ಕಾರ್ಪೊರೇಟ್ ವಲಯದಲ್ಲಿ ಉದ್ಯೋಗಿಯೊಬ್ಬರು ತಮ್ಮ ಕೌಶಲ್ಯ ಹಾಗೂ ತಂತ್ರಜ್ಞಾನವನ್ನು ಬಳಸಿ ಕಚೇರಿ ಕೆಲಸವನ್ನು ಸುಲಭಗೊಳಿಸಿದರೆ ಕಂಪನಿಗಳು ಅವರಿಗೆ ನೀಡುವ ಪ್ರತಿಫಲವೇನು ಎಂಬ ಬಗ್ಗೆ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆ ಶುರುವಾಗಿದೆ. ಪ್ರತಿ ವಾರ ಬರೋಬ್ಬರಿ 15 ಗಂಟೆಗಳ ಕಾಲ ತೆಗೆದುಕೊಳ್ಳುತ್ತಿದ್ದ ವರದಿ ಸಿದ್ಧಪಡಿಸುವ ಕ್ಲಿಷ್ಟಕರ ಕೆಲಸವನ್ನು ಆಟೋಮೇಷನ್ ತಂತ್ರಜ್ಞಾನದ ಮೂಲಕ ಕೇವಲ ಒಂದು ನಿಮಿಷಕ್ಕೆ ಇಳಿಸಿದ ಉದ್ಯೋಗಿಯೊಬ್ಬರಿಗೆ, ಸಂಬಳ ಹೆಚ್ಚಳ ಅಥವಾ ಬಡ್ತಿ ನೀಡುವ ಬದಲು ಹೆಚ್ಚುವರಿ ಕೆಲಸದ ಹೊರೆಯನ್ನು ಹೊರಿಸಿರುವ ಘಟನೆ ಬೆಳಕಿಗೆ ಬಂದಿದೆ.
ಅನಾಮಧೇಯ ಉದ್ಯೋಗಿಯೊಬ್ಬರು ಹಂಚಿಕೊಂಡಿರುವ ವಿವರಗಳ ಪ್ರಕಾರ, ಕಂಪನಿಯಲ್ಲಿ ವಾರದ ವರದಿ ತಯಾರಿಸಲು ದತ್ತಾಂಶ ಸಂಗ್ರಹಿಸುವುದು ಹಾಗೂ ಫಾರ್ಮ್ಯಾಟಿಂಗ್ ಮಾಡಲು ಪ್ರತಿ ವಾರ ಸುಮಾರು 15 ಗಂಟೆಗಳ ಶ್ರಮ ಬೇಕಾಗುತ್ತಿತ್ತು. ಈ ನಿರಂತರ, ಬೇಸರದ ಕೆಲಸಕ್ಕೆ ಪರ್ಯಾಯ ಹುಡುಕಲು ಆತ ಒಂದು ವಾರಾಂತ್ಯ ಪೂರ್ತಿ ಶ್ರಮಿಸಿ ಸ್ವಯಂಚಾಲಿತವಾಗಿ ಕೆಲಸ ನಿರ್ವಹಿಸುವ ಸ್ಕ್ರಿಪ್ಟ್ ಒಂದನ್ನು ಸಿದ್ಧಪಡಿಸಿದ್ದರು. ಇದರ ಫಲವಾಗಿ ಇಡೀ ದಿನ ಹಿಡಿಯುತ್ತಿದ್ದ ಕೆಲಸವು ಕೇವಲ ಒಂದು ನಿಮಿಷದೊಳಗೆ ಪೂರ್ಣಗೊಳ್ಳಲು ಆರಂಭಿಸಿತು. ಉಳಿದ ಸಮಯದಲ್ಲಿ ಆತ ಹೊಸ ಕೌಶಲ್ಯಗಳನ್ನು ಕಲಿಯಲು ಹಾಗೂ ಮಾನಸಿಕ ಒತ್ತಡ ಕಡಿಮೆ ಮಾಡಿಕೊಳ್ಳಲು ಬಳಸಿಕೊಳ್ಳುತ್ತಿದ್ದರು.
ತನ್ನ ನಾವೀನ್ಯತೆ ಹಾಗೂ ಪರಿಶ್ರಮವನ್ನು ಕಂಡು ಮ್ಯಾನೇಜ್‌ಮೆಂಟ್ ಮೆಚ್ಚುಗೆ ಸೂಚಿಸಬಹುದು, ವೇತನ ಹೆಚ್ಚಳ ಅಥವಾ ಬಡ್ತಿ ನೀಡಬಹುದು ಎಂಬ ನಿರೀಕ್ಷೆಯಿಂದ ಆ ಉದ್ಯೋಗಿ ಈ ಆಟೋಮೇಷನ್ ಪ್ರಕ್ರಿಯೆಯನ್ನು ತನ್ನ ವ್ಯವಸ್ಥಾಪಕರಿಗೆ ತೋರಿಸಿದ್ದರು. ಆದರೆ ಅಲ್ಲಿಂದ ಆತನ ನಿರೀಕ್ಷೆ ಸಂಪೂರ್ಣವಾಗಿ ತಲೆಕೆಳಗಾಯಿತು. ಸಂಸ್ಥೆಯು ಆ ಒಂದು ನಿಮಿಷದ ಅವಧಿಯನ್ನೇ ಹೊಸ ಮಾನದಂಡವನ್ನಾಗಿ ನಿಗದಿಪಡಿಸಿತು. 15 ಗಂಟೆಗಳ ಆ ಕೆಲಸದ ಸಮಯ ಉಳಿತಾಯವಾಗುತ್ತಿದ್ದಂತೆ, ಅದೇ ಸಮಯದಲ್ಲಿ ಆತನಿಗೆ ಇತರ ಜವಾಬ್ದಾರಿಗಳನ್ನು ವಹಿಸಲಾಯಿತು.
ಅಷ್ಟಕ್ಕೇ ನಿಲ್ಲದೆ, ಹಿರಿಯ ಉದ್ಯೋಗಿಯೊಬ್ಬರು ಸಂಸ್ಥೆ ತೊರೆದಾಗ ಅವರ ಅರ್ಧದಷ್ಟು ಕೆಲಸದ ಹೊರೆಯನ್ನು ಇದೇ ಉದ್ಯೋಗಿಯ ಹೆಗಲಿಗೆ ಹಾಕಲಾಯಿತು. ಜೊತೆಗೆ ತಂಡದ ಇತರ ಸದಸ್ಯರ ಕೆಲಸಗಳನ್ನೂ ಆಟೋಮೇಟ್ ಮಾಡುವಂತೆ ಸೂಚಿಸಲಾಯಿತು. ಪರಿಣಾಮವಾಗಿ, ಯಾವುದೇ ವೇತನ ಹೆಚ್ಚಳವಿಲ್ಲದೆ ಆತನ ಕೆಲಸದ ಅವಧಿ ವಾರಕ್ಕೆ ಬರೋಬ್ಬರಿ 50 ಗಂಟೆಗಳಿಗೆ ಏರಿಕೆಯಾಯಿತು. ಈ ಕಹಿ ಅನುಭವದಿಂದ ಪಾಠ ಕಲಿತಿರುವ ಉದ್ಯೋಗಿ, ಇನ್ನು ಮುಂದೆ ಯಾವುದೇ ಕೆಲಸವನ್ನು ವೇಗವಾಗಿ ಪೂರ್ಣಗೊಳಿಸಿದರೂ ಅದನ್ನು ಬಹಿರಂಗಪಡಿಸದೆ, ಸಾಮಾನ್ಯ ವೇಗದಲ್ಲೇ ಕಚೇರಿಗೆ ಸಲ್ಲಿಸುವುದಾಗಿ ಹೇಳಿಕೊಂಡಿದ್ದಾರೆ.
ಕೃತಕ ಬುದ್ಧಿಮತ್ತೆ ಹಾಗೂ ಆಟೋಮೇಷನ್ ತಂತ್ರಜ್ಞಾನಗಳು ವ್ಯಾಪಕವಾಗುತ್ತಿರುವ ಇಂದಿನ ದಿನಗಳಲ್ಲಿ ಈ ಘಟನೆ ಗಂಭೀರ ಪ್ರಶ್ನೆಯೊಂದನ್ನು ಹುಟ್ಟುಹಾಕಿದೆ. ಉದ್ಯೋಗಿಯೊಬ್ಬರು ತಂತ್ರಜ್ಞಾನ ಬಳಸಿ ಉತ್ಪಾದಕತೆ ಹೆಚ್ಚಿಸಿದಾಗ, ಉಳಿತಾಯವಾದ ಸಮಯವನ್ನು ಕಂಪನಿಗಳು ಅವರಿಗೆ ಹೊಸ ಜವಾಬ್ದಾರಿ, ಬಡ್ತಿ ಮತ್ತು ವೇತನ ನೀಡಲು ಬಳಸಿಕೊಳ್ಳಬೇಕೇ ಹೊರತು ಕೇವಲ ಹೆಚ್ಚುವರಿ ದುಡಿಮೆಗೆ ಸೀಮಿತಗೊಳಿಸಬಾರದು. ಇಲ್ಲವಾದರೆ ಉದ್ಯೋಗಿಗಳು ತಮ್ಮ ದಕ್ಷತೆಯನ್ನು ಬಹಿರಂಗಪಡಿಸಲು ಹಿಂದೇಟು ಹಾಕುತ್ತಾರೆ ಎಂದು ನೆಟ್ಟಿಗರು ಅಭಿಪ್ರಾಯಪಟ್ಟಿದ್ದಾರೆ.
