ಬೆಳಗಿನ ಜಾವ ಎದ್ದಾಗ ಮುಖ ಬಾಡಿದಂತೆ ಕಾಣುವುದು ಅಥವಾ ಊದಿಕೊಳ್ಳುವುದು ಉಪ್ಪು ಮತ್ತು ನೀರಿನ ಅಂಶ ದೇಹದಲ್ಲಿ ಉಳಿದುಕೊಳ್ಳುವುದರಿಂದ ಉಂಟಾಗುವ ಸಾಮಾನ್ಯ ಸಮಸ್ಯೆಯಾಗಿದೆ. ಪ್ರಮುಖ ಚಿತ್ರೀಕರಣ ಅಥವಾ ಸಭೆಗಳಿಗೆ ಹೋಗುವ ಮುನ್ನ ಈ ಸಮಸ್ಯೆಯಿಂದ ಮುಕ್ತಿ ಪಡೆಯಲು ನಟಿ ಬಾರ್ಖಾ ಸಿಂಗ್ ತಮ್ಮದೇ ಆದ ಕೆಲವು ಸರಳ ಮನೆಮದ್ದುಗಳನ್ನು ಹಂಚಿಕೊಂಡಿದ್ದಾರೆ. ಇವು ಮುಖಕ್ಕೆ ತಕ್ಷಣದ ಚೈತನ್ಯ ಹಾಗೂ ಮೆರುಗು ನೀಡಲು ನೆರವಾಗುತ್ತವೆ.
ಬೆಳಿಗ್ಗೆ ಎದ್ದ ತಕ್ಷಣ ಯಥೇಚ್ಛವಾಗಿ ನೀರು ಕುಡಿಯುವುದು ಮೊದಲ ಆದ್ಯತೆಯಾಗಬೇಕು. ಇದು ದೇಹದಲ್ಲಿರುವ ಕಸವನ್ನು ಹೊರಹಾಕಿ ಚರ್ಮವನ್ನು ಸದಾ ತೇವಾಂಶದಿಂದ ಇಡುತ್ತದೆ. ಇದರ ಜೊತೆಗೆ ಸಣ್ಣಪುಟ್ಟ ಜಂಪಿಂಗ್ ವ್ಯಾಯಾಮಗಳು ಹಾಗೂ ಮುಖದ ಸ್ನಾಯುಗಳಿಗೆ ಚಲನೆ ನೀಡುವ ಅಭ್ಯಾಸಗಳು ಮುಖದಲ್ಲಿನ ರಕ್ತ ಪರಿಚಲನೆಯನ್ನು ಚುರುಕುಗೊಳಿಸುತ್ತವೆ.
ಇನ್ನು ಮುಖದ ಸೌಂದರ್ಯಕ್ಕೆ ಉಪಯುಕ್ತವಾದ ಗುವಾ ಶಾ ಉಪಕರಣವನ್ನು ಬಳಸಿ ಕುತ್ತಿಗೆ ಹಾಗೂ ದವಡೆಯ ಭಾಗಗಳಲ್ಲಿ ಮೃದುವಾಗಿ ಮಸಾಜ್ ಮಾಡುವುದರಿಂದ ಚರ್ಮ ಬಿಗಿಯಾಗುತ್ತದೆ. ಇದರೊಂದಿಗೆ ಅಂತಿಮವಾಗಿ ಐಸ್ ಬೆರೆಸಿದ ತಣ್ಣೀರಿನಲ್ಲಿ ಮುಖವನ್ನು ಮುಳುಗಿಸುವುದರಿಂದ ಮುಖದ ರಂಧ್ರಗಳು ಸಣ್ಣದಾಗಿ, ಸದಾ ತಾಜಾತನದಿಂದ ಕಂಗೊಳಿಸಲು ಸಾಧ್ಯವಾಗುತ್ತದೆ ಎಂದು ಬಾರ್ಖಾ ಸಿಂಗ್ ವಿವರಿಸಿದ್ದಾರೆ.
