ಐಆರ್ಸಿಟಿಸಿ (IRCTC) ವೆಬ್‌ಸೈಟ್‌ನಲ್ಲಿ ತತ್ಕಾಲ್ ಟಿಕೆಟ್ ಬುಕಿಂಗ್ ಮಾಡುವುದು ಭಾರತೀಯ ರೈಲ್ವೆ ಪ್ರಯಾಣಿಕರಿಗೆ ದಿನದಿಂದ ದಿನಕ್ಕೆ ಬಹುದೊಡ್ಡ ಸವಾಲಾಗಿ ಪರಿಣಮಿಸುತ್ತಿದೆ. ತಾಂತ್ರಿಕ ದೋಷಗಳು, ವೆಬ್‌ಸೈಟ್ ನಿಧಾನಗತಿ ಹಾಗೂ ಸರ್ವರ್ ಮೇಲಿನ ಅಧಿಕ ಒತ್ತಡದಿಂದಾಗಿ ಟಿಕೆಟ್ ಕಾಯ್ದಿರಿಸಲು ಯತ್ನಿಸುವ ಸಾವಿರಾರು ಪ್ರಯಾಣಿಕರು ಪರದಾಡುವಂತಾಗಿದೆ.
ಸಮಯಕ್ಕೆ ಸರಿಯಾಗಿ ತೆರೆಯದ ಸೈಟ್
ನಿಯಮದಂತೆ ಪ್ರತಿದಿನ ಬೆಳಿಗ್ಗೆ 10:00 ಗಂಟೆಗೆ ಎಸಿ ಕ್ಲಾಸ್ ಹಾಗೂ 11:00 ಗಂಟೆಗೆ ನಾನ್-ಎಸಿ ಕ್ಲಾಸ್ ತತ್ಕಾಲ್ ಬುಕಿಂಗ್ ಪ್ರಾರಂಭವಾಗುತ್ತದೆ. ಆದರೆ, ಒಂದೇ ಬಾರಿಗೆ ಲಕ್ಷಾಂತರ ಜನರು ಲಾಗಿನ್ ಆಗುವುದರಿಂದ ಕೇವಲ ಒಂದು ನಿಮಿಷದ ವಿಳಂಬವೂ ಟಿಕೆಟ್ ಸಿಗದಂತೆ ಮಾಡುತ್ತಿದೆ. ಬುಕಿಂಗ್ ಸಮಯ ಆರಂಭವಾಗುತ್ತಿದ್ದಂತೆಯೇ ವೆಬ್‌ಸೈಟ್‌ನಲ್ಲಿ “ಉನ್ನತ ಮಟ್ಟದ ದಟ್ಟಣೆ ಎದುರಾಗಿದೆ – ದಯವಿಟ್ಟು ಮರುಪ್ರಯತ್ನಿಸಿ” (We are experiencing High Load – Please retry) ಎಂಬ ಸಂದೇಶ ಕಾಣಿಸಿಕೊಳ್ಳುತ್ತಿದ್ದು, ಸೈಟ್ ಲೋಡ್ ಆಗುವಷ್ಟರಲ್ಲಿ ಲಭ್ಯವಿರುವ ಎಲ್ಲಾ ಟಿಕೆಟ್‌ಗಳು ಮುಗಿದುಹೋಗಿರುತ್ತವೆ. ಇದರ ಜೊತೆಗೆ ಪೇಮೆಂಟ್ ಗೇಟ್‌ವೇ ಕೂಡ ತಾಂತ್ರಿಕ ಸಮಸ್ಯೆಗೆ ಸಿಲುಕಿ ಹಣ ಕಡಿತಗೊಂಡರೂ ಟಿಕೆಟ್ ಜಮೆಯಾಗದ ಉದಾಹರಣೆಗಳು ಹೆಚ್ಚುತ್ತಿವೆ.
ಪ್ರಯಾಣಿಕರ ಅಳಲು
ತುರ್ತು ಕೆಲಸದ ನಿಮಿತ್ತ ಜೈಪುರ-ಅರವಳಿ ಎಕ್ಸ್‌ಪ್ರೆಸ್ ಟಿಕೆಟ್ ಕಾಯ್ದಿರಿಸಲು ಯತ್ನಿಸಿದ ರಾಧಿಕಾ ಮೆನನ್ ಎಂಬ ಉದ್ಯೋಗಿ ಮಾತನಾಡಿ, “ಬೆಳಿಗ್ಗೆ 10 ಗಂಟೆಗೆ ಸರಿಯಾಗಿ ಲಾಗಿನ್ ಆದರೂ ಸೈಟ್ ತೆರೆಯಲೇ ಇಲ್ಲ. ಎರಡು ನಿಮಿಷದ ನಂತರ ಸೈಟ್ ಓಪನ್ ಆದಾಗ ಎಲ್ಲಾ ಟಿಕೆಟ್‌ಗಳು ವೇಟಿಂಗ್ ಲಿಸ್ಟ್‌ಗೆ ಹೋಗಿದ್ದವು” ಎಂದು ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ಅಂತೆಯೇ ಲಕ್ನೋಗೆ ಪ್ರಯಾಣಿಸಬೇಕಿದ್ದ ಮೀರಾ ಜೈನ್ ಎಂಬುವವರು ಪ್ರತಿಕ್ರಿಯಿಸಿ, “ತತ್ಕಾಲ್ ಸಮಯದಲ್ಲಿ ನಿಯಮಿತವಾಗಿ ಪಾಪ್-ಅಪ್ ಸಂದೇಶಗಳು ಬಂದು ಬುಕಿಂಗ್ ಪ್ರಕ್ರಿಯೆ ಪೂರ್ಣಗೊಳಿಸಲು ಸಾಧ್ಯವಾಗುತ್ತಿಲ್ಲ. ದಿನದಿಂದ ದಿನಕ್ಕೆ ತತ್ಕಾಲ್ ಟಿಕೆಟ್ ಪಡೆಯುವುದು ಕಷ್ಟಕರವಾಗುತ್ತಿದ್ದು, ರೈಲ್ವೇ ಇಲಾಖೆ ತಕ್ಷಣವೇ ವೆಬ್‌ಸೈಟ್ ಸುಧಾರಣೆಗೆ ಕ್ರಮ ಕೈಗೊಳ್ಳಬೇಕು” ಎಂದು ಆಗ್ರಹಿಸಿದ್ದಾರೆ.
ಐಆರ್ಸಿಟಿಸಿ ಸ್ಪಷ್ಟನೆ
ಸರ್ವರ್‌ಗೆ ಒಂದೇ ಬಾರಿಗೆ ಭಾರಿ ಪ್ರಮಾಣದ ಬಳಕೆದಾರರು ಲಾಗಿನ್ ಆಗುವುದರಿಂದ ‘ಹೈ ಲೋಡ್’ ಸಂದೇಶ ಕಾಣಿಸಿಕೊಳ್ಳುತ್ತದೆ. ನಮ್ಮ ತಾಂತ್ರಿಕ ತಂಡವು ಈ ಸಮಸ್ಯೆಯನ್ನು ಬಗೆಹರಿಸಲು ಹಾಗೂ ಸರ್ವರ್ ಸಾಮರ್ಥ್ಯವನ್ನು ಹೆಚ್ಚಿಸಲು ನಿರಂತರವಾಗಿ ಶ್ರಮಿಸುತ್ತಿದೆ ಎಂದು ಐಆರ್ಸಿಟಿಸಿ ಅಧಿಕಾರಿಗಳು ತಿಳಿಸಿದ್ದಾರೆ.
