ಬೆಂಗಳೂರು: ಅತಿ ಶ್ರೀಮಂತರು ಹಾಗೂ ಕಾರ್ಪೊರೇಟ್ ಸಂಸ್ಥೆಗಳ ಸಂಪತ್ತು ಮತ್ತು ಆಸ್ತಿಯನ್ನು ನಿರ್ವಹಿಸುವ ಭಾರತದ ಪ್ರಮುಖ ಕಂಪನಿ ‘ನಿಯೋ ಗ್ರೂಪ್’ ಬರೋಬ್ಬರಿ 350 ಕೋಟಿ ರೂ. ಬಂಡವಾಳ ಸಂಗ್ರಹಿಸಿದೆ. ಸಂಸ್ಥೆಯ ಆರಂಭಿಕ ಹೂಡಿಕೆದಾರ ಕಂಪನಿ ‘ಪೀಕ್ XV ಪಾರ್ಟ್ನರ್ಸ್’ ನೇತೃತ್ವದಲ್ಲಿ ಈ ಹೂಡಿಕೆಯನ್ನು ಸಂಗ್ರಹಿಸಲಾಗಿದೆ.
ನಿಯೋ ಗ್ರೂಪ್ ಈಗಾಗಲೇ ದೇಶದ 30ಕ್ಕೂ ಹೆಚ್ಚು ನಗರಗಳಲ್ಲಿ ವಹಿವಾಟು ನಡೆಸುತ್ತಿದ್ದು, ಈ ಹೊಸ ಬಂಡವಾಳವು ಮುಂದಿನ ಹಂತದ ಬೃಹತ್ ಬೆಳವಣಿಗೆಗೆ ದಾರಿ ಮಾಡಿಕೊಡಲಿದೆ. ಇತ್ತೀಚೆಗಷ್ಟೇ ಟಿವಿಎಸ್ ಕ್ಯಾಪಿಟಲ್ ಸಂಸ್ಥೆಯು ನಿಯೋ ಗ್ರೂಪ್ನಲ್ಲಿ 550 ಕೋಟಿ ರೂ. ಹೂಡಿಕೆ ಮಾಡಿತ್ತು. ಇದೀಗ ಪೀಕ್ XV ಕೂಡ ಮತ್ತೆ ಬಂಡವಾಳ ಹೂಡುತ್ತಿರುವುದು, ಭಾರತೀಯ ಹೂಡಿಕೆದಾರರಿಗೆ ಕಂಪನಿ ಮೇಲಿರುವ ನಂಬಿಕೆಗೆ ಸಾಕ್ಷಿಯಾಗಿದೆ.
ನಿಯೋ ಗ್ರೂಪ್ನ ಬೃಹತ್ ಸಾಮರ್ಥ್ಯ
ಪ್ರಸ್ತುತ ನಿಯೋ ಗ್ರೂಪ್ 3,000 ಕೋಟಿ ರೂ.ಗೂ ಅಧಿಕ ಈಕ್ವಿಟಿ ಬಂಡವಾಳ, ವಾರ್ಷಿಕವಾಗಿ 50,000 ಕೋಟಿ ರೂ. ಮರುಕಳಿಸುವ ಆದಾಯ ಆಸ್ತಿ (ಎಆರ್ಆರ್) ಹಾಗೂ ಅಂದಾಜು 1,30,000 ಕೋಟಿ ರೂ. ಮೌಲ್ಯದ ಒಟ್ಟು ಗ್ರಾಹಕರ ಆಸ್ತಿಯನ್ನು ಯಶಸ್ವಿಯಾಗಿ ನಿರ್ವಹಿಸುತ್ತಿದೆ. ಜಾಗತಿಕ ಮಟ್ಟದ ಖಾಸಗಿ ಬ್ಯಾಂಕಿಂಗ್ ವಲಯದ 150ಕ್ಕೂ ಹೆಚ್ಚು ಪ್ರಖ್ಯಾತ ‘ವೆಲ್ತ್ ಅಡ್ವೈಸರ್ಸ್’ (ಸಂಪತ್ತು ಸಲಹೆಗಾರರು) ಸೇರಿದಂತೆ ಒಟ್ಟು 850ಕ್ಕೂ ಅಧಿಕ ನುರಿತ ವೃತ್ತಿಪರರ ತಂಡ ಇಲ್ಲಿದೆ.
ಹೂಡಿಕೆಗೆ ಕಾರಣವೇನು?
ನಿಯೋ ಗ್ರೂಪ್ನ ಸಂಪತ್ತು ನಿರ್ವಹಣಾ ಸೇವೆಯು ಹೆಚ್ಚಿನ ನಂಬಿಕೆ ಮತ್ತು ಅತ್ಯಾಧುನಿಕ ತಂತ್ರಜ್ಞಾನದ ಮಾದರಿಯನ್ನು ಆಧರಿಸಿದೆ. ಅಂದರೆ, ಗ್ರಾಹಕರಿಗೆ ದಶಕಗಳ ಅನುಭವವಿರುವ ಪರಿಣತರ ನೇರ ಮಾರ್ಗದರ್ಶನದ ಜೊತೆಗೆ, ಅತ್ಯಾಧುನಿಕ ತಂತ್ರಜ್ಞಾನದ ಬೆಂಬಲವೂ ಇಲ್ಲಿ ಸಿಗುತ್ತಿದೆ.
ಪ್ರೈವೇಟ್ ಕ್ರೆಡಿಟ್, ಇನ್ಫ್ರಾಸ್ಟ್ರಕ್ಚರ್ ಮತ್ತು ಪ್ರೈವೇಟ್ ಈಕ್ವಿಟಿ ಮುಂತಾದ ಕ್ಷೇತ್ರಗಳಲ್ಲಿ ಹೆಚ್ಚಿನ ರಿಟರ್ನ್ಸ್ ತಂದುಕೊಡುವ ಅತ್ಯುತ್ತಮ ಫಂಡ್ ಮ್ಯಾನೇಜರ್ಗಳನ್ನು ಸಂಸ್ಥೆ ಹೊಂದಿದೆ. ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಶ್ರೀಮಂತ ಉದ್ಯಮಿಗಳು ಹಾಗೂ ಕಾರ್ಪೊರೇಟ್ ವಲಯಕ್ಕೆ ನಿಖರವಾಗಿ ಇಂತಹದ್ದೇ ಒಂದು ವೇದಿಕೆಯ ಅವಶ್ಯಕತೆಯಿತ್ತು ಎಂದು ಪೀಕ್ XV ಪಾರ್ಟ್ನರ್ಸ್ ಅಭಿಪ್ರಾಯಪಟ್ಟಿದೆ.
ʼದೀರ್ಘಕಾಲದ ಬೆಳವಣಿಗೆಗೆ ಒತ್ತುʼ – ನಿತಿನ್ ಜೈನ್
ಈ ಹೊಸ ಬಂಡವಾಳ ಸಂಗ್ರಹದ ಕುರಿತು ಮಾತನಾಡಿರುವ ನಿಯೋ ಗ್ರೂಪ್ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ (ಎಂಡಿ) ನಿತಿನ್ ಜೈನ್, “ಗ್ರಾಹಕರ ಹಿತಾಸಕ್ತಿಗೆ ಆದ್ಯತೆ ನೀಡಿ, ಉತ್ತಮ ಆಡಳಿತ ಮತ್ತು ಶಿಸ್ತುಬದ್ಧ ಬಂಡವಾಳ ಹಂಚಿಕೆಯ ಮೂಲಕ ಒಂದು ಶಾಶ್ವತ ಸಂಸ್ಥೆಯನ್ನು ಕಟ್ಟುವುದು ನಮ್ಮ ಗುರಿ. ಈ ಹೊಸ ಹೂಡಿಕೆಯು ನಮಗೆ ದೇಶಾದ್ಯಂತ ನಮ್ಮ ಉಪಸ್ಥಿತಿಯನ್ನು ಇನ್ನಷ್ಟು ವಿಸ್ತರಿಸಲು, ಹೊಸ ಪ್ರತಿಭೆಗಳನ್ನು ಸೆಳೆಯಲು ಮತ್ತು ಅತ್ಯಾಧುನಿಕ ತಂತ್ರಜ್ಞಾನಗಳ ಮೇಲೆ ಹೂಡಿಕೆ ಮಾಡಲು ನೆರವಾಗಲಿದೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಪೀಕ್ XV ಪಾರ್ಟ್ನರ್ಸ್ನ ಎಂಡಿ ಸಾಕ್ಷಿ ಚೋಪ್ರಾ ಮಾತನಾಡಿ, “ಭಾರತದ ವೆಲ್ತ್ ಮ್ಯಾನೇಜ್ಮೆಂಟ್ ಮಾರುಕಟ್ಟೆ ವಿಸ್ತಾರವಾಗುತ್ತಿದ್ದಂತೆ, ಅತ್ಯಾಧುನಿಕ ಆರ್ಥಿಕ ಪರಿಹಾರಗಳ ಬೇಡಿಕೆಯೂ ಹೆಚ್ಚಾಗುತ್ತಿದೆ. ಈ ನಿಟ್ಟಿನಲ್ಲಿ ನಿಯೋ ಗ್ರೂಪ್ ತನ್ನ ಅತ್ಯುತ್ತಮ ಸಲಹಾ ತಂಡ ಮತ್ತು ಗ್ರಾಹಕ ಸ್ನೇಹಿ ವಿಧಾನಗಳಿಂದ ಗಮನ ಸೆಳೆದಿದೆ. ಅವರ ಜೊತೆಗಿನ ನಮ್ಮ ಪಾಲುದಾರಿಕೆಯನ್ನು ಮತ್ತಷ್ಟು ಗಟ್ಟಿಗೊಳಿಸಲು ನಾವು ಉತ್ಸುಕರಾಗಿದ್ದೇವೆ,” ಎಂದು ಹೇಳಿದರು.
ಮುಂಬೈನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ನಿಯೋ ಗ್ರೂಪ್, ಕೌಟುಂಬಿಕ ಕಚೇರಿಗಳು, ಅತಿ ಶ್ರೀಮಂತರು ಮತ್ತು ಸಾಂಸ್ಥಿಕ ಗ್ರಾಹಕರಿಗೆ ಸಮಗ್ರ ಸಂಪತ್ತು ಮತ್ತು ಆಸ್ತಿ ನಿರ್ವಹಣೆ ಸೇವೆಗಳನ್ನು ನೀಡುತ್ತಿದೆ. ಹೊಸದಿಲ್ಲಿ, ಬೆಂಗಳೂರು, ಹೈದರಾಬಾದ್, ಚೆನ್ನೈ, ಗೋವಾ, ಜೈಪುರ ಸೇರಿದಂತೆ ಭಾರತದ ಪ್ರಮುಖ ನಗರಗಳಲ್ಲಿ ಕಚೇರಿಗಳನ್ನು ಹೊಂದಿದ್ದು, ಅಮೆರಿಕದಲ್ಲೂ ತನ್ನ ಕಾರ್ಯಾಚರಣೆ ಹೊಂದಿದೆ. ವಿಮೆ, ಗ್ಲೋಬಲ್ ಇನ್ವೆಸ್ಟ್ಮೆಂಟ್ ಹಾಗೂ ಎಸ್ಟೇಟ್ ಪ್ಲಾನಿಂಗ್ ಕ್ಷೇತ್ರಗಳಲ್ಲೂ ಸಂಸ್ಥೆ ತನ್ನ ಸೇವೆ ಒದಗಿಸುತ್ತಿದೆ.
