ಕೌಟುಂಬಿಕ ಕಲಹಗಳು ಮತ್ತು ಬದಲಾಗುತ್ತಿರುವ ಸಂಬಂಧಗಳು ಮನುಷ್ಯನ ನಿರ್ಧಾರಗಳನ್ನು ಹೇಗೆ ಬದಲಾಯಿಸುತ್ತವೆ ಎಂಬುದಕ್ಕೆ ಚೀನಾದಲ್ಲಿ ನಡೆದಿರುವ ಈ ಘಟನೆಯೇ ಸಾಕ್ಷಿ. ಶಾಂಘೈನ 19 ವರ್ಷದ ಕಾಲೇಜು ವಿದ್ಯಾರ್ಥಿಯೊಬ್ಬ ತನ್ನ ಹೆತ್ತವರನ್ನು ಬಿಟ್ಟು, ತನ್ನ ಕೋಟ್ಯಂತರ ರೂಪಾಯಿ ಮೌಲ್ಯದ ಇಡೀ ಆಸ್ತಿಯನ್ನು ಬಾಲ್ಯದ ಸ್ನೇಹಿತನ ಹೆಸರಿಗೆ ‘ವಿಲ್’ ಬರೆದಿಡುವ ಮೂಲಕ ಚೀನಾದ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ ಹಾಗೂ ಸಂಚಲನ ಮೂಡಿಸಿದ್ದಾನೆ.
‘ಲಿ’ ಎಂಬ ಉಪನಾಮ ಹೊಂದಿರುವ ಈ ಯುವಕನ ಒಟ್ಟು ಆಸ್ತಿಯ ಮೌಲ್ಯ ಸುಮಾರು 20 ಮಿಲಿಯನ್ ಯುವಾನ್ (ಭಾರತೀಯ ಕರೆನ್ಸಿಯಲ್ಲಿ ಅಂದಾಜು 28 ಕೋಟಿ ರೂಪಾಯಿ) ಎಂದು ಅಂದಾಜಿಸಲಾಗಿದೆ. ಈತ ಇಷ್ಟು ಸಣ್ಣ ವಯಸ್ಸಿನಲ್ಲೇ ತನ್ನ ಆಸ್ತಿಯನ್ನು ಅಧಿಕೃತವಾಗಿ ನೋಂದಣಿ (Notarised) ಮಾಡಿಸಿದ್ದಾನೆ.
ಹೆತ್ತವರ ವಿಚ್ಛೇದನ ಮತ್ತು ಆಸ್ತಿಯ ಹಿನ್ನೆಲೆ
ಲಿ ಹೊಂದಿರುವ ಈ ಕೋಟ್ಯಂತರ ಆಸ್ತಿಯಲ್ಲಿ ಒಂದು ಐಷಾರಾಮಿ ಅಪಾರ್ಟ್‌ಮೆಂಟ್ ಮತ್ತು ಭಾರಿ ಪ್ರಮಾಣದ ನಗದು ಉಳಿತಾಯ ಸೇರಿದೆ. ಲಿಯ ತಂದೆ-ತಾಯಿ ಪರಸ್ಪರ ವಿಚ್ಛೇದನ ಪಡೆದುಕೊಂಡಿದ್ದರು. ಆ ಬಳಿಕ ಅವರಿಬ್ಬರೂ ಬೇರೆ ಬೇರೆ ವ್ಯಕ್ತಿಗಳನ್ನು ಎರಡನೇ ಮದುವೆಯಾಗಿದ್ದರು. ಈ ಸಂದರ್ಭದಲ್ಲಿ ತಂದೆ-ತಾಯಿ ಇಬ್ಬರೂ ಸೇರಿ ಮಗನಿಗೆ ಈ ಆಸ್ತಿಯನ್ನು ನೀಡಿದ್ದರು. ಆದರೆ, ಕುಟುಂಬದ ವಿಘಟನೆಯು ಲಿಯ ಮನಸ್ಸಿನ ಮೇಲೆ ತೀವ್ರ ಪರಿಣಾಮ ಬೀರಿತ್ತು.
ಸ್ನೇಹಿತನಿಗೆ ಆಸ್ತಿ ನೀಡಲು ಮೂರು ಮುಖ್ಯ ಕಾರಣಗಳು !
ತನ್ನ ಸ್ವಂತ ಕುಟುಂಬವನ್ನು ಬಿಟ್ಟು ಸ್ನೇಹಿತನಿಗೆ ಆಸ್ತಿ ನೀಡಲು ಲಿ ಪ್ರಮುಖ ಮತ್ತು ಪ್ರಾಯೋಗಿಕ ಕಾರಣಗಳನ್ನು ಬಿಚ್ಚಿಟ್ಟಿದ್ದಾನೆ:
-
ಅಪಾಯಕಾರಿ ಕ್ರೀಡೆಗಳ ಹವ್ಯಾಸ: ಲಿ ಅತ್ಯಂತ ಅಪಾಯಕಾರಿ ಸಾಹಸ ಕ್ರೀಡೆಗಳ (Extreme Sports) ಪ್ರೇಮಿಯಾಗಿದ್ದು, ನಿರಂತರವಾಗಿ ಅದರಲ್ಲಿ ಭಾಗವಹಿಸುತ್ತಾನೆ. ಒಂದು ವೇಳೆ ತನಗೆ ಏನಾದರೂ ಅನಾಹುತ ಸಂಭವಿಸಿದರೆ ತನ್ನ ಆಸ್ತಿ ತಾನು ಬಯಸಿದವರಿಗೇ ಸಿಗಬೇಕು ಎಂಬುದು ಆತನ ಇಚ್ಛೆಯಾಗಿದೆ.
-
ಸಂಬಂಧಗಳಿಂದ ದೂರ: ಹೆತ್ತವರು ಎರಡನೇ ಮದುವೆಯಾದ ಬಳಿಕ ಬಂದಿರುವ ಸಾಕು ತಂದೆ ಮತ್ತು ಸಾಕು ತಾಯಿಯನ್ನು ಲಿ ಸಂಪೂರ್ಣವಾಗಿ ಅಪರಿಚಿತರು ಎಂದು ಭಾವಿಸುತ್ತಾನೆ. ತನ್ನ ಆಸ್ತಿಯ ಲಾಭ ಆ ಅಪರಿಚಿತರಿಗೆ ಸಿಗಬಾರದು ಎಂಬುದು ಆತನ ಪಟ್ಟು.
-
ಬಾಲ್ಯದ ಗೆಳೆಯನ ಮೇಲಿನ ಅಚಲ ನಂಬಿಕೆ: ತನಗೆ ಕಷ್ಟದ ದಿನಗಳಲ್ಲಿ ಜೊತೆಯಾಗಿದ್ದ, ವರ್ಷಗಳಿಂದ ತಾನು ನಂಬಿರುವ ಬಾಲ್ಯದ ಗೆಳೆಯನಿಗೆ ಈ ಆಸ್ತಿ ಸೇರಬೇಕು ಎಂದು ಲಿ ನಿರ್ಧರಿಸಿದ್ದಾನೆ.
ಚೀನಾ ಕಾನೂನು ಏನು ಹೇಳುತ್ತದೆ ?
ಚೀನಾದ ಉತ್ತರಾಧಿಕಾರ ಕಾಯ್ದೆಯ ಪ್ರಕಾರ, ಒಬ್ಬ ವ್ಯಕ್ತಿಗೆ ಮದುವೆಯಾಗದೆ ಮಕ್ಕಳಿಲ್ಲದಿದ್ದರೆ ಆತನ ಆಸ್ತಿಗೆ ಹೆತ್ತವರೇ ಕಾನೂನುಬದ್ಧ ವಾರಸುದಾರರಾಗುತ್ತಾರೆ. ಆದರೆ, ಅದೇ ಕಾನೂನಿನಲ್ಲಿ ವ್ಯಕ್ತಿಯೊಬ್ಬ ತಾನು ಬರೆದಿಡುವ ಅಧಿಕೃತ ‘ವಿಲ್’ ಮೂಲಕ ತನ್ನ ರಕ್ತಸಂಬಂಧಿಗಳನ್ನು ಹೊರತುಪಡಿಸಿ ಹೊರಗಿನ ಯಾರಿಗಾದರೂ ಆಸ್ತಿಯನ್ನು ಹಸ್ತಾಂತರಿಸಲು ಸಂಪೂರ್ಣ ಸ್ವಾತಂತ್ರ್ಯ ನೀಡಲಾಗಿದೆ.
ಲಿ ಶಾಂಘೈನ ‘ಚೀನಾ ವಿಲ್ ರಿಜಿಸ್ಟ್ರೇಷನ್ ಸೆಂಟರ್’ನಲ್ಲಿ ಈ ದಾಖಲೆಯನ್ನು ನೋಂದಾಯಿಸಿದ್ದಾನೆ. ಆದರೆ ಇಲ್ಲಿ ಒಂದು ಕಟ್ಟುನಿಟ್ಟಿನ ನಿಯಮವಿದೆ. ಲಿಯ ನಿಧನದ ನಂತರ ಆತನ ಸ್ನೇಹಿತ 60 ದಿನಗಳ ಒಳಗಾಗಿ ಈ ಆಸ್ತಿಯನ್ನು ಅಧಿಕೃತವಾಗಿ ಸ್ವೀಕರಿಸಬೇಕು. ಇಲ್ಲದಿದ್ದರೆ ಆತನ ಹಕ್ಕು ರದ್ದಾಗುತ್ತದೆ.
ಯುವ ಪೀಳಿಗೆಯಲ್ಲಿ ಹೆಚ್ಚುತ್ತಿರುವ ಹೊಸ ಟ್ರೆಂಡ್
ಈ ಘಟನೆಯು ಚೀನಾದಲ್ಲಿ ಸದ್ಯದ ಹೊಸ ಸಾಮಾಜಿಕ ಬದಲಾವಣೆಯೊಂದನ್ನು ಎತ್ತಿ ತೋರಿಸಿದೆ. ಇತ್ತೀಚಿನ ವರ್ಷಗಳಲ್ಲಿ ಚೀನಾದಲ್ಲಿ ಯುವ ಪೀಳಿಗೆಯು ಅತಿ ಸಣ್ಣ ವಯಸ್ಸಿನಲ್ಲೇ ವಿಲ್ ಬರೆಯುವ ಪ್ರವೃತ್ತಿ ಹೆಚ್ಚಾಗುತ್ತಿದೆ. ವಿಲ್ ನೋಂದಣಿ ಮಾಡುವವರ ಸರಾಸರಿ ವಯಸ್ಸು 77 ರಿಂದ 67 ಕ್ಕೆ ಕುಸಿದಿದೆ. ವಿಶೇಷವಾಗಿ 1980, 1990 ಮತ್ತು 2000 ರ ನಂತರ ಜನಿಸಿದ ಯುವಕರು ತಮ್ಮ ಆಸ್ತಿ ಮತ್ತು ಆರ್ಥಿಕ ಭವಿಷ್ಯದ ಬಗ್ಗೆ ಮುಂಚಿತವಾಗಿಯೇ ಯೋಜಿಸುತ್ತಿದ್ದಾರೆ.
ಲಿಯ ಈ ನಿರ್ಧಾರಕ್ಕೆ ಅಂತರ್ಜಾಲದಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಕೆಲವರು ಆತನ ಪ್ರಾಯೋಗಿಕ ಮತ್ತು ಕಾನೂನಾತ್ಮಕ ಹಕ್ಕನ್ನು ಬೆಂಬಲಿಸಿದರೆ, ಇನ್ನು ಕೆಲವರು ಹೆತ್ತವರನ್ನು ಬಿಟ್ಟು ಸ್ನೇಹಿತನಿಗೆ ಆಸ್ತಿ ನೀಡಿದ್ದನ್ನು ಪ್ರಶ್ನಿಸುತ್ತಿದ್ದಾರೆ.
