ಮೊಬೈಲ್ ಪರದೆಯ ಮೇಲೆ ನಿರಂತರವಾಗಿ ರೀಲ್ಸ್, ಶಾರ್ಟ್ಸ್ ವೀಕ್ಷಿಸುತ್ತಾ ಸಮಯ ವ್ಯರ್ಥ ಮಾಡುವ ಅಭ್ಯಾಸವನ್ನು ತಪ್ಪಿಸಲು ಹಾಗೂ ನಾಗರಿಕರಲ್ಲಿ ಪುಸ್ತಕ ಓದುವ ಹವ್ಯಾಸವನ್ನು ಪುನರುಜ್ಜೀವನಗೊಳಿಸಲು ಸಿಂಗಾಪುರ ಸರ್ಕಾರ ಅತ್ಯಂತ ವಿಶಿಷ್ಟವಾದ ಯೋಜನೆಯನ್ನು ಜಾರಿಗೆ ತಂದಿದೆ. ದಿನಕ್ಕೆ ಕೇವಲ 15 ನಿಮಿಷ ಪುಸ್ತಕ ಓದುವ ನಾಗರಿಕರಿಗೆ ವರ್ಚುವಲ್ ನಾಣ್ಯಗಳನ್ನು ನೀಡಿ, ನಂತರ ಅದನ್ನು ನಗದು ಹಣವನ್ನಾಗಿ ಪರಿವರ್ತಿಸಿಕೊಳ್ಳುವ ಆಕರ್ಷಕ ಪ್ರೋತ್ಸಾಹಕ ಯೋಜನೆಯನ್ನು ಅಲ್ಲಿನ ರಾಷ್ಟ್ರೀಯ ಗ್ರಂಥಾಲಯ ಮಂಡಳಿ (NLB) ಘೋಷಿಸಿದೆ.
‘ReadSG’ ಎಂಬ ಹೆಸರಿನ ಈ ಐದು ವರ್ಷಗಳ ರಾಷ್ಟ್ರೀಯ ಅಭಿಯಾನವು ಜನರ ಗಮನ ಕೇಂದ್ರೀಕರಣದ ಅವಧಿ ಕುಸಿಯುತ್ತಿರುವುದನ್ನು ತಡೆಯುವ ಉದ್ದೇಶವನ್ನು ಹೊಂದಿದೆ. ಇತ್ತೀಚಿನ ಅಧ್ಯಯನಗಳ ಪ್ರಕಾರ, ಜನರು ಆಳವಾದ ಅಧ್ಯಯನ ಮತ್ತು ದೀರ್ಘ ಲೇಖನಗಳನ್ನು ಓದುವ ಬದಲು ಆನ್‌ಲೈನ್‌ನಲ್ಲಿ ಮೇಲ್ನೋಟಕ್ಕೆ ಕಾಣುವ ಸಣ್ಣ ಸಣ್ಣ ತುಣುಕುಗಳನ್ನು ಮಾತ್ರ ಓದಲು ಬಯಸುತ್ತಿದ್ದಾರೆ. ಇದರಿಂದಾಗಿ ಜನರ ಆಲೋಚನಾ ಸಾಮರ್ಥ್ಯ, ಕಲ್ಪನಾ ಶಕ್ತಿ ಮತ್ತು ವಿಮರ್ಶಾತ್ಮಕ ಚಿಂತನೆಗಳು ಕ್ಷೀಣಿಸುತ್ತಿವೆ ಎಂಬ ಆತಂಕ ತಜ್ಞರಲ್ಲಿ ಮೂಡಿದೆ. ಇದನ್ನು ಸರಿಪಡಿಸಲು ಸಿಂಗಾಪುರ ಸರ್ಕಾರ ‘ಗ್ಯಾಮಿಫಿಕೇಷನ್’ ಮಾದರಿಯನ್ನು ಪರಿಚಯಿಸಿದೆ.
ಯೋಜನೆ ಕಾರ್ಯನಿರ್ವಹಿಸುವ ವಿಧಾನ:
ನಾಗರಿಕರು ದಿನಕ್ಕೆ ಕನಿಷ್ಠ 15 ನಿಮಿಷಗಳ ಕಾಲ ಪುಸ್ತಕ ಓದಿ, ಆ ವಿವರವನ್ನು ಸರ್ಕಾರದ ಅಧಿಕೃತ ವೆಬ್‌ಸೈಟ್‌ನಲ್ಲಿ ದಾಖಲಿಸಬೇಕು.
ದಿನಕ್ಕೆ ಒಂದು ಸೆಷನ್‌ಗೆ ಮಾತ್ರ ಅವಕಾಶವಿದ್ದು, 15 ನಿಮಿಷ ಪೂರ್ಣಗೊಳಿಸಿದರೆ 20 ವರ್ಚುವಲ್ ಕಾಯಿನ್‌ಗಳು ಲಭ್ಯವಾಗುತ್ತವೆ.
ಒಟ್ಟು 1,000 ಕಾಯಿನ್‌ಗಳು ಸಂಗ್ರಹವಾದರೆ ಅದನ್ನು 1 ಸಿಂಗಾಪುರ್ ಡಾಲರ್ (ಸುಮಾರು 65 ರಿಂದ 70 ಭಾರತೀಯ ರೂಪಾಯಿ) ನಗದಿಗೆ ಪರಿವರ್ತಿಸಿಕೊಳ್ಳಬಹುದು.
ಸತತ 50 ದಿನಗಳ ಕಾಲ ದಿನಕ್ಕೆ 15 ನಿಮಿಷ ಓದಿದರೆ 1 ಸಿಂಗಾಪುರ್ ಡಾಲರ್ ಗಳಿಸಬಹುದಾಗಿದೆ.
ಇದು ಯಾರನ್ನೂ ಶ್ರೀಮಂತರನ್ನಾಗಿ ಮಾಡದಿದ್ದರೂ, ಪುಸ್ತಕ ಹಿಡಿಯಲು ಒಂದು ಪುಟ್ಟ ಆರ್ಥಿಕ ಪ್ರೇರಣೆಯಾಗಿ ಕೆಲಸ ಮಾಡುತ್ತದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಮೆಟ್ರೋ ರೈಲಿಗಾಗಿ ಕಾಯುವಾಗ, ಬಸ್ ಪ್ರಯಾಣದ ವೇಳೆ ಅಥವಾ ಬೆಳಗಿನ ಕಾಫಿ ಸೇವಿಸುವ 15 ನಿಮಿಷಗಳ ಬಿಡುವಿನ ವೇಳೆಯನ್ನು ಸದುಪಯೋಗಪಡಿಸಿಕೊಳ್ಳಲು ಇದು ಪ್ರೇರೇಪಿಸುತ್ತದೆ.
ನಾಗರಿಕರ ಜೀವನಶೈಲಿ ಬದಲಾವಣೆಗೆ ಸಿಂಗಾಪುರ ಸರ್ಕಾರ ಹಣಕಾಸಿನ ಪ್ರೋತ್ಸಾಹ ನೀಡುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆ ದಿನನಿತ್ಯದ ನಡಿಗೆ ಗುರಿ (Step Target) ತಲುಪಿದವರಿಗೆ ಹಾಗೂ ಆರೋಗ್ಯಕರ ಹಾದಿಗಳಲ್ಲಿ ಹೆಜ್ಜೆ ಹಾಕಿದವರಿಗೆ ಸೂಪರ್‌ಮಾರ್ಕೆಟ್ ವೋಚರ್‌ಗಳನ್ನು ನೀಡಿ ಯಶಸ್ವಿಯಾಗಿತ್ತು. ಪ್ರಸ್ತುತ ಪ್ರಾಯೋಗಿಕ ಹಂತದಲ್ಲಿರುವ ಈ ಯೋಜನೆಯ ಮೂಲಕ ಈ ವರ್ಷಾಂತ್ಯಕ್ಕೆ 75 ಲಕ್ಷ ನಿಮಿಷಗಳ ಓದುವಿಕೆ ಗುರಿ ಸಾಧಿಸುವ ಜತೆಗೆ ಚಾರಿಟಿ ನಿಧಿ ಸಂಗ್ರಹಿಸುವ ಉದ್ದೇಶವನ್ನೂ ಹೊಂದಲಾಗಿದೆ. ಕೇವಲ ಪರೀಕ್ಷೆಗಾಗಿ ಮಾತ್ರವಲ್ಲದೆ, ದೈನಂದಿನ ಬದುಕಿನಲ್ಲಿ ಪುಸ್ತಕ ಪ್ರೇಮವನ್ನು ಜೀವಂತವಾಗಿಡಲು ಈ ಯೋಜನೆ ಸಹಕಾರಿಯಾಗಲಿದೆ ಎಂದು ನಂಬಲಾಗಿದೆ.
