಸ್ಥೆಯು ಪ್ರತಿದಿನ ಸುಮಾರು 5 ಕೆಜಿ ತಾಜಾ ಮೈಕ್ರೋಗ್ರೀನ್ಸ್ ಉತ್ಪಾದಿಸುತ್ತಿದೆ. ಕೇವಲ ಮನೆಯ ಒಂದು ಸಣ್ಣ ಕೊಠಡಿಯಿಂದ ಆರಂಭವಾದ ಈ ಉದ್ಯಮವು ಪ್ರಸ್ತುತ ದೇಶಾದ್ಯಂತ 140ಕ್ಕೂ ಹೆಚ್ಚು ಫ್ರಾಂಚೈಸಿ ಮಾದರಿಗಳನ್ನು ಹೊಂದಿದೆ. ಯಾವುದೇ ಕೀಟನಾಶಕಗಳಿಲ್ಲದೆ ಸಾವಯವ ರೀತಿಯಲ್ಲಿ ಬೆಳೆದು ಮಾರಾಟ ಮಾಡುತ್ತಿರುವ ಅಜಯ್ ಗೋಪಿನಾಥ್, ಇಂದು ಮೈಕ್ರೋಗ್ರೀನ್ಸ್ ಕೃಷಿಯ ಮೂಲಕ ತಿಂಗಳಿಗೆ ಬರೋಬ್ಬರಿ ₹5 ಲಕ್ಷದವರೆಗೆ ಆದಾಯ ಗಳಿಸುತ್ತಾ ಇತರರಿಗೆ ಮಾದರಿಯಾಗಿದ್ದಾರೆ.
