ದೆಹಲಿಯ 31 ವರ್ಷದ ರಿಯಲ್ ಎಸ್ಟೇಟ್ ಮಾರಾಟ ವ್ಯವಸ್ಥಾಪಕ ಯುವರಾಜ್ ಸಿಂಗ್ ಮಂಚಂಡ ಅವರ ನಿಗೂಢ ಹತ್ಯೆ ಪ್ರಕರಣದ ತನಿಖೆ ತೀವ್ರಗೊಂಡ ಬೆನ್ನಲ್ಲೇ, ಪ್ರಕರಣದಲ್ಲಿ ಬರೋಬ್ಬರಿ 1.2 ಕೋಟಿ ರೂಪಾಯಿಗಳಿಗೂ ಅಧಿಕ ಮೊತ್ತದ ಆರ್ಥಿಕ ವಂಚನೆಯ ಆಘಾತಕಾರಿ ಅಂಶಗಳು ಮುನ್ನೆಲೆಗೆ ಬಂದಿವೆ. ಈ ಕೊಲೆ ಪ್ರಕರಣದಲ್ಲಿ ಬಂಧಿತರಾಗಿರುವ ಅನ್ಯಾ ವಾಟ್ಸ್ ಹಾಗೂ ಸಂಯಮ್ ಸಚ್‌ದೇವ ಎಂಬ ಆರೋಪಿಗಳು ಹೂಡಿದ್ದ ವಂಚನೆಯ ಬೃಹತ್ ಜಾಲ ಹಾಗೂ ಸಂತ್ರಸ್ತರೊಬ್ಬರಿಗೆ ವಾಟ್ಸಾಪ್‌ನಲ್ಲಿ ನೀಡಿದ್ದ ಅಮಾನವೀಯ ಬೆದರಿಕೆ ಸಂದೇಶಗಳು ಈಗ ಎಫ್‌ಐಆರ್ ಮೂಲಕ ಬಹಿರಂಗವಾಗಿವೆ.
ಪ್ರಕರಣದ ವಿವರಗಳ ಪ್ರಕಾರ, ಸಾರ್ವಜನಿಕ ವಲಯದ ಬ್ಯಾಂಕ್‌ಗೆ ಸಂಬಂಧಿಸಿದ ಹಣಕಾಸು ಸಂಸ್ಥೆಯೊಂದರ ಹಿರಿಯ ಉಪಾಧ್ಯಕ್ಷರೊಬ್ಬರನ್ನು ಈ ಜೋಡಿ 2024 ರ ಸೆಪ್ಟೆಂಬರ್‌ನಲ್ಲಿ ಗುರಿಯಾಗಿಸಿಕೊಂಡಿತ್ತು. ಸಂತ್ರಸ್ತ ಅಧಿಕಾರಿ ಆರೋಪಿ ಸಂಯಮ್ ಸಚ್‌ದೇವನ ಹಳೆಯ ಶಾಲಾ ಗೆಳೆಯನಾಗಿದ್ದನು. ಆರೋಪಿಗಳು ವಾಟ್ಸಾಪ್ ಮೂಲಕ ಸಂತ್ರಸ್ತನಿಗೆ ನಕಲಿ ಇಡಿ (ಜಾರಿ ನಿರ್ದೇಶನಾಲಯ) ನೋಟಿಸ್ ಕಳುಹಿಸಿ, ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ ಹಾಗೂ ಭಯೋತ್ಪಾದನಾ ವಿರೋಧಿ ಕಾಯ್ದೆಯಡಿ ಪ್ರಕರಣ ದಾಖಲಾಗಿದೆ ಎಂದು ಹೆದರಿಸಿದ್ದರು. ತಮಗೆ ಉನ್ನತ ಸರ್ಕಾರಿ ಅಧಿಕಾರಿಗಳ ಸಂಪರ್ಕವಿದೆ ಎಂದು ನಂಬಿಸಿ, ಪ್ರಕರಣದಿಂದ ಪಾರು ಮಾಡಲು ಸಹಾಯ ಮಾಡುವ ನೆಪದಲ್ಲಿ ಸಂತ್ರಸ್ತನಿಂದ ಉಳಿತಾಯದ ಹಣ, ಸಾಲ ಹಾಗೂ ಕುಟುಂಬದವರಿಂದ ಪಡೆದ ಹಣ ಸೇರಿ ಒಟ್ಟು 1.2 ಕೋಟಿ ರೂಪಾಯಿಗಳನ್ನು ಸುಲಿಗೆ ಮಾಡಿದ್ದರು. ಈ ಹಣದ ಬಹುಭಾಗ ಅನ್ಯಾ ವಾಟ್ಸ್ ಖಾತೆಗೆ ಜಮೆಯಾಗಿತ್ತು.
ಅಷ್ಟಕ್ಕೇ ನಿಲ್ಲದ ಆರೋಪಿಗಳು, ಸರ್ಕಾರಿ ಏಜೆನ್ಸಿಗಳಿಗೆ ಈಗಾಗಲೇ 13.8 ಕೋಟಿ ರೂಪಾಯಿ ಪಾವತಿಸಲಾಗಿದೆ ಎಂದು ಸುಳ್ಳು ಹೇಳಿ, ಹೆಚ್ಚುವರಿಯಾಗಿ 26 ಕೋಟಿ ರೂಪಾಯಿಗೆ ಬೇಡಿಕೆ ಇಟ್ಟಿದ್ದರು. ಇದೇ ಸಂದರ್ಭದಲ್ಲಿ ಆರೋಪಿಗಳು ಸಂತ್ರಸ್ತ ಅಧಿಕಾರಿಗೆ, “ನಿನ್ನ ಹೆಂಡತಿಯನ್ನು ಮಾರಿಯಾದರೂ ಸರಿ, ಹಣವನ್ನು ತಕ್ಷಣವೇ ಪಾವತಿಸು” ಎಂದು ಅತ್ಯಂತ ಕೀಳು ಮಟ್ಟದ ಬೆದರಿಕೆ ಸಂದೇಶ ರವಾನಿಸಿದ್ದರು. ತಾವು ವಂಚನೆಗೆ ಒಳಗಾಗಿರುವುದನ್ನು ಅರಿತ ಅಧಿಕಾರಿ ಸಂಸತ್ ಭವನದ ರಸ್ತೆಯ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.
ಇನ್ನೊಂದೆಡೆ, ಸೆಪ್ಟೆಂಬರ್ 6 ರಂದು ಗುರುಗ್ರಾಮದಲ್ಲಿ ಸಭೆಯೊಂದರಲ್ಲಿ ಪಾಲ್ಗೊಳ್ಳಲು ತೆರಳಿದ್ದ ಯುವರಾಜ್ ಸಿಂಗ್ ಮಂಚಂಡ ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದರು. ತಾಂತ್ರಿಕ ತನಿಖೆ ಕೈಗೆತ್ತಿಕೊಂಡ ಪೊಲೀಸರು ಯುವರಾಜ್‌ನ ಮಾಜಿ ಸಹೋದ್ಯೋಗಿ ಅನ್ಯಾ ವಾಟ್ಸ್ ಕಡೆಗೆ ಗಮನ ಹರಿಸಿದರು. ಮೊಬೈಲ್ ಕರೆ ವಿವರಗಳು ಹಾಗೂ ಲೊಕೇಶನ್ ಜಾಡು ಹಿಡಿದು ಉತ್ತರಾಖಂಡಕ್ಕೆ ತೆರಳಿದ ಪೊಲೀಸರು ಅನ್ಯಾ ವಾಟ್ಸ್ ಮತ್ತು ಸಂಯಮ್ ಸಚ್‌ದೇವ ಇಬ್ಬರನ್ನೂ ಬಂಧಿಸಿದರು. ವಿಚಾರಣೆ ವೇಳೆ ಆರೋಪಿಗಳು ಯುವರಾಜ್‌ನನ್ನು ಭೇಟಿಯಾಗಿ ಹತ್ಯೆ ಮಾಡಿರುವುದಾಗಿ ಹಾಗೂ ಶವವನ್ನು ಗುರುಗ್ರಾಮದ ಬಾದ್‌ಶಾಪುರ ಪ್ರದೇಶದಲ್ಲಿ ಎಸೆದಿರುವುದಾಗಿ ಒಪ್ಪಿಕೊಂಡಿದ್ದಾರೆ.
ಸೆಪ್ಟೆಂಬರ್ 10 ರಂದು ಗುರುಗ್ರಾಮ ಪೊಲೀಸರು ಪತ್ತೆಹಚ್ಚಿದ್ದ ಅನಾಮಧೇಯ ಶವವನ್ನು ಮೃತನ ಕುಟುಂಬಸ್ಥರು ಗುರುತಿಸಿದ್ದಾರೆ. ಸದ್ಯ ನ್ಯಾಯಾಲಯವು ಆರೋಪಿಗಳನ್ನು ಐದು ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ಒಪ್ಪಿಸಿದೆ. ಆರೋಪಿಗಳು ನಡೆಸುತ್ತಿದ್ದ ಈ ಬೃಹತ್ ನಕಲಿ ಸರ್ಕಾರಿ ನೋಟಿಸ್ ಮತ್ತು ಸುಲಿಗೆ ದಂಧೆಯ ಮಾಹಿತಿ ಯುವರಾಜ್‌ಗೆ ತಿಳಿದಿದ್ದರಿಂದಲೇ ಆತನನ್ನು ಕೊಲೆ ಮಾಡಲಾಯಿತೇ ಎಂಬ ಆಯಾಮದಲ್ಲಿ ಪೊಲೀಸರು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.
