ನವದೆಹಲಿ: ರೈಲು ಪ್ರಯಾಣಿಕರಿಗೆ ಭಾರತೀಯ ರೈಲ್ವೆ ಗುಡ್‌ನ್ಯೂಸ್ ನೀಡಿದೆ. ಪ್ರಯಾಣವನ್ನು ಮತ್ತಷ್ಟು ಸುಲಭಗೊಳಿಸುವ ನಿಟ್ಟಿನಲ್ಲಿ ರೈಲ್ ಒನ್ ಆ್ಯಪ್‌ನಲ್ಲಿ ಶೇರ್ಡ್ ಸೀಸನ್ ಟಿಕೆಟ್ ಬುಕ್ಕಿಂಗ್ ಸೌಲಭ್ಯವನ್ನು ಪರಿಚಯಿಸಲಾಗಿದೆ. ಈ ಹೊಸ ಸೌಲಭ್ಯ ಸೆಪ್ಟೆಂಬರ್ 9, 2026ರಿಂದ ಜಾರಿಗೆ ಬಂದಿದೆ.
ಈ ಸೌಲಭ್ಯದ ಮೂಲಕ ರೈಲ್ ಒನ್ ಆ್ಯಪ್‌ನಲ್ಲಿ ನೋಂದಾಯಿಸಿಕೊಂಡಿರುವ ಬಳಕೆದಾರರು ತಮ್ಮ ಹೆಸರಿನಲ್ಲಿ ಮಾತ್ರವಲ್ಲದೆ, ಕುಟುಂಬ ಸದಸ್ಯರು ಅಥವಾ ಇತರ ಪ್ರಯಾಣಿಕರು ಸೇರಿದಂತೆ ಗರಿಷ್ಠ ಐದು ಮಂದಿಗೆ ಸೀಸನ್ ಟಿಕೆಟ್‌ಗಳನ್ನು ಬುಕ್ ಮಾಡಬಹುದು.
ಯಾರಿಗೆ, ಯಾವಾಗ ಟಿಕೆಟ್ ಮಾನ್ಯ?
ತಮ್ಮ ಹೆಸರಿನಲ್ಲಿ ಬುಕ್ ಮಾಡಿರುವ ಸೀಸನ್ ಟಿಕೆಟ್‌ಗೆ ಭೌಗೋಳಿಕ ಪರಿಶೀಲನೆ ಯಶಸ್ವಿಯಾದ ಬಳಿಕ ಅದೇ ದಿನದಿಂದ ಮಾನ್ಯತೆ ಆರಂಭವಾಗುತ್ತದೆ. ಆದರೆ ಮತ್ತೊಬ್ಬ ವ್ಯಕ್ತಿಯ ಹೆಸರಿನಲ್ಲಿ ಬುಕ್ ಮಾಡಿರುವ ಸೀಸನ್ ಟಿಕೆಟ್ ಮರುದಿನದಿಂದ ಜಾರಿಗೆ ಬರುತ್ತದೆ.
ತಮ್ಮ ಹೆಸರಿನಲ್ಲಿ ಸೀಸನ್ ಟಿಕೆಟ್ ಬುಕ್ ಮಾಡಿಕೊಳ್ಳಲು ಪ್ರಯಾಣಿಕರಿಗೆ ಕನಿಷ್ಠ 18 ವರ್ಷ ವಯಸ್ಸಾಗಿರಬೇಕು. ಮತ್ತೊಬ್ಬರಿಗಾಗಿ ಟಿಕೆಟ್ ಬುಕ್ ಮಾಡುವ ಸಂದರ್ಭದಲ್ಲಿ ಆ ಪ್ರಯಾಣಿಕರಿಗೆ ಕನಿಷ್ಠ 5 ವರ್ಷ ವಯಸ್ಸಾಗಿರಬೇಕು ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.
ಸೀಸನ್ ಟಿಕೆಟ್ ಎಂದರೇನು?
ಸೀಸನ್ ಟಿಕೆಟ್ ಮೂಲಕ ಪ್ರಯಾಣಿಕರು ಎರಡು ನಿರ್ದಿಷ್ಟ ರೈಲು ನಿಲ್ದಾಣಗಳ ನಡುವೆ ಸೆಕೆಂಡ್ ಕ್ಲಾಸ್‌ನಲ್ಲಿ ಪದೇಪದೇ ಪ್ರಯಾಣಿಸಬಹುದು. ಸಾಮಾನ್ಯವಾಗಿ ಸಬರ್ಬನ್ ಹಾಗೂ ನಾನ್-ಸಬರ್ಬನ್ ಮಾರ್ಗಗಳಲ್ಲಿ ಗರಿಷ್ಠ 150 ಕಿಲೋಮೀಟರ್‌ವರೆಗೆ ಪ್ರಯಾಣಿಸಲು ಸೀಸನ್ ಟಿಕೆಟ್‌ಗಳನ್ನು ನೀಡಲಾಗುತ್ತದೆ.
ಈ ಸೌಲಭ್ಯ ಸಾಮಾನ್ಯ ಪ್ರಯಾಣಿಕರು ಹಾಗೂ ವಿದ್ಯಾರ್ಥಿಗಳಿಗೂ ಲಭ್ಯವಿದೆ. ಆದರೆ ಸೀಸನ್ ಟಿಕೆಟ್ ಹೊಂದಿರುವವರು ರಿಸರ್ವ್ಡ್ ಕೋಚ್‌ಗಳಲ್ಲಿ ಪ್ರಯಾಣಿಸಲು ಅನುಮತಿ ಇರುವುದಿಲ್ಲ. ಕೆಲವು ರೈಲುಗಳಲ್ಲಿ ದೂರಕ್ಕೆ ಸಂಬಂಧಿಸಿದ ನಿರ್ಬಂಧಗಳೂ ಅನ್ವಯಿಸುತ್ತವೆ.
QR ಕೋಡ್ ಮೂಲಕ ಟಿಕೆಟ್ ಪರಿಶೀಲನೆ
ಶೇರ್ಡ್ ಸೀಸನ್ ಟಿಕೆಟ್‌ನ ಮುದ್ರಿತ ಪ್ರತಿಯನ್ನು ಅಥವಾ ಮೊಬೈಲ್‌ನಲ್ಲಿ ಸಂಗ್ರಹಿಸಿರುವ PDF ಆವೃತ್ತಿಯನ್ನು ಪ್ರಯಾಣದ ವೇಳೆ ತೋರಿಸಬಹುದು. ಟಿಕೆಟ್‌ನಲ್ಲಿ ಪ್ರಯಾಣಿಕರ ಫೋಟೋ ಜೊತೆಗೆ QR ಕೋಡ್ ಕೂಡ ಇರಲಿದೆ.
ಟಿಕೆಟ್ ಪರಿಶೀಲನೆ ಸಂದರ್ಭದಲ್ಲಿ ರೈಲ್ವೆ ಸಿಬ್ಬಂದಿ ಹ್ಯಾಂಡ್‌ಹೆಲ್ಡ್ ಟರ್ಮಿನಲ್ ಬಳಸಿ QR ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ಟಿಕೆಟ್‌ನ ಮಾನ್ಯತೆಯನ್ನು ಪರಿಶೀಲಿಸಬಹುದು.
ಬುಕಿಂಗ್ ರಸೀದಿ ಮಾತ್ರ ಸಾಕಾಗುವುದಿಲ್ಲ
ಪ್ರಯಾಣಿಕರು ಕಡ್ಡಾಯವಾಗಿ ಮಾನ್ಯ ಸೀಸನ್ ಟಿಕೆಟ್‌ನ್ನು ತಮ್ಮೊಂದಿಗೆ ಇಟ್ಟುಕೊಳ್ಳಬೇಕು. ಕೇವಲ ಬುಕಿಂಗ್ ರಸೀದಿ ಅಥವಾ ಇನ್‌ವಾಯ್ಸ್‌ನ್ನು ಪ್ರಯಾಣದ ದಾಖಲೆ ಎಂದು ಪರಿಗಣಿಸಲಾಗುವುದಿಲ್ಲ.
ಮೊಬೈಲ್‌ನಲ್ಲಿ ಟಿಕೆಟ್ ತೋರಿಸುವಾಗ QR ಕೋಡ್ ಸ್ಪಷ್ಟವಾಗಿ ಕಾಣುವಂತೆ ನೋಡಿಕೊಳ್ಳಬೇಕು. QR ಕೋಡ್ ಹಾನಿಗೊಳಗಾಗಿದ್ದರೆ ಅಥವಾ ಸ್ಕ್ಯಾನ್ ಮಾಡಲು ಸಾಧ್ಯವಾಗದಿದ್ದರೆ ಟಿಕೆಟ್‌ನ ಮಾನ್ಯತೆಯನ್ನು ಪರಿಶೀಲಿಸಲು ಸಾಧ್ಯವಾಗುವುದಿಲ್ಲ. ಅಂತಹ ಸಂದರ್ಭಗಳಲ್ಲಿ ರೈಲ್ವೆ ನಿಯಮಗಳ ಪ್ರಕಾರ ಕ್ರಮ ಕೈಗೊಳ್ಳುವ ಸಾಧ್ಯತೆ ಇದೆ.
ಒಂದೇ ಆ್ಯಪ್‌ನಲ್ಲಿ ಹಲವು ರೈಲ್ವೆ ಸೇವೆಗಳು
ರೈಲ್ ಒನ್ ಆ್ಯಪ್ ಅನ್ನು ಭಾರತೀಯ ರೈಲ್ವೆಯ ಸೂಪರ್ ಆ್ಯಪ್ ಎಂದೂ ಕರೆಯಲಾಗುತ್ತದೆ. ಈ ಆ್ಯಪ್ ಮೂಲಕ ಪ್ರಯಾಣಿಕರು ಒಂದೇ ವೇದಿಕೆಯಲ್ಲಿ ಹಲವು ರೈಲ್ವೆ ಸೇವೆಗಳನ್ನು ಪಡೆಯಬಹುದು.
ರಿಸರ್ವೇಶನ್ ಇಲ್ಲದ ಟಿಕೆಟ್‌ಗಳು, ರಿಸರ್ವ್ಡ್ ಟಿಕೆಟ್‌ಗಳು ಹಾಗೂ ಪ್ಲಾಟ್‌ಫಾರ್ಮ್ ಟಿಕೆಟ್‌ಗಳ ಬುಕ್ಕಿಂಗ್ ಜೊತೆಗೆ IRCTC Rail Connect, NTES, Rail Madad, Food on Track ಸೇರಿದಂತೆ ಹಲವು ಸೇವೆಗಳನ್ನು ಕೂಡ ಆ್ಯಪ್ ಮೂಲಕ ಬಳಸಬಹುದು.
