ಹೊಸ ತಿಂಗಳು ಆರಂಭವಾಗುತ್ತಿದ್ದಂತೆ ಹಲವು ಆರ್ಥಿಕ ನಿಯಮಗಳು ಜಾರಿಗೆ ಬರುತ್ತಿವೆ. ವಿಶೇಷವಾಗಿ ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಆಗಸ್ಟ್ 1ರಿಂದ ಹಲವು ಪ್ರಮುಖ ಬದಲಾವಣೆಗಳು ಜಾರಿಯಾಗಲಿದ್ದು, ಇವು ಬ್ಯಾಂಕ್ ಖಾತೆದಾರರ ಮೇಲೆ ನೇರ ಪರಿಣಾಮ ಬೀರುವ ಸಾಧ್ಯತೆ ಇದೆ. KYC ಪ್ರಕ್ರಿಯೆ, ಕ್ರೆಡಿಟ್ ಕಾರ್ಡ್ ನಿಯಮಗಳು, ಬ್ಯಾಂಕ್ ಸೇವಾ ಶುಲ್ಕಗಳು ಸೇರಿದಂತೆ ಹಲವು ವಿಷಯಗಳಲ್ಲಿ ಹೊಸ ನಿಯಮಗಳು ಜಾರಿಯಾಗಲಿವೆ.
ಆಗಸ್ಟ್‌ನಿಂದ ಜಾರಿಗೆ ಬರುವ ಪ್ರಮುಖ ಬದಲಾವಣೆಗಳು
ಬ್ಯಾಂಕ್ ಸೇವಾ ಶುಲ್ಕಗಳಲ್ಲಿ ಬದಲಾವಣೆ
ಆಗಸ್ಟ್ 1ರಿಂದ ಕೆಲವು ಬ್ಯಾಂಕ್‌ಗಳು ತಮ್ಮ ಸೇವಾ ಶುಲ್ಕಗಳನ್ನು ಪರಿಷ್ಕರಿಸಿವೆ. ಉಜ್ಜೀವನ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಎಸ್‌ಎಂಎಸ್ ಶುಲ್ಕವನ್ನು ತಿದ್ದುಪಡಿ ಮಾಡಿದ್ದು, ಇನ್ನು ಮುಂದೆ ಪ್ರತಿ ಎಸ್‌ಎಂಎಸ್‌ಗೆ ₹0.30 ಶುಲ್ಕ ವಿಧಿಸಲಿದೆ.
ಕ್ರೆಡಿಟ್ ಕಾರ್ಡ್ ಹೊಸ ನಿಯಮಗಳು
ಆರ್‌ಬಿಐ ಹೊಸ ನಿಯಮಗಳ ಪ್ರಕಾರ, ಪಾವತಿಸದ ಕನ್ವೀನಿಯನ್ಸ್ ಶುಲ್ಕ, ದಂಡ ಹಾಗೂ ತೆರಿಗೆಗಳನ್ನು ಬಾಕಿ ಇರುವ ಕ್ರೆಡಿಟ್ ಕಾರ್ಡ್ ಮೊತ್ತದ ಮೇಲೆ ಹಣಕಾಸು (Finance) ಶುಲ್ಕ ಲೆಕ್ಕಿಸುವಾಗ ಸೇರಿಸಬಾರದು. ಇದರಿಂದ ಬಾಕಿ ಮೊತ್ತವನ್ನು ಮುಂದುವರಿಸಿಕೊಂಡು ಹೋಗುವ ಗ್ರಾಹಕರ ಮೇಲಿನ ಹೆಚ್ಚುವರಿ ಬಡ್ಡಿ ಹೊರೆಯು ಕಡಿಮೆಯಾಗಲಿದೆ.
ಇದರ ಜೊತೆಗೆ, ಕೆಲವು ಬ್ಯಾಂಕ್‌ಗಳು ಆಗಸ್ಟ್‌ನಿಂದ ಕ್ರೆಡಿಟ್ ಕಾರ್ಡ್ ರಿವಾರ್ಡ್ ಯೋಜನೆಗಳು, ವಾರ್ಷಿಕ ಶುಲ್ಕ ಹಾಗೂ ಇತರ ಸೇವಾ ಶುಲ್ಕಗಳಲ್ಲಿ ಬದಲಾವಣೆಗಳನ್ನು ಮಾಡುತ್ತಿವೆ.
● ಸೆಂಟ್ರಲೈಸ್ಡ್ e-KYC 2.0 ಜಾರಿ
ಕೇಂದ್ರ ಸರ್ಕಾರ ಆಗಸ್ಟ್‌ನಿಂದ ಸೆಂಟ್ರಲೈಸ್ಡ್ e-KYC 2.0 ವ್ಯವಸ್ಥೆ ಜಾರಿಗೊಳಿಸುತ್ತಿದೆ. ಈ ವ್ಯವಸ್ಥೆಯಡಿ ಪ್ರತಿಯೊಂದು ಬಾರಿ KYCಗಾಗಿ ಆಧಾರ್, ಪಾನ್ ಸೇರಿದಂತೆ ದಾಖಲೆಗಳನ್ನು ಸಲ್ಲಿಸುವ ಅಗತ್ಯ ಇರುವುದಿಲ್ಲ.
ಗ್ರಾಹಕರ ಅನುಮತಿಯೊಂದಿಗೆ ಬ್ಯಾಂಕ್‌ಗಳು ಕೇಂದ್ರೀಕೃತ ಡೇಟಾಬೇಸ್‌ನಿಂದ ಅಗತ್ಯ ಮಾಹಿತಿಯನ್ನು ಪಡೆದು KYC ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲಿವೆ. ಇದರಿಂದ ಗುರುತಿನ ಪರಿಶೀಲನೆ ವೇಗವಾಗಲಿದ್ದು, KYC ಪ್ರಕ್ರಿಯೆ ಕೆಲವೇ ನಿಮಿಷಗಳಲ್ಲಿ ಪೂರ್ಣಗೊಳ್ಳಲಿದೆ.
ಈ ವ್ಯವಸ್ಥೆಯಲ್ಲಿ ಬ್ಯಾಂಕ್‌ಗಳು, ಮ್ಯೂಚುವಲ್ ಫಂಡ್‌ಗಳು, ಬ್ರೋಕರೇಜ್ ಸಂಸ್ಥೆಗಳು ಹಾಗೂ ಇತರೆ ಹಣಕಾಸು ಸಂಸ್ಥೆಗಳು ಭಾಗಿಯಾಗಲಿದ್ದು, ಮುಂದಿನ ದಿನಗಳಲ್ಲಿ ವಿಮಾ ಕಂಪನಿಗಳೂ ಸೇರುವ ಸಾಧ್ಯತೆ ಇದೆ.
● ಆಗಸ್ಟ್ 3ರಿಂದ RBI ಹಣಕಾಸು ನೀತಿ ಸಮಿತಿ ಸಭೆ
ಆಗಸ್ಟ್ 3ರಿಂದ 5ರವರೆಗೆ ಭಾರತೀಯ ರಿಸರ್ವ್ ಬ್ಯಾಂಕ್‌ನ (RBI) ಹಣಕಾಸು ನೀತಿ ಸಮಿತಿ (MPC) ಸಭೆ ನಡೆಯಲಿದೆ. ಆಗಸ್ಟ್ 5ರಂದು ಸಭೆಯ ನಿರ್ಧಾರಗಳನ್ನು ಪ್ರಕಟಿಸಲಾಗುತ್ತದೆ.
ಈ ಸಭೆಯಲ್ಲಿ ಬಡ್ಡಿದರಗಳು ಹಾಗೂ ಹಣದ ಲಭ್ಯತೆ (Liquidity) ಕುರಿತು ಮಹತ್ವದ ತೀರ್ಮಾನಗಳನ್ನು ಕೈಗೊಳ್ಳುವ ಸಾಧ್ಯತೆ ಇದೆ. ಬಡ್ಡಿದರಗಳಲ್ಲಿ ಬದಲಾವಣೆ ನಡೆದರೆ ಸಾಲದ ಬಡ್ಡಿ, EMI ಹಾಗೂ ಫಿಕ್ಸ್ಡ್ ಡೆಪಾಸಿಟ್ (FD) ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ.
