ಬೆಳಗ್ಗಿನ ಜಾವದ ಗಡಿಬಿಡಿಯಲ್ಲಿ ಅಥವಾ ಸಂಜೆಯ ಆಯಾಸದ ಸಮಯದಲ್ಲಿ ಅಡುಗೆ ಮನೆಯಲ್ಲಿ ಹೆಚ್ಚು ಸಮಯ ಕಳೆಯಲು ಯಾರಿಗೂ ಇಷ್ಟವಿರುವುದಿಲ್ಲ. ಇಂತಹ ಸಂದರ್ಭದಲ್ಲಿ ಹತ್ತೇ ನಿಮಿಷಗಳಲ್ಲಿ ತಯಾರಾಗುವ ಸುಲಭ ಹಾಗೂ ರುಚಿಕರವಾದ ರೆಸಿಪಿಗಳ ಹುಡುಕಾಟ ನಮ್ಮದಾಗಿರುತ್ತದೆ. ಸಾಮಾನ್ಯವಾಗಿ ಆಲೂಗಡ್ಡೆ ಫ್ರೈ, ಪನೀರ್ ಬುರ್ಜಿ ಅಥವಾ ಸೋಯಾ ಬುರ್ಜಿಗಳನ್ನು ಪದೇ ಪದೇ ಮಾಡಿ ನಮಗೂ ಬೇಸರವಾಗಿರುತ್ತದೆ. ಈ ಬಾರಿ ನಿಮ್ಮ ದೈನಂದಿನ ಊಟದ ಮೆನುವಿಗೆ ಕೊಂಚ ವಿಭಿನ್ನ ಹಾಗೂ ಆರೋಗ್ಯಕರ ಟ್ವಿಸ್ಟ್ ನೀಡಲು ಬಯಸಿದರೆ, ಈ ಕ್ರಿಸ್ಪಿ ಕೋವಲಕಾಯಿ (ಕುಂದ್ರು) ಫ್ರೈ ಖಂಡಿತವಾಗಿಯೂ ಉತ್ತಮ ಆಯ್ಕೆ.
ಮನೆಮಂದಿಗೆಲ್ಲಾ ಇಷ್ಟವಾಗುವ ಈ ಮಸಾಲೆಯುಕ್ತ ಕೋವಲಕಾಯಿ ಪಲ್ಯವನ್ನು ಮಕ್ಕಳು ಮತ್ತು ಹಿರಿಯರು ಇಬ್ಬರೂ ಇಷ್ಟಪಟ್ಟು ಸವಿಯುತ್ತಾರೆ. ಇದು ಚಪಾತಿ, ಪೂರಿ ಅಥವಾ ಬಿಸಿ ಬಿಸಿ ಅನ್ನ-ದಾಲ್ ಜೊತೆಗೆ ಅತ್ಯುತ್ತಮ ಕಾಂಬಿನೇಷನ್ ಆಗಿದೆ.
ಈ ರೆಸಿಪಿಯ ವಿಶೇಷತೆ ಏನು? ಈ ಕೋವಲಕಾಯಿ ಫ್ರೈ ಪ್ರತಿದಿನದ ಮಧ್ಯಾಹ್ನ ಅಥವಾ ರಾತ್ರಿಯ ಊಟಕ್ಕೆ ಸೂಕ್ತವಾದ ಡ್ರೈ ಸಬ್ಜಿಯಾಗಿದೆ. ಪ್ರವಾಸ ಕೈಗೊಳ್ಳುವಾಗ ಅಥವಾ ಆಫೀಸ್, ಶಾಲೆಗೆ ಲಂಚ್ ಬಾಕ್ಸ್ ಪ್ಯಾಕ್ ಮಾಡಲು ಇದು ತುಂಬಾ ಅನುಕೂಲಕರ. ಏಕೆಂದರೆ ಇದು ಬೇಗನೆ ಹಾಳಾಗುವುದಿಲ್ಲ.
ಈ ರೆಸಿಪಿಯ ಮುಖ್ಯ ವೈಶಿಷ್ಟ್ಯವೆಂದರೆ ಅಡುಗೆಯಲ್ಲಿ ಎಲ್ಲೂ ನೀರನ್ನು ಬಳಸುವುದಿಲ್ಲ. ಕೋವಲಕಾಯಿಯನ್ನು ಈರುಳ್ಳಿ, ಟೊಮೆಟೊ ಮತ್ತು ಮಸಾಲೆಗಳೊಂದಿಗೆ ಎಣ್ಣೆಯಲ್ಲೇ ಚೆನ್ನಾಗಿ ಫ್ರೈ ಮಾಡಲಾಗುತ್ತದೆ. ಇದರ ರುಚಿಯನ್ನು ಮತ್ತಷ್ಟು ಹೆಚ್ಚಿಸಲು ಹುರಿದ ಕಡಲೆ ಹಿಟ್ಟನ್ನು (ಬೇಸನ್) ಬಳಸಲಾಗುತ್ತದೆ. ಇದು ತರಕಾರಿಗೆ ಉತ್ತಮವಾದ ಕೋಟಿಂಗ್ ನೀಡುವುದರ ಜೊತೆಗೆ ಗರಿಗರಿಯಾದ ವಿನ್ಯಾಸವನ್ನು ನೀಡುತ್ತದೆ. ಇನ್ನು ಸಾಸಿವೆ ಎಣ್ಣೆಯ ಬಳಕೆಯು ಈ ಖಾದ್ಯಕ್ಕೆ ಸಾಂಪ್ರದಾಯಿಕ ಪರಿಮಳ ಮತ್ತು ವಿಭಿನ್ನ ರುಚಿಯನ್ನು ತಂದುಕೊಡುತ್ತದೆ.
ರುಚಿಕರವಾದ ಕೋವಲಕಾಯಿ ಪಲ್ಯ ಮಾಡಲು ಬೇಕಾಗುವ ಪದಾರ್ಥಗಳು:
- ಕೋವಲಕಾಯಿ (ಕುಂದ್ರು) – 250 ರಿಂದ 300 ಗ್ರಾಂ
- ಈರುಳ್ಳಿ – 1 ದೊಡ್ಡದು (ಸಣ್ಣದಾಗಿ ಹೆಚ್ಚಿದ್ದು)
- ಟೊಮೆಟೊ – 1 ಮಧ್ಯಮ ಗಾತ್ರದ್ದು (ಸಣ್ಣದಾಗಿ ಹೆಚ್ಚಿದ್ದು)
- ಹಸಿರು ಮೆಣಸಿನಕಾಯಿ – 1 ರಿಂದ 2 (ಕತ್ತರಿಸಿದ್ದು)
- ಜೀರಿಗೆ – 1 ಚಮಚ
- ಅರಿಶಿನ ಪುಡಿ – ಅರ್ಧ ಚಮಚ
- ಧನಿಯಾ ಪುಡಿ – 1 ಚಮಚ
- ಅಚ್ಚ ಖಾರದ ಪುಡಿ – ಅರ್ಧ ಚಮಚ (ರುಚಿಗೆ ತಕ್ಕಷ್ಟು)
- ಗರಂ ಮಸಾಲ – ಅರ್ಧ ಚಮಚ
- ಕಡಲೆ ಹಿಟ್ಟು – 2 ಚಮಚ (ಹುರಿದಿಟ್ಟುಕೊಂಡಿದ್ದು)
- ಸಾಸಿವೆ ಎಣ್ಣೆ – 2 ರಿಂದ 3 ಚಮಚ
- ಕೊತ್ತಂಬರಿ ಸೊಪ್ಪು – ಸ್ವಲ್ಪ (ಸಣ್ಣದಾಗಿ ಹೆಚ್ಚಿದ್ದು)
- ಉಪ್ಪು – ರುಚಿಗೆ ತಕ್ಕಷ್ಟು
ತಯಾರಿಸುವ ಸರಳ ವಿಧಾನ: ಮೊದಲಿಗೆ ಕೋವಲಕಾಯಿಯನ್ನು ಚೆನ್ನಾಗಿ ತೊಳೆದು ನೀರಿಲ್ಲದಂತೆ ಒರೆಸಿಕೊಳ್ಳಿ. ನಂತರ ಅದರ ಎರಡೂ ತುದಿಗಳನ್ನು ಕತ್ತರಿಸಿ, ನಿಮ್ಮ ಇಷ್ಟದ ಗಾತ್ರಕ್ಕೆ ತಕ್ಕಂತೆ ಉದ್ದವಾಗಿ ಅಥವಾ ದುಂಡಗೆ ಹೆಚ್ಚಿಟ್ಟುಕೊಳ್ಳಿ.
ಈಗ ಬಾಣಲೆಯಲ್ಲಿ ಸಾಸಿವೆ ಎಣ್ಣೆಯನ್ನು ಬಿಸಿ ಮಾಡಿ. ಎಣ್ಣೆ ಕಾದ ನಂತರ ಜೀರಿಗೆ ಹಾಕಿ ಚಟಪಟ ಸಿಡಿಸಿ. ಬಳಿಕ ಹಸಿರು ಮೆಣಸಿನಕಾಯಿ ಮತ್ತು ಈರುಳ್ಳಿ ಸೇರಿಸಿ, ಈರುಳ್ಳಿ ಮೃದುವಾಗುವವರೆಗೆ ಚೆನ್ನಾಗಿ ಹುರಿಯಿರಿ.
ಇದರ ನಂತರ ಹೆಚ್ಚಿದ ಕೋವಲಕಾಯಿಯನ್ನು ಸೇರಿಸಿ, ಈರುಳ್ಳಿಯೊಂದಿಗೆ ಅದು ತಿಳಿ ಚಿನ್ನದ ಬಣ್ಣಕ್ಕೆ ತಿರುಗುವವರೆಗೆ ಮಧ್ಯಮ ಉರಿಯಲ್ಲಿ ಬೇಯಿಸಿ.
ಈ ಹಂತದಲ್ಲಿ ಟೊಮೆಟೊ, ಅರಿಶಿನ ಪುಡಿ, ಧನಿಯಾ ಪುಡಿ, ಖಾರದ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಕೈಯಾಡಿಸಿ. ಮಸಾಲೆಗಳು ತರಕಾರಿಯೊಂದಿಗೆ ಸರಿಯಾಗಿ ಬೆರೆಯಲು ಕೆಲವು ನಿಮಿಷಗಳ ಕಾಲ ಬೇಯಲು ಬಿಡಿ.
ನಂತರ ಹುರಿದ ಕಡಲೆ ಹಿಟ್ಟನ್ನು ಇದಕ್ಕೆ ಸೇರಿಸಿ. ಕಡಲೆ ಹಿಟ್ಟು ಕೋವಲಕಾಯಿಗೆ ಸಮನಾಗಿ ಅಂಟಿಕೊಳ್ಳುವಂತೆ ನಿರಂತರವಾಗಿ ಕೈಯಾಡಿಸುತ್ತಿರಿ. ಮಿಶ್ರಣವು ಉತ್ತಮ ಪರಿಮಳವನ್ನು ಹೊರಸೂಸಲು ಪ್ರಾರಂಭಿಸಿದಾಗ ಉರಿಯನ್ನು ಕಡಿಮೆ ಮಾಡಿ.
ಬಾಣಲೆಯ ಮೇಲೆ ಮುಚ್ಚಳವನ್ನು ಮುಚ್ಚಿ, ಕೋವಲಕಾಯಿ ಸಂಪೂರ್ಣವಾಗಿ ಬೇಯುವವರೆಗೆ ಸಣ್ಣ ಉರಿಯಲ್ಲಿ ಬೇಯಿಸಿ. ತಳ ಹಿಡಿಯದಂತೆ ಮಧ್ಯದಲ್ಲಿ ಒಮ್ಮೆ ಕೈಯಾಡಿಸುತ್ತಿರಿ.
ಕೊನೆಯದಾಗಿ ಗರಂ ಮಸಾಲಾ ಮತ್ತು ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ ಒಂದು ನಿಮಿಷ ಬೇಯಿಸಿ ಒಲೆಯಿಂದ ಇಳಿಸಿ. ನಿಮಗೆ ಇಷ್ಟವಿದ್ದರೆ ಕೊನೆಯಲ್ಲಿ ಸ್ವಲ್ಪ ಲಿಂಬೆ ರಸವನ್ನು ಹಿಂಡಿಕೊಳ್ಳಬಹುದು.
ಈಗ ಬಿಸಿಬಿಸಿಯಾದ ಮತ್ತು ಕ್ರಿಸ್ಪಿಯಾದ ಕೋವಲಕಾಯಿ ಪಲ್ಯ ಸವಿಯಲು ಸಿದ್ಧ. ನಿತ್ಯದ ತರಕಾರಿಗಳನ್ನೇ ಬಳಸಿಕೊಂಡು ಕೇವಲ ಕೆಲವೇ ಪದಾರ್ಥಗಳ ಸಹಾಯದಿಂದ ಅದ್ಭುತ ರುಚಿಯ ಖಾದ್ಯವನ್ನು ಹೇಗೆ ತಯಾರಿಸಬಹುದು ಎಂಬುದಕ್ಕೆ ಈ ರೆಸಿಪಿ ಅತ್ಯುತ್ತಮ ಉದಾಹರಣೆಯಾಗಿದೆ.
