ನುಗ್ಗೆ ಸೊಪ್ಪಿನ ಹೆಸರು ಕೇಳುತ್ತಿದ್ದಂತೆ ಅದರ ಸಾಂಬಾರ್, ಪಲ್ಯಗಳ ಸುವಾಸನೆ ನೆನಪಾಗಿ ಬಾಯಲ್ಲಿ ನೀರೂರುವುದು ಸಹಜ. ಭಾರತದಾದ್ಯಂತ ಜನಪ್ರಿಯವಾಗಿರುವ ಈ ಸೊಪ್ಪನ್ನು ಬೇಸಿಗೆಯಲ್ಲಿ ದೇಹದ ಉಷ್ಣತೆ ಹೆಚ್ಚಿಸುತ್ತದೆ ಎಂಬ ಕಾರಣಕ್ಕೆ ಕೆಲವರು ದೂರವಿಡುತ್ತಾರೆ. ಆದರೆ, ನುಗ್ಗೆಕಾಯಿಯಷ್ಟೇ ಅಲ್ಲದೆ ಅದರ ಎಲೆಯಲ್ಲೂ ಅದ್ಭುತ ಔಷಧೀಯ ಗುಣಗಳಿದ್ದು, ನೀರಿನಾಂಶವೂ ಹೇರಳವಾಗಿದೆ. ಹೀಗಾಗಿ ಇದನ್ನು ವರ್ಷದ ಎಲ್ಲಾ ಕಾಲಗಳಲ್ಲೂ ಧಾರಾಳವಾಗಿ ಸೇವಿಸಬಹುದು. ಹಾಗಿದ್ದರೆ ಇದನ್ನು ಸೂಪರ್‌ಫುಡ್ ಎಂದು ಕರೆಯಲು ಮುಖ್ಯ ಕಾರಣವೇನು? ಇದರಲ್ಲಡಗಿರುವ ವಿಶೇಷ ಆರೋಗ್ಯ ಪ್ರಯೋಜನಗಳೇನು? ಇಲ್ಲಿದೆ ಸಂಪೂರ್ಣ ವಿವರ:
ಪೋಷಕಾಂಶಗಳ ಗಣಿ:
ಉಳಿದೆಲ್ಲಾ ಸೊಪ್ಪುಗಳಿಗೆ ಹೋಲಿಸಿದರೆ ನುಗ್ಗೆ ಸೊಪ್ಪಿನಲ್ಲಿ ಪ್ರೋಟೀನ್ ಪ್ರಮಾಣ ಅತ್ಯಧಿಕವಾಗಿದೆ. ಇದರಲ್ಲಿ ಬರೋಬ್ಬರಿ 16 ಬಗೆಯ ಅಮೈನೋ ಆಮ್ಲಗಳ ಜೊತೆಗೆ ವಿಟಮಿನ್ ಎ, ವಿಟಮಿನ್ ಸಿ, ಕ್ಯಾಲ್ಸಿಯಂ, ಪೊಟ್ಯಾಶಿಯಂ ಹಾಗೂ ಕಬ್ಬಿಣದ ಅಂಶಗಳು ಹೇರಳವಾಗಿವೆ. ಇವು ಸ್ನಾಯುಗಳನ್ನು ದೃಢಗೊಳಿಸಿ, ಕಣ್ಣಿನ ದೃಷ್ಟಿ ಹೆಚ್ಚಿಸುವುದಲ್ಲದೆ, ಮೂಳೆಗಳನ್ನು ಬಲಪಡಿಸಿ ರಕ್ತದಲ್ಲಿನ ಆಕ್ಸಿಜನ್ ಮಟ್ಟವನ್ನು ಸುಧಾರಿಸುತ್ತವೆ.
ಉತ್ಕರ್ಷಣ ನಿರೋಧಕಗಳು (ಆಂಟಿಆಕ್ಸಿಡೆಂಟ್‌ಗಳು):
ನುಗ್ಗೆ ಎಲೆಯಲ್ಲಿ ಕ್ವೆರ್ಸೆಟಿನ್, ಕ್ಲೋರೊಜೆನಿಕ್ ಆಮ್ಲ ಹಾಗೂ ಬೀಟಾ ಕ್ಯಾರೋಟಿನ್ ಅಂಶಗಳು ಸಮೃದ್ಧವಾಗಿವೆ. ಇವು ದೇಹದಲ್ಲಿನ ಉಚಿತ ರಾಶಿರಹಿತ ಕಣಗಳನ್ನು (ಫ್ರೀ ರಾಡಿಕಲ್ಸ್) ತಡೆದು, ದೀರ್ಘಕಾಲದ ಮಾರಕ ರೋಗಗಳು ಬಾರದಂತೆ ರಕ್ಷಿಸುತ್ತವೆ. ಅಲ್ಲದೆ, ದೇಹದಲ್ಲಿ ಉರಿಯೂತವನ್ನು ಕಡಿಮೆ ಮಾಡಿ ಆರ್ಥರೈಟಿಸ್ ಹಾಗೂ ಹೃದಯ ಸಂಬಂಧಿ ಕಾಯಿಲೆಗಳನ್ನು ದೂರವಿಡಲು ನೆರವಾಗುತ್ತವೆ.
ರೋಗನಿರೋಧಕ ಶಕ್ತಿ ಹೆಚ್ಚಳ:
ಇದರಲ್ಲಿ ಕಿತ್ತಳೆ ಹಣ್ಣಿಗಿಂತಲೂ ಹೆಚ್ಚಿನ ಪ್ರಮಾಣದ ವಿಟಮಿನ್ ‘ಸಿ’ ಇದೆ. ಹಾಗಾಗಿ, ಇದನ್ನು ನಿಯಮಿತವಾಗಿ ಸೇವಿಸುವುದರಿಂದ ದೇಹದ ರೋಗನಿರೋಧಕ ಶಕ್ತಿ ಹೆಚ್ಚಿ, ಋತುಮಾನದ ಸೋಂಕುಗಳು ಹಾಗೂ ವೈರಲ್ ಜ್ವರಗಳಿಂದ ಬೇಗನೆ ಚೇತರಿಸಿಕೊಳ್ಳಲು ಸಹಾಯವಾಗುತ್ತದೆ.
ತೂಕ ಇಳಿಕೆಗೆ ಸಹಕಾರಿ:
ಕಡಿಮೆ ಕ್ಯಾಲೋರಿ ಮತ್ತು ಹೆಚ್ಚಿನ ಪೋಷಕಾಂಶ ಹೊಂದಿರುವ ನುಗ್ಗೆ ಸೊಪ್ಪು ತೂಕ ಇಳಿಸಲು ಬಯಸುವವರಿಗೆ ಅತ್ಯುತ್ತಮ ಆಹಾರ. ಇದರಲ್ಲಿರುವ ನಾರು (ಫೈಬರ್) ಮತ್ತು ಪ್ರೋಟೀನ್ ಅಂಶವು ಸುಲಭವಾಗಿ ಹೊಟ್ಟೆ ತುಂಬುವಂತೆ ಮಾಡಿ, ಅನಗತ್ಯ ಹಸಿವನ್ನು ತಡೆಯುತ್ತದೆ.
ಮಧುಮೇಹಿಗಳಿಗೆ ವರದಾನ:
ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಸ್ಥಿರವಾಗಿಡಲು ಇದರಲ್ಲಿರುವ ನಾರಿನಂಶ ಮತ್ತು ಪ್ರೋಟೀನ್ ನೆರವಾಗುತ್ತವೆ. ಜತೆಗೆ, ಇದರಲ್ಲಿರುವ ‘ಐಸೊಥಿಯೊಸಯನೇಟ್’ ಎಂಬ ನೈಸರ್ಗಿಕ ಅಂಶವು ಗ್ಲೂಕೋಸ್ ಮಟ್ಟ ಏರಿಳಿತವಾಗದಂತೆ ಕಾಯುತ್ತದೆ. ಇದರಲ್ಲಿರುವ ಪಾಲಿಫೆನಾಲ್‌ಗಳು ಯಕೃತ್ತಿನ (ಲಿವರ್) ಆರೋಗ್ಯಕ್ಕೂ ಬಹಳ ಒಳ್ಳೆಯದು.
ದಿನಕ್ಕೆ ಎಷ್ಟು ಸೇವಿಸಬೇಕು?
ಯಾವುದೇ ಪೋಷಕಾಂಶ ಅತಿಯಾದರೆ ಜೀರ್ಣಿಸಿಕೊಳ್ಳುವುದು ಕಷ್ಟ. ನೀವು ನುಗ್ಗೆ ಸೊಪ್ಪಿನ ಪುಡಿ (ಮೋರಿಂಗಾ ಪೌಡರ್) ಬಳಸುವುದಾದರೆ ದಿನಕ್ಕೆ ಒಂದು ದೊಡ್ಡ ಚಮಚ (ಸುಮಾರು 35 ಕ್ಯಾಲೋರಿ) ಸಾಕು. ಹಸಿ ಸೊಪ್ಪಾದರೆ ದಿನಕ್ಕೆ ಒಂದು ಮುಷ್ಟಿಯಷ್ಟು ಬಳಸಿ ಅಭ್ಯಾಸ ಮಾಡಿಕೊಳ್ಳಬಹುದು. ಗರ್ಭಿಣಿಯರು ಇದನ್ನು ಸಲ್ಪ ಪ್ರಮಾಣದಲ್ಲಿ ಸೇವಿಸುವುದು ಕ್ಷೇಮ, ಅತಿಯಾದ ಸೇವನೆ ಸೂಕ್ತವಲ್ಲ.
ಆಹಾರದಲ್ಲಿ ಬಳಸುವುದು ಹೇಗೆ?
ಬೆಳಿಗ್ಗೆ ನುಗ್ಗೆ ಸೊಪ್ಪಿನ ಪುಡಿಯಿಂದ ಕಷಾಯ ಅಥವಾ ಟೀ ಮಾಡಿ ಕುಡಿಯಬಹುದು.
ಈ ಪುಡಿಯನ್ನು ಸ್ಮೂದಿ, ಸಾಸ್‌ ಅಥವಾ ಸೂಪ್‌ಗಳಲ್ಲಿ ಬೆರೆಸಬಹುದು.
ಪಾಸ್ತಾ ತಯಾರಿಸುವಾಗ ಬೆಸಿಲ್ ಎಲೆಗಳ ಬದಲಿಗೆ ನುಗ್ಗೆ ಎಲೆಯ ಪೇಸ್ಟ್ ಬಳಸಬಹುದು.
ನಮ್ಮ ಸಾಂಪ್ರದಾಯಿಕ ಶೈಲಿಯ ಸಾಂಬಾರ್, ಪಲ್ಯ, ರೊಟ್ಟಿ, ತಂಬುಳಿ ಅಥವಾ ಗೊಜ್ಜುಗಳಿಗೆ ಇದನ್ನು ಧಾರಾಳವಾಗಿ ಸೇರಿಸಬಹುದು.
