ಕೊಲೆಸ್ಟ್ರಾಲ್‌ಗೆ ಬೆಳ್ಳುಳ್ಳಿ ರಾಮಬಾಣವೇ? ತಜ್ಞರು ಹೇಳಿದ್ದೇನು?

ಬೆಂಗಳೂರು: ಆಧುನಿಕ ಜೀವನಶೈಲಿ ಹಾಗೂ ಆಹಾರ ಪದ್ಧತಿಯಿಂದಾಗಿ ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನವರಲ್ಲಿ ಕೊಲೆಸ್ಟ್ರಾಲ್ ಸಮಸ್ಯೆ ಕಾಣಿಸಿಕೊಳ್ಳುತ್ತಿದೆ. ರಕ್ತದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ (LDL) ಪ್ರಮಾಣ ಹೆಚ್ಚಾದರೆ ಅದು ಅಪಧಮನಿಗಳಲ್ಲಿ ಶೇಖರಣೆಯಾಗಿ ಹೃದಯಾಘಾತ ಸೇರಿದಂತೆ ವಿವಿಧ ಹೃದಯಸಂಬಂಧಿ ಕಾಯಿಲೆಗಳಿಗೆ ಕಾರಣವಾಗಬಹುದು. ಹೀಗಾಗಿ ಕೊಲೆಸ್ಟ್ರಾಲ್ ನಿಯಂತ್ರಿಸಲು ಹಲವರು ನೈಸರ್ಗಿಕ ಮನೆಮದ್ದುಗಳನ್ನು ಆಶ್ರಯಿಸುತ್ತಾರೆ. ಅದರಲ್ಲಿ ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ಹಸಿ ಬೆಳ್ಳುಳ್ಳಿ ಸೇವಿಸುವುದು ಅತ್ಯಂತ ಜನಪ್ರಿಯ.ಆದರೆ ಬೆಳ್ಳುಳ್ಳಿ ನಿಜವಾಗಿಯೂ ಕೊಲೆಸ್ಟ್ರಾಲ್ ಕಡಿಮೆ ಮಾಡುತ್ತದೆಯೇ? ಇದನ್ನು ಎಷ್ಟು ಸೇವಿಸಬೇಕು? ಇಲ್ಲಿದೆ ವೈದ್ಯಕೀಯ ವಿವರಣೆ:

ಕೊಲೆಸ್ಟ್ರಾಲ್ ಮೇಲೆ ಬೆಳ್ಳುಳ್ಳಿಯ ಪ್ರಭಾವ ಹೇಗಿರುತ್ತದೆ?

ಬೆಳ್ಳುಳ್ಳಿಯಲ್ಲಿ ಆಲಿಸಿನ್ ಎಂಬ ಪ್ರಬಲ ಜೈವಿಕ ಸಕ್ರಿಯ ಸಂಯುಕ್ತ ಹಾಗೂ ಸಲ್ಫರ್ ಆಧಾರಿತ ಅಂಶಗಳಿವೆ. ಇದು ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವುದಲ್ಲದೆ, ರಕ್ತದೊತ್ತಡವನ್ನು ನಿಯಂತ್ರಿಸಲು ಮತ್ತು ಆಂಟಿಆಕ್ಸಿಡೆಂಟ್ ಆಗಿ ಕೆಲಸ ಮಾಡಲು ನೆರವಾಗುತ್ತದೆ.

ಯಕೃತ್ತಿನ ಮೇಲಿನ ಪ್ರಭಾವ: ಇಸ್ರೇಲ್‌ನ ಇನ್‌ಸ್ಟಿಟ್ಯೂಟ್ ಆಫ್ ಲಿಪಿಡ್ ಅಂಡ್ ಅಥೆರೋಸ್ಕ್ಲೆರೋಸಿಸ್ ಸಂಶೋಧನಾ ಸಂಸ್ಥೆಯ ಅಧ್ಯಯನಗಳ ಪ್ರಕಾರ, ಆಲಿಸಿನ್ ಸಂಯುಕ್ತವು ಯಕೃತ್ತಿನ ಕೋಶಗಳ ಮೇಲೆ ಪರಿಣಾಮ ಬೀರಿ, ಕೆಟ್ಟ ಕೊಲೆಸ್ಟ್ರಾಲ್ ಉತ್ಪಾದನೆಯನ್ನು ಭಾಗಶಃ ತಡೆಯುತ್ತದೆ.

ಸೀಮಿತ ಪರಿಣಾಮ: ಅಧ್ಯಯನಗಳ ಪ್ರಕಾರ ಬೆಳ್ಳುಳ್ಳಿ ಸೇವನೆಯಿಂದ LDL ಕೊಲೆಸ್ಟ್ರಾಲ್ ಮಟ್ಟದಲ್ಲಿ ಶೇ. 6 ರಿಂದ 9 ರಷ್ಟು ಮಾತ್ರ ಕಡಿತ ಕಂಡುಬರುತ್ತದೆ. ಆದರೆ ಇದು ಸಂಪೂರ್ಣವಾಗಿ ಕೊಲೆಸ್ಟ್ರಾಲ್ ಅನ್ನು ಗುಣಪಡಿಸುವುದಿಲ್ಲ. ಅಲ್ಲದೆ, ಬೆಳ್ಳುಳ್ಳಿಯಿಂದ ಸಿಗುವ ಈ ಪ್ರಯೋಜನ ಶಾಶ್ವತವಲ್ಲ ಹಾಗೂ ಇದು ಕೊಲೆಸ್ಟ್ರಾಲ್‌ಗೆ ತೆಗೆದುಕೊಳ್ಳುವ ವೈದ್ಯಕೀಯ ಔಷಧಿಗಳಿಗೆ ಪರ್ಯಾಯವೂ ಅಲ್ಲ.

ಬೆಳ್ಳುಳ್ಳಿಯ ಸುರಕ್ಷಿತ ಪ್ರಮಾಣ ಹಾಗೂ ಸೇವಿಸುವ ವಿಧಾನ:

ಅಧ್ಯಯನಗಳ ಪ್ರಕಾರ, ದಿನಕ್ಕೆ 1 ರಿಂದ 2 ಎಸಳು ಕಚ್ಚಾ/ಹಸಿ ಬೆಳ್ಳುಳ್ಳಿಯನ್ನು ಸೇವಿಸುವುದು ಸುರಕ್ಷಿತ. ಇದನ್ನು ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ಅಗಿದು ತಿನ್ನಬಹುದು ಅಥವಾ ದಿನನಿತ್ಯದ ಆಹಾರದೊಂದಿಗೆ ಸೇವಿಸಬಹುದು.

ಅತಿಯಾದ ಸೇವನೆಯಿಂದ ಎದುರಾಗಬಹುದಾದ ಅಡ್ಡಪರಿಣಾಮಗಳು:

ಪ್ರಮಾಣಕ್ಕಿಂತ ಹೆಚ್ಚು ಬೆಳ್ಳುಳ್ಳಿ ಅಥವಾ ಬೆಳ್ಳುಳ್ಳಿಯ ಸಪ್ಲಿಮೆಂಟ್‌ಗಳನ್ನು ತೆಗೆದುಕೊಳ್ಳುವುದರಿಂದ ಕೆಲವು ಆರೋಗ್ಯ ಸಮಸ್ಯೆಗಳು ಎದುರಾಗಬಹುದು:

ಬಾಯಿಯ ದುರ್ವಾಸನೆ ಹಾಗೂ ದೇಹದ ವಾಸನೆ: ಅತಿಯಾದ ಬೆಳ್ಳುಳ್ಳಿ ಸೇವನೆಯಿಂದ ಬಾಯಿ ಹಾಗೂ ಬೆವರಿನಲ್ಲಿ ತೀವ್ರ ದುರ್ವಾಸನೆ ಉಂಟಾಗಬಹುದು.

ಜೀರ್ಣಕ್ರಿಯೆ ತೊಂದರೆ: ಎದೆಯುರಿ , ಗ್ಯಾಸ್ಟ್ರಿಕ್/ವಾಯು ಕೊರತೆ ಮತ್ತು ಅತಿಸಾರಕ್ಕೆ ಕಾರಣವಾಗಬಹುದು.

ರಕ್ತ ತೆಳುವಾಗುವಿಕೆ : ಬೆಳ್ಳುಳ್ಳಿಯಲ್ಲಿ ನೈಸರ್ಗಿಕ ರಕ್ತ ತೆಳುವಾಗಿಸುವ ಗುಣವಿದ್ದಾಗ, ರಕ್ತಸ್ರಾವದ ಸಮಸ್ಯೆ ಇರುವವರು ಅಥವಾ ಶಸ್ತ್ರಚಿಕಿತ್ಸೆಗೆ ಒಳಗಾಗುವವರು ಎಚ್ಚರ ವಹಿಸಬೇಕು.

ಔಷಧಿಗಳ ಮೇಲಿನ ಪರಿಣಾಮ: ಅಂಗಾಂಗ ಕಸಿ ಮಾಡಿಸಿಕೊಂಡವರು ತೆಗೆದುಕೊಳ್ಳುವ ‘ಸೈಕ್ಲೋಸ್ಪೊರಿನ್’ ಹಾಗೂ ಕ್ಷಯರೋಗ (TB) ವಿರೋಧಿ ಔಷಧಿಗಳ ಪರಿಣಾಮಕಾರಿತ್ವವನ್ನು ಬೆಳ್ಳುಳ್ಳಿ ಕಡಿಮೆ ಮಾಡುತ್ತದೆ.

ಸಲಹೆ: ಬೆಳ್ಳುಳ್ಳಿಯು ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ಪೂರಕವಾಗಿ ಸಹಾಯ ಮಾಡಬಲ್ಲದೇ ವಿನಃ, ವೈದ್ಯರು ನೀಡುವ ಔಷಧಿಗಳನ್ನು ಸಂಪೂರ್ಣವಾಗಿ ನಿಲ್ಲಿಸಿ ಕೇವಲ ಬೆಳ್ಳುಳ್ಳಿಯನ್ನೇ ನಂಬುವುದು ಸುರಕ್ಷಿತವಲ್ಲ. ನಿಯಮಿತ ವ್ಯಾಯಾಮ, ಸಮತೋಲಿತ ಆಹಾರ ಮತ್ತು ವೈದ್ಯರ ಮಾರ್ಗದರ್ಶನ ಅತ್ಯಗತ್ಯ.