ಚಿತ್ರರಂಗದಲ್ಲಿ ಸ್ಟಾರ್ ನಟರ ಮಕ್ಕಳು ತಂದೆಯ ಹಾದಿಯಲ್ಲೇ ನಡೆದು ಹೀರೋ ಆಗಿ ಎಂಟ್ರಿ ಕೊಡುವುದು ತೀರಾ ಸಹಜ. ಆದರೆ ತಮಿಳುನಾಡಿನ ಮುಖ್ಯಮಂತ್ರಿ ಹಾಗೂ ಖ್ಯಾತ ನಟ ದಳಪತಿ ವಿಜಯ್ ಅವರ ಪುತ್ರ ಜೇಸನ್ ಸಂಜಯ್ ಮಾತ್ರ ಇದಕ್ಕಿಂತ ತೀರಾ ಭಿನ್ನವಾದ ಹಾದಿ ಆಯ್ದುಕೊಂಡಿದ್ದಾರೆ. ತಮಗೆ ಬಂದ ಸ್ಟಾರ್ ಲಾಂಚ್ ಆಫರ್ ಅನ್ನು ನಿರಾಕರಿಸಿ, ಚಿತ್ರಕಥೆ ಹಾಗೂ ನಿರ್ದೇಶನದತ್ತ ಮುಖ ಮಾಡಿದ ರೋಚಕ ಕಥೆಯನ್ನು ಜೇಸನ್ ಸಂಜಯ್ ಈಗ ಹಂಚಿಕೊಂಡಿದ್ದಾರೆ.
ತಾವು ನಿರ್ದೇಶಿಸುತ್ತಿರುವ ಮೊದಲ ಚಿತ್ರ ಸಿಗ್ಮಾ ಬಿಡುಗಡೆಗೆ ಸಜ್ಜಾಗುತ್ತಿರುವ ಬೆನ್ನಲ್ಲೇ ಆನಂದ ವಿಕಟನ್ ನಿಯತಕಾಲಿಕೆಗೆ ನೀಡಿರುವ ಸಂದರ್ಶನದಲ್ಲಿ ಜೇಸನ್ ಹಲವು ಆಸಕ್ತಿದಾಯಕ ವಿಷಯಗಳನ್ನು ಹಂಚಿಕೊಂಡಿದ್ದಾರೆ. ತಮಗೆ ಕೇವಲ 20 ವರ್ಷ ವಯಸ್ಸಾಗಿದ್ದಾಗ ಖ್ಯಾತ ಪ್ರೇಮಂ ಚಿತ್ರದ ನಿರ್ದೇಶಕ ಅಲ್ಫೋನ್ಸ್ ಪುತಿರನ್ ಅವರು ಒಂದು ಕಥೆಯನ್ನು ಹಿಡಿದು ನಟಿಸುವಂತೆ ಆಫರ್ ನೀಡಿದ್ದರು ಎಂದು ಜೇಸನ್ ಬಹಿರಂಗಪಡಿಸಿದ್ದಾರೆ. ಜೇಸನ್ ಅವರ ಫೋಟೋ ನೋಡಿ ಇಷ್ಟಪಟ್ಟಿದ್ದ ಅಲ್ಫೋನ್ಸ್, ಅವರಿಗಾಗಿಯೇ ಒಂದು ಯೂತ್ ಫುಲ್ ಕಥೆ ಸಿದ್ಧಪಡಿಸಿದ್ದರು. ಆದರೆ ಜೇಸನ್ ಆ ಸುವರ್ಣಾವಕಾಶವನ್ನು ನಯವಾಗಿಯೇ ತಿರಸ್ಕರಿಸಿದ್ದರು.
ಆ ಸಮಯದಲ್ಲಿ ತಾವು ಇನ್ನೂ ವಿದ್ಯಾರ್ಥಿಯಾಗಿದ್ದು, ಸಿನಿಮಾ ರಂಗವನ್ನು ವೃತ್ತಿಯಾಗಿ ಸ್ವೀಕರಿಸುವ ಬಗ್ಗೆ ಯೋಚಿಸಿರಲಿಲ್ಲ ಎಂದು ಜೇಸನ್ ಹೇಳಿದ್ದಾರೆ. ತಮಗೆ ಅಪಾರ ಗೌರವವಿರುವ ನಿರ್ದೇಶಕರಿಂದ ಕಥೆ ಕೇಳಿ, ಆನಂತರ ಅದನ್ನು ಬೇಡ ಎನ್ನುವುದು ಇಷ್ಟವಿರಲಿಲ್ಲ. ಬಾಲ್ಯದಿಂದಲೂ ಸಿನಿಮಾಗಳ ನಡುವೆಯೇ ಬೆಳೆದರೂ, ತಮಗೆ ಪರದೆ ಮೇಲೆ ಕಾಣಿಸಿಕೊಳ್ಳುವುದಕ್ಕಿಂತ ಸಿನಿಮಾ ಹೇಗೆ ತಯಾರಾಗುತ್ತದೆ ಎಂಬುದನ್ನು ತಿಳಿಯುವ ಕುತೂಹಲವೇ ಹೆಚ್ಚಾಗಿತ್ತು ಎಂದು ಅವರು ವಿವರಿಸಿದ್ದಾರೆ. ಯಾವುದೇ ಸಿನಿಮಾ ನೋಡಿದರೂ ಅದರ ಕಥೆ ಎಲ್ಲಿಂದ ಶುರುವಾಗುತ್ತದೆ, ಹೇಗೆ ಸಾಗುತ್ತದೆ ಎಂಬುದನ್ನು ಸೂಕ್ಷ್ಮವಾಗಿ ಗಮನಿಸುವುದು ತಮಗೆ ಒಂದು ಆಟದಂತಿತ್ತು ಎಂದು ಅವರು ನೆನಪಿಸಿಕೊಂಡಿದ್ದಾರೆ.
ಇದೇ ಆಸಕ್ತಿಯಿಂದಾಗಿ ಅವರು ನಟನೆಯ ತರಬೇತಿ ಪಡೆಯುವ ಬದಲು ಕೆನಡಾಕ್ಕೆ ತೆರಳಿ ಫಿಲ್ಮ್ ಮೇಕಿಂಗ್ ಕೋರ್ಸ್ ಮಾಡಿದರು. ಅಲ್ಲಿ ಸುಮಾರು 120 ಪುಟಗಳ ಸುದೀರ್ಘ ಚಿತ್ರಕಥೆ ಸಿದ್ಧಪಡಿಸಿ, ಅದನ್ನು ತಾವೇ ಕತ್ತರಿಸಿ 20 ನಿಮಿಷಗಳ ಕಿರುಚಿತ್ರವನ್ನಾಗಿ ರೂಪಿಸಿದ್ದರು. ಯಾವುದೇ ನಿರ್ಮಾಪಕರನ್ನು ಮೆಚ್ಚಿಸಲು ಅದನ್ನವರು ಮಾಡಿರಲಿಲ್ಲ, ಬದಲಿಗೆ ಒಬ್ಬ ನಿರ್ದೇಶಕನಾಗಿ ತಮ್ಮ ಸಾಮರ್ಥ್ಯವೇನು ಎಂಬುದನ್ನು ತಾವೇ ಪರೀಕ್ಷಿಸಿಕೊಳ್ಳಲು ಆ ಕಿರುಚಿತ್ರ ಮಾಡಿದ್ದರು.
ಭಾರತಕ್ಕೆ ಮರಳಿದ ನಂತರ ತಮ್ಮ ಕಥೆಗಳನ್ನು ಮರುರೂಪಿಸಿ, ಸ್ನೇಹಿತರ ಬಳಿ ಚರ್ಚಿಸಿ, ಅಂತಿಮವಾಗಿ ಲೈಕಾ ಪ್ರೊಡಕ್ಷನ್ಸ್ ಸಂಸ್ಥೆಗೆ ಕಥೆ ಒಪ್ಪಿಸುವಲ್ಲಿ ಯಶಸ್ವಿಯಾದರು. ಸಿಗ್ಮಾ ಚಿತ್ರದ ಶೂಟಿಂಗ್ ಆರಂಭಿಸುವ ಮುನ್ನ ತಮ್ಮ ಪೋಷಕರು, ಸಹೋದರಿ ಹಾಗೂ ಸ್ನೇಹಿತರ ಬಳಿ ಚರ್ಚಿಸಿದಾಗ ಅವರೆಲ್ಲರಿಂದ ಸಿಕ್ಕ ಸಕಾರಾತ್ಮಕ ಪ್ರತಿಕ್ರಿಯೆ ತಮಗೆ ಅಪಾರ ಧೈರ್ಯ ನೀಡಿತು ಎಂದು ಜೇಸನ್ ಹೇಳಿದ್ದಾರೆ. ಈ ನಡುವೆ ತಮಿಳಿನ ಖ್ಯಾತ ನಟರಾದ ವಿಜಯ್ ಸೇತುಪತಿ, ಸೂರಿ ಸೇರಿದಂತೆ ಹಲವರು ಜೇಸನ್ ಅವರ ಈ ಹೊಸ ಪ್ರಯತ್ನಕ್ಕೆ ಶುಭ ಹಾರೈಸಿದ್ದಾರೆ. ಸ್ಟಾರ್ ಕಿಡ್ ಎಂಬ ಸುಲಭದ ದಾರಿಯನ್ನು ಬಿಟ್ಟು, ಸ್ವಂತ ಶ್ರಮದಿಂದ ನಿರ್ದೇಶಕನ ಕ್ಯಾಪ್ ತೊಟ್ಟ ಜೇಸನ್ ಸಂಜಯ್ ಅವರ ನಿರ್ಧಾರಕ್ಕೆ ಈಗ ಚಿತ್ರರಂಗದಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
