ಮಧುಮೇಹ ಬಂದ ಬಳಿಕ ಹಾಲು ಕುಡಿಯಬಹುದೇ? ಹಾಲು ಸೇವಿಸಿದರೆ ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಹೆಚ್ಚಾಗುತ್ತದೆಯೇ? ಎಂಬ ಪ್ರಶ್ನೆ ಹಲವರಲ್ಲಿದೆ. ತಜ್ಞರ ಪ್ರಕಾರ, ಮಧುಮೇಹ ಇರುವವರು ಹಾಲನ್ನು ಸಂಪೂರ್ಣವಾಗಿ ತ್ಯಜಿಸುವ ಅಗತ್ಯವಿಲ್ಲ. ಆದರೆ ಹಾಲಿನ ಪ್ರಮಾಣ, ಅದರ ವಿಧ ಮತ್ತು ಅದಕ್ಕೆ ಸೇರಿಸುವ ಸಕ್ಕರೆ ಬಗ್ಗೆ ಎಚ್ಚರಿಕೆ ವಹಿಸಬೇಕು.
ಹಾಲಿನಲ್ಲಿ ನೈಸರ್ಗಿಕ ಸಕ್ಕರೆಯಾದ ಲ್ಯಾಕ್ಟೋಸ್ ಇರುತ್ತದೆ. ಇದು ದೇಹದಲ್ಲಿ ಕಾರ್ಬೋಹೈಡ್ರೇಟ್ ಆಗಿ ಜೀರ್ಣಗೊಂಡು ಗ್ಲೂಕೋಸ್‌ ಆಗುತ್ತದೆ. ಹೀಗಾಗಿ ಹಾಲು ಕುಡಿದ ನಂತರ ಕೆಲವರಲ್ಲಿ ರಕ್ತದಲ್ಲಿನ ಸಕ್ಕರೆ ಮಟ್ಟ ಸ್ವಲ್ಪ ಹೆಚ್ಚಾಗಬಹುದು.
ಆದರೆ ಹಾಲಿನಲ್ಲಿ ಪ್ರೋಟೀನ್ ಸೇರಿದಂತೆ ಹಲವು ಪೋಷಕಾಂಶಗಳೂ ಇರುವುದರಿಂದ, ಸರಿಯಾದ ಪ್ರಮಾಣದಲ್ಲಿ ಸೇವಿಸಿದರೆ ಮಧುಮೇಹ ಇರುವವರ ಆಹಾರದ ಭಾಗವಾಗಿರಬಹುದು.
ಹಾಲಿಗಿಂತ ಅದಕ್ಕೆ ಸೇರಿಸುವ ಸಕ್ಕರೆ ಸಮಸ್ಯೆ
ಮಧುಮೇಹ ಇರುವವರು ಹಾಲನ್ನು ಸಂಪೂರ್ಣವಾಗಿ ತಪ್ಪಿಸುವುದಕ್ಕಿಂತ, ಹಾಲಿಗೆ ಏನು ಸೇರಿಸುತ್ತಾರೆ ಎಂಬುದರ ಬಗ್ಗೆ ಹೆಚ್ಚು ಗಮನ ಹರಿಸಬೇಕು.
ಸಕ್ಕರೆ, ಜೇನು, ಫ್ಲೇವರ್ಡ್ ಮಿಲ್ಕ್, ಮಿಲ್ಕ್‌ಶೇಕ್‌ಗಳು, ಸಿಹಿ ಲಸ್ಸಿ ಮತ್ತು ಹೆಚ್ಚು ಸಕ್ಕರೆ ಹೊಂದಿರುವ ಡೈರಿ ಪಾನೀಯಗಳಲ್ಲಿ ಕಾರ್ಬೋಹೈಡ್ರೇಟ್ ಮತ್ತು ಸಕ್ಕರೆಯ ಪ್ರಮಾಣ ಹೆಚ್ಚಿರಬಹುದು. ಇವುಗಳನ್ನು ನಿಯಮಿತವಾಗಿ ಸೇವಿಸುವುದರಿಂದ ರಕ್ತದಲ್ಲಿನ ಸಕ್ಕರೆ ನಿಯಂತ್ರಣಕ್ಕೆ ತೊಂದರೆಯಾಗಬಹುದು.
ಮಧುಮೇಹ ಇರುವವರು ಎಷ್ಟು ಹಾಲು ಕುಡಿಯಬಹುದು?
ಸಾಮಾನ್ಯವಾಗಿ ಒಂದು ಬಾರಿ ಸುಮಾರು 150ರಿಂದ 200 ಮಿ.ಲೀ. ಸಕ್ಕರೆ ಸೇರಿಸದ ಹಾಲು ಸೇವಿಸಬಹುದು ಎಂದು ಪರಿಗಣಿಸಲಾಗುತ್ತದೆ. ಆದರೆ ಇದು ಎಲ್ಲರಿಗೂ ಒಂದೇ ಪ್ರಮಾಣವಾಗುವುದಿಲ್ಲ.
ವ್ಯಕ್ತಿಯ ರಕ್ತದಲ್ಲಿನ ಸಕ್ಕರೆ ಮಟ್ಟ, ತೂಕ, ಔಷಧಿ, ದೈನಂದಿನ ಕ್ಯಾಲೊರಿ ಅಗತ್ಯ ಮತ್ತು ದಿನದ ಉಳಿದ ಆಹಾರದಲ್ಲಿರುವ ಕಾರ್ಬೋಹೈಡ್ರೇಟ್ ಪ್ರಮಾಣವನ್ನು ಆಧರಿಸಿ ಹಾಲಿನ ಪ್ರಮಾಣ ಬದಲಾಗಬಹುದು.
ಹೀಗಾಗಿ ವೈಯಕ್ತಿಕ ಆರೋಗ್ಯ ಸ್ಥಿತಿಗೆ ಅನುಗುಣವಾಗಿ ವೈದ್ಯರು ಅಥವಾ ನೋಂದಾಯಿತ ಆಹಾರ ತಜ್ಞರ ಸಲಹೆ ಪಡೆಯುವುದು ಉತ್ತಮ.
ಚಹಾ, ಕಾಫಿಯಲ್ಲಿ ಹಾಲು ಬಳಸುತ್ತಿದ್ದರೆ?
ಹಾಲನ್ನು ಚಹಾ ಅಥವಾ ಕಾಫಿಯಲ್ಲಿ ಸೇವಿಸುವವರು ಹೆಚ್ಚುವರಿ ಸಕ್ಕರೆ ಸೇರಿಸದಿರುವುದು ಉತ್ತಮ.ಅದೇ ರೀತಿ ಓಟ್ಸ್, ಗಂಜಿ ಅಥವಾ ಇತರ ಕಾರ್ಬೋಹೈಡ್ರೇಟ್‌ಯುಕ್ತ ಆಹಾರದೊಂದಿಗೆ ಹಾಲು ಸೇವಿಸುತ್ತಿದ್ದರೆ, ಆ ಸಂಪೂರ್ಣ ಊಟದಿಂದ ಸಿಗುವ ಒಟ್ಟು ಕಾರ್ಬೋಹೈಡ್ರೇಟ್ ಪ್ರಮಾಣವನ್ನೂ ಪರಿಗಣಿಸಬೇಕು.
ಫುಲ್ ಕ್ರೀಮ್ ಅಥವಾ ಟೋನ್ಡ್ ಹಾಲು?
ಮಧುಮೇಹ ಇರುವವರು ಹಾಲು ಆಯ್ಕೆ ಮಾಡುವಾಗ ಸಕ್ಕರೆ ಪ್ರಮಾಣ ಮಾತ್ರವಲ್ಲದೆ ಕೊಬ್ಬು ಮತ್ತು ಒಟ್ಟು ಕ್ಯಾಲೊರಿಗಳನ್ನೂ ಗಮನಿಸಬೇಕು.
ಅಧಿಕ ತೂಕ, ಕೊಲೆಸ್ಟ್ರಾಲ್ ಅಥವಾ ಹೃದಯ ಸಂಬಂಧಿತ ಸಮಸ್ಯೆ ಇರುವವರಿಗೆ ಕಡಿಮೆ ಕೊಬ್ಬಿನ ಅಥವಾ ಟೋನ್ಡ್ ಹಾಲು ಸೂಕ್ತವಾಗಿರಬಹುದು. ಆದರೆ ಸಾಮಾನ್ಯ ತೂಕ ಹೊಂದಿರುವ ವ್ಯಕ್ತಿಯ ಅಗತ್ಯಗಳು ಬೇರೆಯಾಗಿರಬಹುದು.ಹೀಗಾಗಿ ಮಧುಮೇಹ ಇರುವ ಎಲ್ಲರಿಗೂ ಒಂದೇ ರೀತಿಯ ಹಾಲು ಸೂಕ್ತ ಎಂದು ಹೇಳಲು ಸಾಧ್ಯವಿಲ್ಲ.
ರಾತ್ರಿ ಹಾಲು ಕುಡಿದರೆ ಸಕ್ಕರೆ ಹೆಚ್ಚುತ್ತದೆಯೇ?
ಮಧುಮೇಹ ಇರುವವರು ಹಾಲನ್ನು ಕಡ್ಡಾಯವಾಗಿ ಬೆಳಿಗ್ಗೆಯೇ ಕುಡಿಯಬೇಕು ಎಂಬ ನಿಯಮವಿಲ್ಲ. ಬೆಳಗಿನ ಉಪಾಹಾರದೊಂದಿಗೆ ಅಥವಾ ತಮ್ಮ ಆಹಾರ ಯೋಜನೆಗೆ ಅನುಗುಣವಾಗಿ ಬೇರೆ ಸಮಯದಲ್ಲೂ ಸೇವಿಸಬಹುದು.
ರಾತ್ರಿ ಹಾಲು ಕುಡಿದ ಮಾತ್ರಕ್ಕೆ ಮಧುಮೇಹ ಹೆಚ್ಚಾಗುತ್ತದೆ ಎಂದೇನಿಲ್ಲ. ಆದರೆ ಹಾಲು ಸೇವಿಸಿದ ನಂತರ ರಕ್ತದಲ್ಲಿನ ಸಕ್ಕರೆ ಮಟ್ಟ ನಿರಂತರವಾಗಿ ಹೆಚ್ಚಾಗುತ್ತಿರುವುದು ಕಂಡುಬಂದರೆ, ಹಾಲಿನ ಪ್ರಮಾಣ ಮತ್ತು ಸೇವಿಸುವ ಸಮಯದ ಬಗ್ಗೆ ವೈದ್ಯರು ಅಥವಾ ಆಹಾರ ತಜ್ಞರ ಸಲಹೆ ಪಡೆಯುವುದು ಸೂಕ್ತ.
ಈ ರೀತಿಯ ಹಾಲನ್ನು ತಪ್ಪಿಸುವುದು ಉತ್ತಮ
ಮಧುಮೇಹ ಇರುವವರು ಸಾಧ್ಯವಾದಷ್ಟು ಸಕ್ಕರೆ ಸೇರಿಸಿದ ಹಾಲು, ಸಿಹಿ ಫ್ಲೇವರ್ಡ್ ಮಿಲ್ಕ್, ಮಿಲ್ಕ್‌ಶೇಕ್, ಸಿಹಿ ಲಸ್ಸಿ ಮತ್ತು ಹೆಚ್ಚು ಸಕ್ಕರೆ ಇರುವ ಪ್ಯಾಕ್‌ಡ್ ಡೈರಿ ಪಾನೀಯಗಳನ್ನು ತಪ್ಪಿಸುವುದು ಉತ್ತಮ.
ಮಧುಮೇಹ ಬಂದಿದೆ ಎಂಬ ಕಾರಣಕ್ಕೆ ಹಾಲನ್ನು ಸಂಪೂರ್ಣವಾಗಿ ನಿಲ್ಲಿಸುವ ಅಗತ್ಯವಿಲ್ಲ. ಸಕ್ಕರೆ ಸೇರಿಸದ ಹಾಲನ್ನು ಮಿತ ಪ್ರಮಾಣದಲ್ಲಿ ಸೇವಿಸಬಹುದು. ಆದರೆ ಪ್ರತಿಯೊಬ್ಬರ ದೇಹವು ಹಾಲಿಗೆ ವಿಭಿನ್ನವಾಗಿ ಪ್ರತಿಕ್ರಿಯಿಸಬಹುದು.
ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಪದೇಪದೇ ಹೆಚ್ಚಾಗುತ್ತಿದ್ದರೆ, ನಿಯಮಿತವಾಗಿ ಗ್ಲೂಕೋಸ್‌ ಮಟ್ಟವನ್ನು ಪರಿಶೀಲಿಸುವುದರ ಜೊತೆಗೆ ವೈದ್ಯರು ಅಥವಾ ನೋಂದಾಯಿತ ಆಹಾರ ತಜ್ಞರಿಂದ ವೈಯಕ್ತಿಕ ಆಹಾರ ಸಲಹೆ ಪಡೆಯುವುದು ಉತ್ತಮ.
ಸೂಚನೆ: ಈ ಮಾಹಿತಿ ಸಾಮಾನ್ಯ ಅರಿವಿಗಾಗಿ ಮಾತ್ರ. ಮಧುಮೇಹದ ಔಷಧಿ, ಆಹಾರ ಮತ್ತು ಹಾಲಿನ ಪ್ರಮಾಣವನ್ನು ನಿಮ್ಮ ವೈದ್ಯರ ಸಲಹೆಯಂತೆ ನಿರ್ಧರಿಸಿ.
