ಕರ್ನಾಟಕದ ಕಾವೇರಿ ನಾಡು ಕೊಡಗಿನ ಅಡುಗೆ ಶೈಲಿಗೆ ತನ್ನದೇ ಆದ ವಿಶೇಷ ಸ್ಥಾನವಿದೆ. ಅಲ್ಲಿನ ಸಾಂಪ್ರದಾಯಿಕ ಅಡುಗೆಗಳಲ್ಲಿ ಅತ್ಯಂತ ಜನಪ್ರಿಯ ಹಾಗೂ ಸರಳವಾಗಿ ಮಾಡಬಹುದಾದ ಅಡುಗೆ ಎಂದರೆ ಅದು ‘ಕೊಡಗಿನ ಶೈಲಿಯ ಘಮಘಮಿಸುವ ತುಪ್ಪದ ಅನ್ನ’ (Coorgi Ghee Rice). ಏಲಕ್ಕಿ, ಲವಂಗ, ಚಕ್ಕೆ ಹಾಗೂ ನಾಲಿಗೆಯಲ್ಲಿ ನೀರೂರಿಸುವ ತುಪ್ಪದ ಪರಿಮಳ ಈ ಅನ್ನಕ್ಕೆ ವಿಶೇಷ ರುಚಿಯನ್ನು ನೀಡುತ್ತದೆ. ಯಾವುದೇ ವಿಶೇಷ ಸಮಾರಂಭ ಅಥವಾ ವಾರಾಂತ್ಯದ ಊಟಕ್ಕೆ ಇದು ಅತ್ಯುತ್ತಮ ಆಯ್ಕೆ.
ಈ ರುಚಿಕರ ಕೊಡಗಿನ ತುಪ್ಪದ ಅನ್ನ ಮಾಡಲು ಬೇಕಾಗುವ ಸಾಮಗ್ರಿಗಳು ಮತ್ತು ಮಾಡುವ ಸರಳ ವಿಧಾನ ಇಲ್ಲಿದೆ:
ಬೇಕಾಗುವ ಸಾಮಗ್ರಿಗಳು: ಬಾಸುಮತಿ ಅಥವಾ ಉದ್ದನೆಯ ಅಕ್ಕಿ, ತೆಳುವಾಗಿ ಹೆಚ್ಚಿದ ಈರುಳ್ಳಿ, ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿ, ಸಣ್ಣಗೆ ಹೆಚ್ಚಿದ ಶುಂಠಿ, ಚಕ್ಕೆ, ಏಲಕ್ಕಿ, ಲವಂಗ, ತುಪ್ಪ ಮತ್ತು ಎಣ್ಣೆ, ರುಚಿಗೆ ತಕ್ಕಷ್ಟು ಉಪ್ಪು, ಚಿಟಿಕೆ ಸಕ್ಕರೆ ಹಾಗೂ ಅಗತ್ಯವಿರುವಷ್ಟು ನೀರು.
ಮಾಡುವ ವಿಧಾನ: ಮೊದಲಿಗೆ ಒಂದು ಬಾಣಲೆ ಅಥವಾ ಪಾತ್ರೆಯಲ್ಲಿ ಸಮಪ್ರಮಾಣದ ತುಪ್ಪ ಮತ್ತು ಎಣ್ಣೆಯನ್ನು ಹಾಕಿ ಬಿಸಿ ಮಾಡಿ. ಎಣ್ಣೆ ಕಾದ ನಂತರ ಚಕ್ಕೆ, ಏಲಕ್ಕಿ ಮತ್ತು ಲವಂಗವನ್ನು ಹಾಕಿ ಚೆನ್ನಾಗಿ ಹುರಿಯಿರಿ. ಮಸಾಲೆ ಘಮ ಬರಲು ಪ್ರಾರಂಭಿಸಿದಾಗ ಹೆಚ್ಚಿದ ಈರುಳ್ಳಿಯನ್ನು ಸೇರಿಸಿ ಅದು ಮೃದುವಾಗುವವರೆಗೆ ಹುರಿಯಿರಿ.
ನಂತರ ಸಣ್ಣಗೆ ಹೆಚ್ಚಿದ ಶುಂಠಿ ಮತ್ತು ಬೆಳ್ಳುಳ್ಳಿಯನ್ನು ಹಾಕಿ ಹಸಿ ವಾಸನೆ ಹೋಗುವವರೆಗೆ ಬಾಡಿಸಿ. ಈಗ ತೊಳೆದು ಇಟ್ಟುಕೊಂಡ ಅಕ್ಕಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಗೂ ಚಿಟಿಕೆ ಸಕ್ಕರೆಯನ್ನು ಹಾಕಿ ಒಂದು ನಿಮಿಷಗಳ ಕಾಲ ಮಸಾಲೆಯೊಂದಿಗೆ ಚೆನ್ನಾಗಿ ಮಿಕ್ಸ್ ಮಾಡಿ.
ಅಂತಿಮವಾಗಿ ಅಕ್ಕಿಯ ಮಟ್ಟಕ್ಕಿಂತ ಸ್ವಲ್ಪ ಮೇಲಿರುವಂತೆ ಅಗತ್ಯಕ್ಕೆ ತಕ್ಕಷ್ಟು ನೀರನ್ನು ಸೇರಿಸಿ. ಪಾತ್ರೆಯ ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ ಅಕ್ಕಿ ಹದವಾಗಿ ಬೇಯುವವರೆಗೆ ಬೇಯಿಸಿ. ಅನ್ನ ಹದವಾಗಿ ಬೆಂದ ನಂತರ ಬಿಸಿಯಾಗಿರುವಾಗಲೇ ನಿಮ್ಮಿಷ್ಟದ ಸಾರುವಿನೊಂದಿಗೆ ಅಥವಾ ಕುರ್ಮಾದೊಂದಿಗೆ ಸವಿಯಲು ನೀಡಿ.
