ಭುಗಿಲೆದ್ದ ಬ್ರಿಕ್ಸ್ ಔತಣಕೂಟದ ಆಹಾರ ಮೆನುವಿನ ವಿವಾದ: ಸಂಪೂರ್ಣ ಸಸ್ಯಾಹಾರಿ ಭೋಜನದ ಕುರಿತು ಕಿರಣ್ ರಿಜಿಜು – ರಾಹುಲ್ ಗಾಂಧಿ ನಡುವೆ ವಾಕ್ಸಮರ

ನವದೆಹಲಿ: ಶನಿವಾರ ನಡೆದ ಬ್ರಿಕ್ಸ್ (BRICS) ಔತಣಕೂಟದಲ್ಲಿ ಬಡಿಸಲಾದ ಆಹಾರದ ಮೆನುವಿನ ಕುರಿತು ವಿವಾದವೊಂದು ಭುಗಿಲೆದ್ದಿದೆ.

ಬ್ರಿಕ್ಸ್ ಔತಣಕೂಟದಲ್ಲಿ ಸಂಪೂರ್ಣ ಸಸ್ಯಾಹಾರಿ ಭೋಜನದ ಕುರಿತು ಕಿರಣ್ ರಿಜಿಜು – ರಾಹುಲ್ ಗಾಂಧಿ ನಡುವೆ ವಾಕ್ಸಮರ ನಡೆದಿದೆ. ಪ್ರತಿನಿಧಿಗಳಿಗೆ ಸಂಪೂರ್ಣ ಸಸ್ಯಾಹಾರಿ ಭೋಜನವನ್ನು ನೀಡಿದ್ದಕ್ಕಾಗಿ ಕಾಂಗ್ರೆಸ್ ಸಂಸದ ರಾಹುಲ್ ಗಾಂಧಿ ಭಾನುವಾರ ಸರ್ಕಾರದ ವಿರುದ್ಧ ಪರೋಕ್ಷವಾಗಿ ಟೀಕೆ ವ್ಯಕ್ತಪಡಿಸಿದರು.

ಮೈಕ್ರೋ-ಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ‘ಎಕ್ಸ್'(ಹಿಂದಿನ ಟ್ವಿಟರ್) ನಲ್ಲಿ ‘ಚೋಲೆ ಭಟೂರೆ’ಯ ಫೋಟೋವನ್ನು ಹಂಚಿಕೊಂಡ ಲೋಕಸಭೆಯ ವಿರೋಧ ಪಕ್ಷದ ನಾಯಕ(LoP), ಭಾರತೀಯ ಜನತಾ ಪಕ್ಷದ(ಬಿಜೆಪಿ) ನಡೆಯನ್ನು ಪರೋಕ್ಷವಾಗಿ ಟೀಕಿಸಿದರು ಮತ್ತು ಭಾರತೀಯರಲ್ಲಿ ಶೇಕಡ 80 ರಷ್ಟು ಜನರು ಮಾಂಸಾಹಾರಿಗಳಾಗಿದ್ದಾರೆ ಎಂಬುದನ್ನು ನೆನಪಿಸಿದರು.

ಭಾರತ ಮಂಟಪದಲ್ಲಿ ಬ್ರಿಕ್ಸ್ ಶೃಂಗಸಭೆಯ ನಾಯಕರು ಮತ್ತು ಪ್ರತಿನಿಧಿಗಳಿಗಾಗಿ ಪ್ರಧಾನಿ ನರೇಂದ್ರ ಮೋದಿ ಆಯೋಜಿಸಿದ್ದ ಔತಣಕೂಟದಲ್ಲಿನ ಸಂಪೂರ್ಣ ಸಸ್ಯಾಹಾರಿ ಮೆನುವನ್ನು ಅವರು ಉಲ್ಲೇಖಿಸುತ್ತಿದ್ದರು.

“ಮಾಹಿತಿಗಾಗಿ: ಶೇಕಡಾ 80 ರಷ್ಟು ಭಾರತೀಯರು ಮಾಂಸಾಹಾರಿಗಳು. ಭಾರತೀಯ ಮಾಂಸಾಹಾರಿ ಆಹಾರವು ಅತ್ಯಂತ ರುಚಿಕರವಾಗಿರುತ್ತದೆ. ನನ್ನ ಸಹೋದರಿ ತಯಾರಿಸುವ ‘ಚೋಲೆ ಭಟೂರೆ’ಯಂತೆಯೇ,” ಎಂದು ಉತ್ತರ ಪ್ರದೇಶದ ರಾಯ್ ಬರೇಲಿಯ ಲೋಕಸಭಾ ಸದಸ್ಯರು ಹೇಳಿದ್ದಾರೆ.

ರಾಹುಲ್ ಗಾಂಧಿಯವರಿಗೆ ಕಿರಣ್ ರಿಜಿಜು ತಿರುಗೇಟು

ಕೇಂದ್ರ ಸಂಸದೀಯ ವ್ಯವಹಾರಗಳು ಮತ್ತು ಅಲ್ಪಸಂಖ್ಯಾತರ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು, ರಾಹುಲ್ ಗಾಂಧಿ ಮತ್ತು ಕಾಂಗ್ರೆಸ್ ವಿರುದ್ಧ ವಾಗ್ದಾಳಿ ನಡೆಸಿದರು. ಔತಣಕೂಟದಲ್ಲಿ ಅತಿಥಿಗಳು ಭಾರತೀಯ ಸಸ್ಯಾಹಾರಿ ಭಕ್ಷ್ಯಗಳನ್ನು ಸವಿದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಎಂದು ಹೇಳಿದ ಅವರು, ಈ ವಿಷಯದಲ್ಲಿ ರಾಜಕೀಯ ಮಾಡುವುದನ್ನು ಕಾಂಗ್ರೆಸ್ ಪಕ್ಷವು ನಿಲ್ಲಿಸಬೇಕು ಎಂದು ಸಲಹೆ ನೀಡಿದರು.

“ಬ್ರಿಕ್ಸ್ ರಾಷ್ಟ್ರಗಳ ನಾಯಕರಿಗೆ ಬಡಿಸಲಾದ ಆಹಾರದ ಮೆನುವಿನಲ್ಲೂ ಕಾಂಗ್ರೆಸ್ ಪಕ್ಷವು ರಾಜಕೀಯ ಮಾಡುತ್ತಿರುವುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ. ವೈವಿಧ್ಯಮಯ ಪ್ರಾದೇಶಿಕ ಸಂಪ್ರದಾಯಗಳೊಂದಿಗೆ ಸಮೃದ್ಧ ರುಚಿ ಮತ್ತು ಪೌಷ್ಟಿಕಾಂಶದ ವೈವಿಧ್ಯತೆಯನ್ನು ಹೊಂದಿರುವ ಭಾರತೀಯ ಸಸ್ಯಾಹಾರಿ ಭಕ್ಷ್ಯಗಳನ್ನು ನಮ್ಮ ಅತಿಥಿಗಳು ಸವಿದು ಆನಂದಿಸಿದರು,” ಎಂದು ಅವರು ಗಾಂಧಿಯವರ ಹೆಸರನ್ನು ಪ್ರಸ್ತಾಪಿಸದೆ ‘ಎಕ್ಸ್’ನಲ್ಲಿ ಬರೆದುಕೊಂಡಿದ್ದಾರೆ.

ಬ್ರಿಕ್ಸ್ ಔತಣಕೂಟದ ಮೆನು

ಸರ್ಕಾರದ ಪ್ರಕಾರ, ಬ್ರಿಕ್ಸ್ ಔತಣಕೂಟದಲ್ಲಿ ಆರಂಭಿಕ ತಿನಿಸುಗಳಾಗಿ(ಸ್ಟಾರ್ಟರ್ಸ್) ಕಡಲೆ ಹಿಟ್ಟಿನಿಂದ ಮಾಡಿದ ಆವಿಯಲ್ಲಿ ಬೇಯಿಸಿದ ರೋಲ್ ‘ಖಾಂಡ್ವಿ ಮಿಲ್'(Khandvi mille) ಮತ್ತು ಪುದೀನಾ ಬಳಸಿದ (mint pearls) ಪ್ಯಾನ್-ಗ್ರಿಲ್ ಮಾಡಿದ ಅಣಬೆ ಕಬಾಬ್‌ ಗಳಾದ ‘ಖುಂಬ್ ಗಲೌಟಿ'(khumb galouti) ಅನ್ನು ಬಡಿಸಲಾಯಿತು. ಮುಖ್ಯ ಭಕ್ಷ್ಯಗಳಲ್ಲಿ ‘ಪನೀರ್ ಲಬಾಬ್‌ ದಾರ್’, ‘ಗುಚ್ಚಿ ಮಾರ್ಮಿಕ್'(ಹಿಮಾಲಯದ ಮೊರೆಲ್ ಅಣಬೆಗಳು ಮತ್ತು ಎಳೆಯ ಆಸ್ಪ್ಯಾರಗಸ್) ಹಾಗೂ ‘ಕ್ಯಾರೆಟ್ ಬೀನ್ ಪೊರಿಯಾಲ್’ ಸೇರಿದ್ದವು.

ಔತಣಕೂಟದಲ್ಲಿ ಬಡಿಸಲಾದ ಇತರ ಪದಾರ್ಥಗಳೆಂದರೆ ‘ತಕ್ಕಾಳಿ ಬೆಲ್ಲೆ ಸಾರು’ (ಹಗುರವಾದ ಬೇಳೆ ಸಾರು), ಸಿರಿಧಾನ್ಯದ ಪುಲಾವ್, ಬೀಟ್‌ರೂಟ್ ರಾಯ್ತಾ ಮತ್ತು ವಿವಿಧ ಬಗೆಯ ಭಾರತೀಯ ರೊಟ್ಟಿಗಳು. ಸಿಹಿ ತಿನಿಸುಗಳ ಪಟ್ಟಿಯಲ್ಲಿ ‘ಓಲ್ಡ್ ಡೆಲ್ಲಿ ಫ್ರೂಟ್ ಕ್ರೀಮ್ ವಿತ್ ಜಲೇಬಿ’ ಮತ್ತು ‘ಶಹತೂತ್ ಫಿರ್ನಿ’ ಇದ್ದವು.

ಭಾರತ ಹಾಗೂ ಬ್ರಿಕ್ಸ್ (BRICS) ಒಕ್ಕೂಟದ ಇತರ ಸದಸ್ಯ ರಾಷ್ಟ್ರಗಳ 100ಕ್ಕೂ ಹೆಚ್ಚು ಕಲಾವಿದರ ತಂಡವೊಂದು ನಡೆಸಿಕೊಟ್ಟ ಸಾಂಸ್ಕೃತಿಕ ಕಾರ್ಯಕ್ರಮದೊಂದಿಗೆ ಈ ಭವ್ಯ ಔತಣಕೂಟವನ್ನು ಬಡಿಸಲಾಯಿತು.