ಕಲ್ಲಾಡಿ (ಕೇರಳ): ಕೇರಳದ ವಯನಾಡ್ ಜಿಲ್ಲೆಯ ಮೇಪ್ಪಾಡಿ ಸಮೀಪದ ಕಲ್ಲಾಡಿಯಲ್ಲಿ ಸಂಭವಿಸಿದ ಭೀಕರ ಭೂಕುಸಿತದಲ್ಲಿ ಸಾವನ್ನಪ್ಪಿದವರ ಸಂಖ್ಯೆ ಇದೀಗ 5 ಕ್ಕೆ ಏರಿಕೆಯಾಗಿದೆ. ಕರ್ನಾಟಕದ ಗಡಿ ಚೆಕ್‌ಪೋಸ್ಟ್‌ನಿಂದ ಕೇವಲ 51 ಕಿ.ಮೀ. ದೂರದಲ್ಲಿರುವ ಮೀನಾಕ್ಷಿಪಾಲಂ ಸೇತುವೆ ಬಳಿ, ಕಲ್ಲಾಡಿ-ಆನಾಕಂಪೋಯಿಲ್ ಅವಳಿ ಸುರಂಗ ರಸ್ತೆ ಕಾಮಗಾರಿ ನಡೆಯುತ್ತಿದ್ದ ಸ್ಥಳದಲ್ಲೇ ಈ ಮಹಾ ದುರಂತ ಸಂಭವಿಸಿದೆ. ಸದ್ಯ ನಾಪತ್ತೆಯಾಗಿರುವ ಮತ್ತೊಂದು ಐದು ಜೀವಗಳಿಗಾಗಿ ಶ್ವಾನದಳ, ಮೆಟಲ್ ಡಿಟೆಕ್ಟರ್ ಹಾಗೂ ಭಾರಿ ಯಂತ್ರೋಪಕರಣಗಳನ್ನು ಬಳಸಿ ರೋಚಕ ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದೆ.
ಕಣ್ಣುಮುಚ್ಚಿ ಕಣ್ಣುಬಿಡುವಷ್ಟರಲ್ಲಿ ನುಗ್ಗಿದ ಕೆಸರು ನೀರು:
ಕಳೆದ 24 ಗಂಟೆಗಳಲ್ಲಿ ಈ ಭಾಗದಲ್ಲಿ 265 ಮಿಮೀ ನಷ್ಟು ಅತ್ಯಂತ ಭಾರಿ ಮಳೆಯಾಗಿದ್ದು, ಮೀನಾಕ್ಷಿ ಸೇತುವೆಯ ಮೇಲ್ಭಾಗದಲ್ಲಿದ್ದ ಗುಡ್ಡ ಕುಸಿದು ಭಾರಿ ಪ್ರಮಾಣದ ಮಣ್ಣು ಮತ್ತು ಕಾಂಕ್ರೀಟ್ ತಡೆಗೋಡೆ ರಸ್ತೆಗೆ ನುಗ್ಗಿ ಬಂದಿದೆ. ಮಳೆಯ ಕಾರಣದಿಂದ ಕಾಮಗಾರಿಯನ್ನು ಸ್ಥಗಿತಗೊಳಿಸಲು ಮೊದಲೇ ಆದೇಶಿಸಲಾಗಿದ್ದರೂ, ಅಲ್ಲಿ ನೆರೆದಿದ್ದ ಸೆಕ್ಯೂರಿಟಿ ಸಿಬ್ಬಂದಿ, ಸೂಪರ್‌ವೈಸರ್‌ಗಳು ಹಾಗೂ ಕಾರ್ಮಿಕರು ಈ ಜಲಪ್ರಳಯದಂತಹ ದುರಂತಕ್ಕೆ ಸಿಲುಕಿದ್ದಾರೆ. ಸುಮಾರು 7 ರಿಂದ 10 ಅಡಿ ಎತ್ತರದವರೆಗೆ ಮಣ್ಣು ಬಂದು ಬಿದ್ದಿದ್ದು, ಇಡೀ ಪ್ರದೇಶ ಮಣ್ಣಿನ ಗುಡ್ಡೆಯಾಗಿ ಮಾರ್ಪಟ್ಟಿದೆ.
ಕುಸಿದು ಕೇಬಲ್‌ಗಳ ಮಧ್ಯೆ ಸಿಲುಕಿದ್ದ ಮತ್ತೊಂದು ಮೃತದೇಹ ಪತ್ತೆಯಾಗುವುದರೊಂದಿಗೆ ಸಾವಿನ ಸಂಖ್ಯೆ 5 ಕ್ಕೆ ಏರಿದೆ. ಮೃತರನ್ನು ಮಧ್ಯಪ್ರದೇಶದ ಆಪರೇಟರ್ ಚಂದ್ರ ಭಾನ್, ಬಿಹಾರದ ಸಿವಿಲ್ ಫೋರ್‌ಮ್ಯಾನ್ ಜಾರ್ಖಂಡ್‌ನ ಕಾರ್ಮಿಕ ಅನ್ಮೋಲ್ ಎಂದು ಗುರುತಿಸಲಾಗಿದೆ. ಇನ್ನುಳಿದ ಇಬ್ಬರ ಗುರುತು ಪತ್ತೆಯಾಗಬೇಕಿದೆ.
ಪ್ರಸ್ತುತ ಕಂಸ್ಟ್ರಕ್ಷನ್ ಮ್ಯಾನೇಜರ್ ವಿಕ್ರಮ್ ರಾಣಾ (ಹಿಮಾಚಲ ಪ್ರದೇಶ), ಇಂಜಿನಿಯರ್ ರಾಹುಲ್ (ಹಿಮಾಚಲ ಪ್ರದೇಶ), ಎಕ್ಸ್‌ಕಾವೇಟರ್ ಆಪರೇಟರ್ ಮೊಹಮ್ಮದ್ ಇಮ್ರಾನ್ (ಬಿಹಾರ), ಸರ್ವೇಯರ್‌ಗಳಾದ ರಾಕೇಶ್ ಗುಚೈತ್ (ಪಶ್ಚಿಮ ಬಂಗಾಳ) ಮತ್ತು ಅಜಹರುದ್ದೀನ್ ಅನ್ಸಾರಿ (ಉತ್ತರ ಪ್ರದೇಶ) ನಾಪತ್ತೆಯಾಗಿದ್ದಾರೆ. ಇವರ ಪತ್ತೆಗಾಗಿ ಇಡೀ ದುರಂತ ಪ್ರದೇಶವನ್ನು 4 ವಲಯಗಳಾಗಿ (Zones) ವಿಂಗಡಿಸಿ, ವಯನಾಡು, ಕೋಝಿಕ್ಕೋಡ್, ಕಣ್ಣೂರಿನಿಂದ ಆಗಮಿಸಿದ ಎನ್‌ಡಿಆರ್‌ಎಫ್, ಎಸ್‌ಡಿಆರ್‌ಎಫ್, ಅಗ್ನಿಶಾಮಕ ದಳ ಹಾಗೂ ಪೊಲೀಸರ ಒಟ್ಟು 375 ಕ್ಕೂ ಹೆಚ್ಚು ಸಿಬ್ಬಂದಿ ಸ್ಥಳೀಯರೊಂದಿಗೆ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ರಕ್ಷಣಾ ಕಾರ್ಯಾಚರಣೆ ವೇಳೆ ಮೆಪ್ಪಾಡಿ ಎಸ್‌ಐ ಅವರಿಗೂ ಗಾಯಗಳಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.
ದುರಂತದಿಂದ ಸಂತ್ರಸ್ತರಾದ 23 ಕುಟುಂಬಗಳ 76 ಜನರನ್ನು ಮೇಪ್ಪಾಡಿ ಪಾಲಿಟೆಕ್ನಿಕ್ ಕಾಲೇಜಿನಲ್ಲಿ ಸ್ಥಾಪಿಸಲಾಗಿರುವ ನಿರಾಶ್ರಿತರ ಶಿಬಿರಕ್ಕೆ ಸ್ಥಳಾಂತರಿಸಲಾಗಿದ್ದು, ಅವರಿಗೆ ಆಹಾರ, ಕುಡಿಯುವ ನೀರು ಮತ್ತು ಕಡ್ಡಾಯ ವೈದ್ಯಕೀಯ ಸೌಲಭ್ಯಗಳನ್ನು ಒದಗಿಸಲಾಗಿದೆ. ಗಾಯಗೊಂಡಿರುವ 9 ಕಾರ್ಮಿಕರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇನ್ನು ವಯನಾಡು ಹಾಗೂ ಕೋಝಿಕ್ಕೋಡ್ ಜಿಲ್ಲೆಗಳಿಗೆ ರೆಡ್ ಅಲರ್ಟ್ ಘೋಷಿಸಲಾಗಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ಜಿಲ್ಲೆಯ ಎಲ್ಲಾ ಶಾಲಾ, ಕಾಲೇಜುಗಳಿಗೆ ಬುಧವಾರ ರಜೆ ಘೋಷಿಸಲಾಗಿದೆ. ಇನ್ನುಳಿದ ಮಲಪ್ಪುರಂ, ಕಾಸರಗೋಡು, ಕಣ್ಣೂರು ಜಿಲ್ಲೆಗಳಿಗೆ ಆರೆಂಜ್ ಅಲರ್ಟ್ ನೀಡಲಾಗಿದೆ.
ಕಳೆದ 2024ರಲ್ಲಿ ಇದೇ ವಯನಾಡಿನ ಮೆಪ್ಪಾಡಿ ಗ್ರಾಮ ಪಂಚಾಯ್ತಿಯ ಮುಂಡಕ್ಕಾಯ್, ಚೂರಲ್ಮಲ ಪ್ರದೇಶದಲ್ಲಿ ಸಂಭವಿಸಿದ ರಣಭೀಕರ ದುರಂತದಲ್ಲಿ 250ಕ್ಕೂ ಹೆಚ್ಚು ಜನ ದುರ್ಮಣಕ್ಕೀಡಾಗಿದ್ದರು. ಈಗ ತೀರಾ ಆಘಾತಕಾರಿ ವಿಷಯವೆಂದರೆ, ಅದೇ ಮೆಪ್ಪಾಡಿ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿ, ಕಳೆದ ದುರಂತ ಸಂಭವಿಸಿದ್ದ ಸ್ಥಳದಿಂದ ಕೇವಲ 12 ಕಿ.ಮೀ. ದೂರದಲ್ಲೇ ಈ ಭೀಕರ ಭೂಕುಸಿತ ಸಂಭವಿಸಿದೆ.
ಶಾಸಕ ಐ.ಸಿ. ಬಾಲಕೃಷ್ಣನ್ ನೇತೃತ್ವದಲ್ಲಿ ನಡೆದ ತುರ್ತು ಪರಿಶೀಲನಾ ಸಭೆಯಲ್ಲಿ, ಸುರಂಗ ತೋಡುವಾಗ ತೆಗೆದ ಮಣ್ಣನ್ನು ಅವೈಜ್ಞಾನಿಕವಾಗಿ ದುರಂತ ಸ್ಥಳದಲ್ಲೇ ರಾಶಿ ಹಾಕಿದ್ದೇ ಈ ಭೀಕರ ಘಟನೆಗೆ ಮುಖ್ಯ ಕಾರಣ ಎಂದು ತಿಳಿದುಬಂದಿದೆ. ಈ ಹಿಂದೆ ಅಧಿಕೃತ ತನಿಖಾ ತಂಡವು ಈ ಮಣ್ಣಿನ ರಾಶಿ ದೊಡ್ಡ ದುರಂತಕ್ಕೆ ಕಾರಣವಾಗಬಹುದು ಎಂದು ಎಚ್ಚರಿಸಿದ್ದರೂ ನಿರ್ಲಕ್ಷ್ಯ ವಹಿಸಲಾಗಿತ್ತು. ಮುಖ್ಯಮಂತ್ರಿ ವಿ.ಡಿ. ಸತೀಶನ್, ಗೃಹ ಸಚಿವ ರಮೇಶ್ ಚೆನ್ನಿತ್ತಲ ಮತ್ತು ಸಚಿವ ಟಿ. ಸಿದ್ದಿಕ್ ಅವರು ಇದನ್ನು ‘ಮನುಷ್ಯ ನಿರ್ಮಿತ ದುರಂತ’ ಎಂದು ಕರೆದಿದ್ದು, ಗುತ್ತಿಗೆ ಕಂಪನಿಯ ಭಾರಿ ನಿರ್ಲಕ್ಷ್ಯದ ವಿರುದ್ಧ ಕಠಿಣ ತನಿಖೆಗೆ ಆದೇಶಿಸಿದ್ದಾರೆ.
