ಸಾವು ತೀರಾ ಹತ್ತಿರ ಬಂದಾಗ ಮನುಷ್ಯನಿಗೆ ತನ್ನವರ ನೆನಪಾಗುವುದು ಸಹಜ. ಮಹಾರಾಷ್ಟ್ರದ ಪುಣೆ ಉಪನಗರದ ಮೋಶಿಯಲ್ಲಿ ಇಂತಹದ್ದೇ ಒಂದು ಘಟನೆ ನಡೆದಿದೆ. ತ್ಯಾಜ್ಯದಿಂದ ವಿದ್ಯುತ್ ಉತ್ಪಾದಿಸುವ ಸ್ಥಾವರದ (ವೇಸ್ಟ್ ಟು ಎನರ್ಜಿ ಪ್ಲಾಂಟ್) ಕಟ್ಟಡದ ಮೇಲೆ ಭಾರಿ ಪ್ರಮಾಣದ ಕಸದ ರಾಶಿ ಕುಸಿದು ಬಿದ್ದಾಗ, ಅದರಡಿ ಸಿಲುಕಿದ್ದ ಕಾರ್ಮಿಕ ವಿಜಯ್ ಸಪ್ಕಾಲ್ ತಾನು ಬದುಕುಳಿಯುವ ಆಸೆಯನ್ನೇ ಕೈಬಿಟ್ಟಿದ್ದರು. ಅವಶೇಷಗಳ ಮಧ್ಯೆ ಉಸಿರಾಡಲು ಪರದಾಡುತ್ತಿದ್ದ ಅವರು, “ನಾನು ಕಟ್ಟಡದ ಅಡಿಯಲ್ಲಿ ಸಿಲುಕಿಕೊಂಡಿದ್ದೇನೆ… ಬೇಗ ಬನ್ನಿ” ಎಂದು ತಮ್ಮ ಪತ್ನಿಗೆ ಒಂದು ಸೆಲ್ಫಿ ಹಾಗೂ ಸಂದೇಶ ಕಳಿಸಿದ್ದರು. ಅದು ಅವರ ಕೊನೆಯ ಸಂದೇಶ ಎಂದೇ ಭಾವಿಸಲಾಗಿತ್ತು. ಆದರೆ, ಸುಮಾರು ಒಂಬತ್ತು ಗಂಟೆಗಳ ಕಾಲ ಸಾವಿನೊಂದಿಗೆ ಹೋರಾಡಿದ ವಿಜಯ್ ಅವರನ್ನು ರಕ್ಷಣಾ ಸಿಬ್ಬಂದಿ ಪವಾಡ ಸದೃಶವಾಗಿ ಜೀವಂತವಾಗಿ ಹೊರತಂದಿದ್ದಾರೆ.
ದುರಂತ ಸಂಭವಿಸಿದ್ದು ಹೇಗೆ?
ಬುಧವಾರ ಮಧ್ಯಾಹ್ನ 1:30 ರ ಸುಮಾರಿಗೆ ಮೋಶಿಯಲ್ಲಿರುವ ಈ ಘಟಕದ ಮೇಲೆ ಇದ್ದಕ್ಕಿದ್ದಂತೆ ಕಸದ ಬೆಟ್ಟವೇ ಕುಸಿದು ಬಿದ್ದಿದೆ. ಇದರ ಭೀಕರತೆಗೆ ಇಡೀ ಕಟ್ಟಡವೇ ನೆಲಸಮವಾಗಿದ್ದು, ಒಳಗಿದ್ದ 23 ಉದ್ಯೋಗಿಗಳು ಅವಶೇಷಗಳ ಅಡಿ ಸಿಲುಕಿಕೊಂಡರು. ಈ ಸಮಯದಲ್ಲಿ ವಿಜಯ್ ಸೇರಿದಂತೆ 15 ಕಾರ್ಮಿಕರು ಮೊದಲ ಮಹಡಿಯ ಕ್ಯಾಂಟೀನ್ನಲ್ಲಿ ಮಧ್ಯಾಹ್ನದ ಊಟ ಮಾಡುತ್ತಿದ್ದರು. ಸದ್ಯದ ಮಾಹಿತಿ ಪ್ರಕಾರ, 14 ಕಾರ್ಮಿಕರನ್ನು ಯಶಸ್ವಿಯಾಗಿ ರಕ್ಷಿಸಲಾಗಿದ್ದು, ದುರದೃಷ್ಟವಶಾತ್ ಎಂಟು ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ನಾಪತ್ತೆಯಾಗಿರುವ ಮತ್ತೊಬ್ಬ ಉದ್ಯೋಗಿಗಾಗಿ 72 ಗಂಟೆಗಳ ನಂತರವೂ ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದೆ.
ಅವಶೇಷಗಳಡಿ ಕಳೆದ ಆ ಒಂಬತ್ತು ಗಂಟೆಗಳು!
ನಂತರ ತಮ್ಮ ಭಯಾನಕ ಅನುಭವವನ್ನು ಹಂಚಿಕೊಂಡ ವಿಜಯ್, ಭಾರೀ ಕಾಂಕ್ರೀಟ್ ಕಂಬವೊಂದು ತಮ್ಮ ಕಾಲಿನ ಮೇಲೆ ಬಿದ್ದಿದ್ದರಿಂದ ಕದಲಲು ಸಾಧ್ಯವಾಗುತ್ತಿರಲಿಲ್ಲ ಎಂದು ತಿಳಿಸಿದ್ದಾರೆ. ಸುತ್ತಲೂ ಗಾಜಿನ ಚೂರುಗಳು ಮತ್ತು ಕಸದ ರಾಶಿ ಇತ್ತು. ಎಲ್ಲಕ್ಕಿಂತ ಹೆಚ್ಚಾಗಿ ಕಸದಿಂದ ಬಿಡುಗಡೆಯಾಗುತ್ತಿದ್ದ ಮಿಥೇನ್ ಅನಿಲದಿಂದಾಗಿ ಉಸಿರಾಟ ತೀರಾ ಕಷ್ಟಕರವಾಗಿತ್ತು. ಪ್ರಜ್ಞೆ ತಪ್ಪದಂತೆ ನೋಡಿಕೊಳ್ಳಲು ಅವರು ದೇವರಿನಲ್ಲಿ ಪ್ರಾರ್ಥಿಸುತ್ತಾ, ಪಕ್ಕದಲ್ಲೇ ಸಿಲುಕಿದ್ದ ಇತರ ಕಾರ್ಮಿಕರಿಗೆ ಧ್ವನಿ ನೀಡಿ ಧೈರ್ಯ ತುಂಬುತ್ತಿದ್ದರು. ಅಂತಿಮವಾಗಿ ರಕ್ಷಣಾ ತಂಡ ಅವರನ್ನು ಸುರಕ್ಷಿತವಾಗಿ ಹೊರತೆಗೆದಿದ್ದು, ಸದ್ಯ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇದೇ ವೇಳೆ ಮತ್ತೊಬ್ಬ ಮಹಿಳಾ ಉದ್ಯೋಗಿಯನ್ನೂ ಜೀವಂತವಾಗಿ ರಕ್ಷಿಸಲಾಗಿದೆ.
ಸಂತ್ರಸ್ತರ ಕುಟುಂಬಗಳಿಗೆ ಆರ್ಥಿಕ ನೆರವು
ಈ ಘಟನೆಯಲ್ಲಿ ಮೃತಪಟ್ಟವರ ಕುಟುಂಬಗಳಿಗೆ ಸರ್ಕಾರ ಮತ್ತು ಸ್ಥಳೀಯ ಆಡಳಿತ ಪರಿಹಾರ ಘೋಷಿಸಿದೆ. ಪಿಂಪ್ರಿ-ಚಿಂಚವಡ ಮಹಾನಗರ ಪಾಲಿಕೆಯು ತಲಾ 10 ಲಕ್ಷ ರೂಪಾಯಿ, ಮಹಾರಾಷ್ಟ್ರ ಸರ್ಕಾರ 5 ಲಕ್ಷ ರೂಪಾಯಿ ಹಾಗೂ ಸಂಬಂಧಿತ ಗುತ್ತಿಗೆದಾರ ಸಂಸ್ಥೆಯು 25 ಲಕ್ಷ ರೂಪಾಯಿ ಆರ್ಥಿಕ ನೆರವು ನೀಡುವುದಾಗಿ ಪ್ರಕಟಿಸಿದೆ. ಈ ಘಟನೆಯ ಕುರಿತು ಉನ್ನತ ಮಟ್ಟದ ತನಿಖೆ ನಡೆಸಿ, ಬೇಜವಾಬ್ದಾರಿಗೆ ಕಾರಣರಾದವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಅಧಿಕಾರಿಗಳು ಭರವಸೆ ನೀಡಿದ್ದಾರೆ.
