ಮೇಕೆದಾಟು ಯೋಜನೆಗೆ ತ್ವರಿತ ಅನುಮೋದನೆ ನೀಡಲು ಕೇಂದ್ರ ಸಚಿವ ಸಿ.ಆರ್. ಪಾಟೀಲ್ ಗೆ ಸಿಎಂ ಡಿ.ಕೆ. ಶಿವಕುಮಾರ್ ಮನವಿ

ನವದೆಹಲಿ: ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಇಂದು ನವದೆಹಲಿಯಲ್ಲಿ ಕೇಂದ್ರ ಜಲಶಕ್ತಿ ಸಚಿವ ಸಿ.ಆರ್. ಪಾಟೀಲ್ ಅವರನ್ನು ಭೇಟಿಯಾದರು.

ಈ ಸಂದರ್ಭದಲ್ಲಿ ಕರ್ನಾಟಕ ಸರ್ಕಾರದ ನವದೆಹಲಿಯ ವಿಶೇಷ ಪ್ರತಿನಿಧಿ ಟಿ.ಬಿ. ಜಯಚಂದ್ರ ಹಾಗೂ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.

ಕರ್ನಾಟಕದ ಜಲ ಸಂಪನ್ಮೂಲಗಳು ಹಾಗೂ ರಾಜ್ಯದ ಕುಡಿಯುವ ನೀರು, ನೀರಾವರಿ ಮತ್ತು ಬರ ನಿರ್ವಹಣೆಗೆ ಸಂಬಂಧಿಸಿದ ಪ್ರಮುಖ ವಿಷಯಗಳ ಕುರಿತು ಈ ಸಭೆಯಲ್ಲಿ ಚರ್ಚಿಸಲಾಯಿತು.

ಈ ಕೆಳಗಿನ ವಿಷಯಗಳ ಕುರಿತು ತ್ವರಿತ ಕ್ರಮ ಕೈಗೊಳ್ಳುವಂತೆ ಅವರು ಕೇಂದ್ರ ಸಚಿವರನ್ನು ಕೋರಿದರು:

• ಕೇಂದ್ರ ಜಲ ಆಯೋಗದಿಂದ ₹16,745 ಕೋಟಿ ವೆಚ್ಚದ ಮೇಕೆದಾಟು ಸಮತೋಲನ ಜಲಾಶಯ ಮತ್ತು ಕುಡಿಯುವ ನೀರಿನ ಯೋಜನೆಯ ವಿಸ್ತೃತ ಯೋಜನಾ ವರದಿಯ (DPR) ತ್ವರಿತ ಪರಿಶೀಲನೆ ಮತ್ತು ಅನುಮೋದನೆ.

• KWDT-II (ಕೃಷ್ಣಾ ಜಲ ವಿವಾದ ನ್ಯಾಯಮಂಡಳಿ-2) ತೀರ್ಪನ್ನು ಗೆಜೆಟ್‌ನಲ್ಲಿ ಶೀಘ್ರವಾಗಿ ಪ್ರಕಟಿಸುವುದು; ಇದರಿಂದ ಕರ್ನಾಟಕಕ್ಕೆ ಹಂಚಿಕೆಯಾದ ನೀರಿನ ಪಾಲನ್ನು ಬಳಸಿಕೊಳ್ಳಲು ಮತ್ತು ಸಂಬಂಧಿತ ನೀರಾವರಿ ಯೋಜನೆಗಳನ್ನು ಕೈಗೊಳ್ಳಲು ಸಾಧ್ಯವಾಗುತ್ತದೆ.

• ಕೇಂದ್ರ ಬಜೆಟ್ 2023-24ರಲ್ಲಿ ಘೋಷಿಸಿದಂತೆ, PMKSY ಅಡಿಯಲ್ಲಿ ಮೇಲ್ಭದ್ರಾ ಯೋಜನೆಗೆ ಕೇಂದ್ರದ ನೆರವು ಒದಗಿಸುವುದು.

• ನೀರಾವರಿ, ಪ್ರವಾಹ ನಿಯಂತ್ರಣ ಮತ್ತು ಜಲ ಮೂಲಸೌಕರ್ಯವನ್ನು ಬಲಪಡಿಸಲು PMKSY ಮತ್ತು FMBAP ಅಡಿಯಲ್ಲಿ ಕರ್ನಾಟಕ ಸಲ್ಲಿಸಿರುವ ಪ್ರಸ್ತಾವನೆಗಳಿಗೆ ತ್ವರಿತ ಪರಿಶೀಲನೆ ಮತ್ತು ಅನುಮೋದನೆ.

• ಕೃಷ್ಣಾ ಮತ್ತು ಕಾವೇರಿ ಜಲಾನಯನ ಪ್ರದೇಶಗಳಲ್ಲಿ ರಾಜ್ಯದ ನ್ಯಾಯಯುತ ಅಗತ್ಯಗಳು ಮತ್ತು ಹಿತಾಸಕ್ತಿಗಳನ್ನು ಪರಿಗಣಿಸಿ, ಗೋದಾವರಿ-ಕಾವೇರಿ ಸಂಪರ್ಕ ಹಾಗೂ ಬೇಡ್ತಿ-ವರದಾ (ಹಿರೇವಡಟ್ಟಿ) ಸಂಪರ್ಕ ಯೋಜನೆಗಳ ಅಡಿಯಲ್ಲಿ ಕರ್ನಾಟಕಕ್ಕೆ ಸಮಾನ ಪಾಲು ಹಂಚಿಕೆ ಮಾಡುವುದು.

ಕರ್ನಾಟಕದ ದೀರ್ಘಕಾಲೀನ ನೀರಾವರಿ ಮತ್ತು ಕುಡಿಯುವ ನೀರಿನ ಅಗತ್ಯಗಳ ಹಿತದೃಷ್ಟಿಯಿಂದ, ಈ ವಿಷಯಗಳನ್ನು ಆದ್ಯತೆಯ ಮೇರೆಗೆ ಪರಿಶೀಲಿಸಿ ಶೀಘ್ರವಾಗಿ ಬಗೆಹರಿಸಲು ಅಗತ್ಯ ನಿರ್ದೇಶನಗಳನ್ನು ನೀಡುವಂತೆ ಮುಖ್ಯಮಂತ್ರಿಗಳು ಕೇಂದ್ರ ಸಚಿವರನ್ನು ಕೋರಿದರು.

ಬೆಂಗಳೂರಿನಲ್ಲಿ ರಕ್ಷಣಾ ಇಲಾಖೆಯ ಭೂಮಿ ಮತ್ತು ನಗರಾಭಿವೃದ್ಧಿಗೆ ಸಂಬಂಧಿಸಿದಂತೆ ರಕ್ಷಣಾ ಸಚಿವ ರಾಜ್ ನಾಥ್ ಸಿಂಗ್ ಜತೆ ಚರ್ಚೆ

ನವದೆಹಲಿ: ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಇಂದು ನವದೆಹಲಿಯಲ್ಲಿ ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರನ್ನು ಭೇಟಿಯಾಗಿ, ಬೆಂಗಳೂರಿನಲ್ಲಿ ರಕ್ಷಣಾ ಇಲಾಖೆಯ ಭೂಮಿ ಮತ್ತು ನಗರಾಭಿವೃದ್ಧಿಗೆ ಸಂಬಂಧಿಸಿದ ಹಲವಾರು ಪ್ರಮುಖ ವಿಷಯಗಳ ಕುರಿತು ಚರ್ಚಿಸಿದರು.

• ಬೆಂಗಳೂರಿನ ಇಬ್ಲೂರ್ ಫೈರಿಂಗ್ ರೇಂಜ್ (Iblur Firing Range) ಬಳಿ ಇರುವ ಸುಮಾರು 730 ಎಕರೆ ಬಳಕೆಯಾಗದ ರಕ್ಷಣಾ ಭೂಮಿಯನ್ನು ಶಾಶ್ವತ ಸಾರ್ವಜನಿಕ ಉದ್ಯಾನವನ ಮತ್ತು ನಗರದ ಶ್ವಾಸಕೋಶದಂತಿರುವ ಹಸಿರು ವಲಯವಾಗಿ(lung space) ಅಭಿವೃದ್ಧಿಪಡಿಸುವುದು.

• ರಕ್ಷಣಾ ಇಲಾಖೆಯ ಸುಮಾರು 43.838 ಎಕರೆ ಭೂಮಿಯಲ್ಲಿರುವ 10 ಅಧಿಸೂಚಿತ ಕೊಳೆಗೇರಿಗಳಿಗೆ ಪ್ರಾಯೋಗಿಕ ಹಾಗೂ ಪರಸ್ಪರ ಸ್ವೀಕಾರಾರ್ಹ ಪರಿಹಾರವನ್ನು ಕಂಡುಕೊಳ್ಳುವುದು ಮತ್ತು ಅವುಗಳ ದುರಸ್ತಿ ಹಾಗೂ ಪುನರಾಭಿವೃದ್ಧಿಗೆ ತುರ್ತು ಕಾರ್ಯಾನುಮತಿಯನ್ನು ಪಡೆಯುವುದು.

• ಹೆಚ್‌ಎಎಲ್ (HAL) ವಿಮಾನ ನಿಲ್ದಾಣ ಮತ್ತು ಯಲಹಂಕ ವಾಯುಪಡೆ ನಿಲ್ದಾಣದ ಸುತ್ತಮುತ್ತಲಿನ ಕಟ್ಟಡ ನಿರ್ಮಾಣ ಹಾಗೂ ಎತ್ತರದ ಮೇಲಿನ ನಿರ್ಬಂಧಗಳ (20 ಕಿ.ಮೀ. ವ್ಯಾಪ್ತಿಯಲ್ಲಿ ಕಡ್ಡಾಯವಾಗಿ ಪಡೆಯಬೇಕಾದ ನಿರಾಕ್ಷೇಪಣಾ ಪತ್ರ – NOC ಸೇರಿದಂತೆ) ಪರಿಶೀಲನೆ ಮತ್ತು ತರ್ಕಬದ್ಧಗೊಳಿಸುವಿಕೆ.

• ರಕ್ಷಣಾ ಇಲಾಖೆಯ 13.709 ಎಕರೆ ಭೂಮಿಯ ಹಸ್ತಾಂತರ ಪ್ರಕ್ರಿಯೆಯನ್ನು ತ್ವರಿತಗೊಳಿಸುವುದು ಮತ್ತು ಇಜಿಪುರ ಜಂಕ್ಷನ್ ಮೂಲಕ ಲೋವರ್ ಅಗಾರಂ ರಸ್ತೆಯನ್ನು ಸರ್ಜಾಪುರ ರಸ್ತೆಗೆ ಸಂಪರ್ಕಿಸುವ 24 ಮೀಟರ್ ಅಗಲದ ರಸ್ತೆಯ ನಿರ್ಮಾಣಕ್ಕೆ ಕಾರ್ಯಾನುಮತಿಯನ್ನು ಪಡೆಯುವುದು.

• ಬೆಂಗಳೂರು ನಗರದ ವಾಹನ ಸಂಚಾರಕ್ಕಾಗಿ ಉದ್ದೇಶಿಸಲಾದ ‘ಟ್ವಿನ್ ಟನಲ್'(ಜಂಟಿ ಸುರಂಗ ಮಾರ್ಗ) ಯೋಜನೆಗೆ ಅಗತ್ಯವಿರುವ ರಕ್ಷಣಾ ಇಲಾಖೆಯ ಭೂಮಿಯ ಹಸ್ತಾಂತರವನ್ನು ತ್ವರಿತಗೊಳಿಸುವುದು ಹಾಗೂ ಮೇಖ್ರಿ ಸರ್ಕಲ್ ಬಳಿ ರಕ್ಷಣಾ ಪ್ರದೇಶದ ಮೂಲಕ ಹಾದುಹೋಗುವ ಭೂಗತ ಭಾಗಕ್ಕೆ ಪ್ರಸ್ತಾಪಿಸಲಾದ ಪರವಾನಗಿ ಶುಲ್ಕವನ್ನು ಕಡಿಮೆ ಮಾಡುವುದು.

• ಬಳ್ಳಾರಿ ರಸ್ತೆಯನ್ನು ಸರೋವರ ಲೇಔಟ್‌ಗೆ ಸಂಪರ್ಕಿಸುವ ಉದ್ದೇಶಿತ 18 ಮೀಟರ್ ಅಗಲದ ಸಂಪರ್ಕ ರಸ್ತೆಗಾಗಿ ರಕ್ಷಣಾ ಇಲಾಖೆಯ 6.837 ಎಕರೆ ಭೂಮಿಯ ಹಸ್ತಾಂತರಕ್ಕೆ ತ್ವರಿತ ಅನುಮೋದನೆ ಪಡೆಯುವುದು.

• ಮೇಖ್ರಿ ಸರ್ಕಲ್‌ನಲ್ಲಿ ರಸ್ತೆಯನ್ನು ಎರಡು ಪಥಗಳಿಂದ ಮೂರು ಪಥಗಳಿಗೆ ವಿಸ್ತರಿಸಲು ಸೇನೆಯ ಸ್ವಾಧೀನದಲ್ಲಿರುವ 0.775 ಎಕರೆ ಭೂಮಿಯ ಹಸ್ತಾಂತರವನ್ನು ತ್ವರಿತಗೊಳಿಸುವುದು, ಇದರಿಂದ ವಿಮಾನ ನಿಲ್ದಾಣದ ಮಾರ್ಗದಲ್ಲಿನ ಪ್ರಮುಖ ಸಂಚಾರ ದಟ್ಟಣೆಯ ಸಮಸ್ಯೆಯನ್ನು ನಿವಾರಿಸಲು ಸಾಧ್ಯವಾಗುತ್ತದೆ.

ಬೆಂಗಳೂರಿನ ಸಂಪರ್ಕ ವ್ಯವಸ್ಥೆ, ಮೂಲಸೌಕರ್ಯ ಮತ್ತು ಯೋಜಿತ ನಗರ ಅಭಿವೃದ್ಧಿಗೆ ಅತ್ಯಗತ್ಯವಾಗಿರುವ ಈ ಯೋಜನೆಗಳನ್ನು ಸಕಾಲದಲ್ಲಿ ಅನುಷ್ಠಾನಗೊಳಿಸಲು ರಕ್ಷಣಾ ಸಚಿವಾಲಯದ ಬೆಂಬಲವನ್ನು ಕೋರುತ್ತಾ, ಈ ಪ್ರಸ್ತಾವನೆಗಳಿಗೆ ತ್ವರಿತವಾಗಿ ಅನುಮೋದನೆ ನೀಡುವಂತೆ ಮುಖ್ಯಮಂತ್ರಿಗಳು ರಕ್ಷಣಾ ಸಚಿವರಲ್ಲಿ ಮನವಿ ಮಾಡಿದರು.