ರಿಯಾಲಿಟಿ ಶೋ ಪ್ರಿಯರಿಗೆ ಪರಿಚಿತ ಹೆಸರಾಗಿರುವ ಶ್ರೇಯಾ ಕಲ್ರಾ, ಮುಂಬರುವ ದಿನಗಳಲ್ಲಿ ಯಾವುದೇ ರಿಯಾಲಿಟಿ ಶೋಗಳಲ್ಲಿ ಸ್ಪರ್ಧಿಯಾಗಿ ಕಾಣಿಸಿಕೊಳ್ಳುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇತ್ತೀಚೆಗೆ ‘ಲಾಕ್ ಅಪ್ 2’ ರಿಯಾಲಿಟಿ ಶೋ ಕಿರೀಟ ಮುಡಿಗೇರಿಸಿಕೊಂಡಿದ್ದ ಶ್ರೇಯಾ, ಅಭಿಮಾನಿಗಳಲ್ಲಿ ಹರಿಬಿದ್ದಿದ್ದ ಹಲವು ಕುತೂಹಲಕಾರಿ ಪ್ರಶ್ನೆಗಳಿಗೆ ತಮ್ಮ ಇನ್ಸ್ಟಾಗ್ರಾಮ್ ಚಾನೆಲ್ ಮೂಲಕ ಉತ್ತರ ನೀಡಿದ್ದಾರೆ.
ಲಾಕ್ ಅಪ್ 2 ಶೋ ಗೆದ್ದು ಭಾರಿ ಜನಪ್ರಿಯತೆ ಗಳಿಸಿದ ಬಳಿಕ, ಶ್ರೇಯಾ ಶೀಘ್ರದಲ್ಲೇ ಬಾಲಿವುಡ್ ನಟ ಸಲ್ಮಾನ್ ಖಾನ್ ನಡೆಸಿಕೊಡುವ ‘ಬಿಗ್ ಬಾಸ್’ ಪ್ರವೇಶಿಸಲಿದ್ದಾರೆ ಎಂಬ ವದಂತಿಗಳು ಬಲವಾಗಿ ಹಬ್ಬಿದ್ದವು. ಆದರೆ ಈ ಸುದ್ದಿಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿರುವ ಅವರು, ಸದ್ಯಕ್ಕೆ ರಿಯಾಲಿಟಿ ಶೋಗಳಲ್ಲಿ ಭಾಗವಹಿಸುವ ಯಾವುದೇ ಆಲೋಚನೆ ಇಲ್ಲ ಎಂದಿದ್ದಾರೆ.
ಈ ಕುರಿತು ಧ್ವನಿ ಸಂದೇಶ ಹಂಚಿಕೊಂಡಿರುವ ಅವರು, ಲಾಕ್ ಅಪ್ 2 ಅನುಭವ ಅತ್ಯಂತ ಮಾನಸಿಕ ಒತ್ತಡದಿಂದ ಕೂಡಿತ್ತು. ಆ ಜರ್ನಿಯಿಂದ ಹೊರಬಂದ ಬಳಿಕ ಮತ್ತೊಂದು ರಿಯಾಲಿಟಿ ಶೋಗೆ ಸ್ಪರ್ಧಿಯಾಗಿ ಹೋಗಲು ತಮ್ಮ ಮನಸ್ಸು ಸಿದ್ಧವಿಲ್ಲ ಎಂದು ತಿಳಿಸಿದ್ದಾರೆ. ಆದರೆ ಭವಿಷ್ಯದಲ್ಲಿ ನಿರೂಪಕಿ, ಮಾರ್ಗದರ್ಶಕಿ ಅಥವಾ ಗ್ಯಾಂಗ್ ಲೀಡರ್ ರೂಪದಲ್ಲಿ ಹೊಸ ಜವಾಬ್ದಾರಿ ಸಿಕ್ಕರೆ ಖಂಡಿತ ಸ್ವೀಕರಿಸುವುದಾಗಿ ಹೇಳಿದ್ದಾರೆ.
ಮದುವೆಗೆ ಸಂಬಂಧಿಸಿದ ಪ್ರಶ್ನೆಗಳಿಗೂ ಉತ್ತರಿಸಿರುವ ಶ್ರೇಯಾ, ತಮಗೆ ಸೂಕ್ತ ಸಂಗಾತಿ ಸಿಕ್ಕಿದ್ದು, ಪ್ರಸ್ತುತ ಇಬ್ಬರೂ ವೃತ್ತಿಜೀವನದತ್ತ ಗಮನ ಹರಿಸುತ್ತಿರುವುದಾಗಿ ತಿಳಿಸಿದ್ದಾರೆ. ಪ್ರಿಯಕರ ರಿಷಭ್ ಜೈಸ್ವಾಲ್ ಅವರಿಂದ ಡೈಮಂಡ್ ರಿಂಗ್ ಸಿಕ್ಕ ತಕ್ಷಣ ಮದುವೆ ಯೋಜನೆಯನ್ನು ಅಧಿಕೃತವಾಗಿ ಹಂಚಿಕೊಳ್ಳುವುದಾಗಿ ತಮಾಷೆಯಾಗಿ ಹೇಳಿದ್ದಾರೆ.
ಉದಯೋನ್ಮುಖ ನಟಿ ಶಿವಂಗಿ ಜೋಶಿ ಅವರನ್ನು ಹಿಂದಿಕ್ಕಿ ‘ಲಾಕ್ ಅಪ್ 2’ ಟ್ರೋಫಿ ಜೊತೆಗೆ 1 ಕೋಟಿ ರೂಪಾಯಿ ನಗದು ಬಹುಮಾನ ಗೆದ್ದುಕೊಂಡಿದ್ದ ಶ್ರೇಯಾ, ಸದ್ಯ ತಮ್ಮ ಮುಂದಿನ ವೃತ್ತಿಪರ ಹೆಜ್ಜೆಗಳತ್ತ ಗಮನ ನೆಟ್ಟಿದ್ದಾರೆ.
Shreya clearly stated that she doesn’t want to enter any show as a contestant anymore 🚫🏠
However, she’s open to stepping in as a mentor or host 🎤✨“Let’s see what’s coming,” she added#ShreyaKalra #BiggBoss #LockUpp2 #RealityShows #RealityScoop pic.twitter.com/tMXlAXYI01
— Reality scoop (@reality_scoop_) August 7, 2026
